|
ປີນີ້ແມ່ນປີທີ່ສົງຄາມຈີນຕໍ່ຕ້ານຍີ່ປຸ່ນແລະສົງຄາມຕ້ານຟັດຊິດໂລກໄດ້ຮັບໄຊຊະນະຄົບຮອບ60ປີ.ພວກເຮົາຈະສະເໜີເລື່ອງທີ່ຈີນດັດສ້າງອາດຊະຍາກອນຍີ່ປຸ່ນໃນສົງຄາມໂລກຄັ້ງທີສອງເມື່ອ40ປີກ່ອນ.
ສະຖານທີ່ຄຸ້ມຄອງອາຊະຍາກອນສົງຄາມ
ຢູ່ແຂວງລຽວນິງ ພາກຕາເວັນອອກສຽງເໜືອຂອງຈີນ,ມີຕົວເມືອງໜື່ງທີ່ມີຊື່ສຽງຍ້ອນຜະລິດຖ່ານຫິນ,ນັ້ນກໍຄືເມືອງຟູຊຸ້ນ.ແມ່ນ້ຳສາຍໃຫຍ່ໄຫຼຜ່ານເມືອງດັ່ງກ່າວ,ແບ່ງເມືອງນີ້ເປັນສອງພາກສ່ວນ,ຄືພາກເໜືອແລະພາກໃຕ້.ຢູ່ຝັ່ງໃຕ້ແມ່ນ້ຳ,ມີຫໍລະລຶກໂທດກຳສັງຫານໂຫດພິງຕິງຊ່ານ,ແຫ່ງນັ້ນມີຮ່ອງຮອຍທີ່ກອງທະຫານຍີ່ປຸ່ນຮຸກຮານຈີນເຂັ່ນຂ້າຮາວີສາມັນຊົນຈີນທີ່ບໍ່ມີໂທດຫຍັງ3ພັນກວ່າຄົນ.ສ່ວນຢູ່ຝັ່ງເໜືອແມ່ນ້ຳ,ມີສະຖານທີ່ຄຸ້ມຄອງອາຊະຍາກອນສົງຄາມແຫ່ງໜຶ່ງ,ເຄີຍມີອາຊະຍາກອນສົງຄາມຍີ່ປຸ່ນໃນສົງຄາມໂລກຄັ້ງທີສອງເກືອບ1ພັນຄົນໄດ້ຮັບການດັດສ້າງຢູ່ແຫ່ງນັ້ນ.ພວກເຂົາເຈົ້າບໍ່ມີຜູ້ໃດຖືກຕັດສິນປະຫານຊີວິດ,ເມື່ອໄດ້ຜ່ານການດັດສ້າງເປັນເວລາ6ຮອດ8ປີແລ້ວ,ພວກເຂົາເຈົ້າຖືກປ່ອຍຕົວກັບຄືນປະເທດຍ້ອນນະໂຍບາຍອະໄພໂທດຂອງຈີນ.
ຢູ່ສອງຝັ່ງແມ່ນ້ຳດັ່ງກ່າວ,ພົນລະເມືອງຈີນແລະຍີ່ປຸ່ນພັດມີຊາຕາກຳທີ່ແຕກຕ່າງກັນໝົດ.ໃນສົງຄາມເມື່ອ60ປີກ່ອນ,ພວກລັດທິລັດຖະທະຫານຍີ່ປຸ່ນໄດ້ເຂັ່ນຂ້າຮາວີສາມັນຊົນຈີນ,ຂຸດຊັບພະຍາກອນບໍ່ແຮ່ຕ່າງໆເຊັ່ນຖ່ານຫິນເປັນຕົ້ນແບບປຸ້ນສະດົມ,ໄດ້ສ້າງໂທດກຳອັນລົ້ນຟ້າເຫຼືອແຜ່ນດິນຕໍ່ປະຊາຊົນຈີນ.ພາຍຫຼັງສົງຄາມໂລກຄັ້ງທີສອງສິ້ນສຸດລົງແລ້ວ,ລັດຖະບານຈີນໄດ້ເລີ່ມຈາກມະນຸດສະທຳ,ໃຫ້ການສຶກສາແບບມະນຸດສະຍະພາບ ແກ່ອາຊະຍາກອນສົງຄາມຍີ່ປຸ່ນທີ່ຖືກກັກຂັງ,ເຮັດໃຫ້ພວກເຂົາເຈົ້າປ່ຽນຈາກພວກກະຫາຍສົງຄາມມາເປັນທູດສັນຕິພາບ,ເຊິ່ງໄດ້ສ້າງເລື້ອງອັດສະຈັນ.
ທ່ານຢາມາກູຊິ ອີໂຊ ແມ່ນອະດີດອາຊະຍາກອນສົງຄາມທີ່ໄດ້ຮັບການດັດສ້າງຢູ່ຈີນແລ້ວກັບຄືນຍີ່ປຸ່ນ.ເຖິງວ່າທ່ານມີອາຍຸ80ກວ່າປີແລ້ວກໍຕາມ,ແຕ່ເມື່ອກ່າວເຖິງປະສົບການທີ່ຮັບການດັດສ້າງຢູ່ຈີນ,ທ່ານຍັງຈື່ໄດ້ຢ່າງແຈ່ມແຈ້ງ,ທ່ານເວົ້າວ່າ:
"ຢູ່ສະຖານທີ່ຄຸ້ມຄອງອາຊະຍາກອນສົງຄາມທີ່ຟູຊຸ້ນຂອງຈີນ,ພວກເຮົາໄດ້ຮັບການປະຕິບັດຕໍ່ຢ່າງມີມະນຸດສະທຳທີ່ສຸດ,ພວກເຮົາໄດ້ຮັບການດັດສ້າງແນວຄິດ,ໄດ້ເຫັນແຈ້ງຄວາມຊົ່ວຮ້າຍຂອງສົງຄາມແລະໂທດກຳຂອງຕົນ,ເມືອງຟູຊຸ້ນແມ່ນບ່ອນທີ່ໃຫ້ຊີວິດໃໝ່ແກ່ຂ້ອຍ."
ເມື່ອຕົ້ນຊຸມປີ50ສະຕະວັດແລ້ວນີ້,ຢູ່ຈີນມີອາຊະຍາກອນສົງຄາມຍີ່ປຸ່ນທີ່ຄືກັນກັບທ່ານຢາມາກູຊິ ອີໂຊນັ້ນລວມ1062ຄົນ,ໃນນັ້ນ,ມີ969ຄົນຖືກກັກຂັງຢູ່ສະຖານທີ່ຄຸມຄອງອາຊາຍາກອນສົງຄາມຟູຊຸ້ນ.ຕາມສະຖິຕິ,ມີທະຫານແລະປະຊາຊົນຈີນເກືອບ1ລ້ານຄົນເສຍຊີວິດຢູ່ໃຕ້ດາບຂອງພວກມັນ,ສ່ວນຊັບສິນທີ່ຖືກພວກມັນຍຶດເອົາໄປຈາກຈີນນັ້ນຍິ່ງນັບບໍ່ຖ້ວນ.
ໂດຍປະເຊີນໜ້າກັບພວກກະຫາຍສົງຄາມຝູງໜຶ່ງທີ່ຖືກລັດທິລັດຖະທະຫານຍີ່ປຸ່ນລ້າງສະໝອງ,ລັດຖະບານຈີນໄດ້ໃຊ້ມາດຕະການທີ່ອົບຮົມບົ່ມນິດໄສພວກເຂົາເຈົ້າດ້ວຍຈິດໃຈມະນຸດສະທຳ,ເຮັດໃຫ້ພວກເຂົາເຈົ້າເຫັນແຈ້ງໂທດກຳຂອງຕົນເທື່ອລະກ້າວ.ທ່ານຊຸຍເຢິນເຈ ທີ່ເຄີຍເຮັດວຽກໃຫ້ການສຶກສາຄຸ້ມຄອງຢູ່ສະຖານທີ່ຄຸ້ມຄອງອາຊະຍາກອນສົງຄາມຟູຊຸ້ນໄດ້ຫວນຄືນວ່າ,ໃນຫົວທີ່ເມື່ອທ່ານຖືກແຕ່ງຕັ້ງໄປເຮັດວຽກດັ່ງກ່າວ,ທ່ານກໍບໍ່ຢາກໄປເຮັດ.ແຕ່ວ່າ,ຄືກັນກັບພະນັກງານອື່ນໆໃນສະຖານທີ່ຄຸ້ມຄອງ,ໃນທີ່ສຸດ,ພວກທ່ານຜ່ານຜ່າຄວາມຄຽດແຄ້ນສ່ວນຕົວ,ເຄົາລົບກຽດຂອງອາຊະຍາກອນສົງຄາມ,ອຳນວຍເງື່ອນໄຂດ້ານອາຫານການກິນ,ເຄື່ອງນຸ່ງຫົ່ມແລະວັດທະນະທຳເປັນຕົ້ນທີ່ດີທີ່ສຸດໃນຄາວນັ້ນໃຫ້ແກ່ອາຊະຍາກອນສົງຄາມ,ທ່ານເວົ້າວ່າ:
"ລະດັບຊີວິດການເປັນຢູ່ຂອງອາຊະຍາກອນສົງຄາມໄດ້ລື່ນກາຍລະດັບສະເລ່ຍຂອງຊາວຈີນໃນຄາວນັ້ນຕັ້ງຫຼາຍເທົ່າ.ອາຫານຫຼັກຂອງພວກເຂົາເຈົ້າແມ່ນເຂົ້າ,ແປ້ງໝີ່,ອາຫານສຳຮອງແມ່ນຊີ້ນ,ຜັກແລະໄຂ່,ໃຫ້ພວກເຂົາເຈົ້າກິນຕາມໃຈ.ໃນຊີວິດດ້ານວັດທະນະທຳ,ແຕ່ລະອາທິດ,ໃຫ້ພວກເຂົາເຈົ້າເບິ່ງຮູບເງົາເລື່ອງໜຶ່ງຫຼືສອງເລື່ອງ,ຮ່ຳຮຽນເຄິ່ງມື້,ອ່ານໜັງສື,ເຂົ້າຮ່ວມການເຄື່ອນໄຫວວັດທະນະທຳແລະກິລາ ເຄິ່ງມື້."
ພະນັກງານທັງໝົດທີ່ໃຫ້ການສຶກສາຄຸ້ມຄອງທັງໝົດລ້ວນແຕ່ເວົ້າພາສາຍີ່ປຸ່ນເປັນ,ພວກເຂົາເຈົ້າໄດ້ສະແດງຄວາມເອົາໃຈໃສ່ ໃນເລື່ອງເລັກໆນ້ອຍໆໃນຊີວິດປະຈຳວັນ, ພວກອາຊະຍາກອນສົງຄາມ ຄ່ອຍໆຟື້ນຟູສັນດານເກົ່າອັນບໍ່ດີ.ຜ່ານຈາກວິທີຕ່າງໆເຊັ່ນຮ່ຳຮຽນທິດສະດີ,ຈັດຕັ້ງໜ່ວຍ ຊ່ອຍເຫຼືອກັນເປັນຕົ້ນ,ອາຊະຍາກອນສົງຄາມທັງຫຼາຍໄດ້ທະຍອຍກັນເຫັນແຈ້ງຄວາມຊົ່ວຮ້າຍຂອງສົງຄາມ,ໄດ້ຮັບຮູ້ໂທດກຳຂອງຕົນ,ແລະຮ້ອງຂໍໃຫ້ລັດຖະບານຈີນລົງໂທດຕົນຢ່າງໜັກ.
1 2 3
|
