|
ສະບາຍດີທ່ານຜູ່ຟັງທີ່ໂຄລົບ, ເບສ໌ບອນແມ່ນກິລາທີ່ຄົນອາເມລິການິຍົມມັກຮັກຫຼາຍ. ດຽວນີ້ ກິລາດັ່ງກ່າວກໍ່ໄດ້ດຳເນີນຢູ່ຈີນຢ່າງຟົດຟື້ນ, ໃນຫຼາຍປີມານີ້, ລະດັບເບສ໌ບອນຈີນກໍ່ສູງຂຶ້ນຢ່າງບໍ່ຢຸດຢັ້ງ. ໃນລາຍການໂລກກິລາພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ເບສ໌ບອນຈີນມີການບຸກທະລຸຄັ້ງປະຫວັດສາດ.
ວັນທີ 22 ພຶດສະພາປີ 2005, ເບສ໌ບອນຈີນໄດ້ຂຽນໜ້າປະຫວັດສາດໃໝ່, ຢູ່ສະໜາມກິລາເບສ໌ບອນມີຢາຈາຄີຍີ່ປຸ່ນ, ທີມເບສ໌ບອນຈີນໄດ້ເອົາຊະນະທີມສ.ເກົາຫຼີເຊິ່ງເປັນທີມແຂງໃນອາຊີດ້ວຍຄະແນນ 4:3, ແລ້ວໄດ້ເປັນທີສາມໃນງານແຂ່ງຂັນເບສ໌ບອນຊິງຊະນະເລີດອາຊີຄັ້ງທີ 23, ແລະຊິງໄດ້ຄຸນວຸດທິເຂົ້າຮ່ວມງານແຂ່ງຂັນເບສ໌ບອນຊິງຂັນໂລກທີ່ຈະຈັດຂຶ້ນຢູ່ໂຮນລັງໃນເດືອນກັນຍາ. ນີ້ແມ່ນທີມຊາດຈີນໄດ້ເຂົ້າສູ່ຖັນແຖວສາມທີມນຳໜ້າຂອງອາຊີເປັນຄັ້ງທຳອິດໃນ 20 ປີມານີ້. ຕອນບ່າຍວັນທີ 25 ພຶດສະພາ, ກົມໃຫຍ່ກິລາແຫ່ງຊາດຈີນແລະສະມາຄົມເບສ໌ບອນຈີນໄດ້ຈັດງານຍ້ອງຍໍຢູ່ທີ່ປັກກິ່ງ, ໄດ້ຕີລາຄາສູງຕໍ່ທີມເບສ໌ບອນທີ່ມີການບຸກທະລຸຄັ້ງປະຫວັດສາດ.
ທ່ານນາງຈຽງຊິວຢຸນ ປະທານສະມາຄົມເບສ໌ບອນຈີນສະເໜີວ່າ: ແຕ່ສົ່ງທີມເບສ໌ບອນເຂົ້າຮ່ວມງານແຂ່ງຂັນຊິງຊະນະເລີດອາຊີເປັນຄັ້ງທຳອິດເມື່ອປີ 1985 ເປັນຕົ້ນມາ, ທີມເບສ໌ບອນຈີນກໍ່ຢູ່ໃນອັນດັບທີ 4 ຕັ້ງນານ, ທີມຍີ່ປຸ່ນ ທີມສ.ເກົາຫຼີແລະທີມໄຕເປຂອງຈີນໄດ້ຄອງຖານະທີໜຶ່ງຫາທີສາມ. ໃນງານແຂ່ງຂັນຊິງຊະນະເລີດອາຊີເທື່ອນີ້, ເຖິງວ່າທີມຈີນພຽງເປັນທີສາມທໍ່ນັ້ນ, ແຕ່ເວົ້າສຳລັບເບສ໌ບອນຈີນແລ້ວແມ່ນມີຄວາມໝາຍພິເສດ, ກໍ່ແມ່ນການບຸກທະລຸຢ່າງແທ້ຈິງ.
ທ່ານນາງຈຽງຊິວຢຸນແນະນຳວ່າ, ຈາກທີສີ່ຂຶ້ນເປັນທີສາມ, ໃນວົງການເບສ໌ບອນອາຊີທີ່ສາມທີມເກັ່ງດັ້ງເດີມຜູກຂາດນັ້ນເລື່ອນຂຶ້ນຂັ້ນໜຶ່ງ, ນັກກິລາເບສ໌ບອນຈີນໄດ້ພະຍາຍາມມາເປັນເວລາຫຼາຍເຊັ່ນຄົນ, ຜົນງານແລະຄວາມກ້າວໜ້າທີ່ທີມເບສ໌ບອນຍາດມາໄດ້ນັ້ນ, ແມ່ນຍ້ອນວ່າຈີນໄດ້ຈັດຕັ້ງການແຂ່ງຂັນເບສ໌ບອນພາຍໃນປະເທດແລະແລກປ່ຽນກັບສາກົນ.
ຕາມສະເໜີວ່າ, ເພື່ອຊຸກຍູ້ໃຫ້ກິລາເບສ໌ບອນຈີນຂະຫຍາຍຕົວ, ເມື່ອປີ 2002, ສະມາຄົມເບສ໌ບອນຈີນໄດ້ຈັດຕັ້ງປະຕິບັດການແຂ່ງຂັນປະສົມເບສ໌ບອນເປັນຄັ້ງທຳອິດ, ເມື່ອໄດ້ຂະຫຍາຍຕົວມາເປັນເວລາ 3 ປີ, ທີມເບສ໌ບອນທີ່ເຂົ້າຮ່ວມງານແຂ່ງຂັນຂອງຈີນໄດ້ເພີ່ມຈາກ 4 ທີມໃນເບື້ອງຕົ້ນຂຶ້ນຮອດ 6 ທີມໃນປະຈຸບັນ, ການແຂ່ງຂັນຈາກ 20 ກວ່ານັດໃນໝົດປີ 2002 ໄດ້ເພີ່ມຂຶ້ນຮອດ 90 ນັດໃນຕະຫຼອດປີ 2005. ເມື່ອການແຂ່ງຂັນເພີ່ມຫຼາຍແລ້ວ, ໄດ້ເຮັດໃຫ້ນັກກິລາເບສ໌ບອນຈີນມີບົດຮຽນການແຂ່ງຂັນແລະຄວາມສາມາດການແຂ່ງຂັນເພີ່ມຂຶ້ນ. ພ້ອມກັນນັ້ນ, ງານແຂ່ງຂັນເບສ໌ບອນຈີນຍັງອະນຸຍາດໃຫ້ບັນດາທີມເບສ໌ບອນເຊື້ອເຊີນນັກກິລາຕ່າງປະເທດທີ່ລະດັບກິລາເບສ໌ບອນຂ້ອນຂ້າງສູງເຊັ່ນ ຍີ່ປຸ່ນແລະສ.ເກົາຫຼີເປັນຕົ້ນມາເຂົ້າຮ່ວມການແຂ່ງຂັນ, ນັກກິລາລະດັບສູງເຫຼົ່ານີ້ໄດ້ເສີມຂະຫຍາຍບົດບາດອັນຕັ້ງໜ້າໃນການຊັກຈູງນັກກິລາຈີນຍົກລະດັບເຕັກນິກໃຫ້ສູງຂຶ້ນ.
ນອກຈາກຈັດຕັ້ງການແຂ່ງຂັນແລ້ວ, ທີມເບສ໌ບອນຈີນມີການບຸກທະ ລຸຄັ້ງປະຫວັດສາດເທື່ອນີ້ຍັງຍ້ອນສະມາຄົມເບສ໌ບອນຈີນຕັ້ງໜ້າຖອດຖອນເອົາບົດຮຽນຂອງປະເທດກິລາເບສ໌ບອນເຂັ້ມແຂງ. ຫວ່າງມໍ່ໆນີ້ ສະມາຄົມເບສ໌ບອນຈີນໄດ້ສ້າງການພົວພັນຮ່ວມມືຢ່າງແໜ້ນແຟ້ນກັບສະຫະພັນເບສ໌ບອນອາຊີບອາເມລິກາ (Major League Baseball), ເລີ່ມແຕ່ປີ 2003 ເປັນຕົ້ນມາ, ແຕ່ລະປີ ສະມາຄົມເບສ໌ບອນຈີນກໍ່ສົ່ງທີມຊາດໄປຝຶກແອບຢູ່ອາເມລິກາ, ຝ່າຍອາເມລິກາຈະຊ່ອຍສະມາຄົມເບສ໌ບອນຈີນພັດທະນາງານແຂ່ງຂັນແລະງານແຂ່ງຂັນລຸ້ນຊາວໜຸ່ມ, ແລະສົ່ງຄູຝຶກຜູ່ດີເດັ່ນສອງຄົນທີ່ເຄີຍສອນໃນສະຫະພັນເບສ໌ບອນອາຊີບອາເມລິກາມາຊ່ອຍເຫຼືອການຝຶກແອບຂອງທີມຊາດຈີນ. ຄູຝຶກລະດັບສູງທີ່ມາຈາກອາເມລິກາສອງຄົນນີ້ ໄດ້ຊີ້ນຳນັກກິລາເບສ໌ບອນຈີນຈາກຫຼາຍດ້ານ ເຊັ່ນ ທັດສະນະຄະຕິແລະຂໍ້ປີກຍ່ອຍດ້ານເຕັກນິກເປັນຕົ້ນ, ເຮັດໃຫ້ນັກກິລາຈີນໄດ້ຜົນປະໂຫຍດບໍ່ໜ້ອຍ.
ທ້າວຫວັງໜານ ນັກກິລາເບສ໌ບອນຈີນທີ່ໄດ້ລາງວັນຜູ່ໂຍນບານເກັ່ງໃນງານແຂ່ງຂັນຊິງຊະນະເລີດອາຊີຄັ້ງນີ້ເວົ້າວ່າ: ຂ້າພະເຈົ້າເຫັນວ່າ ຄູຝຶກລະດັບສູງທີ່ມາຈາກອາເມລິກາສອງຄົນນີ້ໄດ້ນຳເອົາເຕັກນິກກ້າວໜ້າແລະພາຫະນະຝຶກແອບທີ່ກ້າວໜ້າມາໃຫ້ແກ່ພວກຂ້າພະເຈົ້າ, ນີ້ແມ່ນມູນເຫດສຳຄັນທີ່ທີມເບສ໌ບອນພວກຂ້າພະເຈົ້າໄດ້ຍົກລະດັບໃຫ້ສູງຂຶ້ນຢ່າງວ່ອງໄວ. ໄຊຊະນະເທື່ອນີ້ເຮັດໃຫ້ພວກຂ້າພະເຈົ້າມີຄວາມໝັ້ນໃຈຫຼາຍກວ່າເກົ່າ, ຕໍ່ໄປພາຍໜ້າ, ເມື່ອແຂ່ງຂັນກັບທີມເກັ່ງນັ້ນ, ພວກຂ້າພະເຈົ້າຈະກ້າບຸກກ້າຕີກວ່າເກົ່າ.
ທ່ານນາງຈຽງຊິວຢຸນເວົ້າຕໍ່ນັກຂ່າວວ່າ, ການພະຍາຍາມຊິງເອົາຜົນງານດີຈົນສຸດຄວາມສາມາດໃນງານກິລາໂອລິມປິກປັກກິ່ງປີ 2008 ນັ້ນ, ແມ່ນໜ້າທີ່ຕົ້ນຕໍຂອງທີມເບສ໌ບອນຈີນໃນໄລຍະຂ້າງໜ້າ. ການບຸກທະລຸໃນງານແຂ່ງຂັນຊິງຊະນະເລີດອາຊີໄດ້ຢັ້ງຢືນໃຫ້ເຫັນວ່າ, ຍຸດທະສາດພັດທະນາຂອງທີມເບສ໌ບອນຈີນໃນໄລຍະມໍ່ໆມານີ້ແມ່ນຖືກຕ້ອງ, ນັ້ນກໍແມ່ນປະກອບທີມຊາດທີ່ອາຍຸໜຸ່ມ, ແລະປະສົມປະສານກັບທັດສະນະຄະຕິແລະພາຫະນະການຝຶກແອບເບສ໌ບອນຂອງສະຫະພັນເບສ໌ບອນອາຊີບອາເມລິກາ. ຍຸດທະສາດພັດທະນານີ້ຈະດຳເນີນຕໍ່ໄປ.
ພ້ອມກັນນັ້ນ, ສະມາຄົມເບສ໌ບອນຈີນຍັງພວມຊອກວິທີເພີ່ມຄວາມແຮງໃນການບຳລຸງສ້າງນັກກິລາໜຸ່ມຜູ່ດີເດັ່ນ. ໃນລະດູການແຂ່ງຂັນປີນີ້, ສະມາຄົມເບສ໌ບອນຈີນໄດ້ຈັດຕັ້ງທີມ "ດາລາແຫ່ງຄວາມຫວັງ" ໂດຍສະເພາະ ເຂົ້າຮ່ວມງານແຂ່ງຂັນທົ່ວປະເທດ, ເພື່ອສ້າງນັກກິລາຜູ່ດີເດັ່ນໃຫ້ທີມຊາດໃນການກະກຽມງານກິລາໂອລິມປິກປັກກິ່ງ. ທ່ານນາງຈຽງຊິວຢຸນແນະນຳວ່າ: ທີມເບສ໌ບອນດັ່ງກ່າວມີນັກກິລາໜຸ່ມ 20 ຄົນທີ່ມາຈາກຫຼາຍເຂດແຂງທົ່ວປະເທດ, ແລະເຊື້ອເຊີນຄູຝຶກເບສ໌ບອນອາຊີບສ.ເກົາຫຼີສອງຄົນມາເຂົ້າຮ່ວມຄະນະຄູຝຶກ, ພ້ອມທັງເຊື້ອເຊີນນັກກິລາຜູ່ດີເດັ່ນ 7 ຄົນຈາກສ.ເກົາຫຼີມາຝຶກແອບນຳກັນກັບນັກກິລາຈີນ.
ທ່ານນາງຈຽງຊິວຢຸນເຊື່ອວ່າ, ທະແນມແຕ່ພະຍາຍາມຢ່າງບໍ່ລົດລະ, ລະດັບທີມເບສ໌ບອນຈີນຍັງຈະສູງຂຶ້ນໃນໜ້າພຽງກວ້າງໃນຫຼາຍປີຂ້າງໜ້າ, ແລະມີຫວັງເອົາຊະນະທີມເກັ່ງຕ່າງປະເທດໃນງານກິລາໂອລິມປິກ.
|
