|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການນິທານສຸພາສິດ. ໃນລາຍການພາກນີ້, ຂ້າພະເຈົ້າຈະເລົ່າເລື່ອງກ່ຽວກັບສຸພາສິດ "ຫູລຸນທຸນຈາວ" ແປວ່າ "ກິນໝາກກະທັນທັງໜ່ວຍ" ສູ່ຟັງ, ຫວັງວ່າທ່ານຄົງຈະມັກ.
ຈູຊີ(zhu xi) ມະຫານັກປາດປັດຊະຍາຂອງສຳນັກຄວາມຄິດຂົງຈື້ດຳລົງຊີວິດຢູ່ໃນສະໄໝລາຊະວົງຊົ້ງໃຕ້ຂອງຈີນ. ຕາມເວົ້າກັນວ່າໃນຄາວຍັງນ້ອຍ ເພິ່ນກໍສະຫຼາດທີ່ສຸດ. ໃນຄາວທີ່ເພິ່ນຫາກໍ່ປາກເປັນ, ມີເທື່ອໜຶ່ງ ພໍ່ຂອງເພິ່ນອຸ້ມເພິ່ນແລ້ວຊີ້ໃສ່ທ້ອງຟ້າເວົ້າຕໍ່ເພິ່ນວ່າ: "ເບິ່ງແມ້ ຂ້າງເທິງນີ້ກໍ່ແມ່ນທ້ອງຟ້າແຫຼະ!" ຈູຊີບໍ່ໄດ້ຊ້ຳຕາມຄຳເວົ້າຂອງຜູ່ໃຫຍ່ແບບງ່າຍໆຄືກັບເດັກນ້ອຍທຳມະດາ, ຫາກເງີຍໜ້າຂຶ້ນຖາມວ່າ: "ຊັ້ນຢູ່ຂ້າງເທິງຂອງທ້ອງຟ້າແດ້ ແມ່ນຫຍັງ?" ພໍ່ຂອງເພິ່ນຮູ້ສຶກດີໃຈທັງປະຫຼາດໃຈ, ເຫັນວ່າເດັກຄົນນີ້ບໍ່ແມ່ນເດັດນ້ອຍຄົນທຳມະດາ, ຍ່ອມຈະມີອະນາຄົດອັນສົດໃສ. ພາຍຫຼັງມາ, ຈູຊີກໍສອບໄດ້ຕຳແໜ່ງບັນດິດໃນສະໄໝລາຊະການຈັກກະພັດກາວຈົ່ງຮ້ອງເຕ້, ແລະໄດ້ດຳລົງຕຳແໜ່ງສຳຄັນຫຼາຍຕຳແໜ່ງໃນສະໄໝຈັກກະພັດກາວຈົ່ງຮ້ອງເຕ້ ສະໄໝຈັກກະພັດຊ້ຽວຈົ່ງຮ້ອງເຕ້ ສະໄໝຈັກກະພັດກວ່າງຈົ່ງຮ້ອງເຕ້ແລະສະໄໝຈັກກະພັດໜິງຈົ່ງຮ້ອງເຕ້ຂອງລາຊະວົງຊົ້ງໃຕ້ຂອງຈີນ.
ໃນຖານະເປັນມະຫານັກປາດປັດຊະຍາຂອງສຳນັກຄວາມຄິດຂົງຈື້ທີ່ມີຊື່ລືນາມໃນສະໄໝລາຊະວົງຊົ້ງໃຕ້, ຈູຊີໄດ້ພັດທະນາທິດສະດີປັດຊະຍາຂອງເສິງຮ້າວ ແລະເສິງອີ ນັກປັດຊະຍາໃນລາຊະວົງຊົ້ງເໜືອຕື່ມອີກ, ໄດ້ສ້າງລະບົບສຳນັກຄວາມຄິດຂົງຈື້ທີ່ຈິດນິຍົມພາວະວິໄສຢ່າງສົມບູນຄົບຖ້ວນ, ຖືກເອີ້ນເປັນສຳນັກປັດຊະຍາເສິງຈູ. ເພິ່ນລິເລີ່ມໂຄສະນາຈະລິຍະທຳສັກດິນາ, ນີ້ສອດຄ່ອງກັບຄວາມຕ້ອງການຂອງການປົກຄອງແບບສັກດິນາໃນຄາວນັ້ນ. ທິດສະດີປັດຊະຍາຂອງເພິ່ນຈິ່ງຖືກລາຊະວົງໝິງແລະລາຊະວົງຊິ່ງຂອງຈີນຖືເປັນສຳນັກຄວາມຄິດສາຍກົງຂອງສຳນັກຂົງຈື້. "ສຶຊູ່ຈີຈູ້" ແປວ່າ "ໝາຍເຫດໜັງສືສີ່ເຫຼັ້ມ" ທີ່ເພິ່ນຮຽບຮຽງນັ້ນ ໄດ້ກາຍເປັນຫຼັກອ້າງອີງຕົ້ນຕໍຂອງທຸກລາຊະວົງທຸກສະໄໝຂອງຈີນໃນການສອບຄັດເລືອກຂຸນນາງ.
ຈູຊີມີທ່າທີສຸຂຸມຮອບຄອບໃນການສຶກສາຄົ້ນຄວ້າ, ເພິ່ນໄດ້ຮຽບຮຽງແລະໝາຍເຫດຄຳພີສຳນັກຂົງຈື້ຢ່າງຫຼວງຫຼາຍ, ມີຄວາມຄິດຄວາມເຫັນຂອງຕົນໃນຫຼາຍດ້ານ. ເພິ່ນສົ່ງເສີມຈິດໃຈຄົ້ນຄວ້າທີ່ດຸໝັ່ນຂະຫຍັນພຽນ, ຄັດຄ້ານແບບທຳນອງທີ່ເຂົ້າໃຈແບບຜິວເຜີນ. ໃນເວລາເພິ່ນເປັນເຈົ້າເປັນນາຍຢູ່ຖົງອານເມືອງສຽນໂຈ່ວນັ້ນ, ມີເຍົາວະຊົນຜູ່ໜຶ່ງຊື່ວ່າສິເຊິ່ງອາຍຸ 13 ປີ, ເດັກຜູ່ນີ້ເປັນຄົນສະຫຼາດແລະມັກຮຽນ, ມາໄຫວ້ຈູຊີຂໍເປັນລູກສິດ. ພາຍຫຼັງຈູຊີພົ້ນຈາກຕຳແໜ່ງແລ້ວ, ຊາວໜຸ່ມຜູ່ນີ້ຍັງສືບຕໍ່ໄຫວ້ຈູຊີຂໍເປັນລູກສິດ. ແຕ່ໜ້າເສຍດາຍທີ່ລາວໄດ້ເສຍຊີວິດແຕ່ຄາວຍັງໜຸ່ມ, ຈູຊີຮູ້ສຶກເສຍໃຈທີ່ສຸດ. ຈູຊີເຄີຍຂຽນຈົດໝາຍໄປໃຫ້ລາວ, ໄດ້ລົມເຖິງບັນຫາແບບທຳນອງການຮຽນ. ເພິ່ນເວົ້າວ່າ: "ດຽວນີ້ມີຫຼາຍໆຄົນບໍ່ຕັ້ງໜ້າຄົ້ນຄວ້າສຶກສາ, ຢູ່ບໍ່ຢູ່ກໍ່ໄດ້ຂໍ້ສະຫຼຸບຢ່າງງ່າຍດາຍ, ເໝືອນກິນໝາກກະທັນທັງໜ່ວຍ, ທັງບໍ່ຮູ້ວ່າລົດຊາດມັນເປັນແນວໃດ, ທັງບໍ່ມີຜົນດີໃນການຍ່ອຍ."
ຈູຊີກ່າວເຕືອນຜູ່ທີ່ບໍ່ຕັ້ງໃຈສຶກສາຮ່ຳຮຽນດ້ວຍການກິນໝາກກະທັນນັ້ນ, ຈັ່ງແມ່ນແນບນຽນທີ່ສຸດ. ຊູ່ມື້ນີ້, ຄົນທັງຫຼາຍມັກໃຊ້ຄຳສຸພາສິດ "ຫູລຸນທຸນຈາວ" ມາອຸປະມາຜູ່ທີ່ບໍ່ຕັ້ງໃຈຮ່ຳຮຽນ ຮັບເອົາໝົດທຸກຢ່າງໂດຍບໍ່ໄດ້ວິເຄາະ. ເຕືອນໃຫ້ຄົນທັງຫຼາຍຕ້ອງເຄັ່ງຄັດຕໍ່ການຮ່ຳຮຽນ, ຢ່າເໝືອນດັ່ງກືນກິນໝາກກະທັນທັງໜ່ວຍໃນການຮ່ຳຮຽນ. ເຫດຜົນເຫຼົ່ານີ້ ຍັງຄົງມີຄວາມໝາຍສຳຄັນເປັນພິເສດຕໍ່ຄົນທັງຫຼາຍໃນຊູ່ມື້ນີ້ ໂດຍສະເພາະແມ່ນຊາວໜຸ່ມເຍົາວະຊົນ.
|
