ຕາມ​ຂ່າວສານ​ຊິນ​ຮວາ: ​ໃນ​ງານ​ຖະ​ແຫຼງຂ່າວ​ທີ່​ຈັດ​ຂຶ້ນ​ໃນ​ຕອນ​ບ່າຍ​ວັນ​ທີ 28 ພຶດ​ສະ​ພາ​ນີ້, ທ່ານ​ຢູຊຸ​ຟ ຄານລາ ຮອງ​ປະທານາທິບໍດີ​ອິນ​ໂດ​ເນ​ເຊຍ​ກ່າວ​ວ່າ, ​ເຫດການ​ລະ​ເບີດ​ສອງ​ລາຍ​ທີ່​ເກີດ​ຂຶ້ນຢູ່​ແຂວງ​ແຊນ​​ໂທຼວ ຊູ​ລາ​ແວ​ຊີ​ແຫ່ງ​ອິນ​ໂດ​ເນ​ເຊຍ​ໃນ​ຕອນ​ເຊົ້າມື້​ດຽວ​ກັນ ​ໄດ້​ເຮັດ​ໃຫ້ 22 ຄົນ​ຕາຍ 57 ຄົນ​ບາດ​ເຈັບ.

ທ່ານຄານລາ​ໄດ້​ກ່າວ​ປະນາມ​ຢ່າງ​ຮຸນ​ແຮງ​ຕໍ່​ເຫດການ​ລະ​ເບີດ, ​ແລະ​ສັ່ງ​ໃຫ້​ທະຫານ​ແລະ​ຕຳ​ຫຼວດ​ອິນ​ໂດ​ເນ​ເຊຍ​ສຳຫຼວດ​ເຫດການ​ດັ່ງກ່າວ​ຢ່າງຮອບດ້ານ.

​ໃນ​ມື້​ດຽວ​ກັນ ​ໂຄສົກ​ກົມ​ໃຫຍ່​ຕຳຫຼວດ​ແຫ່ງ​ຊາດ​ອິນ​ໂດ​ເນ​ເຊຍ​ກ່າວ​ວ່າ, ​ໃນ​ເຫດ​ການ​ລະ​ເບີດ ບໍ່​ມີ​ຄົນ​ຕ່າງປະ​ເທດ​ເສຍ​ຊີວິດ. ທ່ານ​ກ່າວ​ວ່າ ອາດ​ຈະ​ແມ່ນ​ອົງການ​ການ​ທະ​ຫານ​ຫົວ​ຈັດ​ໃດໜຶ່ງ​ຢູ່​ອາຊີ​ອາຄະ​ເນ​ກໍ່​ເຫດການ​ລະ​ເບີດ​ດັ່ງກ່າວ.