|
|
 |
| (GMT+08:00)
2005-06-09 16:33:47
|
 |
|
ລະບົບລົດເມທີ່ມີສະຕິປັນຍາຂອງປັກກິ່ງ
cri
 ປັດຈຸບັນ,ຢູ່ຄິວລົດເມທຸກແຫ່ງຂອງລົດເມຖ້ຽວ 420 ພາກຕາເວັນອອກຂອງເຂດເມືອງປັກກິ່ງ,ລ້ວນແຕ່ມີສາລາຄິວລົດເມທີ່ມີສະຕິປັນຍາ,ມັນສູງ 3 ແມັດ,ແມ່ນເສົາສາມດ້ານ,ແຕ່ລະດ້ານລ້ວນແຕ່ມີໜ້າຈໍເອເລັກໂຕຼນິກ,ຕ່າງຫັນໜ້າໄປສູ່ທາງຍານຍົນພາຫະນະ,ທາງບໍ່ແມ່ນຍານຍົນພາຫະນະແລະຄິວລົດເມ.
ເວົ້າງ່າຍໆແລ້ວ,ລະບົບລົດເມທີ່ມີສະຕິປັນຍາປະກອບດ້ວຍສາມພາກສ່ວນຄື: ພາກສ່ວນທີໜຶ່ງແມ່ນເຄື່ອງເອເລັກໂຕຼນິກທີ່ຕິດຕັ້ງຢູ່ໃນລົດເມ,ມັນໃຫຍ່ສ່ຳໝາກຈອງ,ສັບພະຄຸນຕົ້ນຕໍແມ່ນເກັບເອົາຂໍ້ມູນຂ່າວສານການແລ່ນຂອງລົດຍົນ,ແລ້ວສົ່ງຕໍ່ໂດຍຜ່ານເຄືອຂ່າຍທີ່ບໍ່ມີສາຍ; ພາກສ່ວນທີສອງແມ່ນສູນຂໍ້ມູນຂ່າວສານທີ່ຕັ້ງຢູ່ກອງບັນຊາການລົດເມ,ມັນສາມາດຮັບເອົາຂໍ້ມູນຂ່າວສານທີ່ຝາກມາຈາກເຄື່ອງເອເລັກໂຕຼນິກໃນລົດເມ,ແລ້ວຜ່ານການຄິດໄລ່,ສົ່ງເວລາທີ່ລົດເມແລ່ນຮອດຄິວລົດນັ້ນໃຫ້ພາກສ່ວນທີສາມຂອງລະບົບຄົມມະນາຄົມທີ່ມີສະຕິປັນຍາເຊິ່ງເປັນພາກສ່ວນແກນກາງຄືສາລາຄິວລົດເມທີ່ມີສະຕິປັນຍາ.
ທ່ານເສີນເວີນລົງ ນັກວິຊາການຂອງບໍລິສັດໜຶ່ງຂອງປັກກິ່ງທີ່ເຂົ້າຮ່ວມການຄົ້ນຄວ້າຜະລິດລະບົບລົດເມທີ່ມີສະຕິປັນຍາໄດ້ເວົ້າວ່າ:
"ຜ່ານຈາກໜ້າຈໍທີ່ຫັນໜ້າສູ່ຄິວລົດ,ພວກເຮົາສາມາດປະກາດຂໍ້ມູນຂ່າວສານການແລ່ນລົດໃຫ້ຜູ້ໂດຍສານທີ່ຄອຍລົດນັ້ນຊາບ,ຕົ້ນຕໍແມ່ນ,ດຽວນີ້ ລົດແລ່ນຮອດຄິວລົດໃດແລ້ວ,ແລ່ນມາຮອດຄິວນີ້ຍັງຕ້ອງການເວລາດົນປານໃດແລະອື່ນໆ."
ຕາມຊາບວ່າ,ລະບົບລົດເມທີ່ມີສະຕິປັນຍາໄດ້ທົດລອງໃນລົດເມຖ້ຽວ 420 ຂອງປັກກິ່ງເກືອບໜຶ່ງປີແລ້ວ,ຜູ້ໂດຍສານທີ່ຂີ່ລົດເມສາຍນີ້ຮູ້ສຶກພໍໃຈຫຼາຍຕໍ່ສັບພະຄຸນພະຍາກອນເວລາລົດແລ່ນມາຮອດຄິວຂອງລະບົບດັ່ງກ່າວ. ນາງຫວັງເວົ້າວ່າ:
"ຂ້າພະເຈົ້າຮູ້ສຶກວ່າ,ສາລາຄິວລົດເມທີ່ມີສະຕິປັນຍາດັ່ງກ່າວນີ້ເບິ່ງສະດວກ,ດີຫຼາຍ,ສາມາດຮູ້ເວລາລົດຮອດຄິວແລະອື່ນໆ."
ນອກຈາກພະຍາກອນເວລາລົດເມຮອດຄິວແລ້ວ,ລະບົບລົດເມທີ່ມີສະຕິປັນຍານີ້ຍັງມີສັບພະຄຸນອື່ນໆຫຼາຍຢ່າງ. ຕົວຢ່າງຄື,ໜ້າຈໍເອເລັກໂຕຼນິກຂອງສາລາລົດເມທີ່ມີສະຕິປັນຍາທີ່ຫັນໜ້າສູ່ທາງຍານຍົນພາຫະນະແມ່ນບົ່ງບອກເວລາ,ເພື່ອອຳນວຍຄວາມສະດວກໃຫ້ຜູ້ຂັບລົດຜ່ານ;ສ່ວນໜ້າຈໍທີ່ຫັນໜ້າສູ່ທາງບໍ່ແມ່ນຍານຍົນພາຫະນະແມ່ນບົ່ງບອກຂໍ້ມູນຂ່າວສານສາທາລະນະ,ລວມທັງຂ່າວສຳຄັນ,ປະກາດແຈ້ງການຂອງລັດຖະບານ,ພະຍາກອນອາກາດແລະຂໍ້ມູນຂ່າວສານກ່ຽວກັບສະພາບຖະໜົນຫົນທາງເປັນຕົ້ນ. ເມື່ອເກີດມີອາກາດໄພຮ້າຍຫຼືເກີດອຸບັດເຫດຄົມມະນາຄົມທີ່ຮ້າຍແຮງ,ພະຍາດລະບາດແລະເຫດການອື່ນໆທີ່ເກີດຂຶ້ນຢ່າງກະທັນຫັນ,ໜ້າຈໍເອເລັກໂຕຼນິກກໍຈະປະກາດຂໍ້ມູນຂ່າວສານທີ່ກ່ຽວຂ້ອງຢ່າງວ່ອງໄວ,ເຖິງຈະຢູ່ໃນຍາມກາງຄືນ,ຂໍ້ມູນຂ່າວສານດັ່ງກ່າວກໍຈະແຈ້ງທີ່ສຸດ.
ນອກນີ້,ຢູ່ຫຼັງຄາສາລາຄິວລົດເມທີ່ມີສະຕິປັນຍາ,ຍັງໄດ້ຕິດຕັ້ງກ້ອງຖ່າຍວິດີໂອທີ່ສາມາດໝູນວຽນ 270 ອົງສາ,ຜ່ານຈາກກ້ອງຖ່າຍວິດີໂອດັ່ງກ່າວ,ພະນັກງານຄຸ້ມຄອງໃນກອງບັນຊາການລົດເມ ສາມາດຕິດຕາມຄວບຄຸມປະລິມານຄົມມະນາຄົນ,ອີກດ້ານໜຶ່ງກໍສາມາດຊອກຮູ້ຈຳນວນຜູ້ໂດຍສານທີ່ກຳລັງຄອຍລົດຢູ່,ແລ້ວຈັດວາງລົດເມຢ່າງທັນການບົນພື້ນຖານດັ່ງກ່າວ.
ໃນເວລາເອົາຂ່າວ,ນັກຂ່າວໄດ້ຮູ້ວ່າ,ລະບົບລົດເມທີ່ມີສະຕິປັນຍາຍັງມີສັບພະຄຸນສຳຄັນທີ່ຈະນຳໃຊ້ໃນໄວໆນີ້,ຄືນຳພາຄົນຕາບອດຂີ່ລົດເມ. ປັດຈຸບັນ,ນັກວິຊາການຂອງຈີນໄດ້ຄົ້ນຄວ້າຜະລິດເຄື່ອງໃນມືທີ່ໃຊ້ໃນການຂີ່ລົດເມໂດຍຈຳເພາະສຳລັບຄົນຕາບອດ. ທ່ານເສີນເວີນລົງ ນັກວິຊາການທີ່ເຂົ້າຮ່ວມວຽກງານລາຍນີ້ແນະນຳວ່າ:
"ເມື່ອຄົນຕາບອດເຂົ້າໃກ້ຄິວລົດນີ້,ເຄື່ອງໃນມືຂອງເຂົາກໍຈະໄດ້ຮັບສັນຍານທີ່ຝາກມາຈາກສາລາຄິວລົດເມທີ່ມີສະຕິປັນຍາ,ແລ້ວເຄື່ອງໃນມືຈະມີສຽງບອກວ່າ,ນີ້ແມ່ນຄິວລົດຫຍັງ,ມີລົດໃດແດ່ແລ່ນຜ່ານຄິວນີ້. ໃນເວລາລົດເມສາຍໃດໜຶ່ງແລ່ນເຂົ້າຄິວແລ້ວ,ມັນກໍຈະບອກເຕືອນຜູ້ໂດຍສານຕາບອດໄດ້."
ທ່ານເສີນເວີນລົງເວົ້າວ່າ,ນອກຈາກບໍລິການນຳພາຄົນຕາບອດຂີ່ລົດແລ້ວ,ເຄື່ອງໃນມືຍັງສາມາດບໍລິການພະຍາກອນອາກາດແລະຂ່າວເປັນຕົ້ນ. ນອກນີ້ ໃນເວລາຄົນຕາບອດຕ້ອງການຊ່ອຍເຫຼືອຢູ່ມໍ່ຄິວລົດຫຼືໃນເວລາຂີ່ລົດ,ກໍສາມາດໃຊ້ເຄື່ອງໃນມືເຄື່ອງນີ້ຂໍຄວາມຊ່ອຍເຫຼືອໂດຍດ່ວນໄດ້.
ຕາມຊາບວ່າ,ເພື່ອເປີດກວ້າງສັບພະຄຸນຂອງລະບົບລົດເມທີ່ມີສະຕິປັນຍາຕື່ມອີກ,ນັກວິຊາການຂອງຈີນພວມສືບຕໍ່ຄົ້ນຄວ້າ,ຫວັງໃຫ້ລະບົບຊຸດນີ້ສາມາດສະໜອງການບໍລິການອິນເຕີເນັດ,ວິດີໂອກາງແຈ້ງ,ເຕີມເງິນໃສ່ບັດຂີ່ລົດເມແລະອື່ນໆ.
ເຖິງວ່າປັດຈຸບັນ ຢູ່ປັກກິ່ງມີແຕ່ລົດເມສາຍດຽວນຳໃຊ້ລະບົບລົດເມທີ່ມີສະຕິປັນຍາກໍຕາມ,ແຕ່ເພື່ອຍົກລະດັບບໍລິການຂອງຄົມມະນາຄົມສາທາລະນະຂອງຕົວເມືອງໃຫ້ສູງຂຶ້ນ,ປັກກິ່ງຈະໃຊ້ມາດຕະການຢ່າງແຂງແຮງ,ເພື່ອໃຫ້ລົດເມທັງໝົດລ້ວນແຕ່ໄດ້ໃຊ້ລະບົບຊຸດນີ້ກ່ອນງານກິລາໂອລິມປິກປີ 2008. ນອກຈາກປັກກິ່ງແລ້ວ,ນະຄອນຊຽງໄຮ້ເຊິ່ງເປັນເມືອງໃຫຍ່ອີກເມືອງໜຶ່ງຂອງຈີນກໍໄດ້ເລີ່ມທົດລອງລະບົບລົດເມທີ່ມີສະຕິປັນຍາແລ້ວ.
|
|
|
