|
|
 |
| (GMT+08:00)
2005-06-10 16:09:17
|
 |
|
ການຮ່ວມມືລະຫວ່າງຈີນກັບສະຫະພາບເອີລົບກ່ຽວກັບແຜນການກາລີເລດຳເນີນໄປຢ່າງສະດວກ
cri
Author: sayvanny
ວັນທີ 9 ມິຖຸນາ, ຢູ່ປັກກິ່ງ ນະຄອນຫລວງຂອງຈີນ, ເຈົ້າຫນ້າທີ່ຂອງຈີນແລະສະຫະພາບເອີລົບໄດ້ຈັດການເຈລະຈາຊັ້ນສູງກ່ຽວກັບແຜນການກາລີເລ,ຜູ່ເຂົ້າຮ່ວມການເຈລະຈາຂອງຝ່າຍຈີນແລະສະຫະພາບເອີລົບລ້ວນແຕ່ໄດ້ສະແດງຄວາມເພິ່ງພໍໃຈຕໍ່ການຮ່ວມມືລະຫວ່າງສອງຝ່າຍຕັ້ງແຕ່ຈີນເຂົ້າຮ່ວມແຜນການກາລີເລເປັນຕົ້ນມາ.
ແຜນການກາລີເລແມ່ນແຜນການຄົ້ນຄວ້າວິທະຍາສາດດ້ານຍຸດທະສາດຂອງສະຫະພາບເອີລົບເຊິ່ງເລີ່ມດຳເນີນເມື່ອປີ 2002,ຄາດຫມາຍຂອງແຜນການແມ່ນສ້າງລະບົບນຳທາງກຳນົດທິດໂດຍຜ່ານດາວທຽມໃນທົ່ວໂລກທີ່ຕ່າງກັບລະບົບ GPS ຂອງອາເມລິກາ.ລະບົບນີ້ປະກອບດ້ວຍດາວທຽມ 30 ຫນ່ວຍທີ່ບິນອ້ອມຫນ່ວໂລກໂດຍສູງຈາກຫນ້າດິນ 24000 ກິໂລແມັດ,ກະວ່າຈະເລີ່ມເຮັດວຽກໃນປີ 2008.
ທ້າຍເດືອນຕຸລາປີ 2003,ຈີນໄດ້ເຊັນສັນຍາຮ່ວມມືກັບສະຫະພາບເອີລົບກ່ຽວກັບແຜນການກາລີເລ,ແລ້ວໄດ້ກາຍເປັນປະເທດສະມາຊິກທີ່ບໍ່ແມ່ນ ປະເທດສະຫະພາບເອີລົບປະເທດທຳອິດຂອງແຜນການດັ່ງກ່າວ, ແລະໃຫ້ຄຳຫມັ້ນສັນຍາວ່າຈະລົງທຶນ 200 ລ້ານເອີໂລເຂົ້າໃນແຜນການນີ້.
ວັນທີ 9 ມິຖຸນາ,ຢູ່ປັກກິ່ງ,ທ່ານໂກຼໂຮ ຫົວຫນ້າຮັບຜິດຊອບແຜນການກາລີເບຂອງສະຫະພາບເອີລົບໄດ້ນຳພາຄະນະຜູ່ແທນເຈລະຈາກັບຈີນກ່ຽວກັບບັນຫາຮ່ວມມືກ້າວຕໍ່ໄປ.ທ່ານຈ່າງໂກເສິງ ຜູ່ຮັບຜິດຊອບຝ່າຍຈີນເວົ້າໃນງານຖະແຫລງຂ່າວຫລັງການເຈລະຈາວ່າ:
ຈຸດປະສົງຕົ້ນຕໍຂອງການເຈລະຈາເທື່ອນີ້ແມ່ນປະສານວຽກງານທີ່ກ່ຽວຂ້ອງທີ່ຈີນເຂົ້າຮ່ວມແຜນການກາລີເລເອີລົບ. ຂ້າພະເຈົ້າກັບທ່ານໂກຼໂຮຮູ້ສຶກເພິ່ງພໍໃຈຕໍ່ການຮ່ວມມືແຕ່ຈີນເຂົ້າຮ່ວມແຜນການກາລີເລມາ.
ທ່ານຈ່າງໂກເສິງເວົ້າວ່າ, ການເຈລະຈາເທື່ອນີ້ຕົ້ນຕໍໄດ້ກ່ຽວພັນເຖິງບັນຫາຕ່າງໆຄື ວິສາຫະກິດຈີນເຮັດແນວໃດຈິ່ງເຂົ້າຮ່ວມການທຸລະກິດຂອງແຜນການກາລີເລໄດ້,ຮູບການຮ່ວມມືລະຫວ່າງວິສາຫະກິດຈີນກັບຜູ່ຮັບເຫມົາການທຸລະກິດລວມຂອງແຜນການກາລີເລແລະອຸປະກອນເຕັກນິກອະວະກາດຈຳນວນຫນຶ່ງທີ່ຈີນຄົ້ນຄວ້ານັ້ນຈະນຳໃຊ້ເຂົ້າໃນແຜນການກາລີເລແນວໃດເປັນຕົ້ນ.ທ່ານເຜີຍໃຫ້ຮູ້ວ່າ, ສອງຝ່າຍຈີນກັບສະຫະພາບເອີລົບຈະເຊັນສັນຍາຮ່ວມມືລະອຽດກ່ຽວກັບການໃຊ້ເຕັກນິກຈີນເຂົ້າໃນແຜນການກາລີເລໃນເດືອນຫນ້າ.
ທ່ານໂກຼໂຮ ຜູ່ຮັບຜິດຊອບຂອງຝ່າຍສະຫະພາບເອີລົບໄດ້ຢືນຢັນຢ່າງເຕັມສ່ວນຕໍ່ຈີນທີ່ເປັນຫມູ່ຄູ່ຮ່ວມມື.ທ່ານຊີ້ອອກວ່າ, ເຖິງວ່າມີປະເທດຫລວງ ຫລາຍໃນໂລກນີ້ສົນໃຈນຳແຜນການກາລີເລ,ແຕ່ຈົນຮອດປະຈຸບັນ, ຍັງບໍ່ມີປະເທດໃດສາມາດລົງທຶນຫລາຍປານນີ້ແລະປະກອບສ່ວນຫລາຍປານນີ້ຄືດັ່ງຈີນ.
ທ່ານໂກຼໂຮເວົ້າວ່າ, ຈີນເຂົ້າຮ່ວມແຜນການກາລີເລໄດ້ສະແດງໃຫ້ເຫັນຄວາມປາຖະຫນາຂອງຈີນໃນການຮ່ວມມືກັບເອີລົບທາງດ້ານການເມືອງແລະເຕັກນິກ.ທ່ານເຊື່ອວ່າວິສາຫະກິດຈີນກໍ່ຈະໄດ້ຮັບໂອກາດທຸລະກິດດີຍ້ອນຈີນເຂົ້າຮ່ວມແຜນການນີ້.ທ່ານຍັງໄດ້ຊົມເຊີຍຈີນໃຊ້ເຕັກນິກການບິນອະວະກາດເຂົ້າໃນແຜນການກາລີເລ.ທ່ານເວົ້າວ່າ:
ຂ້າພະເຈົ້າຮູ້ແຈ້ງວ່າ, ຈີນມີເຕັກນິກອະວະກາດ,ສະນັ້ນ, ຂ້າພະເຈົ້າຄອງຄອຍການຮ່ວມມືລະຫວ່າງຈີນກັບສະຫະພາບເອີລົບຈະໄດ້ຮັບຜົນສຳເລັດ.ທ່ານໂກຼໂຮຍັງກ່າວເນັ້ນເປັນພິເສດວ່າ, ແຜນການກາລີເລຈະສືບຕໍ່ເຜີຍແຜ່ຍຸດທະສາດທົ່ວໂລກ.ທ່ານແນະນຳວ່າ, ປະຈຸບັນ, ອິສລາແອນພວມຮ້ອງຂໍເຂົ້າຮ່ວມແຜນການນີ້, ອິນເດຍ ສາທາລະນະລັດເກົາຫລີ ອົສຕຼາລີ ເບຼຊິນ ອັກຊັງຕິນ ມາລົກແລະອຸຍແກຼນເປັນຕົ້ນລ້ວນແຕ່ມີຄວາມສົນໃຈຢ່າງເຂັ້ມຂຸ້ນຕໍ່ການເຂົ້າຮ່ວມແຜນການນີ້.
|
|
|
