|
|
 |
| (GMT+08:00)
2005-06-02 20:42:50
|
 |
|
ສະພາບນຳໃຊ້ອາຍເມຕານຢູ່ຊົນນະບົດຈີນ
cri
Author: li
 ຕາມຂ່າວ CRI: ເລີ່ມແຕ່ປີ 2000 ເປັນຕົ້ນໄປ,ກະຊວງກະສິກຳຈີນໄດ້ເລີ່ມເຜີຍແຜ່ເຕັກນິກອາຍເມຕານຢູ່ຊົນນະບົດທົ່ວປະເທດຈີນ.
ອາຍເມຕານແມ່ນອາຍຊະນິດໜຶ່ງທີ່ເກີດຂຶ້ນໂດຍນຳໃຊ້ເຊື້ອໝັກຂອງອຸຈາລະ,ກ້ານແລະໃບພືດ,ໃຊ້ເປັນພະລັງງານໄດ້,ພ້ອມກັນນັ້ນ,ນ້ຳແລະກາກອາຍເມຕານຍັງໃຊ້ເປັນຝຸ່ນໄດ້. ເມືອງເອີນຊືແຂວງຫູເປ ພາກກາງຂອງຈີນແມ່ນເຂດໜຶ່ງທີ່ເຜີຍແຜ່ອາຍເມຕານກ່ອນໝູ່. ນັກຂ່າວໄດ້ໄປຮອດເຮືອນຂອງທ່ານຊ້ຽງອີຈີ ຊາວນາບ້ານກູນລົງປ້າເມືອງດັ່ງກ່າວ,ໄດ້ເຫັນທໍ່ປຼາສ໌ຕິກສີຂາວເສັ້ນໜຶ່ງຕໍ່ຈາກສະອາຍເມຕານເຂົ້າເຮືອນ. ເມື່ອເປີດສະວິດດອກໄຟອາຍເມຕານ,ແລ້ວເອົາກັບໄຟມາຈູດ,ເຮືອນທີ່ມືດມົວນັ້ນກໍໄດ້ສະຫວ່າງຂຶ້ນໃນທັນທີ, ເມື່ອກົດປຸ່ມເປີດກອກເຕົາອາຍເມຕານ,ແປວໄຟສີຟ້າອ່ອນກໍລຸກຂຶ້ນວູ່ໆ; ເມື່ອເປີດເຄື່ອງຕົ້ມນ້ຳຮ້ອນດ້ວຍອາຍເມຕານ,ກໍຈະມີນ້ຳຮ້ອນໄຫຼອອກຈາກທໍ່ໃນທັນທີ.
ທ່ານຊ້ຽງອີຈີແນະນຳວ່າ,ເລີ່ມແຕ່ 6 ປີກ່ອນ,ອົງການປົກຄອງທ້ອງຖິ່ນກໍໄດ້ຊັກນຳຊາວນາສ້າງສະອາຍເມຕານ,ເມື່ອໄດ້ພະຍາຍາມຫຼາຍປີແລ້ວ,ປັດຈຸບັນ ໄດ້ມີຄອບຄົວຊາວນາ 70% ສ້າງສະອາຍເມຕານແລ້ວ.
ທ່ານຊ້ຽງອີຈີເວົ້າວ່າ,ແຕ່ກ່ອນ,ຊາວນາທັງຫຼາຍໃນບ້ານພວກເຂົາອາໃສການຊື້ຖ່ານຫີນແລະປ້ຳໄມ້ເປັນເຊື່ອໄຟ,ການຊື້ຖ່ານຫີນໄດ້ເພີ່ມລາຍຈ່າຍຂອງຄອບຄົວ,ການປ້ຳໄມ້ໄດ້ທຳລາຍສິ່ງແວດລ້ອມຊີວະພາບ,ອາຍເສຍເຊັ່ນຊຸນເຟີດີອອກຊິດທີ່ເກີດມາຈາກການເຜົາຖ່ານຫີນນັ້ນລະບາຍຈາກບ່ອນເລິກຂອງພູໃຫຍ່ບໍ່ໄດ້,ເຊິ່ງໄດ້ເຊື່ອມພິດອາກາດຂອງທ້ອງຖິ່ນ,ຜະລິດຕະພັນກະສິກຳດັ້ງເດີມທີ່ສົ່ງອອກເຊັ່ນໃບຊາເປັນຕົ້ນກໍໄດ້ຖືກສົ່ງຄືນຍ້ອນມີປະລິມານຊຸນເຟີເກີນມາດຖານ. ແຕ່ຫຼັງຈາກເຜີຍແຜ່ເຕັກນິກອາຍເມຕານແລ້ວ,ປະກົດການອັນບໍ່ດີເຊັ່ນປ້ຳໄມ້ແລະກອງຂີ້ໝູທົ່ວທີບນັ້ນໄດ້ຫັບຫາຍໄປໃນຂັ້ນພື້ນຖານແລ້ວ. ສິ່ງທີ່ເຮັດໃຫ້ໄທບ້ານທັງຫຼາຍດີໃຈເປັນພິເສດນັ້ນແມ່ນ,ປີກາຍນີ້ ໃບຊາຂອງບ້ານກູນລົງປ້າເປັນຕົ້ນໄດ້ຜ່ານການກວດສອບຢ່າງເຄັ່ງຄັດຂອງສະຫະພາບເອີລົບຄືນໃໝ່,ສົ່ງໄປຂາຍນອກຢ່າງຫຼວງຫຼາຍໄດ້ອີກແລ້ວ.
ການໃຊ້ອາຍເມຕານຍັງໄດ້ເຮັດໃຫ້ລາຍໄດ້ຂອງຊາວນາເພີ່ມຂຶ້ນ. ທ່ານຊ້ຽງຈີອີໄດ້ຄິດໄລ່ໃຫ້ນັກຂ່າວຟັງວ່າ,ຄອບຄົວຂອງທ່ານໄດ້ໃຊ້ອາຍເມຕານມາ 3 ປີແລ້ວ,ພຽງແຕ່ຄ່າຖ່ານຫີນກໍໄດ້ປະຢັດ 500 ກວ່າຢວນ,ສ່ວນຝຸ່ນທີ່ຜະລິດດ້ວຍນ້ຳແລະກາກອາຍເມຕານນັ້ນ ບໍ່ພຽງແຕ່ໄດ້ປະຢັດຄ່າຝຸ່ນເຄມີທໍ່ນັ້ນ ຫາກຍັງໄດ້ຍົກປະລິມານການຜະລິດແລະຄຸນນະພາບຂອງຜະລິດຕະພັນກະສິກຳເຊັ່ນທັນຍາຫານ,ຜັກແລະໝາກໄມ້ເປັນຕົ້ນໃຫ້ສູງຂຶ້ນ,ລາຄາຂາຍກໍສູງຂຶ້ນ.
ອາຍເມຕານບໍ່ພຽງແຕ່ໄດ້ຮັບຄວາມນິຍົມຊົມຊອບຢູ່ຊົນນະບົດແຂວງຫູໄປທໍ່ນັ້ນ,ຊາວນາຢູ່ແຫ່ງອື່ນໆກໍມັກຫຼາຍ. ຢູ່ບ້ານຊູນເຟີງເມືອງເຢ້ຢາງແຂວງຫູນານ,ນັກຂ່າວໄດ້ເຫັນວ່າ,ຢູ່ເຮືອນຂອງທ່ານເຮີຊືຢຽນໄດ້ລ້ຽງໝູ 2 ໂຕແລະກະຕ່າຍ 10 ກວ່າໂຕ,ຂີ້ໝູແລະນີ້ກະຕ່າຍຖືກເຊາະໄຫຼເຂົ້າສະອາຍເມຕານ,ເກືອບບໍ່ມີກິ່ນຫຍັງແລ້ວ,ແມງວັນກໍໜ້ອຍລົງ,ເດີ່ນບ້ານສະອາດຮຽບຮ້ອຍ. ທ່ານເຮີຊືຢຽນບອກນັກຂ່າວວ່າ:
"ເມື່ອອຸຈາລະເຂົ້າສະອາຍເມຕານແລ້ວປ່ຽນເປັນພະລັງງານ,ຜົນປະໂຫຍດອີກອັນໜຶ່ງກໍແມ່ນກາກອາຍເມຕານສາມາດເອົາມາບົ່ມເພາະເຫັດ,ເພີ່ມລາຍໄດ້ໃຫ້ສູງຂຶ້ນ. ຢູ່ບ້ານພວກເຮົາມີສະອາຍເມຕານເກືອບທຸກຄອບຄົວ."
ທ່ານເຮີຊືຢຽນເວົ້າວ່າ,ໃນຄອບຄົວຂອງທ່ານຍັງໄດ້ຮັບເໝົາສວນຕົ້ນໝາກຄາຍສວນໜຶ່ງ,ບໍ່ໃຊ້ຝຸ່ນເຄມີຈັກເທື່ອ,ລ້ວນແຕ່ໃຊ້ກາກແລະນ້ຳອາຍເມຕານເປັນຝຸ່ນ,ໝາກຄາຍບໍ່ພຽງແຕ່ເປັນໝາກໃຫຍ່,ສີສົດໃສທໍ່ນັ້ນ ຍັງຫວານພິເສດ,ລາຄາກໍຂາຍໄດ້ດີກວ່າໝາກຄາຍທຳມະດາ.
ໃນຂະນະທີ່ເຕັກນິກອາຍເມຕານໄດ້ນຳໃຊ້ຢູ່ຊົນນະບົດໂດຍທົ່ວໄປນັ້ນ ກໍໄດ້ເຜີຍແຜ່ຢູ່ວິສາຫະກິດຈຳນວນໜຶ່ງ. ບໍລິສັດການລ້ຽງສັດເຈີ້ງຊີງແມ່ນວິສາຫະກິດລ້ຽງສັດຂະໜາດໃຫຍ່ຂອງເມືອງລິນອານແຂວງເຈີຈຽງ. ແຕ່ກ່ອນ,ໃນເວລາຜະລິດ ບໍລິສັດດັ່ງກ່າວຕ້ອງລະບາຍຂອງເສຍທີ່ມີອິນຊີເຊັ່ນຂີ້ໝູເປັນຕົ້ນຢ່າງຫຼວງຫຼາຍ,ບໍ່ພຽງແຕ່ເຊື່ອມພິດລະບົບນ້ຳແລະນາເຂົ້າທີ່ຢູ່ມໍ່ຫັ້ນທໍ່ນັ້ນ ກໍໄດ້ທຳລາຍສິ່ງແວດລ້ອມດຳລົງຊີວິດຂອງຊາວນາທີ່ຢູ່ອ້ອມແອ້ມອີກດ້ວຍ.
ແຕ່ປັດຈຸບັນ,ບໍລິສັດດັ່ງກ່າວເລີ່ມໃຊ້ເຕັກນິກອາຍເມຕານມາຊຳລະຂີ້ໝູ. ທ່ານກົງວານເພີງ ນັກຂ່າວວິທະຍຸCRIທີ່ຫາກໍ່ກັບມາຈາກການໄປເອົາຂ່າວຢູ່ແຂວງເຈີຈຽງໄດ້ແນະນຳວ່າ:
"ຢູ່ບໍລິສັດການລ້ຽງສັດເຈີງຊີງ ຂ້າພະເຈົ້າໄດ້ເຫັນວ່າ,ພວກເຂົາເຈົ້າໄດ້ໃຊ້ເຕັກນິກອາຍເມຕານມາຊຳລະຂອງເສຍທີ່ມີອິນຊີ,ອາຍເມຕານທີ່ເກີດຂຶ້ນກໍໃຊ້ມາແຕ່ງກິນໃຫ້ພາລະກອນ,ກາກອາຍເມຕານເຮັດເປັນຝຸ່ນອິນຊີ,ນ້ຳອາຍເມຕານກໍສະໜອງໃຫ້ຊາວນາທີ່ຢູ່ມໍ່ໂດຍບໍ່ເກັບຄ່າ,ໃຊ້ໃນການປູກພືດພັນທັນຍາຫານ,ແລ້ວເກັບຄືນເຟືອງເຂົ້າ,ເຊິ່ງຈໍ່ຕົວເປັນລະບົບໝູນວຽນຊີວະພາບສີຂຽວ."
ຕາມແນະນຳວ່າ,ຮອດທ້າຍປີ 2003 ຢູ່ທົ່ວແຂວງເຈີຈຽງໄດ້ສ້າງໂຄງການອາຍເມຕານຂະໜາດໃຫຍ່ຂະໜາດກາງເກືອບ 200 ແຫ່ງ,ໄດ້ຊຳລະຂອງເສຍຂອງປະສຸສັດແລະສັດປີກ 2 ລ້ານ 8 ແສນໂຕນຕໍ່ປີ,ຜະລິດອາຍເມຕານ 5 ລ້ານ 2 ແສນກວ່າແມັດກ້ອນຕໍ່ປີ,ໄດ້ເດີນຕາມເສັ້ນທາງໃໝ່ທີ່ນິຄົມລ້ຽງສັດປົວແປງການເຊື່ອມແບບບໍ່ມີຜົນຮ້າຍແລະຫັນເປັນຊັບພະຍາກອນ."
|
|
|
