|
|
 |
| (GMT+08:00)
2005-05-20 11:31:17
|
 |
|
ສຽງນັນແຊວເປັນສາທາລະນະໄພທີ່ຮ້າຍແຮງ
cri
Author: li
 ປີ 1981 ໃນງານຄອນເຊີດກາງແຈ້ງທີ່ທັນສະໄໝເທື່ອໜຶ່ງທີ່ຈັດຂຶ້ນຢູ່ອາເມລິກາ,ເມື່ອສຽງດົນຕີທີ່ດັງກ້ອງສະນັ່ນດັງຂຶ້ນ,ມີຜູ້ຟັງ 300 ກວ່າຄົນໄດ້ເສຍສະຕິຢ່າງກະທັນຫັນ,ແລະສະຫຼົບໄປ,ລົດພະຍາບານ 100 ຄັນໄດ້ແລ່ນມາຮອດເພື່ອກອບກູ້. ນີ້ກໍແມ່ນເຫດການສຽງນັນແຊວເຊື່ອມພິດທີ່ເຮັດໃຫ້ຄົນຕື່ນຕົກໃຈ.
ການຄົ້ນຄວ້າສຽງນັນແຊວເລີ່ມແຕ່ສະຕະວັດທີ 17,ຫຼັງຈາກຊຸມປີ 50 ສະຕະວັດທີ 20,ສຽງນັນແຊວຖືກຖືໂດຍທົ່ວໄປວ່າເປັນໄພສາທາລະນະທີ່ຮ້າຍແຮງ. ສື່ມວນຊົນກໍໄດ້ລາຍງານຂ່າວກ່ຽວກັບເຫດການສຽງນັນແຊວເຊື່ອມພິດຢູ່ເລື້ອຍໆ. ເດືອນພະຈິກປີ 1960 ຢູ່ເມືອງຮີໂລຊີມາແຫ່ງຍີ່ປຸ່ນ,ຜູ້ຊາຍຜູ້ໜຶ່ງໄດ້ຖືກສຽງນັນແຊວຂອງໂຮງງານຢູ່ມໍ່ຫັ້ນທໍລະມານຈົນລຳຄານໃຈທີ່ສຸດ,ຈົນຮອດຂ້າເຈົ້າຂອງໂຮງງານຕາຍໃນທີ່ສຸດ. ນອກນັ້ນ ເດືອນກໍລະກົດປີ 1961 ຊາວໜຸ່ມຍີ່ປຸ່ນຜູ້ໜຶ່ງໄດ້ໄປຫາວຽກເຮັດຢູ່ໂຕກຽວ,ຍ້ອນວ່າພັກຢູ່ມໍ່ທາງລົດໄຟ,ຈຶ່ງໄດ້ຖືກສຽງນັນແຊວຂອງລົດໂດຍສານແລະລົດບັນທຸກສິນຄ້າທີ່ແລ່ນໄປມາເລື້ອຍໆທໍລະມານ,ແລ້ວໄດ້ເປັນພະຍາດນອນບໍ່ຫຼັບ,ແລະທົນຕໍ່ຄວາມທຸກທໍລະມານບໍ່ໄດ້,ເລີຍຂ້າໂຕຕາຍ. ເດືອນຕຸລາປີດຽວກັນ,ໃນຄອບຄົວຢູ່ເຂດໜຶ່ງຂອງໂຕກຽວ,ແມ່ລູກສາມຄົນຍ້ອນທົນຕໍ່ສຽງນັນແຊວຂອງໂຮງງານວັດສະດຸກໍ່ສ້າງທີ່ຢູ່ມໍ່ຫັ້ນບໍ່ໄດ້,ຈຶ່ງເຈຕະນາຂ້າໂຕຕາຍ,ແຕ່ບໍ່ສຳເລັດຜົນ. ຈີນກໍແມ່ນປະເທດທີ່ສຽງນັນແຊວເຊື່ອມພິດຂ້ອນຂ້າງຮ້າຍແຮງ,ໃນທົ່ວປະເທດມີໄທເມືອງເກືອບ 2 ສ່ວນ 3 ດຳລົງຊີວິດແລະເຮັດວຽກຢູ່ໃນສະພາບແວດລ້ອມທີ່ສຽງນັນແຊວເກີນມາດຖານ,ການຮ້ອງຟ້ອງຕໍ່ສຽງນັນແຊວເຊື່ອມພິດກວມການຮ້ອງຟ້ອງຕໍ່ສິ່ງແວດລ້ອມເປັນພິດເກືອບ 40%.
ສຽງນັນແຊວຖືກເອີ້ນເປັນ"ກຳລັງຮຸນແຮງທີ່ບໍ່ເຫັນຮູບ",ແມ່ນໄພຮ້າຍໃຫຍ່ອັນໜຶ່ງຂອງຕົວເມືອງໃຫຍ່. ມີຄົນເຄີຍທົດລອງ,ເອົາໜູໄປໄວ້ຢູ່ໃນສະພາບແວດລ້ອມທີ່ສຽງດັງ 173 DB,ບໍ່ເທົ່າໃດນາທີ,ໜູກໍຕາຍ. ຫຼັງຈາກຜ່າຕັດໜູແລ້ວເຫັນວ່າ,ປອດແລະຕັບໄຕໄສ້ພຸງຂອງໜູລ້ວນແຕ່ມີປະກົດການເລືອດອອກ. ປີ 1959 ຢູ່ອາເມລິກາມີ 10 ຄົນອາສາສະໝັກດຳເນີນການທົດລອງສຽງນັນແຊວ. ເມື່ອຍົນທົດລອງບິນຜ່ານຜູ້ທົດລອງ 10 ຄົນນີ້ຈາກຄວາມສູງກວ່າ 10 ຮອດ 12 ແມັດ,ມີ 6 ຄົນຕາຍກັບບ່ອນ,ອີກ 4 ຄົນກໍຕາຍຫຼັງຈາກນັ້ນບໍ່ເທົ່າໃດຊົ່ວໂມງ. ເມື່ອວັນນະສູດສົບແລ້ວໄດ້ຢັ້ງຢືນວ່າ,10 ຄົນນີ້ລ້ວນແຕ່ຕາຍຍ້ອນສະໝອງອອກເລືອດຍ້ອນສຽງນັນແຊວ. ຈາກນີ້ສາມາດເຫັນໄດ້ວ່າ,"ອາວຸດສຽງ"ນີ້ມີລິເດດແຮງປານໃດ.
ສຽງແບ່ງອອກເປັນສຽງມ່ວນແລະສຽງນັນແຊວ. ສຽງທີ່ເກີດມາຈາກວັດຖຸທີ່ສະເທືອນຕາມກົດເກນໃດໜຶ່ງແມ່ນສຽງມ່ວນ;ສຽງທີ່ເກີດຈາກສິ່ງທີ່ສະເທືອນບໍ່ເປັນລະບຽບແລະບໍ່ເປັນຮອບນັ້ນແມ່ນສຽງນັນແຊວ. ສຽງທີ່ລົບກວນການພັກຜ່ອນ,ຮ່ຳຮຽນແລະເຮັດວຽກຂອງຄົນທັງຫຼາຍພ້ອມດ້ວຍສຽງສະເທືອນທີ່ມີຄວາມຖີ່ແລະຈັງຫວັດບໍ່ເປັນລະບຽບ,ຂາດຕິດຂາດຕໍ່ຫຼືບໍ່ເປັນລະບຽບໃນດ້ານສະຖິຕິລ້ວນແຕ່ເອີ້ນເປັນສຽງນັນແຊວ. ສຽງນັນແຊວມາຈາກສະພາບແວດລ້ອມທີ່ມະນຸດດຳລົງຊີວິດ,ເຊັ່ນການຜະລິດອຸດສາຫະກຳ,ການຂົນສົ່ງຄົມມະນາຄົມ,ການສ້າງສິ່ງກໍ່ສ້າງແລະຊີວິດສັງຄົມອື່ນໆ,ກໍເອີ້ນວ່າສຽງນັນແຊວສິ່ງແວດລ້ອມ. ສຽງທີ່ລົບກວນຊີວິດແລະສຸຂະພາບຂອງຄົນຈາກງານຄອນເສີດດັ່ງກ່າວນັ້ນກໍຢູ່ໃນປະເພດນີ້.
ສຽງນັນແຊວສາມາດທຳລາຍໂສຕະວິນຍານ,ພາໃຫ້ເປັນພະຍາດຊຳເຮື້ອ,ນອກນີ້,ຍັງສາມາດກະທົບກະເທືອນເຖິງລະບົບອື່ນໆຂອງຮ່າງກາຍຄົນ,ເຊັ່ນລະບົບເສັ້ນປະສາດ,ລະບົບເສັ້ນເລືອດຫົວໃຈ,ລະບົບກະເພາະລຳໄສ້,ຕາແລະລະບົບພູມຕ້ານທານ.
ສຽງນັນແຊວແມ່ນສິ່ງເຊື່ອມພິດລັກສະນະຟິຊິກ,ບ່ອນທີ່ຕ່າງກັບສິ່ງເຊື່ອມພິດລັກສະນະເຄມີແລະລັກສະນະຊີວະຊາດແມ່ນຢູ່ບ່ອນວ່າ,ຈຸດພິເສດຂອງສຽງນັນແຊວສິ່ງແວດລ້ອມເຊື່ອມພິດແມ່ນມີລັກສະນະພາກສ່ວນ,ລັກສະນະເຂດແລະລັກສະນະບໍ່ສືບຕໍ່. ໝາຍຄວາມວ່າ,ເມື່ອແຫຼ່ງເຊື່ອມພິດເຊົາໝູນເດີນແລ້ວ,ການເຊື່ອມພິດກໍຈະຫາຍໄປໃນທັນທີ. ສະນັ້ນ ເຖິງວ່າສຽງນັນແຊວແມ່ນ"ຄາຕະກອນເລືອມກາຍ"ກໍຕາມ,ຂໍແຕ່ວ່າຄົນເຮົາຄວບຄຸມຢ່າງເໝາະສົມໃນດ້ານແຫຼ່ງສຽງນັນແຊວ,ຂະບວນການສົ່ງສຽງນັນແຊວພ້ອມດ້ວຍເຕັກນິກປົກປ້ອງສ່ວນຕົວແລ້ວ,ກໍສາມາດເຮັດໃຫ້ສຽງນັນແຊວຫ່າງໄກຈາກຊີວິດພວກເຮົາໄດ້.
|
|
|
