|
|
 |
| (GMT+08:00)
2005-05-24 18:54:55
|
 |
|
ລັດຖະບານຈີນຈະໃຊ້ມາດຕະການອອກແຮງຍົກຄວາມສາມາດປະດິດສ້າງໃໝ່ໂດຍເປັນເຈົ້າຕົນເອງ(ສຽງ)
cri
Author: mo
|
ສັບປະດານີ້, ຢູ່ປັກກິ່ງພວມຈັດງານມະຫະກຳອຸດສາຫະກຳວິທະຍາສາດເຕັກໂນໂລຢີສາກົນ. ວັນທີ 24 ພຶດສະພາ, ໃນກອງປະຊຸມລາຍງານທີ່ມີຫົວຂໍ້ຫລັກຂອງງານມະຫະກຳ, ທ່ານຫຸຍລຽນຢູ້ ຮອງນາຍົກລັດຖະມົນຕີຈີນກ່າວວ່າ, ການປະດິດສ້າງເຕັກໂນໂລຢີໃໝ່ແມ່ນພື້ນຖານທີ່ຄ້ຳຢັນການພັດທະນາຂອງປະເທດໜຶ່ງ. ລັດຖະບານຈີນຈະໃຊ້ມາດຕະການອັນບັງເກີດຜົນ, ອອກແຮງຍົກຄວາມສາມາດປະດິດສ້າງໃໝ່ໂດຍເປັນເຈົ້າຕົນເອງ, ຊຸກຍູ້ເສດຖະກິດສັງຄົມຈີນພັດທະນາຢ່າງຮອບດ້ານ ກົມກຽວກັນແລະສືບເນື່ອງ.
ລັດຖະບານຈີນເອົາໃຈໃສ່ທີ່ສຸດນຳບົດບາດຂອງຄວາມກ້າວໜ້າດ້ານວິທະຍາສາດເຕັກໂນໂລຢີໃນການພັດທະນາແຫ່ງຊາດ, ໄດ້ວາງຍຸດທະສາດ ສ້າງຊາດໃຫ້ຈະເລີນດ້ວຍການສຶກສາວິທະຍາສາດເຕັກໂນໂລຢີນັ້ນຢ່າງແຈ່ມແຈ້ງ, ແລະອອກແຮງຊຸກຍູ້ຄວາມກ້າວໜ້າແລະການປະດິດສ້າງໃໝ່ຂອງວິທະຍາສາດເຕັກໂນໂລຢີ, ຊຸກຍູ້ໝາກຜົນວິທະຍາສາດເຕັກນິກຫັນໄປສູ່ກຳລັງການຜະລິດ. ໃນຫລາຍປີມານີ້, ໄດ້ຮັບໝາກຜົນວິທະຍາສາດເຕັກໂນໂລຢີອັນສຳຄັນຕ່າງໆທີ່ປະຈັກຕາຊາວໂລກຄືແນວເຂົ້າປະສົມພັນ, ການບິນອະວະກາດບັນທຸກຄົນເປັນຕົ້ນ. ໝາກຜົນວິທະຍາສາດເຕັກໂນໂລຢີອັນສຳຄັນເຫຼົ່ານີ້ໄດ້ມີບົດບາດສຳຄັນໃນການຊຸກຍູ້ການພັດທະນາເສດຖະກິດສັງຄົມຂອງຈີນ, ຍົກກຳລັງສັງລວມແຫ່ງຊາດຈີນໃຫ້ສູງຂຶ້ນ, ແລະປົວແປງຊີວິດການເປັນຢູ່ຂອງປະຊາຊົນເປັນຕົ້ນ.
ໃນກອງປະຊຸມລາຍງານຂອງ"ງານມະຫະກຳອຸດສາຫະກຳວິທະຍາສາດເຕັກໂນໂລຢີສາກົນປັກກິ່ງຄັ້ງທີ 8 "ໃນວັນທີ 24 ພຶດສະພາ, ທ່ານຮຸຍລຽງຢູ້ ຮອງນາຍົກລັດຖະມົນຕີຈີນກ່າວວ່າ, ຈີນຍັງຈະໃຊ້ມາດຕະການຕື່ມອີກ, ຊຸກຍູ້ຄວາມກ້າວໜ້າດ້ານວິທະຍາສາດເຕັກໂນໂລຢີ, ຍົກຄວາມສາມາດປະດິດສ້າງໃໝ່ໂດຍເປັນເຈົ້າຕົນເອງ. ທ່ານເວົ້າວ່າ,
ຕ້ອງຜັນຂະຫຍາຍການເພີ່ມຄວາມສາມາດປະດິດສ້າງໃໝ່ໂດຍເປັນເຈົ້າຕົນເອງໄປຮອດການສ້າງສາທັນສະໄໝທຸກດ້ານ, ໄປຮອດທຸກອຸດສາຫະກຳ ຂະແໜງການແລະເຂດແຄວ້ນ. ໃນຂົງເຂດທີ່ເປັນຂໍກະແຈ, ຕ້ອງກຳສິດຊັບສິນທາງປັນຍາໂດຍເປັນເຈົ້າຕົນເອງຫລາຍກວ່າເກົ່າ, ຄອງຖານະໃນຂົງເຂດວິທະຍາສາດແລະຂົງເຂດເຕັກໂນໂລຢີສູງທາງຍຸດທະສາດ.
ໃນເວລາກ່າວເຖິງມາດຕະການອັນລະອຽດທີ່ຊຸກຍູ້ການພັດທະນາວິທະຍາສາດເຕັກໂນໂລຢີແລະຍົກສູງຄວາມສາມາດປະດິດສ້າງໃໝ່ນັ້ນ, ທ່ານຮຸຍລຽງຢູ້ກ່າວວ່າ, ຈຸດໜັກແມ່ນສ້າງລະບົບປະດິດສ້າງເຕັກໂນໂລຢີໃໝ່ທີ່ເອົາວິສາຫະກິດເປັນອັດຕະພາບ, ສ້າງແລະປະຕິບັດລະບົບການເງິນສ່ວຍສາອາກອນແລະການທະນາຄານທີ່ມີຜົນດີຕໍ່ການປະດິດສ້າງໃໝ່ໂດຍເປັນເຈົ້າຕົນເອງ, ສະໜັບສະໜູນວິສາຫະກິດລົງທຶນເຂົ້າໃນການປະດິດສ້າງເຕັກໂນໂລຢີໃໝ່ໃຫ້ຫລາຍກວ່າເກົ່າ, ພັດທະນາເຕັກໂນໂລຢີຂໍກະແຈທີ່ມີສິດຊັບສິນທາງປັນຍາໂດຍເປັນເຈົ້າຕົນເອງ, ສ້າງຍີ່ຫໍ້ຊື່ສຽງລະດັບໂລກ.
ຕາມແນະນຳວ່າ, ໃນຫລາຍປີມານີ້, ຈີນລົງທຶນໃນຂົງເຂດວິທະຍາສາດເຕັກໂນໂລຢີໄດ້ເພີ່ມຂຶ້ນຢ່າງບໍ່ຢຸດຢັ້ງ, ປີ 2003, ຄ່າໃຊ້ຈ່າຍດ້ານວິທະຍາສາດເຕັກນິກຂອງຈີນກວມ 1,3% ຂອງGDP, ອັດຕາດັ່ງກ່າວໄດ້ສູງກວ່າ 6 ປີກ່ອນ 1 ເທົ່າ. ຕາມແຜນກຳນົດພັດທະນາວິທະຍາສາດເຕັກໂນໂລຢີຂອງຈີນ, ຮອດທ້າຍປີນີ້, ຄ່າໃຊ້ຈ່າຍດ້ານວິທະຍາສາດເຕັກໂນໂລຢີຂອງຈີນກວມGDP ຈະຫລາຍກວ່າ 1,5%.
ທ່ານຮຸຍລຽງຢູ້ຍັງກ່າວເນັ້ນວ່າ, ຈີນຍັງຈະອອກແຮງອົບຮົມແລະນຳເຂົ້າຜູ້ມີຄວາມຮູ້ຄວາມສາມາດດ້ານວິທະຍາສາດເຕັກໂນໂລຢີຢ່າງຕັ້ງໜ້າ, ບູລະນະກົນໄກທີ່ມີຜົນດີຕໍ່ການເຮັດໃຫ້ຜູ້ມີຄວາມຮູ້ຄວາມສາມາດໂປໂລຂຶ້ນນັ້ນຢ່າງບໍ່ຢຸດຢັ້ງ.ສືບຕໍ່ຄັດເລືອກແລະສົ່ງຜູ້ມີຄວາມຮູ້ຄວາມສາມາດທີ່ດີເລີດໄປຮຽນວິທະຍາສາດເຕັກໂນໂລຢີທີ່ກ້າວຫນ້າຂອງໂລກຢູ່ຕ່າງປະເທດ,ພ້ອມທັງນຳໃຊ້ແລະເຝິກຝົນຜູ້ມີຄວາມຮູ້ຄວາມສາມາດໄວຫນຸ່ມໄວກາງທີ່ດີເລີດໃນໂຄງການວິທະຍາສາດເຕັກໂນໂລຢີສຳຄັນແລະໂຄງການກໍ່ສ້າງສຳຄັນຂອງລັດ,ດູດດຶງຜູ້ຊ່ຽວຊານແລະນັກປາດຕ່າງປະເທດມາຮ່ວມມືກັບຝ່າຍຈີນໃນໂຄງການຄົ້ນຄວ້າວິທະຍາສາດຢູ່ຈີນດ້ວຍຫລາຍຮູບການ.
ໃນເວລາລິເລິ່ມການປະດິດສ້າງໃໝ່ໂດຍເປັນເຈົ້າຕົນເອງນັ້ນ, ທ່ານຮຸຍລຽງຢູ້ກ່າວວ່າ, ຈີນກໍສົ່ງເສີມການແລກປ່ຽນແລະການຮ່ວມມືລະຫວ່າງຊາດ. ທ່ານກ່າວວ່າ,
ພວກຂ້າພະເຈົ້າມີເຈດຈຳນົງວ່າ, ໃນການຮ່ວມມືລະຫວ່າງຊາດຢ່າງກວ້າງຂວາງນັ້ນ, ເອົາໃຈໃສ່ການປະດິດສ້າງດັ້ງເດີມແລະການປະດິດສ້າງເຕັກໂນໂລຢີໃໝ່ໃນຂົງເຂດຕ່າງໆຄືວິທະຍາສາດທຳມະຊາດ ວິທະຍາສາດວັດທະນະທຳ, ແລະວິທະຍາສາດສັງຄົມເປັນຕົ້ນ. ບົນເສັ້ນທາງທີ່ຍົກສູງຄວາມສາມາດປະດິດສ້າງໃໝ່ໂດຍເປັນເຈົ້າຕົນເອງນັ້ນ, ລັດຖະບານຈີນໄດ້ເອົາໃຈໃສ່ຢ່າງສະເໝີຕົ້ນສະເໝີປາຍແລະຈະເຮັດຄືແຕ່ເກົ່າເມືອຫລັງ, ຊຸກຍູ້ການແລກປ່ຽນແລະການຮ່ວມມືດ້ານວິທະຍາສາດເຕັກໂນໂລຢີລະຫວ່າງຊາດ.
ທ່ານຮຸຍລຽງຢູ້ຊີ້ອອກວ່າ, ຈີນຄວນຊຸກຍູ້ການປະດິດສາງໃໝ່ພັດທະນາໃນລະດັບສູງບົນພື້ນຖານທີ່ດູດດຶງແລະຖອດຖອນເອົາໝາກຜົນວິທະຍາສາດເຕັກນິກທີ່ກ້າວໜ້າໃນໂລກຢ່າງກວ້າງຂວາງ.
|
|
|
