|
|
 |
| (GMT+08:00)
2005-05-27 20:32:51
|
 |
|
ການພົວພັນຈີນມາເລເຊຍກ້າວເຂົ້າສູ່ໄລຍະໃໝ່ທີ່ຂະຫຍາຍຕົວຮອບດ້ານ
cri
Author: da
ຕາມຂ່າວສານຊິນຮວາ:ແຕ່ຈີນມາເລເຊຍສ້າງການພົວພັນທາງການທູດ 31 ປີມານີ້,ການພົວພັນມິດຕະພາບແລະຮ່ວມມືລະຫວ່າງສອງປະເທດໄດ້ຂະຫຍາຍຕົວຢ່າງໜັກແໜ້ນ.ໂດຍສະເພາະແມ່ນໃນ 10 ກວ່າປີມານີ້,ຄວາມໄວ້ເນື້ອເຊື່ອໃຈທາງການເມືອງລະຫວ່າງສອງປະເທດໄດ້ເພີ່ມທະວີຂຶ້ນຢ່າງບໍ່ຢຸດຢັ້ງ,ການຮ່ວມມືທາງເສດຖະກິດການຄ້າກໍພັດທະນາຢ່າງໄວວາ,ການແລກປ່ຽນທາງການສຶກສາວັດທະນະທຳແລະການທ່ອງທ່ຽວ ແລະການໄປມາຫາສູ່ກັນລະຫວ່າງປະຊາຊົນທັງສອງຊາດນັບມື້ນັບຫຼາຍຂຶ້ນ,ການພົວພັນຮ່ວມມືທີ່ສະເໝີພາບແລະຕ່າງຝ່າຍຕ່າງມີຜົນປະໂຫຍດລະຫວ່າງສອງຝ່າຍໄດ້ຂຶ້ນສູ່ໄລຍະໃໝ່ທີ່ຂະຫຍາຍພົວຮອບດ້ານ.
ແຕ່ສອງປະເທດສ້າງການພົວພັນທາງການທູດໃນວັນທີ 31 ພຶດສະພາປີ 1974 ເປັນຕົ້ນມາ,ການພົວພັນສອງຝ່າຍຈີນມາເລເຊຍໄດ້ເປີດໜ້າໃໝ່.ໃນຫຼາຍປີມານີ້,ຜູ້ນຳສອງປະເທດຢ້ຽມຢາມເຊິ່ງກັນແລະກັນເປັນຫຼາຍເທື່ອ,ນີ້ໄດ້ສ້າງພື້ນຖານອັນໜາແໜ້ນໃຫ້ແກ່ການຂະຫຍາຍການພົວພັນລະຫວ່າງສອງຝ່າຍ.ຜູ້ນຳຈີນຄືທ່ານຈຽງເຈີມິນແລະທ່ານຈູຢົງຈີເຄີຍຢ້ຽມຢາມມາເລເຊຍ,ທ່ານມາຮາເຕຍ ອະດີດນາຍົກລັດຖະມົນຕີມາເລເຊຍກໍເຄີຍຢ້ຽມຢາມຈີນ 7 ເທື່ອ.ໃນເວລາຢ້ຽມຢາມຈີນໃນເດືອນພຶດສະພາປີກາຍນີ້, ທ່ານບາຕາວີ ນາຍົກລັດຖະມົນຕີມາເລເຊຍໄດ້ເຈລະຈາກັບທ່ານຫູຈີນທາວ ປະທານປະເທດແລະທ່ານເວີນເຈຍປາວ ນາຍົກລັດຖະມົນຕີ,ສອງຝ່າຍມີຄວາມເຫັນເປັນເອກະສັນກັນຢ່າງກວ້າງຂວາງໃນການຂະຫຍາຍການພົວພັນລະຫວ່າງສອງຝ່າຍແລະບັນຫາສາກົນທີ່ສົນໃຈນຳກັນ.ເນື່ອງໃນໂອກາດສອງປະເທດສ້າງການພົວພັນທາງການທູດຄົບຮອບ 31 ປີ,ທ່ານອູປາງໂກ ປະທານຄະນະປະຈຳສະພາປະຊາຊົນແຫ່ງຊາດຈີນຈະຢ້ຽມຢາມມາເລເຊຍໃນວັນທີ 28 ພຶດສະພາ,ນີ້ຈະສ້າງຄວາມຊີວິດຊີວາໃໝ່ແກ່ການຂະຫຍາຍການພົວພັນລະຫວ່າງສອງຝ່າຍ.
ແຕ່ປີ 1985 ເປັນຕົ້ນມາ,ສອງປະເທດໄດ້ເຊັນເອກະສານຮ່ວມມື 13 ສະບັບເຊັ່ນ:"ສັນຍາການຄ້າລັດຖະບານ","ສັນຍາການບິນ","ເອກະສານໂຄງລ່າງກ່ຽວກັບການຮ່ວມມືຮອບດ້ານທີ່ເດີນໄປສູ່ສະຕະວັດທີ 21 "ແລະ"ບົດບັນທຶກຊ່ອຍຈຳຮ່ວມມືທາງການສຶກສາລະຫວ່າງຈີນມາເລເຊຍ"ເປັນຕົ້ນ,ອັນໄດ້ຊຸກຍູ້ການພົວພັນສອງຕໍ່ສອງຂະຫຍາຍໄປສູ່ທິດຮອບດ້ານຢ່າງສະດວກ.ນອກນີ້,ສອງປະເທດຍັງຊອກຫາຊ່ອງທາງໃໝ່ແຫ່ງການເພີ່ມທະວີການຮ່ວມມືສອງຕໍ່ສອງແລະຢູ່ພາກພື້ນ ພາຍໃຕ້ຂອບ"ອາຊຽນ-ຈີນ"ແລະ"ອາຊຽນ-ຈີນ ຍີ່ປຸ່ນ ສ.ເກົາຫຼີ".
ຈີນແລະມາເລເຊຍແມ່ນປະເທດພວມພັດທະນາ,ລ້ວນແຕ່ອອກແຮງພັດທະນາເສດຖະກິດຂອງປະເທດຕົນ.ການຮ່ວມມືທາງເສດຖະກິດແລະການຄ້າລະຫວ່າງສອງປະເທດໄດ້ພັດທະນາຢ່າງວ່ອງໄວ,ແມ່ນຈຸດຮຸ່ງໃນການຂະຫຍາຍຕົວແຫ່ງການພົວພັນລະຫວ່າງສອງຝ່າຍ.ເສດຖະກິດຂອງຈີນແລະມາເລເຊຍສາມາດຕາບຈູນກັນຫຼາຍ,ຜະລິດຕະພັນຂອງສອງປະເທດແມ່ນຂາຍດີຂາຍດິບຢູ່ຕະຫຼາດຝ່າຍກົງກັນຂ້າມ,ນີ້ໄດ້ສະໜອງເງື່ອນໄຂທີ່ດີໃຫ້ສອງຝ່າຍອອກແຮງພັດທະນາການຄ້າ,ຍອດມູນຄ່າການຄ້າຂອງສອງຝ່າຍໄດ້ເພີ່ມຂຶ້ນໃນຫຼາຍປີຕິດໆກັນ.ຕາມສະຖິຕິ,ຍອດມູນຄ່າການຄ້າຈີນມາເລເຊຍໃນປີ 2004 ໄດ້ບັນລຸ 26 ຕື້ 200 ລ້ານໂດລາສະຫະລັດ,ເຊິ່ງເພີ່ມຂຶ້ນຫຼາຍກວ່າປີ 2003 30%,ເມື່ອທຽບກັບປີ 1995,ໄດ້ເພີ່ມຂຶ້ນເກືອບ 7 ເທົ່າ.
ພ້ອມກັນນັ້ນ,ໂຄງການທີ່ມາເລເຊຍລົງທຶນຢູ່ຈີນໂດຍກົງໃນປີ 2004 ມີ 352 ໂຄງການ,ມູນຄ່າໃນຂໍ້ຜູກພັນຫຼາຍເຖິງ 1 ຕື້ 300 ລ້ານໂດລາສະຫະລັດ,ເຊິ່ງເພີ່ມຂຶ້ນຫຼາຍກວ່າປີ 2003 35%.ໂຄງການລົງທຶນຂອງມາເລເຊຍຢູ່ຈີນ ນັບລວມແລ້ວມີ 3200 ກວ່າໂຄງການ,ຍອດມູນຄ່າການລົງທຶນຕົວຈິງມີປະມານ 3 ຕື້ 500 ລ້ານໂດລາສະຫະລັດ.ນັບມາຮອດທ້າຍປີ 2004,ໂຄງການຕ່າງໆທີ່ຝ່າຍຈີນຮັບເໝົາຢູ່ມາເລເຊຍນັ້ນມີເຖິງ 1400 ກວ່າໂຄງການ,ມູນຄ່າໃນຂໍ້ຜູກພັນມີ 3 ຕື້ກວ່າໂດລາສະຫະລັດ.
ນອກນີ້,ການແລກປ່ຽນລະຫວ່າງສອງປະເທດໃນດ້ານວັດທະນະທຳ ການສຶກສາແລະການທ່ອງທ່ຽວເປັນຕົ້ນ,ໂດຍສະເພາະແມ່ນການໄປມາຫາສູ່ກັນຂອງປະຊາຊົນໃນຂົງເຂດເຫຼົ່ານີ້ໄດ້ເພີ່ມຂຶ້ນຫຼາຍ.ຄະນະສີລະປະວັດທະນະທຳແລະກິລາຂອງສອງຝ່າຍໄດ້ຢ້ຽມຢາມເຊິ່ງກັນແລະກັນເລື້ອຍໆ,ນັກສຶກສາມາເລເຊຍຢູ່ຈີນກໍເພີ່ມຂຶ້ນຫຼາຍ,ປະຈຸບັນມີເຖິງ 1 ໝື່ນກວ່າຄົນ.ຈຳນວນຜູ້ທ່ອງທ່ຽວຂອງຈີນແລະຂອງມາເລເຊຍໃນປີ 2004 ລວມເຂົ້າກັນແລ້ວ ມີປະມານ 1 ລ້ານ 3 ແສນຄົນ.ປະຊາຊົນຂອງສອງປະເທດຢ້ຽມຢາມແລະຕິດຕໍ່ພົວພັນກັນຢ່າງກວ້າງຂວາງ,ເຮັດໃຫ້ມິດຕະພາບແລະຄວາມເຂົ້າໃຈກັນລະຫວ່າງປະຊາຊົນທັງສອງປະເທດລົງສູ່ລວງເລິກຕື່ມອີກ.
ມາເລເຊຍຍຶດໝັ້ນຫຼັກໝັ້ນຈີນດຽວ.ໃນວຽກງານສາກົນ,ຈີນແລະມາເລເຊຍເອົາໃຈໃສ່ນຳການປະສານງານແລະການຫາລຶກັນ,ສະໜັບສະໜູນເຊິ່ງກັນແລະກັນ,ປະສານສົມທົບກັນ,ມີທັດສະນະຄືກັນໃນບັນຫາສາກົນທີ່ສຳຄັນ,ໄດ້ພ້ອມກັນທຳຄວາມພະຍາຍາມຢ່າງບໍ່ລົດລະເພື່ອຊຸກຍູ້ສັນຕິພາບແລະການພັດທະນາຂອງໂລກ.
|
|
|
