|
ທ່ານຊາງທາງ ຜູ່ທີ່ມີຊື່ສຽງໃນສະໄຫມຈີນບູຮານ ໃນປະຫວັດສາດບູຮານຂອງຈີນ ສົມເດັດຊາງທາງແມ່ນບຸກຄົນທີ່ມີຊື່ສຽງຜູ່ຫນຶ່ງ ສົມເດັດໄດ້ໂຄ່ນລົ້ມລາຊະວົງເຊ້ຍທີ່ມີຖານະປົກຄອງຢູ່ເຂດຍ່ານກາງແລະຍ່ານໃຕ້ແມ່ນ້ຳເຫຼືອງໃນຄາວນັ້ນ ແລ້ວສ້າງລາຊະວົງຊາງທີ່ມີປະຫວັດສາດ 500 ກວ່າປີ ອາລິຍະທຳທອງສຳລິດແລະການກຳເນີດຂອງຕົວຫນັງສືທີ່ຄວັດໃສ່ອອງເຕົ່າແລະກະດູກສັດຂອງລາຊະວົງຊາງໄດ້ກະທົບກະເທືອນເຖິງປະຫວັດສາດຂອງຈີນຢ່າງເລິກເຊິ່ງ&nbລາຊະວັງເຊ້ຍແມ່ນລາຊະວົງທຳອິດຂອງຈີນ ໃນທ້າຍລາຊະວົງເຊ້ຍ ສົມເດັດເຈ ເຈົ້າຊີວິດທີ່ຄອງອຳນາດໃນຄາວນັ້ນໄດ້ເປັນເຈົ້າຊີວິດທີ່ໂງ່ຈ້າມືນເມົາແລະໂຫດຮ້າຍທາລຸນ ຕາມເລົ່າລືກັນວ່າ ສົມເດັດເຈໄດ້ຊົງສັ່ງໃຫ້ ຄົນໄປຂຸດຫນອງເຫຼົ້າໃຫຍ່ແຫ່ງຫນຶ່ງຢູ່ໃນພະລາຊະວັງ ສາ ມາດໃຫ້ຫຼາຍພັນຄົນຕື່ມເຫຼົ້າໄປພ້ອມກັນ ເຈົ້າຊີວິດເຈຈັດງານລ້ຽງເຫຼົ້າເລື້ອຍໆ ຫຼັງຫຼາຍຄົນເມື່ອເມົາເຫຼົ້າແລ້ວເລີຍຕົວຢູ່ໃນຫນອງເຫຼົ້າຢ່າງບໍ່ລະວັງ ແລ້ວຕາຍໄປ ເຈົ້າຊີວິດເຈກັບມະເຫສີຂອງສົມເດັດມັກຊົມສະພາບທີ່ຄົນທັງຫຼາຍດື່ມເຫຼົ້າຫຼິ້ນມ່ວນຊື່ນແບບປ່ວງບ້າ ເພື່ອສະຫນັບສະຫນູນການບໍລິໂພກອັນຟູມເຟືອຍຂອງພະອົງ ເຈົ້າຊີວິດເຈໄດ້ເພີ່ມເກັບສ່ວນສາອາກອນຢ່າງຫຼວງຫຼາຍຈາກປະຊາຊົນ ເມື່ອເປັນແນວນີ້ດົນໄປ ຄວາມຄຽງແຄ້ນຂອງປະຊາຊົນກໍນັບມື້ນັບເພີ່ມຂຶ້ນ
ໃນຄາວນັ້ນໃຕ້ການປົກຄອງຂອງລາຊະວົງເຊ້ຍ ມີລັດນ້ອຍຊື່ວ່າລັດຊາງ ສົມເດັດຊາງທາງແມ່ນເຈົ້າຊີວິດຂອງລັດຊາງ ສົມເດັດຊາງທາງມີເມດຕາກາລຸນາຕໍ່ປະຊາຊົນ ສະນັ້ນປະຊາຊົນກໍສະຫນັບ ສະຫນູນອຸ້ມຊູສົມເດັດທີ່ສຸດ .ມີນິທານເລື່ອງຫນຶ່ງເລົ່າກັນວ່າ ມີມື້ຫນຶ່ງ ເຈົ້າຊີວິດຊາງທາງໄດ້ໄປທ່ຽວຢູ່ນອກ ເຫັນຄົນຫນຶ່ງກາງຕາຫນ່າງໃຫຍ່ໆທີ່ຈະຈັບນົກ ແລະອະທິຖານວ່າ ຂໍໃຫ້ນົກທັງຫມົດໃນໂລກລ້ວນແຕ່ບິນເຂົ້າສູ່ຕາຫນ່າງຂອງຂ້ອຍ ສົມເດັດຊາງທາງຊົງຕັດວ່າ ເຮັດແນວນີ້ແມ່ນຢາກຈັບນົກທັງຫມົດໃນໂລກບໍ່ ຈາກນັ້ນ ສົມເດັດໄດ້ສັ່ງໃຫ້ຜູ່ນີ້ກູ້ຕາຫນ່າງໃຫຍ່ຄືນ ແລ້ວປ່ຽນເປັນຕາຫນ່າງນ້ອຍຈັບນົກ ເມື່ອເຈົ້າຊີວິດຂອງລັດນ້ອຍອື່ນໆຈຳນວນຫນຶ່ງໄດ້ຍິນເລື່ອງນີ້ແລ້ວ ເຫັນວ່າສົມເດັດຊາງທາງເປັນຄົນໃຈບຸນແລ້ວພາກັນເຂົ້າເພີ່ງສົມເດັດຊາງທາງ
ສົມເດັດຊາງທາງໄດ້ໃຫ້ຄົນທີ່ມີຄວາມປີຊາສາມາດເປັນຜູ່ຊ່ອຍມື ພ້ອມກັນວາງແຜນການດັບສູນລາຊະວົງເຊ້ຍ ສ່ວນສົມເດັດເຈມີແຕ່ຫຼິ້ນກິນຢ່າງຊົ່ວຊ້າເລວຊານ ເລີຍກາຍເປັນຜູ່ໄຮ້ຍາດຂາດມິດ ສົມເດັດຊາງທາງໄດ້ຍົກພົນສູ້ລົບ 11 ເທື່ອ ເມື່ອສະຕະວັດທີ 16ກ່ອນຄ .ສ ໄດ້ເອົາຊະນະເຈົ້າຊີວິດເຈ ແລ້ວດັບສູນລາຊະວົງເຊ້ຍ ຫຼັງຈາກລາຊະວົງເຊ້ຍຖືກດັບສູນແລ້ວ ສົງເດັດຊາງທາງໄດ້ສ້າງຕັ້ງລາຊະວົງຊາງຢູ່ເມືອງຮາວ (ຄື ເມືອງຊາງສິ່ວແຂວງເຫີນານໃນປັດຈຸບັນ)
ກ່ຽວກັບຄຸນສົມບັດຂອງສົມເດັດຊາງທາງ ມີການເລົ່າລືກັນຫຼາຍຢ່າງຫຼາຍແນວ ຕາມການບັນທຶກໃນຫນັງສືປະຫວັດສາດຂຽນວ່າ ຫຼັງຈາກສົມເດັດຊາງທາງໄດ້ສ້າງຕັ້ງປະເທດບໍ່ດົນ ໄດ້ເກີດມີໄພແຫ້ງແລ້ງຢ່າງຕໍ່ເນື່ອງກັນ ເກັບກ່ຽວເຂົ້າບໍ່ໄດ້ຈັກເມັດ ຄົນທັງຫຼາຍໃນຄາວນັ້ນລ້ວນແຕ່ເຫັນວ່າແມ່ນເຈົ້າຟ້າເກີດໂມໂຫ ຈຶ່ງລົງໂທດຄົນທັງຫຼາຍໃນເມືອງຄົນ ຫມໍມົນສະເຫນີໃຫ້ໃຊ້ຄົນເປັນມາບູຊາເທບພະເຈົ້າ ໃນເວລານີ້ ສົມເດັດຊາງທາງສະເຫນີຢ່າງເປັນເຈົ້າການວ່າ:ຖ້າຕ້ອງເອົາຄົນເປັນມາເຮັດ ເປັນເຄື່ອງລ້ຽງຜີແທ້ ກໍຂໍໃຫ້ພະອົງເຮົາເຮັດເປັນເຄື່ອງລ້ຽງສາ! ສົມເດັດ ຂີ່ລົດມ້າສີຂາວ ນຸ່ງເຄື່ອງຜ້າຝ້າຍ ເອົາຫຍ້າຄາເຮັດເປັນເຄື່ອງປະດັບພະເກດ ໄປປ່າໄມ້ຕົ້ນມອນແລະອະທິຖານວ່າ:ດຽວນີ້ ໃນທົ່ວປະເທດໄດ້ເກີດໄພແຫ້ງແລ້ງແລ້ວ ຄວນໃຫ້ພະອົງເຮົາເປັນຜູ່ຮັບຜິດຊອບ ຂໍໃຫ້ເຈົ້າຟ້າຢ່າສູ່ລົງໂທດສາມັນຊົນອັນໄພສານ ຢ່າສູ່ທຳ ຮ້າຍມວນຊົນພະອົງເຮົາທີ່ ບໍ່ສະຫຼາດສະຫຼຽວ ຫຼັງຈາກອະທິຖານແລ້ວແລ້ວ ສົມເດັດຊາງທາງກຽມຂ້າໂຕຕາຍເພື່ອບູຊາເຈົ້າຟ້າ ໃນເວລານີ້ ໄດ້ມີຝົນຕົກຢ່າງກະທັນຫັນ ຄົນທັງຫຼາຍເຫັນວ່າແມ່ນການກະທຳຂອງສົມເດັດຊາງທາງໄດ້ກະ ຕຸ້ນໃຈເຈົ້າຟ້າ
ຫຼັງຈາກສົມເດັດຊາງທາງສ້າງຕັ້ງປະເທດແລ້ວ ເພື່ອປັບປຸງອຳນາດການປົກຄອງ ໄດ້ໃຊ້ມາດຕະການອັນບັງເກີດຜົນຕ່າງໆ ຕົວຢ່າງຄືໃຫ້ລັດຕ່າງໆປົກຄອງຕົນເອງໃນລະດັບສູງ ລັດຖະບານສູນກາງພຽງແຕ່ເກັບເອົາສ່ວນສາອາກອນທີ່ເຫມາະສົມ ແລ້ວໃຫ້ປະຊາຊົນພັກຜ່ອນເພື່ອມີແຮງຄືນ ສົມເດັດຍັງໄດ້ວາງແຜນການແບ່ງເປັນເຂດບໍລິຫານຂອງລັດ ໃຫ້ປະຊາຊົນເຜົ່າດຽວກັນທີ່ຕິດຕາມສົມເດັດສູ້ລົບນັ້ນແຈກຢາຍຢູ່ແຫ່ງຕ່າງໆທົ່ວປະເທດ ດ້ານຫນຶ່ງມີຜົນດີຕໍ່ສະຖຽນລະພາບຂອງລັດ ອີກດ້ານຫນຶ່ງ ເຮັດໃຫ້ຄົນເຜົ່າຊາງກັບຄົນເຜົ່າອື່ນໆເຊື່ອມໂຍງເຂົ້າກັນເປັນກ້າວໆ ອັນໄດ້ສ້າງກົກຮາກປະຊາຊາດຈີນທີ່ເປັນປະເທດຫຼາຍຊົນເຜົ່າແລະເປັນເອກະພາບກັນໃນຕໍ່ໄປພາຍຫນ້າ ນອກນີ້ ສົມເດັດຊາງທາງໄດ້ປະດິດສ້າງລະບອບເຈົ້ານາຍຊຸດຫນຶ່ງ ຕັ້ງເຈົ້ານາຍຜູ່ທີຫນຶ່ງທີ່ຊ່ອຍສົມເດັດປົກຄອງລັດ ແລ້ວເຮັດໃຫ້ສົມເດັດຕ້ອງໄປເຮັດເລື້ອງຫມົດທຸກຢ່າງ ສ່ວນການປົກຄອງຂອງລັດຍັງເປັນລະບຽບຮຽບຮ້ອຍ
ລາຊະວົງຊາງທີ່ສົມເດັດຊາງທາງລິເລີ່ມສ້າງຂຶ້ນນັ້ນໄດ້ກາຍເປັນການເລີ່ມຕົ້ນຂອງຈີນທີ່ມີການບັນທຶກໃນປະຫວັດສາດຢ່າງແຈ່ມແຈ້ງ ຕົວຫນັງສືທີ່ຄວັດໃສ່ອອງເຕົ່າແລະກະດູກສັດທີ່ສ້າງຕັ້ງຂຶ້ນໃນລາຊະວົງຊາງໄດ້ຫັນປ່ຽນເປັນຕົວຫນັງສືຮ້ານຂອງຈີນ ອາລິຍະທຳທອງສຳລິດໃນສະໄຫມຊາງໄດ້ມີຊື່ສຽງໃນໂລກ ນັບມາຮອດປັດຈຸບັນ ມໍລະດົກອັນຫຼວງຫຼາຍພາຍມາກທີ່ຕົກທອດມາແຕ່ລາຊະວົງຊາງຍັງຄົງດູດດຶງເອົາສາຍຕາຂອງນັກບູຮານນະຄະດີແລະນັກປະຫວັດສາດ
|
