|
|
 |
| (GMT+08:00)
2005-06-10 16:37:30
|
 |
|
ວິທີງ່າຍໆໃນຊີວິດປະຈຳວັນທີ່ມີຜົນດີຕໍ່ສຸຂະພາບ
cri
Author: li
 ໃນການບຳລຸງຮ່າງກາຍໃນຊີວິດປະຈຳວັນ,ຄຽງຄູ່ກັບການຄົ້ນຄວ້າວິທະຍາສາດຂະຫຍາຍຕົວອອກແລະລົງສູ່ລວງເລິກ,ທັດສະນະຄະຕິດັ້ງເດີມຈຳນວນໜຶ່ງກໍປ່ຽນໃໝ່ເລື້ອຍໆ.
ການຫາຍໃຈໃຫຍ່ແມ່ນປະກົດການທາງສະລີລະສາດຂອງຄົນໃນເວລາພົບກັບເຫດການທີ່ໂສກເສົ້າ,ເປັນຫ່ວງ,ອາໄລອາວອນ,ຄວາມທຸກທໍລະມານໃຈຫຼືອຸກອັ່ງລຳຄານໃຈ.
ໃນເວລາດົນນານມານີ້,ຄົນທັງຫຼາຍເຫັນວ່າ,ການຫາຍໃຈໃຫຍ່ການອຸທານແມ່ນປະກົດການທີ່ຫຍໍ້ທໍ້ແລະເຫັນໄປໃນແງ່ຮ້າຍ,ແຕ່ການສັງເກດຂອງນັກຈິດຕະສາດຍີ່ປຸ່ນສະແດງໃຫ້ເຫັນວ່າ,ໃນເວລາຄົນເຮົາຮູ້ສຶກໂສກເສົ້າເຫງົາງ່ວມນັ້ນ,ຫາຍໃຈໃຫຍ່ສອງບາດຈະມີຄວາມຮູ້ສຶກປະໂລມໃຈ,ໂລ່ງໃຈ; ຫາຍໃຈໃຫຍ່ໃນເວລາວຽກງານແລະການຮ່ຳຮຽນເຄັ່ງຕຶງແລະອິດເມື່ອຍ,ຫາຍໃຈໃຫຍ່ຫຼາຍບາດຈະເຮັດໃຫ້ມີຄວາມຮູ້ສຶກໃຈກວ້າງ,ໃຈທຸ່ນທ່ຽງ; ໃນເວລາທີ່ເພິ່ງພໍໃຈ,ມ່ວນຊື່ນຕື່ນເຕັ້ນ,ຫາຍໃຈໃຫຍ່ບາດໜຶ່ງກໍຈະຮູ້ສຶກສະບາຍອົກສະບາຍໃຈ. ນັກຈິດຕະສາດແລະນາຍໝໍເຄີຍແທກເລືອດດັນໃຫ້ນັກກິລາກ່ອນເຂົາເຈົ້າຈະໄປຊິງເອົາແຊມປຽນແລະກ່ອນນັກຮຽນຈະເຂົ້າຫ້ອງສອບເສັງ,ແລ້ວໃຫ້ພວກເຂົາເຈົ້າຫາຍໃຈໃຫຍ່ແລະອຸທານຫຼາຍບາດ,ໃນທີ່ສຸດປະກົດເຫັນວ່າ,ຄວາມດັນຫົດຫູ່ແລະຄວາມດັນຂະຫຍາຍຂອງພວກເຂົາເຈົ້າລ້ວນແຕ່ຕ່ຳລົງໜ້ອຍໜຶ່ງ. ການຫາຍໃຈແລະໃຈເຕັ້ນກໍຊ້າລົງ,ສະພາບຕື່ນເຕັ້ນໄດ້ຜ່ອນຄາຍລົງ. ສະນັ້ນ ນັກສະລີລະຊາດຊີ້ອອກວ່າ,ກ່ອນຫຼິ້ນກິລາໃນແຕ່ລະມື້,ໃຫ້ຫາຍໃຈໃຫຍ່ຫຼາຍເທື່ອກ່ອນຈະມີບົດບາດເຮັດໃຫ້ກ້າມເນື້ອຫາຍໃຈເຂັ້ມແຂງແລະປົວແປງສັບພະຄຸນຫາຍໃຈໃຫ້ດີຂຶ້ນ,ທັງສາມາດເຮັດໃຫ້ຈິດໃຈຊື່ນບານ,ທັງຊຸກຍູ້ການຫັດກາຍບໍລິຫານ.
ຄົນທັງຫຼາຍຍ່າງຫຼິ້ນໃນເວລາອາກາດປອດໂປ່ງຖືກຖືເປັນເລື່ອງປົກກະຕິ,ແຕ່ຢູ່ບາງປະເທດເອີລົບແລະອາເມລິກາ,ມີຄົນນັບມື້ນັບຫຼາຍໄປຍ່າງຫຼິ້ນໃນເວລາຝົນຕົກ. ນີ້ແມ່ນຍ້ອນວ່າ,ນັກອຸຕຸນິຍົມເຫັນວ່າ,ການຍ່າງຫຼິ້ນໃນເວລາຝົນຕົກມີບົດບາດທີ່ດີຫຼາຍຢ່າງກວ່າການຫັດກາຍໃນຍາມອາກາດປົກກະຕິ. ເພາະວ່າໃນເວລາຝົນຕົກ,ຝົນຈະຊຸລ້າງຂີ້ຝຸ່ນຖິ້ມ,ເຮັດໃຫ້ອາກາດສະອາດ,ຖະໜົນຫົນທາງຍິ່ງສະອາດ,ອາກາດຍິ່ງສົດໃສ. ນອກນີ້ ໃນເວລາແດດກ້າກ່ອນຝົນຕົກແລະໃນເວລາຝົນຫາກໍ່ຕົກ,ຈະມີອີອົງລົບເກີດຂຶ້ນຢ່າງຫຼວງຫຼາຍ,ເຊິ່ງຖືກເອີ້ນເປັນ"ວິຕາມິນໃນອາກາດ",ແລະຈະຊ່ອຍຫຼຸດຄວາມດັນເລືອດ. ການແຂ່ງຝົນຍ່າງຫຼິ້ນຍັງຈະຊ່ອຍລົບລ້າງພະຍາດຊຶມເສົ້າຍ້ອນຟ້າບົດຝົນຕົກ. ສ່ວນຜູ້ຍ່າງຫຼິ້ນໂດຍບໍ່ມີການກັ້ງບັງຫຍັງນັ້ນ,ຝົນຝອຍຕົກຮຳໃສ່ກໍເໝືອນກັບອາບນ້ຳເຢັນທຳມະຊາດເທື່ອໜຶ່ງ,ສາມາດເພີ່ມກຳລັງຕ້ານທານຂອງຮ່າງກາຍໃຫ້ສອດຄ່ອງກັບການປ່ຽນແປງຂອງສິ່ງແວດລ້ອມພາຍນອກ.
ຢູ່ຈີນມີສຸພາສິດເວົ້າວ່າ,"ຍາມດີຂອງມື້ໜຶ່ງແມ່ນຢູ່ຕອນເຊົ້າ". ຄົນສ່ວນຫຼາຍລື້ງຫັດກາຍໃນຕອນເຊົ້າ,ນຶກວ່າຈະເຮັດໃຫ້ຈິດໃຈຊື່ນບານ. ແຕ່ວ່າ,ຜູ້ຊ່ຽວຊ້ານຮັກສາສຸຂະພາບໄດ້ຄົ້ນຄວ້າເຫັນວ່າ,ການຫັດກາຍໃນຕອນຫົວຄ່ຳກໍມີປະໂຫຍດຫຼາຍ. ສູນສຸຂະພາບຂອງມະຫາວິທະຍາໄລຫຼັງໜຶ່ງໃນອາເມລິກາໄດ້ຄົ້ນຄວ້າແລ້ວຊີ້ອອກວ່າ,ການເຄື່ອນໄຫວຊະນິດຕ່າງໆຂອງຮ່າງກາຍລ້ວນແຕ່ຖືກ"ໂມງຊີວະຊາດ"ຄວບຄຸມ,ໃນ 24 ຊົ່ວໂມງຂອງມື້ໜຶ່ງ,ຈຸດສູງສຸດແລະຈຸດຕ່ຳສຸດຂອງກຳລັງຮ່າງກາຍຂອງຄົນລ້ວນແຕ່ມີກົດເກນອັນແນ່ນອນ,ສ່ວນເວລາທີ່ກຳລັງຮ່າງກາຍເສີມຂະຫຍາຍຮອດຈຸດສູງສຸດນັ້ນ ສ່ວນຫຼາຍແມ່ນຢູ່ຕອນຫົວຄ່ຳ,ໃນໄລຍະນີ້,ຄວາມຄ່ອງແຄ້ວແລະຄວາມສອດຄ່ອງຂອງຮ່າງກາຍຂອງຄົນລ້ວນແຕ່ບັນລຸເຖິງລະດັບສູງສຸດ,ຫົວໃຈເຕັ້ນແລະຄວາມດັນເລືອດກໍທຸ່ນທ່ຽງທີ່ສຸດ,ຖ້າຫັດກາຍໃນໄລຍະນີ້,ຫົວໃຈຈະບໍ່ເຕັ້ນໄວແລະຄວາມດັນເລືອດກໍບໍ່ສູງຂຶ້ນ,ມີຜົນປະໂຫຍດຕໍ່ສຸຂະພາບ. ການຄົ້ນຄວ້າຍັງເຫັນວ່າ,ການຫັດກາຍໃນຕອນຫົວຄ່ຳຍ້ອນຫ່າງຈາກເວລານອນບໍ່ດົນປານໃດ,ຄວາມອິດເໝື່ອຍໃນເວລາຫັດກາຍຈະຊ່ອຍໃຫ້ນອນຫຼັບໄວ.ນອກນີ້ ການຫັດກາຍໃນຕອນຫົວຄ່ຳແຮ່ງເໝາະສຳລັບຜູ້ອອກແຮງງານດ້ວຍສະໝອງ,ເພາະວ່າ,ເມື່ອໄດ້ໃຊ້ສະໝອງມາມື້ໜຶ່ງແລ້ວ,ວຽກທີ່ເຮັດໃນຍາມກາງເວັນຍັງຄ້າງຢູ່ໃນສະໝອງຢູ່,ຖ້າຫາບ່ອນມິດງຽບໄປຫັດກາຍຫຼັງອາຫານຄ່ຳເຄິ່ງຊົ່ວໂມງ,ຢືດເສັ້ນຢືດແອວ,ຢຸດຢ່ອນອາລົມຈະເຮັດໃຫ້ສະໝອງແຈ່ມໃສ,ທັງສາມາດປ່ຽນແປງສະພາບນອນ,ໄດ້ປະໂຫຍດສອງຢ່າງ.
|
|
|
