|
|
 |
| (GMT+08:00)
2005-05-20 18:05:12
|
 |
|
ເພີ່ມທະວີການຮ່ວມມືແລະຮັດແໜ້ນມິດຕະພາບ-ທ່ານອູປາງໂກວຢ້ຽມຢາມສິງກະໂປ(ສຽງ)
cri
Author: da
|
ຕາມຂ່າວCRI: ແຕ່ວັນທີ 17 ຫາວັນທີ 19 ພຶດສະພາ,ທ່ານອູປາງໂກ ປະທານຄະນະປະຈຳສະພາປະຊາຊົນແຫ່ງຊາດຈີນໄດ້ຢ້ຽມຢາມສັນຖະວະໄມຕີສິງກະໂປຢ່າງເປັນທາງການຕາມຄຳເຊີນ.ການຢ້ຽມຢາມເທື່ອນີ້ໄດ້ສະແດງເຖິງມິດຕະພາບລະຫວ່າງຈີນສິງກະໂປ,ພ້ອມທັງໄດ້ຮັບຜົນອຸດົມສົມບູນ.
ສິງກະໂປແມ່ນປະເທດອາຊຽນທີ່ມີອິດທິພົນສຳຄັນ.ຈີນແມ່ນຄູ່ຂາການຄ້າໃຫຍ່ທີສີ່ຂອງສິງກະໂປ,ສ່ວນສິງກະໂປແມ່ນຄູ່ຂາການຄ້າໃຫຍ່ທີ 7 ຂອງຈີນແລະແມ່ນປະເທດລົງທຶນຢູ່ຈີນຫຼາຍເປັນທີ 8 .ຈຸດປະສົງການຢ້ຽມຢາມຂອງທ່ານອູປາງໂກເທື່ອນີ້,ກໍແມ່ນເພີ່ມທະວີມິດຕະພາບອັນມີມູນເຊື້ອແລະການຮ່ວມມືທີ່ຕ່າງຝ່າຍຕ່າງມີຜົນປະໂຫຍດລະຫວ່າງຈີນສິງກະໂປຕື່ມອີກ,ຊຸກຍູ້ການພົວພັນລະຫວ່າງຈີນສິງກະໂປມີການຂະຫຍາຍຕົວຫຼາຍກວ່າເກົ່າ.
ໃນໄລຍະຢ້ຽມຢາມ,ທ່ານອູປາງໂກວໄດ້ພົບປະບັນດາຜູ້ນຳສິງກະໂປ ເຊັ່ນ:ທ່ານນາຕານ ປະທານາທິບໍດີ,ທ່ານລີຮຽນລົງ ນາຍົກລັດຖະມົນຕີ,ທ່ານອັບດູນລາ ຕາມູກີ ປະທານລັດຖະສະພາແລະທ່ານລີກວນຢູ ລັດຖະບຸລຸດລັດຖະບານສິງກະໂປ.ສອງຝ່າຍໄດ້ກ້າວເຖິງຂັ້ນມີຄວາມຮັບຮູ້ຄືກັນກ່ຽວກັບການພົວພັນລະຫວ່າງສອງປະເທດແລະຫຼາຍບັນຫາທີ່ສົນໃຈນຳກັນ.ທ່ານອູປາງໂກວກ່າວເນັ້ນວ່າ,ຄວາມໄວ້ເນື້ອເຊື່ອໃຈເຊິ່ງກັນແລະກັນທາງການເມືອງແລະການຮ່ວມມືທີ່ຕ່າງຝ່າຍຕ່າງມີຜົນປະໂຫຍດແມ່ນພື້ນຖານແລະພະລັງແມ່ແຮງແຫ່ງການຂະຫຍາຍການພົວພັນລະຫວ່າງຈີນສິງກະໂປ.ເພື່ອຊຸກຍູ້ການພົວພັນລະຫວ່າງສອງປະເທດຂະຫຍາຍຕົວອອກ,ທ່ານສະເໜີວ່າ,ສອງຝ່າຍສາມາດຫຼຸດຄວາມເຫັນແຕກຕ່າງກັນຢ່າງບໍ່ຢຸດຢັ້ງແລະເປີດກວ້າງຄວາມຮັບຮູ້ຄືກັນໂດຍຜ່ານການເພີ່ມທະວີການແລກປ່ຽນກັນ;ອຸດສາຫະກຳທີສາມແມ່ນຈຸດເຕີບໃຫຍ່ໃໝ່ແຫ່ງການຮ່ວມມືເສດຖະກິດການຄ້າ.ທ່ານອູປາງໂກວຍັງກ່າວປາຖະກະຖາໃນພິທີໄຂກອງປະຊຸມເວທີປາໄສກ່ຽວກັບການຮ່ວມມືເສດຖະກິດການຄ້າຈີນສິງກະໂປ,ແລະສະເໜີໃຫ້ບັນລຸເປົ້າໝາຍໃໝ່ທີ່ມີມູນຄ່າການຄ້າຈີນສິງກະໂປຫຼາຍກວ່າ 50 ຕື້ໂດລາສະຫະລັດເມື່ອຮອດປີ 2010 ,ແລະຂໍ້ສະເໜີລະອຽດທີ່ກ່ຽວຂ້ອງຂອງຈີນ.ນອກນັ້ນ,ທ່ານອູປາງໂກວຍັງໄດ້ເຂົ້າຮ່ວມພິທີເຊັນເອກະສານຮ່ວມມືລະຫວ່າງສອງປະເທດ ເຊັ່ນ"ສັນຍາສ້າງຕັ້ງຄະນະກຳມະການສົ່ງເສີມການລົງທຶນຈີນສິງກະໂປ"ເປັນຕົ້ນ,ເພື່ອຊຸກຍູ້ການສ້າງແທ່ນສຳລັບການທີ່ຫາລືແລະແກ້ໄຂບັນຫາເສດຖະກິດການຄ້າລະຫວ່າງສອງປະເທດ.
ໃນໄລຍະຢ້ຽມຢາມສິງກະໂປ,ທ່ານອູປາງໂກວຍັງໄປທັດສະນາຈອນຫໍລະລຶກນານຢາງຊຸນຢັດເຊັນສິງກະໂປທີ່ມີຄວາມໝາຍປະຫວັດສາດພິເສດ.ຊາວຈີນຕ່າງດ້າວແລະພໍ່ຄ້າຊາວຈີນຢູ່ຫຼາຍປະເທດອາຊີອາຄະເນເຄີຍໄດ້ສະໜອງການຊ່ອຍເຫຼືອແລະການສະໜັບສະໜູນຢ່າງບໍ່ເຫັນແກ່ຕົວໃຫ້ແກ່ການເຄື່ອນໄຫວປະຕິວັດອັນຍິ່ງໃຫຍ່ຂອງທ່ານຊຸນຢັດເຊັນ. ປີນີ້ແມ່ນສະມາຄົມສະຫະພັນ ເຊິ່ງເປັນພັກການເມືອງຊົນຊັ້ນນາຍທຶນພັກທຳອິດຂອງຈີນເຊິ່ງນຳໂດຍທ່ານຊຸນຢັດເຊັນ ສ້າງຕັ້ງຂຶ້ນຄົບຮອບ 100 ປີ,ກໍແມ່ນທ່ານຊຸນຢັດເຊັນເຖິງແກ່ກຳຄົບຮອບ 80 ປີ.ນັກປາດສິງກະໂປຫຼາຍທ່ານເຫັນວ່າ,ການທັດສະນາຈອນຫໍລະລຶກນານຢາງຊຸນຢັດເຊັນຂອງທ່ານອູປາງໂກວເທື່ອນີ້ມີຄວາມໝາຍຫຼາຍ.
ການຢ້ຽມຢາມຂອງທ່ານອູປາງໂກວເທື່ອນີ້ໄດ້ຮັບຜົນອຸດົມສົມບູນ,ຈະຊຸກຍູ້ການພົວພັນຮ່ວມມືທີ່ຕ່າງຝ່າຍຕ່າງມີຜົນປະໂຫຍດລະຫວ່າງຈີນສິງກະໂປຂະຫຍາຍຕົວຕື່ມອີກຢ່າງແທ້ຈິງ.ການຢ້ຽມຢາມເທື່ອນີ້ໄດ້ເພີ່ມທະວີຄວາມໄວ້ເນື້ອເຊື່ອໃຈເຊິ່ງກັນແລະກັນ,ເປີດກວ້າງຄວາມຮັບຮູ້ຄືກັນ,ຮັກສາທ່ວງທ່າການຢ້ຽມຢາມກັນຂອງຜູ້ນຳຊັ້ນສູງປະເທດຢ້ຽມຢາມທັງສອງ;ຊຸກຍູ້ການໄປມາຫາສູ່ກັນແລະການຮ່ວມມືໃນທຸກລະດັບລະຫວ່າງສະພາປະຊາຊົນແຫ່ງຊາດຈີນກັບລັດຖະສະພາສິງກະໂປ,ການເລີ່ມຈັດເວທີປາໄສຮ່ວມມືເສດຖະກິດການຄ້າຈີນສິງກະໂປນັ້ນ,ຈະຍົກການພົວພັນເສດຖະກິດການຄ້າລະຫວ່າງສອງປະເທດໃຫ້ຂຶ້ນສູ່ລະດັບໃໝ່; ຜູ້ນຳສອງປະເທດຍັງສະແດງວ່າ,ຈະສືບຕໍ່ເພີ່ມທະວີການຫາລືກັນແລະການປະສານສົມທົບກັນໃນວຽກງານພາກພື້ນແລະສາກົນ,ຊຸກຍູ້ສັນຕິພາບແລະຄວາມຮຸ່ງເຮືອງຂອງພາກພື້ນ.
ການຢ້ຽມຢາມຂອງທ່ານອູປາງໂກວເທື່ອນີ້ບໍ່ພຽງແຕ່ຜູ້ນຳສິງກະໂປເອົາໃຈໃສ່ໃນລະດັບສູງເທົ່ານັ້ນ,ຫາກຍັງໄດ້ຮັບການຕ້ອນຮັບຊົມເຊີຍຢ່າງຈິງອົກຈິງໃຈແລະກະຕືລືລົ້ນຈາກປະຊາຊົນສິງກະໂປທີ່ເຕັມໄປດ້ວຍໄມຕີຈິດຮັກແພງ.ກໍເໝືອນກັບທ່ານອູປາງໂກວເວົ້ານັ້ນວ່າ,ຈີນຈະສະໜອງໂອກາດແກ່ການບັນດາປະເທດໂດຍສະເພາະແມ່ນປະເທດອ້ອມຂ້າງດ້ວຍການພັດທະນາຂອງຕົນ.ສ່ວນນ້ຳໃຈທີ່ພະຍາຍາມພັດທະນາພ້ອມກັນດັ່ງກ່າວນີ້,ພວມເຮັດໃຫ້ຈີນໄດ້ຮັບມິດຕະພາບແລະການສະໜັບສະໜູນຍິ່ງຫຼາຍກວ່າເກົ່າ.
|
|
|
