|
ທ່ານຜູ້ຟັງ, ສັນຍາການຄ້າສິນຄ້າຂອງເຂດການຄ້າເສລີຈີນ-ອາຊຽນທີ່ຈີນກັບອາຊຽນເຊັນກັນຈະເລີ່ມປະຕິບັດແຕ່ວັນທີ1ກໍລະກົດປີ2005ເປັນຕົ້ນໄປ. ນັບມາຮອດດຽວນີ້, ການສ້າງສາເຂດການຄ້າເສລີຈີນ-ອາຊຽນຈະກ້າວເຂົ້າສູ່ໄລຍະດຳເນີນງານທີ່ມີລັກສະນະທາດແທ້ຢ່າງຮອບດ້ານ. ເພື່ອເພີ່ມທະວີການຮ່ວມມືທາງເສດຖະກິດການຄ້າລະຫວ່າງຈີນກັບ10ປະເທດອາຊຽນ, ຊຸກຍູ້ການສ້າງສາເຂດການຄ້າເສລີຈີນ-ອາຊຽນ, ວັນທີ13ມິຖຸນາ, ເວທີປາໄສຊັ້ນສູງຂອງເຂດການຄ້າເສລີຈີນ-ອາຊຽນຄັ້ງທີສອງໄດ້ຈັດຂຶ້ນຢູ່ປັກກິ່ງຢ່າງສະດວກ. ເອກອັກຄະລັດຖະທູດແລະເຈົ້າໜ້າທີ່ການທູດບັນດາປະເທດອາຊຽນປະຈຳຈີນ, ເຈົ້າໜ້າທີ່ຊັ້ນສູງຂອງພະແນກລັດຖະບານທີ່ກ່ຽວຂ້ອງຂອງຈີນເຊັ່ນກະຊວງການຄ້າຈີນເປັນຕົ້ນແລະນັກທຸລະກິດ, ຜູ້ຊ່ຽວຊານທີ່ມີຊື່ສຽງ, ສື່ມວນຊົນເປັນຕົ້ນລວມ250ກວ່າຄົນໄດ້ເຂົ້າຮ່ວມເວທີປາໄສຄັ້ງນີ້. ຜູ້ຮ່ວມປະຊຸມລ້ວນແຕ່ກ່າວວ່າເຂດການຄ້າເສລີຈີນ-ອາຊຽນຈະນຳເອົາໂອກາດການຄ້າໃໝ່ມາໃຫ້ບັນດາປະເທດ.
ທ່ານສີໜິງໜິງ ມົນຕີໃນຄະນະມົນຕີວຽກງານການຄ້າຈີນ-ອາຊຽນເວົ້າວ່າ:
ການປະຕິບັດສັນຍາການຄ້າສິນຄ້າຂອງເຂດການຄ້າເສລີຈີນ-ອາຊຽນບໍ່ພຽງແຕ່ແມ່ນເລື່ອງສຳຄັນໃນປະຫວັດສາດລະຫວ່າງຈີນກັບບັນດາປະເທດອາຊຽນເທົ່ານັ້ນ, ແລະກໍແມ່ນເລື່ອງສຳຄັນໃນຂະບວນການເຊື່ອມໂຍງເສດຖະກິດອາຊີຕາເວັນອອກໃຫ້ເປັນເອກະພົບດຽວ, ແລະກໍແມ່ນເລື່ອງສຳຄັນໃນການຮ່ວມມືເສດຖະກິດພາກພື້ນຂອງໂລກນຳອີກ. ການສ້າງສາເຂດການຄ້າເສລີຈີນ-ອາຊຽນຍ່ອມຈະນຳເອົາການປ່ຽນແປງທີ່ຕັ້ງໜ້າແລະເລິກເຊິ່ງມາໃຫ້ພາກພື້ນນີ້, ຍ່ອມຈະເຮັດໃຫ້ພາກພື້ນນີ້ມີສະຖານະພາບຮ່ວມມືທີ່ໃໝ່ອ່ຽມ, ຄຶກຄັກແລະຮອບດ້ານ.
ຕາມແນະນຳວ່າ, ເດືອນພະຈິກປີ2001, ຈີນກັບອາຊຽນໄດ້ກ້າວເຖິງຂັ້ນມີຄວາມຮັບຮູ້ຄືກັນກ່າວກັບການສ້າງເຂດການຄ້າເສລີ, ປີ2002, ມູນຄ່າການຄ້າລະຫວ່າງສອງຝ່າຍໄດ້ເພີ່ມຂຶ້ນຫຼາຍກວ່າປີກ່ອນ32%; ເດືອນພະຈິກປີ2002, ຈີນກັບອາຊຽນໄດ້ເຊັນສັນຍາຂອບຮ່ວມມືເສດຖະກິດຮອບດ້ານທີ່ຖືເອົາເຂດການຄ້າເສລີເປັນເນື້ອໃນຕົ້ນຕໍ, ປີ2003, ຍອດມູນຄ່າການຄ້າລະຫວ່າງສອງຝ່າຍໄດ້ເພີ່ມຂຶ້ນ43%; ເດືອນຕຸລາປີ2003, ຈີນໄດ້ເຂົ້າຮ່ວມສົນທິສັນຍາມິດຕະພາບອາຊີອາຄະເນ, ໄດ້ກຳນົດການພົວພັນຄ່ຂາຍຸດທະສາດທີ່ຫັນໜ້າໄປສູ່ສັນຕິພາບແລະຄວາມຈະເລີນຮຸ່ງເຮືອງກັບອາຊຽນ.ວັນທີ1ມັງກອນປີ2004, ແຜນການຜົນໄດ້ຮັບໄລຍະຕົ້ນຂອງເຂດການຄ້າເສລີໄດ້ເລີ່ມປະຕິບັດຢ່າງຮອບດ້ານ. ໃນປີດັ່ງກ່າວນີ້, ມູນຄ່າການຄ້າລະຫວ່າງຈີນກັບອາຊຽນໄດ້ເພີ່ມຂຶ້ນ35%, ບັນລຸ105ຕື້900ລ້ານໂດລາສະຫະລັດ. ຕໍ່ເລື່ອງນີ້, ທ່ານຫວາງຢຸນເຈີ ຮອງປະທານສະມາຄົມມິດຕະພາບຕໍ່ຕ່າງປະເທດຂອງປະຊາຊົນຈີນວິເຄາະແລະຊີ້ອອກວ່າ,
ເຂດການຄ້າເສລີຈີນ-ອາຊຽນໄດ້ກຳເນີດເກີດຂຶ້ນໂດຍຄຽງຄູ່ກັບການຄ້າລະຫວ່າງຈີນກັບປະເທດອາຊຽນໄດ້ເພີ່ມຂຶ້ນຢ່າງວ່ອງໄວ. ຄືກັນກັບທ່ານຫູຈີນທາວ ປະທານປະເທດຈີນໄດ້ມີຄວາມໝັ້ນໃຈອັນເຕັມປ່ຽມໃນເວລາທ່ານໄປຢ້ຽມຢາມອາຊີອາຄະເນນັ້ນ, ທ່ານກ່າວວ່າ: ຄຽງຄູ່ກັບການສ້າງສາເຂດການຄ້າເສລີຈີນອາຊຽນກ້າວໄປໜ້າຢ່າງບໍ່ຢຸດຢັ້ງ, ພວກເຮົາມີຄວາມໝັ້ນໃຈຢ່າງສົມບູນວ່າຈະສາມາດບັນລຸເປົ້າໝາຍທີ່ເຮັດໃຫ້ມູນຄ່າການຄ້າລະຫວ່າງຈີນກັບອາຊຽນບັນລຸ200ຕື້ໂດລາສະຫະລັດກ່ອນປີ2010.
ເທິງເວທີປາໄສ, ໃນເວລາທ່ານຈັດຕຸລົງ ວົສີສະຫວາດ ເຈົ້າໜ້າທີ່ສະຖານທູດລາວປະຈຳຈີນຕາງໜ້າຝ່າຍລາວປະກອບຄຳຄິດຄຳເຫັນນັ້ນ, ທ່ານກ່າວວ່າ, ກ່ຽວກັບການສ້າງສາເຂດການຄ້າເສລີຈີນ-ອາຊຽນ, ໃນການປຶກສາຫາລືຕ່າງໆ, ຄົນທັງຫຼາຍໄດ້ເວົ້າເຖິງກາລະໂອກາດ, ທັງໄດ້ເວົ້າເຖິງການທ້າທາຍ. ແຕ່ເວົ້າລວມແລ້ວໂອກາດຫຼາຍກວ່າການທ້າທາຍ. ໃນຖານເປັນຕະຫຼາດໃຫຍ່ທີ່ມີປະຊາກອນ1ຕື້800ລ້ານຄົນ, ການສ້າງເຂດການຄ້າເສລີຈີນ-ອາຊຽນຈະເພີ່ມກຳລັງແກ່ງແຍ່ງແລະລະດັບຊື້ຂາຍຂອງອົງກອນເສດຖະກິດທີ່ໃຫຍ່ໂຕດັ່ງກ່າວໃຫ້ສູງຂຶ້ນຢ່າງຫຼວງຫຼາຍ, ຈະນຳເອົາໂອກາດການຄ້າຫຼວງຫຼາຍມາໃຫ້ບັນດາປະເທດ.
ທ່ານຈັດຕຸລົງຊີ້ອອກວ່າ, ເຖິງວ່າລາວເປັນປະເທດນ້ອຍ, ພື້ນຖານເສດຖະກິດອ່າວບອບບາງ, ແຕ່ກໍມີກຳລັງບົ່ມຊ້ອນໃນການພັດທະນາຢ່າງຫຼວງຫຼາຍ, ເຊື່ອວ່າການສ້າງສາເຂດການຄ້າເສລີຈີນ-ອາຊຽນຈະນຳເອົາໂອກາດພັດທະນາໃໝ່ມາໃຫ້ລາວ:
ເວົ້າສຳລັບລາວແລ້ວ, ການເຂົ້າຮ່ວມເຂດການຄ້າເສລີຈະມີຜົນດີຕໍ່ລາວເຊື່ອມໂຍງເຂົ້າໃນການພັດທະນາເສດຖະກິດພາກພື້ນແລະຂອງໂລກ, ມີຜົນດີເພີ່ມກຳລັງແກ່ງແຍ່ງຂອງຜະລິດຕະພັນລາວໃນຕະຫຼາດສາກົນ, ຈະຊ່ອຍໃຫ້ລາວ ມີຕະຫຼາດຂອງຕົນຈໍ່ຕົວຂຶ້ນຄືກັນກັບປະເທດອ້ອມຂ້າງ, ແລ້ວສ້າງສະພາບແວດລ້ອມທີ່ດີກວ່າເກົ່າ, ດູດດຶງທຶນຕ່າງປະເທດ, ຍັງຈະຊຸກຍູ້ການພັດທະນາການຄ້າແລະການລົງທຶນລະຫວ່າງລາວຈີນ.
ຕໍ່ເລື່ອງນີ້, ມຽນມາກໍມີຄວາມຮູ້ສຶກຄືກັນ. ໃນເວລາທ່ານເອເຢໂກໂກ ເຈົ້າໜ້າທ່ສະຖານທູດມຽນມາປະຈຳຈີນປະກອບຄຳຄິດຄຳເຫັນນັ້ນ, ທ່ານຊີ້ອອກວ່າ:
ເສດຖະກິດຈີນເຕັມໄປດ້ວຍພະລັງຊີວິດອັນຟົດຟື້ນ. ການພົ້ນເດັ່ນຂຶ້ນຂອງຈີນໄດ້ສ້າງໂອກາດມະຫາສານໃຫ້ແກ່ບັນດາປະເທດອາຊຽນ. ພວກຂ້າພະເຈົ້າເຊື່ອວ່າ, ການສ້າງເຂດການຄ້າເສລີຈີນ-ອາຊຽນຈະມີຜົນດີທີ່ສຸດຕໍ່ການພັດທະນາພາກພື້ນແຫ່ງນີ້, ແລະຈະນຳເອົາຜົນດີມາໃຫ້ສອງຝ່າຍ.
|
