|
|
 |
| (GMT+08:00)
2005-05-25 15:47:57
|
 |
|
ສຳຜັດສະເໜສິລະປະ, ເພີ່ມການແລກປ່ຽນວັດທະນະທຳ(ສຽງ)
cri
Author: mo
|
ການເຄື່ອນໄຫວ"ນັດພົບທີ່ປັກກິ່ງ" ເຊິ່ງແມ່ນງານສິລະປະສາກົນຂະໜາດໃຫຍ່ທີ່ຂະແໜງການວັດທະນະທຳຈີນເປັນເຈົ້າພາບໄດ້ຈັດຂຶ້ນຢູ່ປັກກິ່ງໃນເດືອນພືດສະພາ, ສິນລະປີນພັນກວ່າຄົນທີ່ມາຈາກ 30 ກວ່າປະເທດໄດ້ມາຮອດປັກກິ່ງຢ່າງຕໍ່ເນື່ອງກັນ, ໄດ້ຈັດການສະແດງແລະງານວາງສະແດງທີ່ມີສິສັນພິເສດຕ່າງໆ. ຕໍ່ໄປເຊີນຟັງການແຈ້ງຂ່າວກ່ຽວກັບການເຄື່ອນໄຫວ"ນັດພົບທີ່ປັກກິ່ງ"ຄັ້ງທີ 5 .
ທີ່ທ່ານພວມຟັງຢູ່ນີ້ແມ່ນອັດສຽງງານລາຕີສິລະປະທີ່ມີຫົວຂໍ້ວ່າ"ມວນໝູ່ມາລາແຂ່ງກັນບານ ສິລະປະແຫ່ງຊົນເຜົ່າ" ເຊິ່ງເປັນງານລາຕີເປີດສາກຂອງການເຄື່ອນໄຫວ"ນັດພົບທີ່ປັກກິ່ງ"ຄັ້ງນີ້. ສິນລະປີນຂອງຄະນະສິລະປາກອນຈີນໄດ້ສະແດງລາຍການຟ້ອນແລະຮ້ອງຂອງບັນດາຊົນເຜົ່າໃນສະໄໝຕ່າງໆຂອງຈີນໃນເຄິ່ງສະຕະວັດກວ່າມານີ້. ການສະແດງຢ່າງດີເດັ່ນໄດ້ຮັບຄວາມນິຍົມຊົມຊອບດ້ວຍສຽງຕົບມືຢ່າງຟົດສະນັ່ນແລະສຽງໄຊໂຍໂຮຮ້ອງຈາກຜູ້ຊົມທັງຫລາຍ.
ແຕ່ປີ 2000 ມານີ້, ການເຄື່ອນໄຫວ"ນັດພົບທີ່ປັກກິ່ງ"ໄດ້ຈັດຂຶ້ນ 4 ຄັ້ງຢ່າງສຳເລັດຜົນ, ໄດ້ດູດດຶງຜູ່ມາຊົມລ້ານກວ່າເທື່ອຄົນ. ໃນຖານເປັນງານສິລະປະລະດັບຊາດຂອງຈີນ, ແລະງານສິລະປະລະດູບານໃໝ່ທີ່ມີຂະໜາດໃຫຍ່ກວ່າໝູ່ຢູ່ພາກພື້ນອາຊີ, ການເຄື່ອນໄຫວ"ນັດພົບທີ່ປັກກິ່ງ"ໄດ້ຈໍ່ຕົວຂຶ້ນເປັນຍີ່ຫໍສິລະປະທີ່ມີອິດທິພົນອັນແນ່ນອນ, ໄດ້ຮັບຄວາມຮັບຮອງຈາກວົງການສິລະປະພາຍໃນປະເທດຈີນແລະຕ່າງປະເທດ. ການເຄື່ອນໄຫວ"ນັດພົບທີ່ປັກກິ່ງ"ຄັ້ງນີ້ໄດ້ຍຶດໝັ້ນວັດຖຸປະສົງທີ່ສົ່ງເສີມວັດທະນະທຳຊົນຊາດຈີນ, ນຳເຂົ້າສິລະປະຍອດຢ້ຽມຂອງຕ່າງປະເທດ, ຊຸກຍູ້ການແລກປ່ຽນວັດທະນະທຳລະຫວ່າງຊາດ, ຜ່ານຮູບການສິລະປະຊະນິດຕ່າງໆມາສະແດງໃຫ້ເຫັນການແລກປ່ຽນແລະເຊື່ອມໂຍງເຂົ້າກັນຂອງວັດທະນະທຳຕ່າງກັນ.
ທ່ານຈ່າງຢູ ຜູ້ອຳນວຍການໃຫຍ່ຂອງກຸ່ມບໍລິສັດວັດທະນະທຳຕໍ່ຕ່າງປະເທດຂອງຈີນທີ່ຮັບຜິດຊອບຈັດການເຄື່ອນໄຫວເທື່ອນີ້ແນະນຳວ່າ:
ເວົ້າໃນດ້ານເນື້ອໃນແລ້ວ, ການເຄື່ອນໄຫວ"ນັດພົບທີ່ປັກກິ່ງ"ໃນປີນີ້ອຸດົມສົມບູນຄືກັນກັບທຸກປີທີ່ຜ່ານມາ, ພ້ອມກັນນັ້ນກໍຍັງມີເນື້ອໃນໃໝ່, ແລະມີການຊຸກຍູ້ໃໝ່. ເວົ້າໃນດ້ານຮູບການແລ້ວ, ປີນີ້ກໍພົ້ນເດັ່ນກວ່າແຕ່ກ່ອນ, ເມື່ອທຽບກັບເມື່ອກ່ອນແລ້ວ ມີທັງການສືບທອດແລະການພັດທະນາ.
ທ່ານຈ່າງຢູແນະນຳວ່າ, ການເຄື່ອນໄຫວໃນປີນີ້ຍິ່ງເນັ້ນໜັກຄວາມຫລາກຫລາຍຂອງວັດທະນະທຳ ສິລະປະແລະເຂດແຄວ້ນ. ຄະນະສິລະປະທີ່ມີທຳນອງຕ່າງກັນຄືຄະນະດົນຕີປະສານສຽງແຟງລັງ, ຄະນະຫຼີ້ນກົນຂອງຍີ່ປຸ່ນ, ຄະນະຮ້ອງແລະຟ້ອນຂອງກົງໂກ, ຄະນະດົນຕີລອກແອນໂລນອາເມລິກາແລະຄະນະດົນຕີສະໄໝນິຍົມຣັດເຊຍເປັນຕົ້ນຈະສະແດງໃນງານສິລະປະທີ່ຈະດຳເນີນໄປເປັນເວລາ 30 ກວ່າມື້. ນອກນີ້, ການເຄື່ອນໄຫວປີວັດທະນະທຳຝຣັ່ງພວມຈັດຂຶ້ນຢູ່ປັກກິ່ງ, ປີນີ້ຍັງແມ່ນປີທີ່ລະລຶກສະຫະພາບເອີລົບສ້າງສາຍສຳພັນການທູດກັບຈີນຄົບຮອບ 30 ປີ, ສະນັ້ນ, ຄະນະສິລະປະທັງຫລາຍທີ່ມາຈາກເອີລົບໄດ້ປະຈັກຕາຄົນເປັນພິເສດ. ໃນນັ້ນ, ຄະນະດົນຕີປະສານສຽງແຫ່ງຊາດດານມາກຈະສະແດງໃນພິທີປິດງານ"ນັດພົບທີ່ປັກກິ່ງ"ຄັ້ງນີ້, ຄະນະລະບຳບານເລຝຣັ່ງຈະສະແດງລະຄອນເລື່ອງ"ທ່ານໂລເມໂອກັບນາງຈູລຽດ"ທີ່ແຕ່ງໂດຍທ່ານເຊັກສຼເປຍດ້ວຍລະບຳທັນສະໄໝ, ຄະນະສິລະປະແລະງານວາງສະແດງຂອງປະເທດຕ່າງໆຄືແບນຊິກ ແຟງລັງ ເຢຍລະມັນ ແລະນອກເວເປັນຕົ້ນກໍໄດ້ຈັດການສະແດງອັນຍອດຢ້ຽມໃນການເຄື່ອນໄຫວ"ນັດພົບທີ່ປັກກິ່ງ".
ການເຄື່ອນໄຫວ"ນັດພົບທີ່ປັກກິ່ງ"ໄດ້ປະກອບດ້ວຍຫລາຍພາກສ່ວນຄືການສະແດງຢູ່ໂຮງລະຄອນ, ການສະແດງຢູ່ສະໜາມຫລວງ, ແລະການວາງສະແດງສິລະປະເປັນຕົ້ນ. ການສະແດງຢູ່ສະໜາມຫລວງປີນີ້ພໍດີກົງກັບວັນກຳມະກອນສາກົນ 1 ພຶດສະພາ, ສິນລະປິນຂອງບັນດາປະເທດໄດ້ໄປຮອດສວນອຸທິຍານແລະສະໜາມຫລວງຈຳນວນໜຶ່ງໃນນະຄອນປັກກິ່ງ, ຈັດການສະແດງອັນໜ້າຊົມໃຫ້ໄທເມືອງທີ່ພວມພັກຜ່ອນ. ພວກເຂົາເຈົ້າໄດ້ຕ້ອນຮັບນັກທ່ອງທ່ຽວທຸກໆທ່ານດ້ວຍການສະແດງອັນຟົດຟື້ນແລະສິນລະປະທີ່ດີເລີດ.
ຄະນະດົນຕີເພດຍິງແຊງມາລີຂອງນິວຊີແລນໄດ້ຮອງເພງຮັບຕ້ອນແຂກເພງໜຶ່ງ. ໃນເວລາໃຫ້ສຳພາດຕໍ່ນັກຂ່າວ, ທ່ານປາຕຼີວາ ຫົວໜ້າຄະນະດົນຕີເວົ້າດ້ວຍຄວາມກະຕຸ້ນໃຈວ່າ:
ຂ້າພະເຈົ້າເຫັນວ່າ, ງານສິລະປະ"ນັດພົບທີ່ປັກກິ່ງ"ໄດ້ເພີ່ມມິດຕະພາບຂອງພວກເຮົາ, ໂດຍສະເພາະແມ່ນຊາວໜຸ່ມ, ຄົນຈີນເປັນຄົນທີ່ມີຄວາມຈູບຈ້າວ, ມັກແຂກມັກຄົນ. ຂ້າພະເຈົ້າຮູ້ສຶກດີໃຈຫລາຍ.
ທ່ານຜູ້ຟັງ, ປັດຈຸບັນ, ການເຄື່ອນໄຫວ"ນັດພົບທີ່ປັກກິ່ງ"ຄັ້ງທີ 5 ພວມຈັດຂຶ້ນຢູ່ປັກກິ່ງ, ດົນຕີບູຮານກັບດົນຕີສະໄໝນິຍົມ, ຄວາມດັ້ງເດີມກັບທັນສະໄໝ, ຮີດຄອງປະເພນີອາເມລິກາລາຕີນທີ່ເສລີແລະຟົດຟື້ນ, ລົດນິຍົມອັດລັງຕິກທີ່ມີຂັງຫວະໄວແລະຈະແຈ້ງ, ຈັງຫວະອາເມລິກາເໜືອທີ່ນິຍົມຊົມຊອບໃນປັດຈຸບັນ, ພ້ອມດ້ວຍພື້ນສືບອາຊີເອີລົບໃນສະໄໝບູຮານ, ເຮັດໃຫ້ຜູ້ຊົມປັກກິ່ງໄດ້ສຳຜັດຄວາມຫລາກຫລາຍຂອງວັດທະນະທຳບັນດາປະເທດຢ່າງເຕັມສ່ວນ.
|
|
|
