|
|
(GMT+08:00)
2005-06-06 15:35:09
|
|
ດ້ວຍເຫດໃດ ທ່ານອາບັສປະກາດເລື່ອນເວລາຈັດການເລືອກຕັ້ງຄະນະກຳມະການນິຕິບັນຍັດປາເລັສຕີນ(ສຽງ)
cri
Author: mo
ຕາມຂ່າວCRI: ວັນທີ 4 ມິຖຸນາ, ທ່ານອາບັສ ປະທານອົງການອຳນາດແຫ່ງຊາດປາເລັສຕີນເຊັນດຳລັດປະກາດວ່າ, ເລື່ອນເວລາຈັດການເລືອກຕັ້ງຄະນະກຳມະການນິຕິບັນຍັດປາເລັສຕີນທີ່ຈະຈັດຂຶ້ນໃນເດືອນກໍລະກົດຕາມແຜນການເດີມ. ເລື່ອງນີ້ໄດ້ຖືກຂະບວນການອິສລານປາເລັສຕີນຕໍ່ຕ້ານຫຼືອົງການຮາມັສ ຄັດຄ້ານຢ່າງຮຸນແຮງ. ບຸກຄົນວິເຄາະຊີ້ອອກວ່າ, ການຖົກຖ້ຽງກັນລະຫວ່າງທ່ານອາບັສກັບອົງການຮາມັສທີ່ໝູນອ້ອມວັນເລືອກຕັ້ງຄະນະກຳມະການນິຕິບັນຍັດ, ໄດ້ສ່ອງແສງໃຫ້ເຫັນຄວາມຂັດແຍ່ງກັນລະຫວ່າງ ຂະບວນປົດປ່ອຍຊາດປາເລັສຕີນຫຼືອົງການອານຟາຕາ ເຊິ່ງເປັນພັກຄອງອຳນາດປາເລັສຕີນ ກັບອົງການຮາມັສ ກຳລັງການເມືອງທີ່ເຕີບໂຕໃໝ່, ແລະການຍາດຊິງສິດນຳພາປາເລັສຕີນ ລະຫວ່າງສອງຝ່າຍ.
ຕາມກົດໝາຍເລືອກຕັ້ງສະບັບປັບປຸງທີ່ຄະນະກຳມະການນິຕິບັນຍັດປາເລັສຕີນຜ່ານຮັບຮອງໃນຫວ່າງມໍ່ໆນີ້, ໃນ 132 ທີ່ນັ່ງຂອງຄະນະກຳມະການນິຕິບັນຍັດ, ມີ 2/3 ແມ່ນກຳເນີດຂຶ້ນຕາມລະບອບການເລືອກຕັ້ງສ່ວນຫລາຍ, 1/3 ກຳເນີດຂຶ້ນຕາມລະບອບມາດຕາສ່ວນ. ແຕ່ທ່ານອາບັສທວງໃຫ້ການເລືອກຕັ້ງໃຊ້ລະບອບມາດຕາສ່ວນໝົດ ເຊິ່ງກໍຄື: ທີ່ນັ່ງທັງໝົດຂອງຄະນະກຳມະການນິຕິບັນຍັດໃຫ້ແບ່ງປັນຕາມມາດຕາສ່ວນຂອງບັນດາພັກ.
ສື່ມວນຊົນເຫັນວ່າ, ທ່ານອາບັສຍຶດໝັ້ນລະບອບແບ່ງປັນຕາມມາດຕາສ່ວນໝົດແມ່ນເພື່ອຮັບປະກັນກຳລັງປີກຊ້າຍແລະກຳລັງລະຫວ່າງກາງທີ່ນຳໂດຍອົງການອານຟາຕາຈະໄດ້ທີ່ນັ່ງສ່ວນຫລາຍໃນຄະນະກຳມະການນິຕິບັນຍັດ, ເພື່ອຕ້ານກັບອົງການຮາມັສທີ່ໄດ້ອັດຕາສະໜັບສະໜູນຂ້ອນຂ້າງສູງຈາກມະຕິຊົນ. ເທື່ອນີ້ແມ່ນອົງການຮາມັສເຂົ້າຮ່ວມການເລືອກຕັ້ງເປັນຄັ້ງທຳອິດແຕ່ສ້າງຕັ້ງຂຶ້ນເມື່ອປີ 1987 ເປັນຕົ້ນມາ. ໃນເວລາດົນນານມານີ້, ອົງການຮາມັສໄດ້ຍຶດໝັນການຕໍ່ສູ້ດ້ວຍກຳລັງອາວຸດ ແລະຄັດຄ້ານການເຈລະຈາສັນຕິພາບກັບອິສຣາແອນໂດຍຕະຫລອດ, ຈຶ່ງບໍ່ແມ່ນອົງການການເມືອງປາເລັສຕີນ. ແຕ່ວ່າ, ໃນຫລາຍປີມານີ້, ອົງການຮາມັສນັບມື້ນັບຄ່ອງແຄ້ວແລະຕິດແທດຕົວຈິງ, ຄ່ອຍໆປ່ຽນແປງຍຸດໂທບາຍ, ເລີ່ມສະແຫວງຫາເຂົ້າຮ່ວມຂະບວນວິວັດການເມືອງແລະລະບຽບການຕົກລົງວຽກງານຂອງປາເລັສຕີນ.
ສື່ມວນຊົນເຫັນໂດຍທົ່ວໄປວ່າ, ອົງການຮາມັສໄດ້ທ້າທາຍອົງການອານຟາຕາທີ່ເປັນພັກຄອງອຳນາດປັດຈຸບັນຢ່າງແຂງແຮງ. ຜ່ານການຕໍ່ສູ້ດ້ວຍກຳລັງອາວຸດເປັນເວລາຍາວນານ, ອົງການຮາມັສບໍ່ພຽງແຕ່ໄດ້ສ້າງພື້ນຖານມະຕິຊົນຫລາຍສົມຄວນ, ແລະໃນຖານເປັນກຳລັງໃໝ່ບົນເວທີການເມືອງປາເລັສຕີນ, ອົງການຮາມັສຍິ່ງເອົາໃຈໃສ່ການສ້າງໂສມໜ້າຂອງຕົນເອງ, ແລະຜ່ານການເຄື່ອນໄຫວກຸສົນແລະສົງເຄາະຕ່າງໆຍາດເອົາໃຈຄົນ. ໃນການເລືອກຕັ້ງທ້ອງຖິ່ນຂອງປາເລັສຕີນໄລຍະທີ 2 ທີ່ຈັດຂຶ້ນໃນຫວ່າງບໍ່ດົນນີ້, ອົງການຮາມັສໄດ້ຮັບສິດຄວບຄຸມຫົວໜ່ວຍບໍລິຫານທ້ອງຖິ່ນກວມເຖິງ 1/3. ເມື່ອທຽບໃສ່ກັນແລ້ວ, ເຖິງວ່າອົງການອານຟາຕາຍັງຄົງແມ່ນພັກໃຫຍ່ທີໜຶ່ງຂອງປາເລັສຕີນ, ແຕ່ຍ້ອນວ່າ ຢູ່ພາຍໃນອົງການມີຫລາຍກ້ຳຫລາຍຝ່າຍ, ການຕໍ່ສູ້ເພື່ອຍາດເອົາອຳນາດກໍສັບສົນ, ກຳລັງໜ່ຽງເຂົ້າກັນແລະກຳລັງສັງລວມຂອງພັກດັ່ງກ່າວໄດ້ຖືກບັ່ນທອນແລ້ວ. ໃນຫລາຍປີມານີ້, ຍ້ອນເປັນພັກຄອງອຳນາດດົນນານ, ຄະດີເຈົ້າໜ້າທີ່ອານຟາຕາຊຸດໂຊມເປື່ອຍເຍື່ອຍແລະສະແຫວງຫາຜົນປະໂຫຍດດ້ວຍສິດອຳນາດຂອງຕົນກໍໄດ້ປະກົດຂຶ້ນເລື້ອຍໆ, ໂສມໜ້າຂອງອົງການບໍ່ຈົບບໍ່ງາມຄືແຕ່ກ່ອນແລ້ວ.
ບຸກຄົນວິເຄາະເຫັນວ່າ, ທ່ານອາບັສຕົກລົງເລື່ອນເວລາຈັດການເລືອກຕັ້ງຄະນະກຳມະການນິຕິບັນຍັດເທື່ອນີ້, ຕົ້ນຕໍແມ່ນຢາກໄດ້ເວລາຍິ່ງຫລາຍມາແກ້ໄຂຄວາມເຫັນຂັດກັນຢູ່ພາຍໃນອານຟາຕາ, ປັບປຸງອົງການຄືນໃໝ່, ເພື່ອຮັບມືກັບການທ້າທາຍຂອງອົງການຮາມັສ.
ພ້ອມກັນນັ້ນ, ບຸກຄົນວິເຄາະຍັງເຫັນວ່າ, ເຖິງວ່າອົງການຮາມັສຄັດຄ້ານຢ່າງຮຸນແຮງຕໍ່ການຕົກລົງຂອງທ່ານອາບັສທີ່ເລື່ອນເວລາຈັດການເລືອກຕັ້ງຄະນະກຳມະການນິຕິບັນຍັດກໍຕາມ, ແຕ່ຄວາມອາດສາມາດທີ່ຄວາມຂັດແຍ້ງກັນລະຫວ່າງສອງຝ່າຍພາຍໃນໄລຍະມໍ່ໆນີ້ຈະຂະຫຍາຍກວ້າງອອກນັ້ນແມ່ນບໍ່ຫລາຍປານໃດ, ທ່ານອາບັສອາດຈະສະໜອງຜົນປະໂຫຍດທາງການເມືອງອື່ນໆໃຫ້ອົງການຮາມັສ, ເພື່ອໃຫ້ເຂົາເຫັນດີເລື່ອນເວລາຈັດການເລືອກຕັ້ງ.
|
|
|