|
ຕຳລາອາຫານເຊົ້າທີ່ມີທາດບຳລຸງ
cri
Author: li
ອາຫານເຊົ້າຄວນກິນຫຍັງແດ່? ທຳມະດາແລ້ວ,ຄົນເຮົາຕື່ນເຊົ້າມາ,ການຮັບເອົາທາດບຳລຸງແມ່ນມີຈຳກັດເພາະກິນບໍ່ຫຼາຍ,ສະນັ້ນ ນາຍໝໍຈຶ່ງສະເໜີໃຫ້ກິນອາຫານທາດແຫຼວເປັນຫຼັກ,ແລະກິນອາຫານແຫ້ງເລັກໜ້ອຍ. ການເພີ່ມນ້ຳແກ່ຮ່າງກາຍແມ່ນສຳຄັນທີ່ສຸດ,ແຕ່ນ້ຳລ້າໆບໍ່ມີທາດບຳລຸງປານໃດ,ຈຶ່ງຄວນກິນນ້ຳນົມດີກວ່າ. ໃນນ້ຳນົມມີແຄນຊຽມ,ໂປຼຕິນແລະວິຕາມິນຢ່າງຫຼວງຫຼາຍທີ່ຮ່າງກາຍຕ້ອງການ,ສາມາດຕອບສະໜອງຄວາມຕ້ອງການທາດບຳລຸງຂອງຮ່າງກາຍ. ຕອນເຊົ້າກິນນ້ຳນົມຈອກໜຶ່ງ,ທາດຫວານໃນນ້ຳນົມຈະຊ່ອຍໃຫ້ຮ່າງກາຍຮັບເອົາທາດບຳລຸງ,ອາຫານເຊົ້າທີ່ເໝາະສົມຄວນແມ່ນນ້ຳນົມຈອກໜຶ່ງ,ໝາກໄມ້ສົດຫຼືຜັກພໍປະມານ,ເຂົ້າຈີ່ 100 ກຼາມຫຼືອາຫານທີ່ເຮັດດ້ວຍແປ້ງເຊັ່ນເຂົ້າໜົມປັງອື່ນໆ; ສ່ວນຄົນໄວກາງໃຫ້ຄວບຄຸມອາຫານທາດແປ້ງຢ່າກິນຫຼາຍ,ໃຫ້ກິນໄຂ່ໄກ່ໜ່ວຍໜຶ່ງ,ນ້ຳເຕົ້າຮູ້ຈອກໜຶ່ງຫຼືເຂົ້າປຽກຖ້ວຍໜຶ່ງ,ອາຫານແຫ້ງພໍປະມານແລະຜັກໜ້ອຍໜຶ່ງ; ອາຫານເຊົ້າສຳລັບຜູ້ເຖົ້າ ນອກຈາກຕ້ອງມີອາຫານທີ່ຍ່ອຍງ່າຍແລະມີທາດບຳລຸງອຸດົມສົມບູນເຊັ່ນນ້ຳນົມຫຼືນ້ຳເຕົ້າຮູ້ແລ້ວ,ກິນເຂົ້າປຽກ,ໝີ່,ໝູຫຍອງແລະຖົ່ວດິນກວນກໍໄດ້. ຕື່ນເຊົ້າມາ,ດື່ມນ້ຳນົມຈອກໜຶ່ງ,ກິນກັບອາຫານທາດແປ້ງເຊັ່ນເຂົ້າຈີ່,ເຂົ້າໜົມໄຂ່ແລະອື່ນໆ,ທຳມະດາແລ້ວ,ຕ່າງຄົນຕ່າງກໍມີຄວາມຕ້ອງການທີ່ບໍ່ຄືກັນ.
ສຳລັບເດັກນ້ອຍພວມຢູ່ໃນໄວເຕີບໃຫຍ່,ຄວນເອົາໃຈໃສ່ບຳລຸງໂປຼຕິນແລະແຄນຊຽມ,ຂອງຫວານບໍ່ຄວນກິນຫຼາຍ,ເພື່ອປ້ອງກັນແຂ້ວແມງແລະຕຸ້ຍໂພດ. ຖ້າມີເງື່ອນໄຂ,ອາຫານເຊົ້າຂອງເດັກນ້ອຍຄວນກິນນ້ຳນົມຈອກໜຶ່ງ,ໄຂ່ໄກ່ໜ່ວຍໜຶ່ງແລະເຂົ້າຈີ່ກ້ອນນ້ອຍໆກ້ອນໜຶ່ງ.
ສຳລັບຊາວໜຸ່ມເຍົາວະຊົນເຕີບໃຫຍ່ໄວ,ແມ່ນໄລຍະສຳຄັນທີ່ກ້າມເນື້ອແລະກະດູກພວມເຕີບໂຕ,ຕ້ອງການທາດບຳລຸງຕ່າງໆຢ່າງພຽງພໍເຊັ່ນແຄນຊຽມ,ວິຕາມິນເຊ,ວິຕາມິນອາເປັນຕົ້ນ,ໂດຍສະເພາະແມ່ນຕ້ອງຮັບປະກັນກາໂລລີຢ່າງພຽງພໍ. ອາຫານເຊົ້າສຳລັບຊາວໜຸ່ມເຍົາວະຊົນເໝາະສົມທີ່ສຸດແມ່ນຕ້ອງມີນ້ຳນົມຈອກໜຶ່ງ,ໝາກໄມ້ຫຼືຜັກສົດສ່ຳໃດສ່ຳໜຶ່ງ,ເຂົ້າຈີ່ 100 ກຼາມຫຼືອາຫານທາດແປ້ງແນວອື່ນ. ກາໂລລີພໍກັບຄວາມຕ້ອງການຂອງການເຄື່ອນໄຫວທາງສະໝອງແລະຮ່າງກາຍຊາວໜຸ່ມເຍົາວະຊົນ.
ສຳລັບຄົນໄວກາງ,ຕ້ອງຫາບແບກທັງວຽກງານແລະຄອບຄົວ,ທັງກາຍແລະໃຈໜັກສົມຄວນ,ບວກກັບສັບພະຄຸນຂອງອະໄວຍະວະໃນໄວນີ້ກໍຄ່ອຍໆເສື່ອມລົງ,ສັບພະຄຸນສະລີລະສາດນັບມື້ນັບອ່ອນລົງ,ບໍ່ທໍ່ຊາວໜຸ່ມເຍົາວະຊົນແລ້ວ. ເພື່ອເຮັດໃຫ້ຮ່າງກາຍເສື່ອມໂຊມຊ້າລົງ,ຜ່ອນຊ້າໄວຊະລາ,ນອກຈາກຕ້ອງມີອາລົມຈິດທີ່ມ່ວນຊື່ນແລະຫັດກາຍບໍລິຫານທີ່ຈຳເປັນແລ້ວ,ການກິນອາຫານຢ່າງເໝາະສົມກໍສຳຄັນທີ່ສຸດ. ອາຫານຂອງໄວກາງຄົນ ຕ້ອງມີໂປຼຕິນ,ວິຕາມິນ,ແຄນຊຽມແລະຟົສຟໍແລ້ວ,ຍັງຕ້ອງຮັບປະກັນໃຫ້ມີກາໂລລີຕ່ຳ,ໄຂມັນໜ້ອຍ. ຄວນຄວບຄຸມປະລິມານທາດແປ້ງຢ່າງເໝາະສົມ. ອາຫານເຊົ້າທີ່ເໝາະສຳລັບໄວກາງຄົນແມ່ນ: ໄຂ່ໄກ່ໜ່ວຍໜຶ່ງ,ນ້ຳເຕົ້າຮູ້ຈອກໜຶ່ງຫຼືເຂົ້າປຽກຖ້ວຍໜຶ່ງ,ເຂົ້າໜົມປັງຫຼືເຂົ້າຈີ່ໜ້ອຍໜຶ່ງແລະຜັກຕາມຕ້ອງການ.
ສັບພະຄຸນການຂັບຖ່າຍສິ່ງເກົ່າປ່ຽນສິ່ງໃໝ່ຂອງຜູ້ເຖົ້າໄດ້ລົງຢ່າງເດັ່ນຊັດ,ແຕ່ທາດບຳລຸງທີ່ຈຳເປັນແມ່ນຫຼຸດລົງບໍ່ໄດ້,ໂດຍສະເພາະແມ່ນຕ້ອງຮັບປະກັນແຄນຊ່ຽມ,ເພື່ອປ້ອງກັນບໍ່ໃຫ້ກະດູກຜຸຜ່ອຍ. ອາຫານເຊົ້າຂອງຜູ້ເຖົ້ານອກຈາກມີນ້ຳນົມແລະນ້ຳເຕົ້າຮູ້ແລ້ວ,ໃຫ້ກິນອາຫານທີ່ຍ່ອຍງ່າຍແລະມີທາດບຳລຸງອຸດົມສົມບູນເຊັ່ນເຂົ້າໂຈ໊ກ,ໝີ່,ໝູຫຍອງແລະຖົ່ວດິນກວນເປັນຕົ້ນ.ສຳລັບແມ່ຍິງຖືພາ,ແມ່ມານແລະລູກໃນທ້ອງລ້ວນແຕ່ຕ້ອງການກາໂລລີແລະທາດບຳລຸງຢ່າງພຽງພໍ,ສະນັ້ນ ອາຫານເຊົ້າຍິ່ງຄວນກິນດີແດ່. ນັກໂພສະນາການຊີ້ອອກວ່າ,ແມ່ມານຄວນກິນອາຫານທີ່ມີທາດເຫຼັກຫຼາຍ,ຢ່າຮິຂອງກິນຫຼືກິນແຕ່ແນວທີ່ຕົນມັກ,ເພື່ອປ້ອງກັນບໍ່ໃຫ້ເລືອດຈາງລັກສະນະຂາດທາດເຫຼັກ,ແລ້ວເປັນໂທດຕໍ່ສຸຂະພາບຂອງຕົນແລະລູກໃນທ້ອງ. ຖ້າຕອນເຊົ້າປວດຮາກ,ໃຫ້ກິນເຂົ້າໜົມປັງໂຊດາຈັກຫຼາຍແຜ່ນ,ບຶດໜຶ່ງຈຶ່ງກິນອາຫານເຊົ້າ. ອາຫານເຊົ້າຂອງແມ່ມານ ຢ່າງໜ້ອຍຕ້ອງມີໄຂ່ໄກ່ໜ່ວຍໜຶ່ງ,ນ້ຳນົມຈອກໜຶ່ງກັບເຂົ້າອົດ,ແລະຕ້ອງກິນໝາກໄມ້ສົດ,ເພື່ອຮັບປະກັນຄວາມຕ້ອງການຕໍ່ວິຕາມິນແລະທາດບຳລຸງອື່ນໆ.
|
|
