|
ສະບາຍດີທ່ານຜູ່ຟັງທີ່ໂຄລົບ. ໃນໜຶ່ງປີທີ່ຜ່ານມາ, ກິລາເທັນນິສຈີນໄດ້ກ້າວໜ້າຫຼາຍ. ໃນງານແຂ່ງຂັນເທັນນິສອົສຕຼາລີໂອເພັນທີ່ຈັດຂຶ້ນເມື່ອຕົ້ນປີ 2004, ນາງເຈິ້ງແຈກັບນາງອ້ຽນຈືໄດ້ເຂົ້າຮອບ 8 ທິມສຸດທ້າຍນີ້ເປັນບຸກທະລຸເທື່ອໜຶ່ງທັງເປັນຜົນງານດີທີ່ສຸດຂອງນັກກິລາເທັນນິສຕີຄູ່ເພດຍິງຈີນໃນງານແຂ່ງຂັນເທັນນິສໂອເພັນແກຼນດ໌ສະລາມ(Grand Slam); ໃນງານແຂ່ງຂັນເທັນນິສຝຣັ່ງໂອເພັນປີ 2004 ທີ່ຈັດຂຶ້ນຕາມຫຼັງ, ນາງເຈິ້ງແຈໄດ້ເຂົ້າຮອບ 16 ຄົນສຸດທ້າຍ ເຊິ່ງເປັນຜົນງານດີທີ່ສຸດຂອງນັກກິລາຕີດ່ຽວເພດຍິງຂອງຈີນໃນງານແຂ່ງຂັນ Grand Slam, ຕໍ່ຈາກນັ້ນ ໃນງານກິລາໂອລິມປິກອາແຕນ, ນາງລີທິງກັບນາງຊຸນຖຽນຖຽນຊິງໄດ້ຫຼຽນຄຳເທັນນິສຕີຄູ່ເພດຍິງ. ໃນເວລາ 6 ເດືອນທີ່ຜ່ານມາ, ນັກກິລາຈີນເກົ້າອົດເກົ້າເຍື້ອນ, ນາງລີນາຊິງໄດ້ແຊມປຽນເປັນຄັ້ງທຳອິດໃນ WTA, ນີ້ກໍ່ແມ່ນແຊມປຽນຄັ້ງທຳອິດຂອງຈີນ. ໃນການບຸກທະລຸດັ່ງກ່າວນີ້, ນັກກິລາທີ່ຖືກສົນໃຈຫຼາຍກວ່າໝູ່ແມ່ນນາງລີທິງກັບນາງຊຸນຖຽນຖຽນ ແຊມປຽນງານກິລາໂອລິມປິກ, ງານກິລາໂອລິມປິກອາແຕນໄດ້ຜ່ານພົ້ນໄປເກືອບໜຶ່ງປີແລ້ວ, ພວກເຂົາເຈົ້າມີຄວາມຄອງຄອຍຫຍັງແດ່? ໃນລາຍການໂລກກິລາພາກນີ້, ເຊິນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ນັກກິລາຈີນທີ່ເປັນແຊມປຽນເທັນນິສໂອລິມປິກຄອງຄອຍມີການບຸກທະລຸຄັ້ງໃໝ່.
ໃນງານແຂ່ງຂັນເທັນນິສຝຣັ່ງໂອເພັນປີ 2005 ທີ່ຈັດຂຶ້ນໃນວັນທີ 23 ພຶດສະພາ, ນາງລີທິງກັບນາງຊຸນຖຽນຖຽນບໍ່ໄດ້ເຂົ້າຮອບ 8 ທິມສຸດທ້າຍ, ແຕ່ເຂົາເຈົ້າສອງຄົນກໍມີການບຸກທະລຸ, ເພາະນີ້ແມ່ນຜົນງານດີກວ່າໝູ່ທີ່ນັກກິລາຈີນຍາດມາໄດ້ໃນງານແຂ່ງຂັນຝຣັ່ງໂອເພັນ, ກໍ່ແມ່ນຜົນງານດີທີ່ສຸດຂອງສອງຄົນໃນງານແຂ່ງຂັນ Grand Slam. ການບຸກທະລຸເທື່ອນີ້ບໍ່ແມ່ນງ່າຍ. ຍ້ອນວ່າຫຼັງຈາກງານກິລາໂອລິມປິກອາແຕນ, ຜົນການແຂ່ງຂັນຂອງນາງລີທິງກັບນາງຊຸນຖຽນຖຽນບໍ່ດີປານໃດ, ໃນການແຂ່ງຂັນຕີຄູ່ເພດຍິງຂອງງານແຂ່ງຂັນເທັນນິສອົສຕຼາລີໂອເພັນທີ່ຈັດຂຶ້ນເມື່ອຕົ້ນປີນີ້, ເຂົາເຈົ້າສອງຄົນຕົກຮອບທີສາມ. ນາງລີທິງໄດ້ໃຫ້ສຳພາດຕໍ່ນັກຂ່າວວ່າ, ກ່ອນງານແຂ່ງຂັນຝຣັ່ງໂອເພັນ, ສະພາບການຂອງນາງບໍ່ດີປານໃດ, ນາງກັບນາງຊຸນຖຽນຖຽນແມ່ນຊິງໄດ້ຜົນງານດີໂດຍອາໄສການຝຶກແອບຫຼາຍແລະລຳບາກທີ່ສຸດກ່ອນງານແຂ່ງຂັນແລະບຸກບືນສູ້ຊົນຢ່າງໝັ້ນໜຽວທົນທານໃນການແຂ່ງຂັນ.
ນາງລີທິງເວົ້າວ່າ: ກ່ອນໜ້ານີ້, ສະພາບການແຂ່ງຂັນຂອງຂ້າພະເຈົ້າບໍ່ດີປານໃດ, ຂ້າພະເຈົ້າເອງກໍບໍ່ມີຄວາມໝັ້ນໃຈປານໃດ, ກ່ອນງານແຂ່ງຂັນຝຣັ່ງໂອເພັນ ໄດ້ເຂົ້າຮ່ວມງານແຂ່ງຂັນຫຼາຍເທື່ອ, ເຖິງວ່າຊິງໄດ້ແຊມປຽນໃນງານແຂ່ງຂັນເທື່ອທຳອິດກໍ່ຕາມ, ແຕ່ຄູ່ແຂ່ງຂັນບໍ່ແຂງປານໃດ, ເມື່ອແຂ່ງຂັນຢູ່ອີຕາລີ, ໃນຮອບທຳອິດກໍເສຍໃຫ້ນາງເຜິງຊວ້າຍກັບນາງລີຮຸ້ຍຈື. ກ່ອນງານແຂ່ງຂັນຝຣັ່ງໂອເພັນ ຂ້າພະເຈົ້າຝຶກແອບເອົາແທ້ເອົາວ່າ, ໄດ້ປັບປຸງຕົນເອງໂດຍແນໃສ່ບັນຫາ, ໃນເວລາແຂ່ງຂັນກໍສູ້ຊົນຢ່າງໝັ້ນໜຽວທົນທານ, ໃນທີ່ສຸດ ຂ້າພະເຈົ້າຍິ່ງຕີກໍຍິ່ງມີຄວາມໝັ້ນໃຈ.
ການໄດ້ຮັບໄຊຊະນະໃນງານແຂ່ງຂັນເທັນນິສຝຣັ່ງໂອເພັນ ເຮັດໃຫ້ນາງລີທິງກັບນາງຊຸນຖຽນຖຽນມີຄວາມໝັ້ນໃຈຕໍ່ຕົນເອງອີກ, ເຂົາເຈົ້າກ່າວວ່າ, ຈະພະຍາຍາມມີການບຸກທະລຸຫຼາຍກວ່າເກົ່າໃນງານກິລາທົ່ວປະເທດຈີນທີ່ຈະຈັດຂຶ້ນໃນທ້າຍປີນີ້ ແລະໃນງານແຂ່ງຂັນເທັນນິສອາເມລິກາໂອເພັນທີ່ຈະຈັດຂຶ້ນໃນເດືອນກັນຍາປີນີ້. ທ່ານຊຸນຖຽນຖຽນກ່າວວ່າ: "ເປົ້າໝາຍຂ້າງໜ້າຂອງພວກຂ້າພະເຈົ້າແມ່ນສືບຕໍ່ໃຫ້ມີການບຸກທະລຸໃໝ່ໃນງານແຂ່ງຂັນເທັນນິສໂອເພັນ, ເວົ້າສຳລັບເທັນນິສແລ້ວ, ງານແຂ່ງຂັນໂອເພັນແມ່ນສຳຄັນຫຼາຍ."
ຢາກຈະໄດ້ຮັບຜົນງານດີຕື່ມອີກ, ນາງລີທິງກັບນາງຊຸນຖຽນຖຽນຕ້ອງຜ່ານຜ່າຄວາມຫຍຸ້ງຍາກອີກປະການໜຶ່ງ, ນັ້ນກໍ່ຄື ໃນຖານະເປັນແຊມປຽນງານກິລາໂອລິມປິກ ຈະຮັບມືແນວໃດກັບຄວາມສົນໃຈຂອງຜູ່ອື່ນແລະຄວາມກົດດັນຢ່າງບໍ່ຟ້າວບໍ່ຟັ່ງ. ຕໍ່ເລື່ອງນີ້, ທ່າທີຂອງພວກເຂົາເຈົ້າແມ່ນ "ປັບຕົນເອງຫຼາຍກວ່າເກົ່າ". ນາງຊຸນຖຽນຖຽນເວົ້າວ່າ: "ຄົນຮູ້ຈັກພວກຂ້າພະເຈົ້າຫຼາຍຂຶ້ນແລ້ວ, ຝາກຄວາມຫວັງນຳພວກຂ້າພະເຈົ້າກໍຫຼາຍຂຶ້ນນຳ. ໃຕ້ສະພາບການນີ້, ພວກຂ້າພະເຈົ້າຈະເພີ່ມຄວາມກົດດັນໃສ່ຕົນເອງບໍ່ໄດ້, ຖ້າບໍ່ດັ່ງນັ້ນກໍ່ຈະແຂ່ງຂັນບໍ່ໄດ້ອີກ. ແນ່ນອນແລ້ວ, ບາງເທື່ອກໍ່ມີຄວາມກົດດັນ, ເພາະນັດໃດກໍ່ຢາກເອົາຊະນະ. ສະນັ້ນ ຮັບມືກັບຄວາມກົດດັນແລະປັບຕົນເອງແນວໃດແມ່ນສຳຄັນທີ່ສຸດ."
ນອກຈາກສືບຕໍ່ກ້າວໄປໜ້າໃນລາຍການຕີຄູ່ແລ້ວ, ແຊມປຽນຄູ່ນີ້ຍັງມີຂົງເຂດ ໜຶ່ງຕ້ອງການ "ບຸກທະລຸ", ນັ້ນກໍ່ຄືຈະຍົກລະດັບຕີດ່ຽວໃຫ້ສູງຂຶ້ນແນວໃດ? ໃນກິລາເທັນນິສອາຊີບ, ນັກກິລາຈະສົນໃຈການຕີດ່ຽວຫຼາຍກວ່າການຕີຄູ່. ສະນັ້ນ, ຫຼັງຈາກງານກິລາໂອລິມປິກອາແຕນ, ນາງລີທິງກັບນາງຊຸນຖຽນຖຽນກໍ່ຕັດສິນໃຈມີການບຸກທະລຸໃນການຕີດ່ຽວ. ແຕ່ໃນດ້ານນີ້, ພວກເຂົາເຈົ້າໄດ້ປະເຊີນກັບສະຖານະພາບທີ່ຍັງຫຍຸ້ງຍາກກວ່າການຊິງເອົາແຊມປຽນງານກິລາໂອລິມປິກ, ເພາະການຕີດ່ຽວກັບການຕີຄູ່ຂອງເທັນນິສແຕກຕ່າງກັນຫຼາຍ, ນາງຊຸນຖຽນຖຽນເວົ້າວ່າ: ການລຽງລຳດັບລະຫວ່າງການຕີດ່ຽວກັບການຕີຄູ່ຂອງພວກຂ້າພະເຈົ້າຈັ່ງແມ່ນໂຕນກັນຫຼາຍ, ຫຼາຍເທື່ອແລ້ວ ພວກຂ້າພະເຈົ້າເຂົ້າຮ່ວມການແຂ່ງຂັນທາງການບໍ່ໄດ້, ເຂົ້າຮ່ວມຮອບຄັດເລືອກ, ຕ້ອງແຂ່ງຂັນກັນ 3 ຮອບຈິ່ງເຂົ້າຮອບ ແຂ່ງຂັນທາງການໄດ້. ໃນດ້ານເຕັກນິກກໍ່ມີບັນຫາ, ເພາະນັກກິລາຕີດ່ຽວແລ່ນຢູ່ສະໜາມກວ້າງກວ່າຕີຄູ່, ຍັງມີຄວາມຮຽກຮ້ອງຕ້ອງການຕໍ່ຄວາມສາມາດຂອງນັກກິລາຕີດ່ຽວຫຼາຍກວາຕີຄູ່.
ນັກກິລາຕີດ່ຽວຜູ່ເກັ່ງກໍ່ຍິ່ງຫຼາຍ, ການແຂ່ງຂັນຍິ່ງດຸເດືອດກວ່າ, ນີ້ຈະເຮັດໃຫ້ນາງລີທິງກັບນາງຊຸນຖຽນຖຽນຍາກທີ່ຈະໄດ້ຮັບໝາກຜົນໃນເວລາສັ້ນ. ນັບມາຮອດປະຈຸບັນ, ຜົນງານຕີກ່ຽວດີທີ່ສຸດຂອງນາງລີທິງພຽງແຕ່ເຂົ້າຮອບແຂ່ງຂັນທາງການໃນງານແຂ່ງຂັນເທັນນິສອົສຕຼາລີໂອເພັນຕົ້ນປີນີ້ທໍ່ນັ້ນ, ສ່ວນນາງຊຸນຖຽນຖຽນແມ່ນພຽງແຕ່ເຂົ້າຮອບທີສອງໃນງານແຂ່ງຂັນວິມເບີດັນໂອເພັນໃນປີກາຍ; ງານແຂ່ງຂັນຝຣັ່ງໂອເພັນເທື່ອນີ້, ສອງຄົນກໍ່ບໍ່ໄດ້ເຂົ້າຮອບແຂ່ງຂັນທາງການ. ຍາກ ຈັ່ງແມ່ນຍາກແທ້! ແຕ່ນາງສອງຄົນກໍ່ກ່າວເນັ້ນວ່າ, ການຕີດ່ຽວສຳຄັນຫຼາຍ, ຈົນກວ່າເຕັກນິກຕີຄູ່ກໍ່ຖືການຕີດ່ຽວເປັນພື້ນຖານ. ສະນັ້ນ ບໍ່ວ່າບົນເສັ້ນທາງມີຄວາມລຳບາກກາກກຳຫຼາຍເທົ່າໃດ, ແຊມປຽນງານກິລາໂອລິມປິກຄູ່ນີ້ກໍ່ຈະຍຶດໝັ້ນຍຸດທະສາດສົນໃຈຕີດ່ຽວກັບຕີຄູ່ພ້ອມກັນ, ເພາະເຂົາເຈົ້າຍັງຄອງຄອຍມີການບຸກທະລຸຫຼາຍກວ່າເກົ່າໃນຊີວິດເທັນນິສອາຊີບຂອງຕົນ ແລະໃນຂະບວນວິວັດພັດທະນາກິລາເທັນນິສຂອງຈີນ.
|
