|
|
 |
| (GMT+08:00)
2005-06-13 20:41:01
|
 |
|
ຕະຫລາດນັດຄຸນມິງ----ເວທີຮ່ວມມືເສດຖະກິດການຄ້າທີ່ສຳຄັນລະຫວ່າງຈີນອາຊຽນ(ສຽງ)
cri
Author: mo
|
ຕະຫລາດນັດຄຸນມິງປີ 2005 ພວມຈັດຂຶ້ນຢູ່ສູນປະຊຸມວາງສະແດງສາກົນຄຸນມິງ ເທດສະບານແຂວງຢຸນນານຈີນ, ຕະຫລາດນັດຄຸນມິງເທື່ອນີ້ໄດ້ຈັດຫໍວາງສະແດງອາຊຽນອີກ. ບຸກຄົນທີ່ກ່ຽວຂ້ອງກ່າວວ່າ, ຕະຫລາດນັດຄຸນມິງໄດ້ກາຍເປັນເວທີຮ່ວມມືເສດຖະກິດການຄ້າທີ່ສຳຄັນລະຫວ່າງຈີນອາຊຽນແລ້ວ.
ເມື່ອຍ່າງເຂົ້າຫ້ອງໂຖງໃຫຍ່ຊັ້ນໜຶ່ງຂອງສູນປະຊຸມວາງສະແດງສາກົນຄຸນມິງ, ເບື້ອງຊ້າຍກໍແມ່ນຫ້ອງວາງສະແດງຂອງປະເທດອາຊຽນທີ່ປະຈັກຕາຄົນ. ນັກທຸລະກິດທີ່ມາຈາກ 10 ປະເທດອາຊຽນໄດ້ເຂົ້າຮ່ວມການວາງສະແດງ, ມີບ່ອນວາງສະແດງລວມ 203 ບ່ອນ.
ເພື່ອສະແດງໃຫ້ເຫັນຮີດຄອງປະເພນີຂອງບັນດາປະເທດ, ລາວ ໄທ ແລະຫວຽດນາມເປັນຕົ້ນໄດ້ຈັດວາງຫ້ອງວາງສະແດງຂອງຕົນເປັນພິເສດ. ຢູ່ແຫ່ງນີ້, ທ່ານຈະໄດ້ເຫັນທາດຫລວງ----ສັນຍະລັກຂອງປະເທດລາວທີ່ສ້າງດ້ວຍໄມ້, ປະຕູແບບເຈດີຂອງໄທ, ສາວຫວຽດນາມທີ່ໃສ່ງອບແລະນຸ່ງກີເພົາ, ແລະອື່ນໆ, ເຮັດໃຫ້ທ່ານຮູ້ສຶກເໝືອນດັ່ງຢູ່ໃນບັນດາປະເທດອາຊຽນ. ການຈັດວາງໃນຫ້ອງວາງສະແດງກໍຈັດໄດ້ດີຫລາຍ, ສິນຄ້າຂອງປະເທດອາຊຽນທີ່ເອົາມາວາງສະແດງລ້ວນແຕ່ໄດ້ສະແດງໃຫ້ເຫັນສິສັນພິເສດຂອງປະເທດຕົນ, ເຊັ່ນ: ເພັດນິນຈີນດາທີ່ເຫຼື້ອມຍິບຍັບຂອງມຽນມາ, ເຄື່ອງໄຊ້ສວຍທີ່ເຮັດດ້ວຍໄມ້ຂອງລາວ, ກາເຟແລະເຄື່ອງກິນທີ່ຫອມຫວນຂອງຫວຽດນາມ, ດອກໃບຕອງແຫ້ງທີ່ສວຍງາມຂອງມາເລເຊຍ. ນອກນີ້, ກຸ່ມຈະເລີນໂພກພັນຂອງໄທແລະກຸ່ມຢວນຕົ່ງຂອງສິງກະໂປໄດ້ເອົາສິນຄ້າລາຄາແພງເຊັ່ນເຄື່ອງຈັກໄຟຟ້າເປັນຕົ້ນມາວາງສະແດງ, ກຸ່ມຈິນຢວນຂອງຟິລິບປິນຍັງໄດ້ຈັດງານໂຄສະນາເຮືອນຢູ່ທີ່ຮ່ວມມືສ້າງຢູ່ເມືອງຄຸນມິງ.
ທ່ານຊຽວໂປເຢີນ ຮອງເລຂາທິການສະພາການຄ້າສາກົນຈີນສາຂາຄຸນມິງກ່າວວ່າ, ຢຸນນານກັບອາຊຽນມີທີ່ຕັ້ງພູມສາດອັນດີເລີດ; ກອງປະຊຸມGMSກໍຈະຈັດຂຶ້ນຢູ່ຄຸນມິງໃນເດືອນກໍລະກົດ; ປີໜ້າ, ທາງຫລວງຄຸນມິງບາງກອກຈະແລ່ນລົດໄດ້ຕະຫລອດສາຍ, ຈຸດພິເສດຂອງຄຸນມິງທີ່ເປັນ"ນະຄອນແຫ່ງງານມະໂຫລານ", "ສູນຈໍລະຈອນສິນຄ້າ"ເປັນຕົ້ນນັບມື້ນັບພົ້ນເດັ່ນຂຶ້ນ, ສ່ວນການສ້າງເຂດການຄ້າເສລີຈີນອາຊຽນໄດ້ກ້າວເຂົ້າໄລຍະທາດແທ້ ຍິ່ງແມ່ນສາເຫດຕົ້ນຕໍທີ່ຫ້ອງວາງສະແດງຂອງອາຊຽນໄດ້ຍົກລະດັບສູງຂຶ້ນ. ທ່ານເວົ້າວ່າ:
ເຂດການຄ້າເສລີຈີນອາຊຽນໄດ້ຖືກມວນຊົນອັນໄພສານຂອງຈີນແລະບັນດາປະເທດອາຊຽນຮັບເອົາແລ້ວ, ສະນັ້ນ, ໃນຫ້ອງວາງສະແດງຂອງອາຊຽນປີນີ້, ວິສາຫະກິດຂອງລາວ ໄທ ມຽນມາ ແລະມາເລເຊຍທີ່ເຂົ້າຮ່ວມການວາງສະແດງນັ້ນລ້ວນແຕ່ມີຂະໜາດໃຫຍ່ກວ່າທຸກປີທີ່ຜ່ານມາ.
ເຊັ່ນດຽວກັນ, ລັດຖະບານຂອງບັນດາປະເທດອາຊຽນກໍໄດ້ເອົາໃຈໃສ່ໃນລະດັບສູງຕໍ່ຕະຫລາດນັດຄຸນມິງ. ຫວຽດນາມ ລາວແລະກຳປູເຈຍເປັນຕົ້ນໄດ້ແຕ່ງຄະນະຜູ້ແທນຂັ້ນຮອງລັດຖະມົນຕີມາເຂົ້າຮ່ວມຕະຫລາດນັດ, ລັດຖະມົນຕີກະຊວງພານິດຂອງໄທຍັງໄດ້ມອບໝາຍໃຫ້ຫົວໜ້າກົມສົ່ງເສີມການສົ່ງອອກນຳພາຄະນະຜູ້ແທນມາຮ່ວມ. ສ່ວນການສະໜັບສະໜູນຂອງກົມສົ່ງເສີມການສົ່ງອອກຂອງໄທໃນດ້ານທຶນຮອນທີ່ມີຕໍ່ຫ້ອງວາງສະແດງຂອງຕະຫລາດນັດຄຸນມີງແມ່ນຫລາຍກວ່າທຸກປີທີ່ຜ່ານມາ.
ທ່ານຊຽວໂປເຢິນ ຮອງເລຂາທິການສະພາການຄ້າສາກົນຈີນສາຂາຄຸນມິງກ່າວວ່າ,
ແຕ່ໃດມາ, ວັດຖຸປະສົງຂອງຕະຫລາດນັດຄຸນມີງກໍບໍ່ໄດ້ຈຳກັດສາຍຕານຳແຕ່ວິສາຫະກິດແຂວງຢຸນນານແລະຜະລິດຕະພັນແຂວງຢຸນນານ, ຄຳຂວັນຂອງພວກຂ້າພະເຈົ້າແມ່ນ: ຂາຍສິນຄ້າອາຊຽນ, ຊື້ສິນຄ້າອາຊຽນ, ຂາຍສິນຄ້າທົ່ວປະເທດຈີນ, ຊື້ສິນຄ້າທົ່ວປະເທດຈີນ. ໝາຍຄວາມວ່າ, ພວກຂ້າພະເຈົ້າຈະຈຳໜ່າຍສິນຄ້າທີ່ດີຂອງຈີນໃຫ້ວິສາຫະກິດຕ່າງປະເທດ ແລະຕະຫລາດຂອງຕ່າງປະເທດ, ແລະກໍແນະນຳຜະລິດຕະພັນແລະວິສາຫະກິດທີ່ດີຂອງຕ່າງປະເທດໃຫ້ຕະຫລາດແລະນັກທຸລະກິດຂອງຈີນ.
ຂໍ້ມູນຂ່າວສານສະແດງໃຫ້ເຫັນວ່າ, ຜະລິດຕະພັນຢ່າງຫລວງຫລາຍຂອງປະເທດອາຊຽນກໍແມ່ນຜ່ານຈາກຫ້ອງວາງສະແດງອາຊຽນຂອງຕະຫລາດນັດຄຸນມີງ, ແລ້ວເຂົ້າສູ່ຕະຫລາດຈີນ. ບໍລິສັດເຮັດເກີບພິງສຽນຫວຽດນາມກໍແມ່ນຜ່ານຕະຫລາດນັດຄຸນມີງເຂົ້າສູ່ຕົວເມືອງໃຫຍ່ແລະຜ້ານກາງຂອງຈີນ, ປັດຈຸບັນ, ອັດຕາກວມຕະຫລາດຢູ່ຈີນຂ້ອງຂ້າງສູງ. ກາເຟແລະເຄື່ອງສຳອາງຂອງຫວຽດນາມກໍແມ່ນເຂົ້າສູ່ຕະຫລາດຈີນໂດຍຜ່ານຕະຫລາດນັດຄຸນມິງ. ຕົວຢ່າງແນວນີ້ຍັງມີຫລາຍຈົນນັບບໍ່ຖ້ວນ.
ຢູ່ຫ້ອງວາງສະແດງອາຊຽນ, ນັກຂ່າວໄດ້ພົບທ່ານຖຽນ ຜູ້ອຳນວຍການຂອງບໍລິສັດພັດທະນາລາວຊຸນຈຳກັດຂອງລາວ, ບໍລິສັດດັ່ງກ່າວແມ່ນວິສາຫະກິດທີ່ຂຶ້ນກັບກະຊວງການຄ້າລາວ, ທຸລະກິດການທ່ອງທ່ຽວຂ້າມຊາດອາຊີອາຄະເນແລະຜະລິດເຄື່ອງເຟີນີເຈີແບບບູຮານເປັນຕົ້ນຢູ່ລາວ. ເທື່ອນີ້, ພວກເຂົາເຈົ້າໄດ້ນຳເອົາເຄື່ອງສິລະປະເຮັດດ້ວຍໄມ້ຂອງລາວ 70-80ເຄື່ອງມາເຂົ້າຮ່ວມ.
ທ່ານຖຽນເວົ້າວ່າ, ແຕ່ເດີມ, ພວກຂ້າພະເຈົ້າບໍ່ເຂົ້າໃຈຕະຫລາດຈີນປານໃດ, ປີກາຍນີ້, ພວກຂ້າພະເຈົ້າໄດ້ເຂົ້າຮ່ວມງານຕະຫລາດນັດຄຸນມິງເປັນຄັ້ງທຳອິດ, ຜ່ານການເຂົ້າຮ່ວມງານຕະຫລາດນັດໄດ້ເຂົ້າໃຈຈີນຕື່ມອີກ, ແລະໄດ້ຕົກລົງບຸກເບີກຕະຫລາດຢູ່ຈີນຢ່າງເປັນທາງການ, ພວກຂ້າພະເຈົ້າຍັງໄດ້ຈັດຕັ້ງ 10 ກວ່າຄະນະຂອງວິສາຫະກິດຈີນທີ່ຮູ້ຈັກໃນງານຕະຫລາດນັດໄປທັດສະນະສຶກສາການຄ້າຢູ່ລາວ. ໃນງານຕະຫລາດນັດເທື່ອນີ້, ຜະລິດຕະພັນທີ່ພວກຂ້າພະເຈົ້າເອົາມາວາງສະແດງນັ້ນແມ່ນເຫັນໜ້ອຍທີ່ສຸດຢູ່ເຂດໃນຈີນ, ໃນມື້ເປີດງານມື້ທຳອິດ, ພາຍໃນເວລາໜຶ່ງຊົ່ວໂມງອັນສັ້ນໆກໍມີນັກທຸລະກິດ 20 ກວ່າຄົນມາຕິດຕໍ່ພົວພັນກັບພວກຂ້າພະເຈົ້າ, ຫລັງກອງປະຊຸມ, ພວກຂ້າພະເຈົ້າກຽມສຳພາດໂດຍສະເພາະຕໍ່ລູກຄ້າທັງໝົດໄດ້ຈົ່ງວິທີຕິດຕໍ່ໄວ້ໃຫ້ພວກຂ້າພະເຈົ້າ. ພວກຂ້າພະເຈົ້າກໍຫວັງເປີດກວ້າງອິດທິພົນແລະຕະຫລາດຂອງຕົນ, ບັນລຸຈຸດປະສົງທີ່ຕ່າງຝ່າຍຕ່າງໄດ້ຜົນປະໂຫຍດກັບວິສາຫະກິດຈີນ.
ຢູ່ບ່ອນວາງສະແດງເຄື່ອງເຟີນີເຈີຂອງບໍລິສັດລາວອີກຫຼັງໜຶ່ງ, ທ່ານລີວຊິ້ວເຈ ປະທານກຸ່ມອຸດສາຫະກຳຈິວພ້າຍແຂວງເຫີເປຈີນໄດ້ລູບຄຳເຄື່ອງເຟີນິເຈີແບບບູຮານຂອງລາວຈົນບໍ່ຢາກວາງມື:
ຂ້າພະເຈົ້າມັກເຄື່ອງເຟີນິເຈີແບບບູຮານຫລາຍ, ໄມ້ແລະສີມືດີຫລາຍ, ແຕ່ມີບາງແບບອາດຈະບໍ່ເໝາະກັບຄວາມຕ້ອງການຂອງຕະຫລາດຈີນ, ພວກຂ້າພະເຈົ້າຢາກຊື້ເຄື່ອງເຟີນິເຈີຊຸດໜຶ່ງສອງຊຸດກັບເມືອໃຫ້ຊ່ຽວຊານຂອງພວກເຮົາເບີ່ງ, ຖ້າເປັນໄປໄດ້, ພວກຂ້າພະເຈົ້າຈະເອົາຜັງວາດຈຳນວນໜຶ່ງມາໃຫ້, ແລ້ວເຊັນສັນຍາຮ່ວມມື.
ຕາມຊາບວ່າ, ເມື່ອວິສາຫະກິດລາວທີ່ຮ່ວມງານປີນີ້ໄດ້ປຽບທຽບງານເອັສໂປຈີນອາຊຽນທີ່ນານນິງກັບງານຕະຫລາດນັດຄຸນມິງແລ້ວ, ຮູ້ສຶກວ່າ, ງານຕະຫລາດນັດຄຸນມິງມີປະສິດທິຜົນດີກວ່າ, ພວກເຂົາເຈົ້າມາແລ້ວໄດ້ຮັບໃບຈອງຢ່າງແທ້ຈິງ, ເຄື່ອງວາງສະແດງທີ່ພວກເຂົາເຈົ້າເອົາມານັ້ນລ້ວນແຕ່ຂາຍໄດ້ໝົດ.ໃນເວລາທ່ານສຽວສະຫວາດ ຮອງລັດຖະມົນຕີກະຊວງການຄ້າລາວທີ່ເຂົ້າຮ່ວມງານຕະຫລາດນັດຄຸນມິງຕາມຄຳເຊີນຕ້ອນຮັບການເຂົ້າສຳພາດຂອງນັກຂ່າວCRIພວກເຮົານັ້ນ, ທ່ານໄດ້ວາດພາບງານຕະຫລາດນັດຄຸນມີງຄືແນວນີ້:(ອັດສຽງ)
|
|
|
