|
ໃນງານຖະແຫຼງຂ່າວທີ່ຈັດຂຶ້ນຢູ່ປັກກິ່ງໃນຫວ່າງມໍ່ໆນີ້,ເຈົ້າໜ້າທີ່ທີ່ຮັບຜິດຊອບວຽກງານປະຊາກອນແລະແຜນການຄຸມກຳເນີດຂອງຈີນໄດ້ກ່າວວ່າ,ປັດຈຸບັນ,ນະໂຍບາຍໃຫ້ເງິນລາງວັນແກ່ຄອບຄົວໃນຊົນນະບົດທີ່ຈີນທົດລອງປະຕິບັດແຕ່ປີ2004ມານີ້ໄດ້ຮັບປະສິດທິຜົນອັນເດັ່ນຊັດແລ້ວ.ປີ2005,ຈີນຈະເປີດກວ້າງວຽກງານທົດລອງດັ່ງກ່າວຕື່ມອີກຢູ່ເຂດຊົນນະບົດ,ແລະມີແຜນວ່າ,ເມື່ອຮອດປີ2006ຈະເຜີຍແຜ່ນະໂຍບາຍ ດັ່ງກ່າວໃນທົ່ວປະເທດຈີນ.
ຈີນແມ່ນປະເທດ ທີ່ມີປະຊາກອນຫຼາຍ,ການປະຕິບັດແຜນການຄຸມກຳເນີດແມ່ນນະໂຍບາຍພື້ນຖານແຫ່ງຊາດຈີນ.ອັນທີ່ວ່າແຜນການຄຸມກຳເນີດໝາຍຄວາມວ່າ,ທາງລັດສົ່ງເສີມພົນລະເມືອງສ້າງຄອບຄົວຊ້າແລະເອົາລູກຊ້າ,ສົ່ງເສີມໃຫ້ຜົວເມຍ ຄູ່ໜຶ່ງເອົາແຕ່ລູກຜູ້ດຽວ,ຄັນສອດຄ່ອງກັບເງື່ອນໄຂທີ່ກຳນົດໄວ້ໃນກົດໝາຍແລະກົດບັນຍັດ,ກໍຮ້ອງຂໍຈັດວາງເອົາລູກຜູ້ທີສອງໄດ້.ຕັ້ງແຕ່ຈີນປະຕິບັດນະໂຍບາຍແຜນການຄຸມກຳເນີດໃນຊຸມປີ70ສະຕະວັດແລ້ວນີ້,ຈີນໄດ້ຄຸມກຳເນີດປະຊາກອນ300ລ້ານຄົນ.ຍ້ອນວ່າຈີນມີປະຊາກອນຢ່າງຫຼວງຫຼາຍ,ສະນັ້ນ,ຈີນຍັງຈະປະຕິບັດນະໂຍບາຍແຜນການຄຸມກຳເນີດໃນໄລຍະຍາວນານ.
ເມື່ອກ່ອນ,ຈີນຕົ້ນຕໍແມ່ນຜ່ານຈາກຮູບການປັບໄໝຄອບຄົວທີ່ລະເມີດແຜນການຄຸມກຳເນີດແລະຮູບການອື່ນໆມາບັນລຸຈຸດປະສົງຂອງແຜນການຄຸມກຳເນີດ,ແຕ່ວ່າໃນເວລາປະຕິບັດນະໂຍບາຍດັ່ງກ່າວກໍໄດ້ປະກົດມີບັນຫາຈຳນວນໜຶ່ງ.ຕົວຢ່າງຄື,ຢູ່ຊົນນະບົດຈີນ,ລະບົບປະກັນສັງຄົມຂ້ອນຂ້າງອ່ອນແອ,ໜ້າທີ່ຮັບຜິດຊອບລ້ຽງພໍ່ແມ່ສ່ວນຫຼາຍແມ່ນໃຫ້ລູກຊາຍເປັນຜູ້ແບກຫາບ,ສະນັ້ນ,ເພື່ອຫຼີກເວັ້ນບໍ່ໃຫ້ເກີດມີສະພາບທີ່ບໍ່ມີຄົນມາລ້ຽງຕົນ,ຜົວເມຍບາງຄູ່ທີ່ລູກກົກແມ່ນລູກສາວນັ້ນແໜງເສຍຄ່າປັບໄໝໃຫ້ອົງການປົກຄອງກໍຈະເອົາລູກຫຼາຍຄົນຈົນວ່າໄດ້ມີລູກຊາຍ.ສະພາບແນວນີ້ທັງໄດ້ເພີ່ມຄວາມຫາບແບກຂອງ ຄອບຄົວ,ທັງໄດ້ກະທົບກະເທືອນປະສິດທິຜົນແຫ່ງການປະຕິບັດນະໂຍບາຍແຜນການຄຸມກຳເນີດຂອງລັດ.
ໂດຍແນໃສ່ບັນຫາເຫຼົ່ານີ້,ເລີ່ມແຕ່ປີ2004ເປັນຕົ້ນມາ,ຈີນໄດ້ທົດລອງປະຕິບັດນະໂຍບາຍໃໝ່ທີ່ໃຫ້ເງິນລາງວັນແກ່ຄອບຄົວທີ່ເອົາລູກໜ້ອຍຢູ່ເຂດຊົນນະບົດສ່ວນໜື່ງ,ເຊິ່ງເປັນການເພີ່ມເຕີມນະໂຍບາຍທີ່ປັບໄໝຄອບຄົວທີ່ເອົາລູກຫຼາຍຄົນໃນເມື່ອກ່ອນ.ອີງຕາມລະບອບດັ່ງກ່າວ,ທະແນມແຕ່ແມ່ນຊາວນາຜູ້ມີອາຍຸເຕັມ60ປີທີ່ມີແຕ່ລູກສາວຜູ້ດຽວຫຼືລູກສາວສອງຄົນ,ຫຼືປັດຈຸບັນບໍ່ມີລູກເຕົ້າຍ້ອນລູກເຕົ້າເສຍໄປ,ລ້ວນແຕ່ຈະຮ້ອງຂໍການອຸດໜູນຈາກລັດໄດ້ຕາມລະບຽບການທີ່ກຳນົດໄວ້,ຄັນຮ້ອງຂໍໄດ້ຮັບອະນຸມັດແລ້ວ,ຜູ້ໜຶ່ງຈະໄດ້ເງິນລາງວັນ600ຢວນຂຶ້ນໄປຕໍ່ປີ,ຈົນຮອດເຖິງແກ່ກຳ.ເງິນກ້ອນນີ້ເວົ້າສຳລັບຄອບຄົວໃນຊົນນະບົດຈີນແລ້ວບໍ່ແມ່ນຈຳນວນໜ້ອຍ.
ທ່ານນາງພານກຸ້ຍຢູ ຮອງຫົວໜ້າຄະນະກຳມະການປະຊາກອນແລະແຜນການຄຸມກຳເນີດແຫ່ງຊາດຈີນກ່າວວ່າ,ປັດຈຸບັນ,ວຽກງານທົດລອງປະຕິບັດນະໂຍບາຍທີ່ໃຫ້ເງິນລາງວັນແກ່ຄອບຄົວທີ່ປະຕິບັດແຜນການຄຸມກຳເນີດນັ້ນໄດ້ມີຄວາມຄືບໜ້າຢ່າງສະດວກ.ນາງເວົ້າວ່າ:
"ແຕ່ກ່ອນ,ນະໂຍບາຍແຜນການຄຸມກຳເນີດຕົ້ນຕໍແມ່ນປັບໄໝຄອບຄົວທີ່ເອົາລູກຫຼາຍ,ດຽວນີ້ຫັນມາສູ່ທັງຕ້ອງເຮັດຕາມກົດໝາຍ, ປັບໄໝຄອບຄົວທີ່ເອົາລູກຫຼາຍ,ແລະທັງຕ້ອງໃຫ້ເງິນລາງວັນແກ່ຄອບຄົວທີ່ເອົາລູກໜ້ອຍ,ອັນໄດ້ປຸກລະດົມຄວາມຂະຫຍັນຫ້າວຫັນຂອງຊາວນາອັນໄພສານໃນການປະຕິບັດແຜນການຄຸມກຳເນີດ,ຢູ່ເຂດທົດລອງງວດທຳອິດ,ຈຳນວນຊາວນາທີ່ປະຕິບັດແຜນການຄຸມກຳເນີດແລະຜັນຂະຫຍາຍມາດຕະການຄຸມກຳເນີດນັ້ນໄດ້ເພີ່ມຂຶ້ນໃນໜ້າພຽງກວ້າງ,ນອກນີ້,ຍັງໄດ້ຜ່ອນຄາຍຄວາມຫຍຸ້ງຍາກໃນດ້ານການຜະລິດ,ດຳລົງຊີວິດແລະການລ້ຽງດູໃນຍາມເຖົ້າແກ່ຂອງຊາວນາທີ່ປະຕິບັດແຜນການຄຸມກຳເນີດ,ຊອກຄົ້ນໄດ້ແລວຄວາມຄິດໃໝ່ກ່ຽວກັບການສ້າງລະບອບປະກັນສັງຄົມໃນຊົນນະບົດ."
ປີ2004,ຢູ່ເຂດທົດລອງໄດ້ມີ8ແສນກວ່າຄົນໄດ້ຮັບຜົນປະໂຫຍດຈາກນະໂຍບາຍທີ່ໃຫ້ເງິນລາງວັນແກ່ຄອບຄົວທີ່ເອົາລູກໜ້ອຍ.ນະໂຍບາຍລາຍນີ້ກໍໄດ້ຮັບຄວາມອູ້ມຊູຈາກຊາວນາ,ມີຊາວນາ95%ຂຶ້ນໄປເພິ່ງພໍໃຈນຳນະໂຍບາຍລາຍນີ້.
ປັດຈຸບັນ,ວຽກງານກະກຽມທຸກລາຍເພື່ອປະຕິບັດໂຍບາຍດັ່ງກ່າວເຊັ່ນດ້ານເງິນທຶນ,ບຸກຄະລາກອນແລະການຈັດຕັ້ງເປັນຕົ້ນໄດ້ມີຄວາມຄືບໜ້າຢ່າງສະດວກ. ທ່ານນາງພານກຸ້ຍຢູ ຮອງຫົວໜ້າຄະນະກຳມະການປະຊາກອນແລະແຜນການຄຸມກຳເນີດແຫ່ງຊາດຈີນກ່າວວ່າ,ນະໂຍບາຍດັ່ງກ່າວແມ່ນຈີນໄດ້ປັບປຸງທິດຊີ້ນຳ ນະໂຍບາຍແຜນການຄຸມກຳເນີດໃນເມື່ອກ່ອນ,ແມ່ນນະໂຍບາຍໄລຍະຍາວນານ,ນາງເວົ້າວ່າ:
"ການໃຫ້ເງິນລາງວັນເກື້ອກູນແກ່ຄອບຄົວຊົນນະບົດສ່ວນໜຶ່ງທີ່ປະຕິບັດແຜນການຄຸມກຳເນີດບໍ່ພຽງແຕ່ແມ່ນການປະຕິຮູບແລະການປະດິດສ້າງລະບອບສຳຄັນລາຍໜຶ່ງຂອງວຽກງານປະຊາກອນແລະແຜນການຄຸມກຳເນີດຂອງຈີນເທົ່ານັ້ນ,ພ້ອມກັນນັ້ນຍັງໄດ້ສະແດງໃຫ້ເຫັນຢ່າງເຕັມສ່ວນວ່າລັດຖະບານຈີນເອົາໃຈໃສ່ນຳຜົນປະໂຫຍດຕິດຕົວຂອງຊາວນາ.ມັນແມ່ນນະໂຍບາຍໝັ້ນທ່ຽງຍາວນານ, ແມ່ນການຈັດວາງ ລະບອບເພື່ອແກ້ໄຂບັນຫາປະຊາກອນຊົນນະບົດຈາກດ້ານກົກຮາກ,ແລະຊຸກຍູ້ໃຫ້ປະຊາກອນແລະເສດຖະກິດສັງຄົມພັດທະນາຢ່າງກົມກຽວກັນ.ຫາກບໍ່ແມ່ນແຜນການຊົ່ວຄາວ.
ຕາມສະເໜີວ່າ,ບົນພື້ນຖານເຂດທົດລອງສ່ວນໜຶ່ງທີ່ປະຕິບັດເມື່ອປີ2004,ການເງິນສູນກາງຈີນຍັງຈະຈັດວາງ400ລ້ານຢວນ,ການເງິນທ້ອງຖິ່ນຈະຈັດວາງ200ລ້ານຢວນ,ໃຊ້ສຳລັບເປີດກວ້າງວຽກງານ ທົດລອງ,ມີ1ລ້ານ3ແສນກວ່າຄົນຖືກຈັດເຂົ້າໃນເປົ້າໝາຍຜູ້ໄດ້ເງິນລາງວັນໃນຂອບເຂດຈຸດທົດລອງຂອງລັດ.ປີ2006,ຈີນຈະເຜີຍແຜ່ນະໂຍບາຍໃຫ້ເງິນລາງວັນແກ່ຄອບຄົວທີ່ປະຕິບັດແຜນການຄຸມກຳເນີດໃນທົ່ວປະເທດຈີນ.ເມື່ອຮອດເວລານັ້ນ,ຄອບຄົວຊົນນະບົດທັງໝົດຂອງຈີນທີ່ປະຕິບັດແຜນການຄຸມກຳເນີດລ້ວນແຕ່ຈະໄດ້ຮັບການອຸດໜູນຈາກລັດຖະບານ.
|
