|
|
 |
| (GMT+08:00)
2005-06-03 19:46:37
|
 |
|
ການເສື່ອມພິດສິ່ງແວດລ້ອມກັບວິທີປົ່ວພະຍາດດ້ວຍອາຫານການກິນ
cri
Author: li
ເຮົາກໍບໍ່ຮູ້ວ່າ, ທ່ານເຮັດອາຊີບອີຫຍັງ? ບ່ອນເຮັດວຽກຂອງທ່ານອາດຈະເປັນບ່ອນສະອາດແລະສະຫວາດສະເຫວີຍດີ ເຊິ່ງອາດຈະບໍ່ມີບັນຫາເປິເປື້ອນຫຍັງກໍວ່າໄດ້. ຖ້າເປັນຈັ່ງຊັ້ນແທ້ກໍເປັນເລື່ອງດີທີ່ສຸດ. ແຕ່ກໍຍັງມີຫຼາຍຄົນ, ຍ້ອນເຮັດວຽກຕ່າງກັນຈຶ່ງຕ້ອງຈັບຕ້ອງບາຍວັດຖຸບາງຢ່າງທີ່ເປັນຜົນຮ້າຍຕໍ່ຮ່າງກາຍຂອງຜູ່ກ່ຽວ ເຊັ່ນ, ກຳມະກອນໂຮງພິມ ຊ່າງຈອດດ້ວຍໄຟຟ້າ ຊ່າງເຮັດເຄື່ອງເຫຼັກເຄືອບແລະເຮັດວຽກອຸດສາຫະກຳຫຼໍ່ຫຼອມເປັນຕົ້ນແມ່ນຕ້ອງສຳຜັດກັບຊືນ ແລະໂລຫະອື່ນໆພ້ອມທັງຢູ່ໃນບັນຍາກາດທີ່ມີທາດເບື່ອຈຳນວນໜຶ່ງ; ຜູ່ປະຕິບັດງານຝ່າຍແພດໃນພະແນກຊ່ອງໄຟຟ້າກໍ່ຕ້ອງສຳຜັດກັບລັງສີເລື້ອຍໆ; ສ່ວນກຳມະກອນໂຮງງານຕ່ຳແຜ່ນນັ້ນກໍມີໃຍຝ້າຍໃຍ ປ່ານຫຼືຂົນສັດຜ່ານປາກຜ່ານຮູດັງເຂົ້າໄປໃນໂຕຢ່າງບໍ່ຮູ້ເມື່ອຄີງເລື້ອຍເຫຼົ່ານີ້ເປັນຕົ້ນ. ສິ່ງເຫຼົ່ານີ້ລ້ວນແຕ່ເປັນຜົນຮ້າຍຕໍ່ສຸຂະພາບຂອງຄົນເຮົາ, ດົນຕາມດົນກໍຈະພາໃຫ້ເປັນພະຍາດແນວໃດແນວໜຶ່ງ. ສະນັ້ນຈຶ່ງເປັນບັນຫາທີ່ຄວນເອົາໃຈໃສ່ທີ່ສຸດ. ແຕ່ທ່ານກໍບໍ່ຕ້ອງເປັນຫວ່ງຫຼາຍ, ເພາະວ່າ, ບັນຫານີ້ມັນໄດ້ພາໃຫ້ຜູ່ຊ່ຽວຊານທັງຫຼາຍສົນໃຈມາແຕ່ດົນ, ແລະກໍໄດ້ດຳເນີນການຄົ້ນຄວ້າມາແລ້ວ. ພວກທ່ານປະກົດເຫັນວ່າ, ໃນອາຫານການກິນຂອງຄົນເຮົາໃນຍາມປົກກະຕິນັ້ນ, ມີຂອງກິນບາງຢ່າງກໍມີບົດບາດແກ້ທາດເບື່ອແລະຂັບຖ່າຍສິ່ງທີ່ມີທາດເບື່ອອອກຈາກຮ່າງກາຍຂອງຄົນເຮົາໄດ້.
ຕົວຢ່າງຄືຜັກທຽມກໍເປັນສິ່ງທີ່ແກ້ທາດເບື່ອໄດ້ດີ.ກຳມະກອນທີ່ຕ້ອງຈັບຕ້ອງບາຍຊືນເລື້ອຍໆນັ້ນໃຫ້ໝັ່ນກິນຜັກທຽມເລື້ອຍໆ. ບັນດາຜູ່ຊ່ຽວຊານເຄີຍທົດລອງແລ້ວວ່າ, ຖ້າໃຫ້ກຳມະກອນຜະລິດຊືນກິນຜັກທຽມມື້ລະກຼາມເຄິ່ງ, ກິນໄປຈັກ 3 ເດືອນກໍຈະບໍ່ມີປະກົດການເບື່ອຊືນອີກ. ຜູ່ທີ່ເຄີຍເບື່ອທາດຊືນມາແລ້ວນັ້ນ, ເມື່ອກິນຜັກທຽມແລ້ວ, ອາການກໍຈະທຸເລົາລົງຢ່າງເດັ່ນຊັດ.
ການກິນເລືອດໝູນັ້ນຄົນທັງຫຼາຍຖືເປັນຢາແກ້ພິດຂີ້ຝຸ່ນຕ່າງໆມາແລ້ວ. ຜ່ານການຄົ້ນຄວ້າປະກົດເຫັນວ່າ, ໂປຼຕິນເລືອດແດງໃນເລືອດໝູນັ້ນເມື່ອຖືກນ້ຳຍ້ອຍອາຫານໃນກະເພາະແຍກທາດແລ້ວ, ມັນກໍຈະເກີດເປັນວັດຖຸຢ່າງໜຶ່ງທີ່ແກ້ທາດເບື່ອໄດ້, ແລ້ວເຮັດໃຫ້ລະອອງແລະຂີ້ໂທຫະຕ່າງໆທີ່ເຂົ້າໄປໃນຮ່າງກາຍຂອງຄົນນັ້ນກັບກາຍເປັນສິ່ງທີ່ບໍ່ມີຜົນຮ້າຍແລະຂັບຖ່າຍອອກຈາກຮ່າງກາຍ.
ເຫັດຫູໜູກໍມີສະມັດຖະພາບພິເສດທີ່ສາມາດລະລາຍໃຍວັດຖຸ. ດັ່ງນັ້ນ, ມັນຈຶ່ງເປັນອາຫານຮັກສາສຸຂະພາບຢ່າງມີຜົນສັກສິດພິເສດສຳລັບກຳມະກອນຕ່ຳແຜ່ນ.
ທ່ານກໍມັກກິນຫົວກະລົດບໍ່? ຫົວກະລົດນອກຈາກມິທາດບຳລຸງແນວອື່ນຢ່າງອຸດົມສົມບູນແລ້ວ, ມັນຍັງມີສະມັດຖະພາບເລັ່ງລັດການຂັບຖ່າຍອີອົງນ້ຳບາອອກຈາກໂຕຄົນ, ເພາະວ່າ, ໃນຫົວກະລົດນັ້ນມີນ້ຳຢາງແນວໜຶ່ງຫຼາຍທີ່ສຸດ, ເມື່ອວັດຖຸດັ່ງກ່າວປະສົມກັບນ້ຳບາແລ້ວ, ກໍຈະເຮັດໃຫ້ອີອົງນ້ຳບາໃນເລືອດຈາງລົງ ແລ້ວຂັບຖ່າຍໄດ້ໄວ.
ຜູ່ທີ່ເຮັດວຽກທີ່ສຳຜັດກັບວັດຖຸລັງສີນັ້ນຕ້ອງໝັ່ນກິນໄຂ່ໄກ່ ຖົ່ວເຫຼືອງ ນົມງົວ ຊີ້ນລ້ວນໆ ຕັບໄຕສັດແລະອື່ນໆ ເຊິ່ງເປັນຂອງທີ່ມີທາດໂປຼຕິນຫຼາຍນັ້ນເລື້ອຍໆ. ເພື່ອຕາບຈູນທາດໂປຼຕິນໃນຮ່າງກາຍທີ່ເສຍໄປຍ້ອນລັງສີທຳລາຍ, ແລ້ວເຮັດໃຫ້ຮ່າງກາຍມີທາດບຳລຸງໂປຼຕິນຢ່າງພຽງພໍຢູ່ສເມີ. ນອກນີ້, ຍັງຕ້ອງກິນນ້ຳຊາຂຽວໃຫ້ຫຼາຍເພາະວ່ານ້ຳຊາຂຽວຈະຊ່ອຍຂັບຖ່າຍວັດຖຸລັງສີໃນໂຕອອກໄດ້ໄວ.
ທ່ານອາດຈະຄຶດວ່າ, ອາຊີບທີ່ເວົ້າເມື່ອກີ້ນີ້ທ່ານບໍ່ເຄີຍເຮັດຈັກເທື່ອ, ຄືຊິບໍ່ມີບັນຫາຖືກທາດເບື່ອໃນຍາມເຮັດວຽກ. ທີ່ຈິງແລ້ວບໍ່ແມ່ນຈັ່ງຊັ້ນ, ຄຽງຄູ່ກັບອຸດສາຫະກຳຈະເລີນຂຶ້ນເລື້ອຍໆນັ້ນໃນເວລາຜະລິດ, ກໍມັກມີວັດຖຸທີ່ມີທາດເບື່ອບາງຢ່າງລະບາຍອອກມາເລື້ອຍໆ, ຖ້າວ່າໂຮງງານຫຼືກົມກອງທີ່ກ່ຽວຂ້ອງບໍ່ຊຳລະແກ້ໄຂຢ່າງເຄັ່ງຄັດ, ວັດຖຸອັນເປັນຜົນຮ້າຍເຫຼົ່ານີ້ຈຶ່ງອາດຈະເຮັດໃຫ້ນ້ຳແລະອາກາດຫຼືເຄື່ອງປູກຂອງຝັງໃນບໍລິເວນອ້ອມແອ້ມຫັ້ນເປິເປື້ອນແລ້ວກາຍເປັນໄພຕໍ່ສຸຂະພາບຂອງຄົນທັງຫຼາຍ. ສະນັ້ນ, ເຮົາຈຶ່ງເຫັນວ່າ, ບໍ່ວ່າທ່ານຈະເຮັດວຽກຫຍັງ, ໃນຍາມປົກກະຕິ, ອາດຈະກິນເລືອດໝູ ຜັກທຽມ ເຫັດຫູໜູ ຫົວກະລົດແລະກິນນ້ຳຊາຂຽວ ມັນກໍຈະມີຜົນດີຕໍ່ສຸຂະພາບຂອງທ່ານຄືກັນ. ທ່ານວ່າແມ່ນບໍ່?
|
|
|
