|
|
(GMT+08:00)
2005-06-14 21:11:42
|
|
ລະບອບ"ນາງໂສເພນີທະຫານ"ແມ່ນໂທດກຳປະຫວັດສາດທີ່ປະຕິເສດບໍ່ໄດ້(ສຽງ)
cri
Author: mo
ໃນກອງປະຊຸມທີ່ຈັດຂຶ້ນຢູ່ແຂວງຊີຈູໂອຄາໃນວັນທີ 11 ມິຖຸນາ, ທ່ານນາລີຢາຄິ ນາຄາຢາມາ ລັດຖະມົນຕີກະຊວງສຶກສາທິການແລະວິທະຍາສາດຍີ່ປຸ່ນໄດ້ປະຕິເສດບໍ່ຮັບຮູ້ປະຫວັດສາດທີ່ອັບອາຍຂາຍໜ້າຂອງຍີ່ປຸ່ນອີກເທື່ອໜຶ່ງ, ກ່າວເນັ້ນວ່າ, ຍີ່ປຸ່ນບໍ່ມີບັນຫານາງໂສເພນີທະຫານ. ໂດຍແນໃສ່ຖ້ອຍຄວາມຂອງທ່ານນາລີຢາຄິ ນາຄາຢາມາທີ່ປະຕິເສດບໍ່ຮັບຮູ້ຍີ່ປຸ່ນເຄີຍຂຶນເກນນາງໂສເພນີທະຫານໃນໄລຍະສົງຄາມໂລກຄັ້ງທີສອງ, ນັກຂ່າວວິທະຍຸພວກເຮົາໄດ້ສຳພາດທ່ານຊູຈື້ລຽງ ຫົວໜ້າພະແນກປະຫວັດສາດຂອງມະຫາວິທະຍາໄລສ້າງຄູຊຽງໄຮ້ ຫົວໜ້າສູນຄົ້ນຄວ້າບັນຫາ"ນາງໂສເພນີທະຫານ"ຂອງຈີນ.
ທ່ານຊູຈື້ລຽງເວົ້າວ່າ, ລະບອບ"ນາງໂສເພນີທະຫານ" ແມ່ນລະບອບຂອງລັດຖະບານຍີ່ປຸ່ນທີ່ບັງຄັບແມ່ຍິງບັນດາປະເທດເປັນຂ້າທາດດ້ານເພດຂອງທະຫານຍີ່ປຸ່ນໃນສົງຄາມໂລກຄັ້ງທີສອງ, ແມ່ນການເຄື່ອນໄຫວທີ່ມີການຈັດຕັ້ງທີ່ລັດຖະບານແລະກອງທະຫານຍີ່ປຸ່ນວາງແຜນໂດຍກົງ, ທະຫານຍີ່ປຸ່ນໃນແຫ່ງຕ່າງໆປະຕິບັດ. ຕາມນັກປະຫວັດສາດຄາດຄະເນວ່າ, ໃນຄາວນັ້ນ, ບັນດາປະເທດອາຊີຢ່າງໜ້ອຍມີແມ່ຍິງ 4 ແສນຄົນຖືກທະຫານຍີ່ປຸ່ນຂຶນເກນໄປເປັນຂ້າທາດດ້ານເພດ, ແມ່ຍິງເຫຼົ່ານີ້ກວມເຖິງຈີນ, ແຫຼມເກົາຫລີ, ບັນດາປະເທດຢູອາຊີອາຄະເນ, ຍີ່ປຸ່ນແລະແມ່ຍິງຊາວຜິວຂາວສ່ວນໜ້ອຍທີ່ອາໄສຢູ່ອາຊີ.
ທ່ານສາສະດາຈານຊູຈື້ລຽງຊີ້ອອກວ່າ, ລະບອບ"ນາງໂສເພນີທະຫານ"ໄດ້ຝ່າຝືນສິນທຳ, ໄຮ້ມະນຸດສະທຳ, ໄດ້ນຳເອົາຄວາມທໍລະມານຫລວງຫລາຍມາໃຫ້ແມ່ຍິງທີ່ປະສົບຜົນຮ້າຍ. ແມ່ຍິງເຫຼົ່ານີ້ ສັງເວດທີ່ສຸດ, ພວກເຂົາເຈົ້າຖືກຄຸ້ມສົ່ງໄປຈຸດທີ່ຕັ້ງຂອງທະຫານຍີ່ປຸ່ນ, ແລ້ວກໍເສຍຄວາມເສລີໝົດ, ແຕ່ລະມື້ຖືກທໍລະມານດ້ານເພດ, ໃນໄລຍະສົງຄາມ ມີຫລາຍຄົນຖືກທະຫານຍີ່ປຸ່ນຂ້າຖິ້ມດ້ວຍວິທີຕ່າງໆ, ບາງຄົນປ່ວຍໜັກຈົນຕາຍ, ຜູ້ທີ່ຍັງມີຊີວິດຢູ່ນັ້ນ, ກໍໄດ້ປະສົບຄວາມທຸກທໍລະມານທາງຮ່າງກາຍແລະຈິດໃຈ.
ທ່ານຊູຈື້ລຽງເວົ້າວ່າ, ລະບອບ"ນາງໂສເພນີທະຫານ", ກັບສັງຫານໂຫດທີ່ນະຄອນນານກິ່ງ, ການທົດລອງດ້ວຍຮ່າງກາຍຄົນ, ກຸລີໃນສົງຄາມແລະອື່ນໆ, ລ້ວນແຕ່ແມ່ນເລື່ອງຈິງໃນປະຫວັດສາດທີ່ໂຕ້ຖຽງກັນບໍ່ໄດ້. ໂທດກຳຂອງຍີ່ປຸ່ນໃນການປະຕິບັດລະບອບ"ນາງໂສເພນີທະຫານ"ແມ່ນມີຫລັກຖານແທ້ໆ.
ໜຶ່ງ, ລັດຖະບານແລະກອງບັນຊາການທະຫານຍີ່ປຸ່ນໃນໄລຍະສົງຄາມມີເອກະສານຫລວງຫລາຍສະແດງໃຫ້ເຫັນວ່າ, ໃນໄລຍະສົງຄາມ, ລັດແລະກອງທະຫານຍີ່ປຸ່ນໄດ້ປະຕິບັດລະບອບ"ນາງໂສເພນີທະຫານ"; ສອງ, ປີ 1996 ແລະປີ 1998, ຄະນະກຳມາທິການສິດທິມະນຸດສະຫະປະຊາຊາດໄດ້ຜ່ານບົດລາຍງານ, ຮັບຮູ້ເລື່ອງຈິງທີ່ຍີ່ປຸ່ນໄດ້ປະຕິບັດລະບອບ"ຂ້າທາດດ້ານເພດ"ໃນໄລຍະສົງຄາມໂລກຄັ້ງທີສອງ, ທັງເຕືອນໃຫ້ລັດຖະບານຍີ່ປຸນຄວນຮັບໂທດ. ແຕ່ວ່າ, ທ່າທີຂອງລັດຖະບານຍີ່ປຸ່ນໃນການຊຳລະບັນຫາ"ນາງໂສເພນີທະຫານ"ນັ້ນເຮັດໃຫ້ຄົນຮູ້ສຶກເສຍໃຈ. ເພື່ອເອົາຄວາມເປັນທຳ, ໃນ 10 ກວ່າປີມານີ້, ນາງໂສເພນີຂອງຈີນ ເກົາຫລີໃຕ້ແລະເກົາຫລີເໜືອເປັນຕົ້ນທີ່ຍັງມີຊີວິດຫລາຍຄົນໄດ້ໄປໂຕກຽວ, ກ່າວຟ້ອງລັດຖະບານຍີ່ປຸ່ນກ່ຽວກັບບັນຫານາງໂສເພນີທະຫານ. ແຕ່ການກ່າວຟ້ອງຂອງພວກເຂົາເຈົ້າລ້ວນແຕ່ເສຍໄຊ. ໃນເວລາກ່າວເຖິງຈຸດປະສົງຂອງທ່ານນາລີອາຄິ ນາຄາຢາມາກ່າວຖ້ອຍຄວາມປະຕິເສດບໍ່ຮັບຮູ້ລະບອບນາງໂສເພນີໃນຫວ່າງມໍ່ໆນີ້, ທ່ານຊູຈື້ລຽງຊີ້ອອກວ່າ, ບຸກຄົນການເມືອງຂອງຍີ່ປຸ່ນເຮັດແນວນີ້ແມ່ນຢາກຟື້ນຄະດີໃຫ້ສົງຄາມຮຸກຮານ. ທ່ານເວົ້າວ່າ:
ຫວ່າງມໍ່ໆນີ້, ລັດຖະມົນຕີກະຊວງສຶກສາທິການແລະວິທະຍາສາດຍີ່ປຸ່ນໄດ້ເປີດປ່າວວ່າ, ຈຸດປະສົງຂອງທ່ານແມ່ນເພື່ອສອດຄ່ອງກັບອາລົມຈິດຊາດນິຍົມອັນຄັບແຄບຢູ່ພາຍໃນປະເທດຍີ່ປຸ່ນ, ຢາກໄດ້ບັດເລືອກຕັ້ງ, ເພື່ອເດີນໄປ"ມະຫາປະເທດການເມືອງ".
ຖ້ອຍຄວາມຂອງທ່ານນາລີອາຄິ ນາຄາຢາມາໄດ້ຖືກລັດຖະບານແລະສື່ມວນຊົນຂອງບາງປະເທດອາຊີກ່າວປະນາມຢ່າງຮຸນແຮງ. ທ່ານລິວຈ້ຽນຊາວ ໂຄສົກກະຊວງການຕ່າງປະເທດຈີນກ່າວວ່າ, ການຂຶນເກນນາງໂສເພນີທະຫານແມ່ນໂທດກຳອັນໜັກໜ່ວງທີ່ລັດທິລັດຖະທະຫານຍີ່ປຸ່ນຕ້ອງຫາໃນໄລຍະສົງຄາມໂລກຄັ້ງທີສອງ. ສະມາຊິກລັດຖະບານຍີ່ປຸ່ນທີ່ຮັບຜິດຊອບການສຶກສາໄດ້ປະຕິເສດເລື່ອງຈິງອັນຂີ້ຮ້າຍໃນປະຫວັດສາດຢ່າງບັງອາດເປີດແປນນັ້ນ, ແມ່ນການທຳຮ້າຍອາລົມຈິດປະຊາຊົນຂອງປະເທດທີ່ປະສົບເຄາະຮ້າຍຢ່າງໜັກໜ່ວງ. ໂຄສົກພັກຄອງອຳນາດສ.ເກົາຫລີກໍຕິຕຽນວ່າ, ເຈົ້າໜ້າທີ່ສູງສຸດທີ່ຮັບຜິດຊອບການສຶກສາຍິ່ປຸ່ນປະຕິເສດບໍ່ຮັບຮູ້ການຮຸກຮານໃນແຕ່ກ່ອນ, ທັງກ່າວຖ້ອຍຄວາມທີ່ອັບປະຍົດແນວນີ້, ພວກຂ້າພະເຈົ້າຮູ້ສຶກເສຍໃຈແລະຄຽດແຄ້ນ.
|
|
|