|
|
 |
| (GMT+08:00)
2005-05-23 22:04:14
|
 |
|
ພວກເຮົາມາເພື່ອສະແຫວງຫາການຮ່ວມມືແລະການພັດທະນາ
----ສຳພາດທ່ານປາລະມີ ພົມມະທັນສີ ຮອງຫົວໜ້າຄະນະຜູ້ແທນລາວກ່ຽວກັບສັບປະດາໂທລະຄົມຈີນອາຊຽນ(ສຽງ)
cri
Author: mo
|
ສັບປະດາໂທລະຄົມຈີນອາຊຽນໄດ້ຈັດຂຶ້ນຢູ່ປັກກິ່ງຢ່າງຄຶກຄື້ນໃນວັນທີ 12 ພືດສະພາ. ສັບປະດາໂທລະຄົມເທື່ອນີ້ມີຫົວຂໍ້ວ່າ: ຈີນກັບອາຊຽນ: ສ້າງການພົວພັນຄູ່ຂາຂົງເຂດຂໍ້ມູນຂ່າວສານແລະໂທລະຄົມມະນາຄົມທີ່ອວ່າຍໜ້າໄປສູ່ການພັດທະນາພ້ອມກັນ. ລັດຖະມົນຕີຫຼືຮອງລັດຖະມົນຕີຂອງກະຊວງຂໍ້ມູນຂ່າວສານແລະໂທລະຄົມມະນາຄົມຂອງຈີນແລະ 10 ປະເທດອາຊຽນຄື ລາວ ຫວຽດນາມແລະໄທເປັນຕົ້ນໄດ້ນຳພາຄະນະຜູ້ແທນມາເຂົ້າຮ່ວມການເຄື່ອນໄຫວຂອງສັບປະດາໂທລະຄົມ. ຫວ່າງມໍ່ໆນີ້, ທ່ານປາລະມີ ພົມມະທັນສີ ຮອງຫົວໜ້າຄະນະຜູ້ແທນລາວ ຫົວໜ້າກົມໄປສະນີໂທລະຄົມກະຊວງຄົມມະນາຄົມຂົນສົ່ງໄປສະນີແລະກໍ່ສ້າງສປປລາວໄດ້ຕ້ອນຮັບການເຂົ້າສຳພາດໂດຍສະເພາະຂອງວິທະຍຸCRIພວກເຮົາ, ທ່ານໄດ້ແນະນຳສະພາບກ່ຽວກັບຄະນະຜູ້ແທນລາວເຂົ້າຮ່ວມສັບປະດາໂທລະຄົມຈີນອາຊຽນເທື່ອນີ້ສູ່ຟັງ:
ໂດຍຕອບສະໜອງຕາມຄຳເຊີນຂອງທ່ານວາງຊູຕົງ ລັດຖະມົນຕີວ່າການກະຊວງອຸດສາຫະກຳຂ່າວສານສ.ປ.ຈີນ, ຄະນະຜູ້ແທນສປປລາວນຳໂດຍທ່ານບົວທອງ ວົງລໍຄຳ ລັດຖະມົນຕີວ່າການກະຊວງ ຄຂປກ ໄດ້ເດີນທາງມາຮ່ວມງານສັບປະດາໂທລະຄົມຈີນອາຊຽນ, ຄະນະຜູ້ແທນປະກອບດ້ວຍ 8 ທ່ານ, ໃນນັ້ນຈາກກະຊວງ ຄຂປກ 3 ທ່ານ, ແລະຈາກຮາກຖານການຜະລິດແລະການບໍລິການໂທລະຄົມ 5 ທ່ານ.
ການເຄື່ອນໄຫວສັບປະດາໂທລະຄົມຈີນອາຊຽນເທື່ອນີ້ໄດ້ຈັດຂຶ້ນແຕ່ວັນທີ 12 ຮອດວັນທີ 18 ພຶດສະພາປີ 2005 ໂດຍແບ່ງອອກເປັນ 3 ໄລຍະ, ຕ່າງຈັດຂຶ້ນຢູ່ປັກກິ່ງ ຊຽງໄຮ້ແລະເສີນເຈີ້ນ. ໃນໄລຍະນີ້ໄດ້ຈັດງານສົນທະນາກັນລະຫວ່າງລັດຖະບານຈີນອາຊຽນກັບວິສາຫະກິດ, ງານສຳມະນາຂໍ້ມູນຂ່າວສານໂທລະຄົມຈີນອາຊຽນຄັ້ງທີ 4, ພ້ອມດ້ວຍກອງປະຊຸມບໍ່ເປັນທາງການຂອງເຈົ້າໜ້າທີ່ຊັ້ນສູງດ້ານໂທລະຄົມຈີນອາຊຽນແລະອື່ນໆ. ຄະນະຜູ້ແທນຂອງບັນດາປະເທດຍັງໄດ້ໄປທັດສະນະສຶກສາວິສາຫະກິດທຸລະກິດແລະວິສາຫະກິດຜະລິດເຄື່ອງປະກອບໂທລະຄົມຈີນ.
ທ່ານປາລະມີ ພົມມະທັນສີບອກພວກເຮົາວ່າ, ການເຄື່ອນໄຫວຂອງສັບປະດາໂທລະຄົມເທື່ອນີ້ໄດ້ສ້າງພາບປະທັບໃຈອັນເລິກເຊິ່ງທີ່ສຸດໄວ້ກັບທ່ານ:
ຂ້າພະເຈົ້າຮູ້ສຶກວ່າ, ການມາຮ່ວມກອງປະຊຸມສັບປະດາໂທລະຄົມຈີນອາຊຽນຄັ້ງນີ້ເປັນຜົນປະໂຫຍດດີທີ່ສຸດໃຫ້ແກ່ຄະນະຜູ້ແທນພວກຂ້າພະເຈົ້າ, ເປັນຕົ້ນແມ່ນເນື້ອໃນໃນການແລກປ່ຽນຄຳຄິດຄຳເຫັນແລະບັນດາແນວຄິດຍຸດທະສາດອັນສຳຄັນທີ່ວ່າໄດ້ກ່າວຢູ່ໃນຖະແຫລງການກອງປະຊຸມປັກກິ່ງຄັ້ງນີ້, ເປັນເນື້ອໃນສຳຄັນທີ່ຈະຕ້ອງຜັນຂະຫຍາຍໃນປະເທດພວກຂ້າພະເຈົ້າ, ເພື່ອການຮ່ວມມືລະຫວ່າງລາວກັບຈີນ, ແລະເພື່ອການຮ່ວມມືລະຫວ່າງລາວກັບອາຊຽນພາຍໃຕ້ໝາກໄດ້ຜົນມາສູ່ປະເທດຊາດແລະສັງຄົມແລະເພື່ອການພັດທະນາໂທລະຄົມແລະເພື່ອພັດທະນາເສດຖະກິດສັງຄົມຢ່າງມີທິດເລັ່ງແລະເປົ້າໝາຍຄັກແນ່, ອັນນີ້ຂ້າພະເຈົ້າກໍຖືວ່າເປັນຜົນໄດ້, ພວກຂ້າພະເຈົ້າກໍໄດ້ຮ່ຳຮຽນເອົາບົດຮຽນຂອງປະເທດ ຕ່າງໆທີ່ໄດ້ຍົກຂຶ້ນແລກປ່ຽນຄຳຄິດຄຳເຫັນໃນກອງປະຊຸມຫັ້ນ ກໍຖືວ່າປະເສີດ. ມາເທື່ອນີ້ ຂ້າພະເຈົ້າກໍຖືວ່າໄດ້ຮັບບົດຮຽນເປັນຢ່າງດີ. ສອງ, ການຮັບຕ້ອນຂອງປະເທດເຈົ້າພາບໂດຍສະເພາະຂອງກະຊວງອຸດສາຫະກຳຂໍ້ມູນຂ່າວສານຈີນຕໍ່ຄະນະຜູ້ແທນຂອງກະຊວງ ຄຂປກ ລາວນີ້ແມ່ນມີລັກສະນະພິເສດ ອົບອຸ່ນ ເປັນກັນເອງ ຖືວ່າສົມກຽດ. ອັນນີ້ຂ້າພະເຈົ້າປະທັບໃຈເປັນຢ່າງດີ. ສາມ, ມາປັກກິ່ງເທື່ອນີ້, ຖືວ່າ, ຍ້ອນແນວທາງການເມືອງແລະແນວທາງເສດຖະກິດຂອງສປຈີນແມ່ນຖືກຕ້ອງ, ໃນສະພາບປັດຈຸບັນ, ເຮັດໃຫ້ເສດຖະກິດຂອງສປຈີນໄດ້ຮັບການເຕີຍໃຫຍ່ຂະຫຍາຍຕົວຢ່າງໄວວາ. ຂ້າພະເຈົ້າມາເທື່ອນີ້ ເຫັນວ່າຫລາຍອາຄານກໍ່ສ້າງຫລາຍແບບໆນີລະມິດແປວ່າມັນໄວທີ່ສຸດ, ແລະມີຫລາຍອຸດສາຫະກຳເກີດຂຶ້ນ. ເວລາຄະນະຜູ້ແທນພວກຂ້າພະເຈົ້າຢູ່ນີ້ກໍໄດ້ຮັບການຢ້ຽມຢາມຂອງບັນດາທຸລະກິດ ໂດຍສະເພາະໂຮງຈັກໂຮງງານ ບັນດາບໍລິສັດບໍລິການດ້ານໂທລະຄົມICTເຂົ້າພົບ, ຖືວ່າເປັນບໍລິສັດໃຫຍ່ທີ່ຜະລິດອຸປະກອນທີ່ໄດ້ລະດັບມາດຖານໃນໂລກແລະກໍປະສົບຜົນສຳເລັດທາງດ້ານບໍລິການອັນໃຫຍ່ຫລວງ. ເຂົາມາພົບແມ່ນຢາກເຂົ້າໄປຮ່ວມທຸລະກິດ ໄປລົງທຶນ ໄປໃຫ້ຊ່ອຍໃນການກູ້ຢືມທຶນຮອນຫລືຊ່ອຍໃນດ້ານວິສາວະກຳດ້ານຊ່ຽວຊານ ທີ່ປຶກສາຕ່າງໆ. ອັນນີ້ກໍເປັນໜ້າປະທັບໃຈເປັນຢ່າງຍິ່ງ, ບັນຫາອື່ນໆກໍແມ່ນບັນຍາກາດໃນການພົບປະແລກປ່ຽນຄຳຄິດຄຳເຫັນກັບບັນດາຜູ້ແທນແລະອົງການຈັດຕັ້ງສາກົນຕ່າງໆກໍຖືວ່າດີ, ອັນນີ້ຂ້າພະເຈົ້າກໍເປັນອັນປະທັບໃຈຢ່າງຫລວງຫລາຍທີ່ສຸດໃນການເຂົ້າຮ່ວມກອງປະຊຸມສັບປະດາໂທລະຄົມຈີນອາຊຽນເທື່ອນີ້.
ແຕ່ໃດມາ, ລັດຖະບານຈີນກໍໄດ້ເອົາໃຈໃສ່ທີ່ສຸດນຳການພົວພັນຮ່ວມມືດ້ວຍໄມຕີຈິດກັບບັນດາປະເທດອາຊຽນ, ສັບປະດາໂທລະຄົມຈີນອາຊຽນເທື່ອນີ້ແມ່ນທ່ານເວີນເຈຍປາວ ນາຍົກລັດຖະມົນຕີຈີນສະເໜີອອກມາໃນກອງປະຊຸມສຸດຍອດອາຊຽນຄັ້ງທີ 8 ທີ່ຈັດຂຶ້ນຢູ່ນະຄອນຫລວງວຽງຈັນເມື່ອເດືອນພະຈິກປີ 2004 , ໄດ້ຮັບຄວາມເຫັນດີເຫັນພ້ອມຢ່າງຕັ້ງໜ້າຈາກຜູ້ນຳບັນດາປະເທດອາຊຽນ. ທ່ານຮວງຈູ ຮອງນາຍົກລັດຖະມົນຕີຈີນໄດ້ເຂົ້າຮ່ວມພິທີໄຂສັບປະດາໂທລະຄົມເທື່ອນີ້, ທ່ານຫວັງໃຫ້ສອງຝ່າຍລົງເລິກແລະເປີດກວ້າງການພົວພັນຮ່ວມມືໃນຂົງເຂດຂໍ້ມູນຂ່າວສານໂທລະຄົມຢ່າງຮອບດ້ານຕາມຫລັກການສະເໝີພາບ ຕ່າງໄວ້ເນື້ອເຊື່ອໃຈກັນ, ຮ່ວມມືກັນແລະໄດ້ຮັບຜົນປະໂຫຍດນຳກັນບົນພື້ນຖານຮ່ວມມືໃນເມື່ອກ່ອນ.
ທ່ານປາລະມີ ພົມມະທັນສີໄດ້ສະແດງຄວາມເຫັນດີເຫັນພ້ອມນຳເລື່ອງນີ້. ທ່ານເຫັນວ່າ, ສັບປະດາໂທລະຄົມຈີນອາຊຽນຈັດຂຶ້ນຢ່າງສຳເລັດຜົນມີຄວາມໝາຍເລິກເຊິ່ງຍາວໄກຕໍ່ການເພີ່ມທະວີການພົວພັນຮ່ວມມືກັນດ້ວຍໄມຕີຈິດລະຫວ່າງຈີນກັບອາຊຽນທີ່ມີຢູ່ແລ້ວ.
ສັບປະດາໂທລະຄົມອາຊຽນຈີນມີຄວາມສຳຄັນຕໍ່ການຮ່ວມມືດ້ານໂທລະຄົມ ICT ແລະການຮ່ວມມືດ້ານອື່ນໆທີ່ມີລັກສະນະຍຸດທະສາດດ້ານເສດຖະກິດ ດ້ານອຸດສາຫະກຳ ດ້ານການຄ້າລະຫວ່າງອາຊຽນກັບຈີນ ແລະລະຫວ່າງສອງປະເທດດ້ວຍກັນຄືຈີນກັບແຕ່ລະສະມາຊິກອາຊຽນ, ແລະກໍມີຄວາມສຳຄັນເປັນຖານະບົດບາດລວມເພື່ອປົກປ້ອງຜົນປະໂຫຍດລວມຂອງອາຊີປາຊີຟິກຕໍ່ນະໂຍບາຍເສດຖະກິດການຄ້າໃນທົ່ວໂລກອີກດ້ວຍ. ລະອຽດ: ກອງປະຊຸມຄັ້ງນີ້ໄດ້ແລກປ່ຽນຄຳຄິດຄຳເຫັນຢ່າງກົງໄປກົງມາກ່ຽວກັບການຮ່ວມມືພັດທະນາດ້ານICT ໃນຂົງເຂດອາຊີປາຊີຟິກ, ຂຸດຄົ້ນນຳໃຊ້ທ່າແຮງລວມລະຫວ່າງ 10 ປະເທດສະມາຊິກຂອງອາຊຽນແລະຈີນ, ເໝືອນດັ່ງບັນດາທ່ານໄດ້ຮັບຊາບແລ້ວ, ICT ແມ່ນຂະບວນໂລກາວິວັດຂອງການສື່ສານທີ່ທັນສະໄໝຂອງຕົ້ນສັດຄະວັດທີ 21, ແຕ່ລະປະເທດຕ້ອງນຳໃຊ້ICTເປັນພາຫະນະ, ເປັນຂໍ້ກຸນແຈກ້າວໄປສູ່ການພັດທະນາດ້ານເສດຖະກິດ, ອຸດສາຫະກຳການຜະລິດ, ການສຶກສາວັດທະນະທຳສັງຄົມ, ສ້າງຄວາມສີວິໄລອຸດົມຮັ່ງມີໃຫ້ແກ່ປະເທດຊາດ. ດ້ວຍຈິດໃຈດັ່ງກ່າວ, ຢູ່ໃນປະເທດໃດ, ຂົງເຂດຊົນນະບົດໃດຍັງບໍ່ທັນມີຕາໜ່າງຊົມໃຊ້ICTໄປເຖິງ, ກໍ່ຕ້ອງພັດທະນາICTໃຫ້ໄປເຖິງ, ເພື່ອໃຫ້ປະຊາຊົນໄດ້ຊົມໃຊ້, ເພື່ອລົບລ້າງການດ້ອຍໂອກາດໃນການນຳໃຊ້ICT ແລະເພື່ອແກ້ໄຂຄວາມທຸກຍາກຂອງປະຊາຊົນ.
ກອງປະຊຸມຄັ້ງນີ້ໄດ້ປຶກສາຫາລືໃນຫລາຍບັນຫາທີ່ມີລັກສະນະຍຸດທະສາດເພື່ອເປັນທິດທາງລວມໃນການຮ່ວມມືເປັນຕົ້ນ: 1, ດ້ານອຸດສາຫະກຳ ເຕັກໂນໂລຍີຂ່າວສານ; 2, ການບໍລິການນຳໃຊ້ICTຢ່າງກວ້າງຂວາງທົ່ວເຖິງ, ບໍ່ໃຫ້ມີເຂດທີ່ຍັງດ້ອຍໂອກາດ; 3, ສົ່ງເສີມການຄ້າອຸປະກອນເອເລັກໂຕຼນິກໂທລະຄົມລະຫວ່າງປະເທດແບບຕ່າງຝ່າຍຕ່າງມີຜົນປະໂຫຍດ; 4, ການພັດທະນາໂຄງລ່າງພື້ນຖານICT ໂຄງການກໍ່ສ້າງສາຍສົ່ງຂ່າວສານຄວາມໄວສູງລະຫວ່າງ 6 ປະເທດລ້ອງແມ່ນ້ຳຂອງ（GMS）ຊຶ່ງມີທັງສປປລາວ ຈີນ ຫວຽດນາມ ກຳປູເຈຍ ໄທ ແລະມຽນມາ; 5, ການພັດທະນາຊັບພະຍາກອນມະນຸດທາງດ້ານICT; 6, ການປ້ອງກັນລະບົບຂໍ້ມູນຂ່າວສານ, ບໍ່ໃຫ້ຂໍ້ມູນຂ່າວສານຖືກທຳລາຍ, ບໍ່ໃຫ້ຖືກປະປົນເນື້ອໃນ, ບໍ່ໃຫ້ເນື້ອໃນຖືກລັກລອບໄປ; 7, ການຮ່ວມມືທາງດ້ານການລົງທຶນລະຫວ່າງປະເທດ, ໝາຍຄວາມວ່າ, ໃນ 10 ປະເທດບວກກັບຈີນນີ້, ແມ່ນການຮ່ວມມືຊ່ອຍເຫຼືອກັນ, ແລະກັນການຂາດຂຶນທຶນຮອນ ອຸກະກອນການລົງທຶນກໍ່ສ້າງພຶ້ນຖານ, ແລະທາງດ້ານຊັບພະຍາກອນມະນຸດຕ່າງໆນັ້ນ, ແມ່ນເພິ່ງພາອາໄສເຊິ່ງກັນແລະກັນແລະຊ່ອຍເຫຼືອກັນ; 8, ການຊຸກຍູ້ໃຫ້ມີການພົວພັນລະຫວ່າງສອງຝ່າຍ, ໝາຍຄວາມວ່າ, ໃນ 10 ປະເທດບວກກັບຈີນນີ້, ມີການພົວພັນລະຫວ່າງຈີນກັບແຕ່ລະປະເທດອາຊຽນກໍເປັນໄປໄດ້ສອງຝ່າຍ, ຫລືວ່າຈີນກັບຫລາຍປະເທດທີ່ເຊັນຢູ່ໃນGMSກໍມີການພົວພັນເປັນໄປໄດ້ບໍ່ແມ່ນວ່າມີແຕ່ອາຊຽນກັບຈີນ. ອັນນີ້ກໍແມ່ນບັນຫາສຳຄັນທີ່ພວກເຮົາໄດ້ເອົາມາປຶກສາຫາລືກັນແລະເປັນເອກະພາບກັນແລ້ວ. ສຸດທ້າຍ, ກໍຕ້ອງຜ່ານຍັດຕິ, ໝາຍຄວາມວ່າຖະແຫລງການຂອງປັກກິ່ງກ່ຽວກັບການຮ່ວມມືຊ່ອຍເຫຼືອກັນພັດທະນາທາງດ້ານICT, ແລະໃຫ້ບັນດາປະເທດມີສ່ວນຮ່ວມໃນການພັດທະນາເສດຖະກິດສັງຄົມເຂົ້າຮ່ວມກັນ. ອັນນີ້ກໍແມ່ນເນື້ອໃນເວົ້າໃນຖະແຫລງການປັກກິ່ງຢ່າງລະອຽດແລ້ວ.
ຂອບໃຈທ່ານປາລະມີ ທີ່ໄດ້ສະຫຼະເວລາອັນລ້ຳຄ່າຮັບການສຳພາດຂອງພວກເຮົາ, ພ້ອມທັງຂໍຂອບໃຈເພື່ອນຜູ້ຟັງທີ່ພວມຮັບຟັງລາຍການນີ້.
|
|
|
