|
|
 |
| (GMT+08:00)
2005-06-10 16:26:07
|
 |
|
ປື້ມປະຫວັດສາດທີ່ຈີນຍີ່ປຸ່ນແລະສ.ເກົາຫລີຮ່ວມກັນຮຽບຮຽງໄດ້ຮັບຮອງການສັງຫານໂຫດນະຄອນນານກິ່ງ
cri
Author: mo
ວັນທີ 9 ມິຖຸນາປີ 2005, ປື້ມ"ປະຫວັດສາດສະໄໝມໍ່ແລະສະໄໝປັດຈຸບັນຂອງສາມປະເທດອາຊີຕາເວັນອອກ"ສະບັບພາສາຈີນທີ່ຮຽບຮຽງໂດຍນັກປາດຈີນ ຍີ່ປຸ່ນ ແລະສ.ເກົາຫລີເກືອບ 40 ທ່ານ ໄດ້ຈັດພິທີຈຳໜ່າຍຄັ້ງທຳອິດຢູ່ທີ່ປັກກິ່ງ. ໃນປື້ມເຫຼັ້ມນີ້, ນັກປາດຂອງສາມປະເທດໄດ້ບັນທຶກຢ່າງພາວະວິໄສຕໍ່ບັນຫາຕ່າງໆຄືລັດທິລັດຖະທະຫານຍີ່ປຸ່ນກໍ່ສົງຄາມຮຸກຮານ, ການສັງຫານໂຫດນານກິ່ງ, ໂສເພນີໃນກອງທະຫານຍີ່ປຸ່ນ, ແລະການຕັດສິນຄະດີອາຊະຍາກອນສົງຄາມທີ່ໂຕກຽວເປັນຕົ້ນ, ນີ້ໄດ້ຕອບໂຕ້ທັດສະນະປະຫວັດສາດຂອງກຳລັງປີກຂວາຍີ່ປຸ່ນທີ່ເວົ້າຍ້ອມສົງຄາມ.
ການລິເລີ່ມຮຽບຮຽງປື້ມເຫຼັ້ມນີ້ແມ່ນມີຂຶ້ນຢູ່ກອງປະຊຸມເວທີປາໄສສັນຕິພາບອາຊີຕາເວັນອອກທີ່ຈັດຂຶ້ນຢູ່ນະຄອນນານກິ່ງເມື່ອປີ 2001, ເວລານັ້ນ, ພໍດີຍິ່ປຸ່ນພິມຈຳໜ່າຍປື້ມຮຽນປະຫວັດສາດທີ່ຮຽບຮຽນໂດຍປີກຂວາ, ຈຶ່ງມີຄົນສະເໜີໃຫ້ນັກປາດຂອງສາມປະເທດຜ່ານການປຶກສາຫາລືແລກປ່ຽນກັນຮຽບຮຽງປຶ້ມອ່ານປະຫວັດສາດຮ່ວມເຫຼັ້ມໜຶ່ງ, ເພື່ອຕອບໂຕ້ປື້ມຮຽນທີ່ຮຽບຮຽງໂດຍປີກຂວາຢ່າງເດັດດ່ຽວ.
ຕາມຊາບວ່າ, ໃນເລວາຮຽບຮຽງນັ້ນ, ນັກປາດຈີນເຄີຍຖົກຖຽງກັນກັບນັກປາດຍີ່ປຸ່ນ. ກ່ຽວກັບການຖົກຖຽງກັນໃນເວລາຮຽບຮຽງນັ້ນ, ຄົນທັງຫລາຍຕົ້ນຕໍແມ່ນຄຳນຶງເຖິງສາມັນຊົນ, ແລະໃຊ້ຕົວເລກທີ່ມີຄວາມອິດທິພົນໃນຄາວນັ້ນແລະຫລັກອ້າງອິງກົດໝາຍມາອະທິບາຍ, ເພື່ອສະແຫວງຫາຄວາມຮັບຮູ້ຄືກັນ.
ທ່ານຈູເສີງຊານ ຜູ້ຮຽບຮຽງຂອງຝ່າຍຈີນ ຫົວໜ້າຫໍລະລຶກການສັງຫານໂຫດນານກິ່ງກ່າວວ່າ, ການພິມຈຳໜ່າຍປື້ມເຫຼັ້ມນີ້, ແມ່ນການບຸກທະລຸຂອງສາມປະເທດຄືຈີນ ຍີ່ປຸ່ນແລະສ.ເກົາຫລີໃນການແກ້ໄຂບັນຫາປື້ມຮຽນປະຫວັດສາດ. ເວົ້າໃນຄວາມໝາຍໃດໜຶ່ງແລ້ວ, ຄວາມເຫັນຂອງສາມປະເທດທີ່ມີຕໍ່ປະຫວັດສາດໄດ້ເປັນເອກະພາບໃນເບື້ອງຕົ້ນ, ຄວາມໝາຍຂອງການພິມຈຳໜ່າຍປື້ມນີ້ຫລາຍກວ່າປື້ມເອງ, ມັນຕາງໜ້າທ່າທີແຫ່ງການຮ່ວມມືແລກປ່ຽນກັນໃນເຂດອາຊີຕາເວັນອອກໃນອະນາຄົດ, ສ້າງເປັນແບບຢ່າງໃນການແກ້ໄຂຄວາມເຫັນຂັດກັນທາງປະຫວັດສາດລະຫວ່າງຊາດ, ໄດ້ແກ່ສະແຫວງຫາຄວາມຮັບຮູ້ຄືກັນໂດຍຜ່ານວິທີຫາລືກັນ.
ກ່ຽວກັບບັນຫາການສັງຫານໂຫດທີ່ນານກິ່ງ, ຢູ່ຍີ່ປຸ່ນມີການຖົກຖຽງກັນຫລາຍ, ຢູ່ຍີ່ປຸ່ນໄດ້ແບ່ງອອກເປັນຝ່າຍສັງຫານໂຫດ, ຝ່າຍປັ້ນແຕ່ງ, ແລະຝ່າຍສ່ວນໜ້ອຍ.
ຝ່າຍສັງຫານໂຫດເຫັນວ່າ, ຍີ່ປຸ່ນເຄີຍດຳເນີນການສັງຫານໂຫດທີ່ນານກິ່ງ, ນັກປາດຍີ່ປຸ່ນມີອິດທິພົນກວ່າໝູ່ໃນການຄົ້ນຄວ້າສັງຫານໂຫດນານກິ່ງ, ເພາະນັກປາດຜູ້ອາວຸໂສສອງທ່ານໄດ້ເຖິງແກ່ກຳແລ້ວ, ຜູ້ທີສາມໄດ້ເຂົ້າຮ່ວມການຮຽບຮຽງປື້ມເຫຼັ້ມນີ້, ທ່ານເຫັນວ່າ, ຈຳນວນຜູ້ເສຍຊີວິດໃນການສັງຫານໂຫດນານກິ່ງແມ່ນ 2 ແສນຄົນ. ຕົວເລກດັ່ງກ່າວນີ້ໄດ້ຖືກປີກຂວາຍີ່ປຸ່ນໂຈມຕີຢ່າງຮຸນແຮງ.
ປື້ມ"ປະຫວັດສາດສະໄໝມໍ່ແລະສະໄໝປັດຈຸບັນຂອງສາມປະເທດອາຊີຕາເວັນອອກ"ໄດ້ໃຊ້ສອງຕົວເລກສັງຫານໃນເອກະສານສຳຫລວດຕັດສິນຢູ່ນານກິ່ງ, ສອງຕົວເລກນີ້ບວກໃສ່ກັນແລ້ວແມ່ນ 3 ແສນ 4 ໝື່ນຄົນ; ພ້ອມກັນນັ້ນ, ປື້ມປະຫວັດສາດສາມປະເທດອາຊີຕາເວັນອອກໄດ້ນຳໃຊ້ຕົວເລກສະຫລຸບໃນເວລາຕັດສິນອາຊະຍາກອນຢູ່ໂຕກຽວ, ໄດ້ສັງຫານ 2 ແສນຄົນຂຶ້ນໄປ. ປື້ມ"ປະຫວັດສາດສະໄໝມໍແລະສະໄໝປັດຈຸບັນຂອງສາມປະເທດອາຊີຕາເວັນອອກ"ຍັງໄດ້ບັນທຶກຢ່າງພາວະວິໄສຕໍ່ຫລັກສູດປີກຂວາຍີ່ປຸ່ນຫຼົບຫຼີກບໍ່ກ່າວເຖິງເຫດການຕ່າງໆຄື: ໂສເພນີໃນກອງທະຫານຍີ່ປຸ່ນແລະແຮງງານຮວາກາງເປັນຕົ້ນ.
ກ່ອນໜ້ານີ້, ປື້ມ"ປະຫວັດສາດສະໄໝມໍ່ແລະສະໄໝປັດຈຸບັນຂອງສາມປະເທດອາຊີຕາເວັນອອກ"ສະບັບພາສາເກົາຫລີໃຕ້ແລະພາສາຍີ່ປຸ່ນຕ່າງພິມຈຳໜ່າຍ 2 ໝື່ນເຫຼັ້ມຢູ່ສ.ເກົາຫລີແລະຍີ່ປຸ່ນ. ໃນປື້ມດັ່ງກ່າວ, ໄດ້ແນະນຳຢ່າງຮອບດ້ານ, ພາວະວິໄສແລະທ່ຽງທຳຕໍ່ປະຫວັດສາດຮຸກຮານກັບການຕ້ານຮຸກຮານລະຫວ່າງຈີນ ສ.ເກົາຫລີກັບຍີ່ປຸ່ນ. ຜູ້ຮຽບຮຽງຫວັງວ່າ, ປື້ມເຫຼັ້ມນີ້ສາມາດເຮັດໃຫ້ຊາວໜຸ່ມ ສາມປະເທດມີຄວາມຮັບຮູ້ຄືກັນຕໍ່ປະຫວັດສາດ.
ທ່ານຢິນຮິດທັກ ຜູ້ຮຽບຮຽງຂອງຝ່າຍສ.ເກົາຫລີ ສາສະດາຈານສະຖາບັນຄົ້ນຄວ້າວິທະຍາສາດວັດທະນະທຳຂອງມະຫາວິທະຍາໄລອາຊີຕາເວັນອອກກ່າວວ່າ, ປັດຈຸບັນ, ປື້ມເຫຼັ້ມນີ້ເປັນທີໜຶ່ງໃນການລຽງລຳດັບປື້ມໜັງສືປະຫວັດສາດສ.ເກົາຫລີ, ແລະຈະພິມຈຳໜ່າຍອີກໃນເດືອນກໍລະກົດ.
ທ່ານອູເມດາ ມາຊະມິ ຜູ້ຮັບຜິດສຳນັກພິມຈຳໜ່າຍຄົ້ນຄວ້າວັດທະນະທຳຍີ່ປຸ່ນເຜີຍໃຫ້ຮູ້ວ່າ, ປື້ມ 2 ໝື່ນເຫຼັ້ມໄດ້ຂາຍຂາດພາຍໃນອາທິດໜຶ່ງ, ສຳນັກພິມຈຳໜ່າຍຕົກລົງຈະພິມຕື່ມ 15 ພັນເຫຼັ້ມ, ໂຮງຮຽນເອກະຊົນທີ່ກຽວໂຕກ່າວວ່າ, ຈະເອົາປື້ມນີ້ເປັນປື້ມຮຽນສຳຮອງຂອງຫລັກສູດປະຫວັດສາດ.
ທ່ານເຊ້ເຊົ້າກວາງ ພໍ່ຄ້າປຶ້ມໜັງສືຈີນ ຜູ້ອຳນວຍການສຳນັກພິມຈຳໜ່າຍເອກະສານວິທະຍາສາດສັງຄົມຈີນສະເໜີວ່າ, ການພິມຈຳໜ່າຍປື້ມດັ່ງກ່າວໄດ້ເຮັດໃຫ້ໄຕ້ຫວັນ ຮົງກົງແລະຕ່າງປະເທດສົນໃຈນຳ, ສຳນັກພິມຈຳໜ່າຍອາເມລິກາແຫ່ງໜຶ່ງກ່າວວ່າ, ມີເຈດຕະນາອອກເປັນພາສາອັງກິດ, ສ່ວນການພິມຈຳໜ່າຍປື້ມສະບັບພາລາໂລກແລະສະບັບຕົວໜັງສືຈີນແບບເກົ່າກໍພວມວາງແຜນຢູ່.
|
|
|
