|
|
 |
| (GMT+08:00)
2005-05-27 17:02:11
|
 |
|
ສຸຂະພາບເຄິ່ງແຂງແຮງ
cri
Author: li
 ຂໍໃຫ້ທ່ານລອງຄຶດເບິ່ງວ່າ,ທ່ານມີຄວາມຮູ້ສຶກແນວນີ້ເລື້ອຍໆບໍ່ຄື ບາງທີໃຈສັ່ນ,ຫາຍໃຈຝືດ,ອ່ອນເພຍໝົດຄີງ,ແຕ່ໃບບັນທຶກຄື້ນໄຟຟ້າຂອງຫົວໃຈພັດປົກກະຕິ,ບາງທີເຈັບຫົວ,ວິນຫົວ,ແຕ່ເລືອດດັນແລະພາບຄື້ນໄຟຟ້າສະໝອງບໍ່ມີບັນຫາ. ຖ້າເປັນແນວນັ້ນ,ສຸຂະພາບຂອງທ່ານກໍອາດຈະຢູ່ໃນສະພາບເຄິ່ງແຂງແຮງ,ກໍແມ່ນສະພາບສີຂີ້ເທົ່າແລະຄົນເຄິ່ງແຂງແຮງທີ່ມັກເວົ້າກັນ.
"ເຄິ່ງແຂງແຮງ"ໝາຍເຖິງຮ່າງກາຍຢູ່ໃນສະພາວະລະຫວ່າງສຸຂະພາບເຂັ້ມແຂງກັບເປັນພະຍາດ,ກໍວ່າພະຍາດອິດເໝື່ອຍຊຳເຮື້ອຫຼືສະພາບທີສາມ. ນັກແພດສາດຂອງບັນດາປະເທດໃນໂລກລ້ວນແຕ່ໄດ້ຄົ້ນຄວ້າສະພາບເຄິ່ງແຂງແຮງຢ່າງຫຼວງຫຼາຍ,ແຕ່ຈົນຮອດຊູ່ມື້ນີ້ ພວກເພີ່ນກໍບໍ່ໄດ້ຊອກພົບປັດໄຈພິເສດຫຍັງທີ່ພາໃຫ້ເປັນແບບນີ້,ແພດສາດປັດຈຸບັນກໍບໍ່ໄດ້ຊອກເຫັນມູນເຫດແລະກົນໄກພາໃຫ້ບໍ່ສະບາຍ,ສະນັ້ນ ຈຶ່ງຂາດເຂີນວິທີປິ່ນປົວທີ່ໄດ້ຜົນແທ້ຈິງ.
ການສຳຫຼວດສະແດງໃຫ້ເຫັນວ່າ,ຜູ້ທີ່ເຮັດວຽກຄຸ້ມຄອງວິສາຫະກິດແລະການເຄື່ອນໄຫວການຄ້າຈະມີສະພາບບໍ່ສະບາຍທີ່ວ່າມານັ້ນຫຼາຍແດ່. ຕາມສະຖິຕິ,ຜູ້ທີ່ຢູ່ໃນສະພາວະເຄິ່ງແຂງແຮງຄືບໍ່ສະບາຍນັ້ນສ່ວນຫຼາຍອາຍຸຢູ່ໃນລະຫວ່າງ 20 ປີຮອດ 45 ປີ.
ອາການບໍ່ສະບາຍມັກຖືກບົ່ງມະຕິເປັນພະຍາດສັງລວມຍ້ອນອິດເໝື່ອຍ,ນ້ຳຊຶມພາຍໃນຮ່າງກາຍເສຍຄວາມດຸນດ່ຽງ,ເສັ້ນປະສາດອ່ອນແລະພະຍາດໝົດລະດູປັນຕົ້ນ. ອາການໃນດ້ານຈິດໃຈແມ່ນ:ຈິດໃຈບໍ່ຊື່ນ,ກະທົບຕອບຊ້າ,ນອນບໍ່ຫຼັບ,ຝັນຫຼາຍ,ຫົວນອນໃນຍາມກາງເວັນ,ໃຈບໍ່ຕ້ອມ,ຄວາມຊົງຈຳເສື່ອມ,ໝຸດໝັດ,ໃຈຮ້ອນ,ມັກຕື່ນເປັນຕົ້ນ,ອາການໃນດ້ານຮ່າງກາຍແມ່ນມັກເໝື່ອຍ,ອ່ອນເພຍ,ຫາຍໃຈຝືດໃນເວລາຫັດກາຍ,ເຫື່ອອອກຫຼາຍ,ເຈັບແອວເຈັບຫຼັງປວດແຂ່ງປວດຂາເປັນຕົ້ນ. ນອກນີ້,ຍັງອາດຈະມີອາການລະບົບເສັ້ນເລືອດຫົວໃຈເຊັ່ນຫົວໃຈສັ່ນ,ໃຈເຕັ້ນບໍ່ສະໝ່ຳສະເໝີເປັນຕົ້ນ.
ການຄົ້ນຄວ້າຂອງຜູ້ຊ່ຽວຊານທີ່ກ່ຽວຂ້ອງສະແດງໃຫ້ເຫັນວ່າ,ປັດໄຈທີ່ພາໃຫ້ບໍ່ສະບາຍເລື້ອຍໆນັ້ນມີຫຼາຍຂໍ້ດັ່ງລຸ່ມນີ້ຄື:
ໜຶ່ງ,ຍ້ອນວ່າການແກ່ງແຍ່ງແຂ່ງຂັນກັນນັບມື້ນັບດຸເດືອດ,ຄົນເຮົາຕ້ອງໃຊ້ສະໝອງແລະຄຶດຫຼາຍເກີນໄປ,ອະໄວຍະວະສຳຄັນໃນຮ່າງກາຍຢູ່ໃນສະພາບຫາບແບກໜັກເກີນໄປເປັນເວລາຍາວນານ.
ສອງ,ຍ້ອນຮ່າງກາຍເຖົ້າເຂົ້າໄປເລື້ອຍໆຈຶ່ງປະກົດວ່າ,ແຮງບໍ່ພໍ,ກຳລັງວັງຊາບໍ່ພຽງພໍ,ເສັ້ນປະສາດກໍອ່ອນລົງ,ບໍ່ສາມາດສອດຄ່ອງກັບສະພາບແວດລ້ອມ.
ສາມ,ອາດຈະແມ່ນໄລຍະຕົ້ນຂອງພະຍາດເສັ້ນເລືອດຫົວໃຈແລະສະໝອງແລະຊີ້ນປົ່ງເປັນຕົ້ນ. ກ່ອນເປັນພະຍາດ,ຮ່າງກາຍຈະບໍ່ມີການປ່ຽນແປງເປັນພະຍາດ,ໃນໄລຍະເວລາຍາວນານສົມຄວນ,ແຕ່ໃນດ້ານສັບພະຄຸນຂອງອະໄວຍະວະໃດໜຶ່ງໄດ້ຕິດຂັດແລ້ວ,ຕົວຢ່າງຄືຫາຍໃຈຝືດ,ວິນຫົວ,ຕາລາຍ,ນອນບໍ່ຫຼັບແລະຂີ້ລືມ.
ສີ່,ໄລຍະກະແສຕ່ຳຂອງຮອບວຽນຊີວະຊາດໃນຮ່າງກາຍຂອງຄົນ. ຈະແມ່ນຄົນແຂງແຮງ,ກໍອາດຈະຢູ່ໃນສະພາວະບໍ່ສະບາຍໃນໄລຍະອັນແນ່ນອນ.ຖ້າຢູ່ໃນສະພາວະເຄິ່ງແຂງແຮງທີ່ບໍ່ສະບາຍກໍຄວນບຳລຸງຮ່າງກາຍ. ວິທີຕ້ານກັບການບໍ່ສະບາຍທີ່ວິທະຍາສາດກວ່າໝູ່ແມ່ນຮັບປະກັນໃຫ້ມີທາດບຳລຸງຢ່າງສະໝ່ຳສະເໝີ. ໃນຊີວິດປະຈຳວັນ,ອາຫານແຕ່ລະມື້ຕ້ອງຮັບປະກັນບໍ່ໃຫ້ຂາດທາດບຳລຸງທີ່ຮ່າງກາຍຕ້ອງການຈັກຢ່າງເຊັ່ນນ້ຳຕານ,ໂປຼຕິນ,ໄຂມັນ,ທາດແຮ່ແລະວິຕາມິນເປັນຕົ້ນ. ພ້ອມກັນນັ້ນ ຍັງຄວນເອົາໃຈໃສ່ສອງດ້ານໃນອາຫານການກິນຄື,ໜຶ່ງແມ່ນຢ່າໃຫ້ທາດບຳລຸງແລະກາໂລລີຫຼາຍເກີນຄວາມຕ້ອງການ;ສອງແມ່ນຢ່າອົດອາຫານເພື່ອຈຸດປະສົງໃດໜຶ່ງຈົນພາໃຫ້ຂາດທາດບຳລຸງໃດໜຶ່ງແລະກາໂລລີບໍ່ພຽງພໍ. ເພາະຄວາມຜິດພາດສອງຢ່າງດັ່ງກ່າວລ້ວນແຕ່ຈະພາໃຫ້ຮ່າງກາຍຕົກຢູ່ໃນສະພາວະບໍ່ສະບາຍຄືເຄິ່ງແຂງແຮງ. ເວົ້າລະອຽດແລ້ວກໍແມ່ນ,ຜູ້ໄວກາງຄົນທີ່ແຂງແຮງຕ້ອງການ 1500 ກາໂລລີຕໍ່ມື້,ຜູ້ທີ່ເຮັດວຽກຫຼາຍຕ້ອງການ 2000 ກາໂລລີຕໍ່ມື້,ການເພີ່ມທາດບຳລຸງເລື້ອຍໆແມ່ນປະຖົມປັດໄຈທີ່ຈະຮັກສາກຳລັງວັງຊາຂອງຄົນເຮົາ.
|
|
|
