|
|
 |
| (GMT+08:00)
2005-06-17 15:59:49
|
 |
|
ສຳຜັດຜະລິດຕະພັນວິທະຍາສາດເຕັກນິກສູງໃນງານວາງສະແດງວິທະຍາສາດເຕັກນິກສູງປັກກິ່ງຄັ້ງທີ 8
cri
Author: li
 ຕາມຂ່າວ CRI: ງານວາງສະແດງອຸດສາຫະກຳວິທະຍາສາດເຕັກນິກສາກົນປັກກິ່ງຄັ້ງທີ 8 ທີ່ໄຂຂຶ້ນຢູ່ປັກກິ່ງໄດ້ອັດລົງໃນທ້າຍເດືອນທີ່ແລ້ວ,ງານວາງສະແດງອຸດສາຫະກຳວິທະຍາສາດເຕັກນິກປັກກິ່ງທີ່ໄດ້ຈັດຂຶ້ນ 8 ເທື່ອແລ້ວນັ້ນໄດ້ກາຍເປັນງານມະໂຫລານທີ່ວາງສະແດງຜະລິດຕະພັນເຕັກນິກສູງໃໝ່ຂອງຈີນ,ໂຮງງານທີ່ມີຊື່ສຽງຢ່າງຫຼວງຫຼາຍຂອງຈີນແລະຕ່າງປະເທດໄດ້ນຳເອົາໝາກຜົນຄົ້ນຄວ້າໃໝ່ສຸດຂອງຕົນມາສະແດງຢູ່ແຫ່ງນີ້.
ຢູ່ເຂດວາງສະແດງເຂດໜຶ່ງ,ນັກຂ່າວໄດ້ເຫັນວ່າ,ວິສາຫະກິດທີ່ເຂົ້າຮ່ວມງານວາງສະແດງໄດ້ປະດັບແທ່ນສະແດງເປັນຫ້ອງການ. ໃນຫ້ອງການໄດ້ປະກອບອຸປະກອນເຮັດການເຊັ່ນຄອມພິວເຕີມືຖື,ກ້ອງໂປຼເຊັກຊົງແລະເຄື່ອງພິມເປັນຕົ້ນ. ເຖິງວ່າບໍ່ມີສາຍເຊື່ອມຕໍ່ກັນ,ແຕ່ອຸປະກອນເຫຼົ່ານີ້ພັດແມ່ນເຊື່ອມຕໍ່ກັນ. ໝາຍຄວາມວ່າ,ໃນເວລາຕ້ອງການສະແດງຜະລິດຕະພັນທີ່ຄົ້ນຄວ້າຜະລິດໃໝ່ສຸດໃຫ້ລູກຄ້ານັ້ນ ບໍ່ຕ້ອງການຕໍ່ສາຍ,ພຽງແຕ່ວາງຄອມພິວເຕີມືຖືມາວາງໄວ້ຢູ່ບ່ອນທີ່ຫ່າງຈາກກ້ອງໂປຼເຊັກຊົງພາຍໃນ 100 ແມັດ,ກໍຈະໄດ້ເຫັນຮູບໃນຄອມພິວເຕີຢ່າງງ່າຍດາຍ; ຖ້າທ່ານຢາກຖ່າຍເອົາເອກະສານເພີ່ມເຕີມຈຳນວນໜຶ່ງຈາກຄອມພິວເຕີອື່ນໆ,ມີແຕ່ເອົາຄອມພິວເຕີເຄື່ອງນັ້ນໄວ້ຢູ່ໃກ້ຄອມພິວເຕີຂອງທ່ານ,ຄອມພິວເຕີສອງເຄື່ອງນີ້ກໍຈະເຊື່ອມຕໍ່ກັນໄດ້ໃນທັນທີ,ແລ້ວໂອນຖ່າຍເອກະສານໃຫ້ແກ່ກັນ.
ຄັນຊັ້ນ ການພົວພັນອັນອັດສະຈັນລະຫວ່າງຄອມພິວເຕີ,ກ້ອງໂປຼເຊັກຊົງແລະເຄື່ອງພິມເຫຼົ່ານີ້ແມ່ນສ້າງຂຶ້ນແນວໃດ? ທ່ານດຣ.ຫຼີມິງ ທີ່ເຂົ້າຮ່ວມການຄົ້ນຄວ້າເຕັກນິກລາຍນີ້ບອກນັກຂ່າວວ່າ,ນີ້ແມ່ນຍ້ອນວ່າລະຫວ່າງອຸປະກອນເຫຼົ່ານີ້ໄດ້ມີມາດຖານ IGRS.
"IGRS ແມ່ນມາດຖານໜຶ່ງທີ່ເຮັດໃຫ້ຄອມພິວເຕີ,ຜະລິດຕະພັນໂທລະຄົມແລະຜະລິດຕະພັນເອເລັກໂຕຼນິກປະເພດບໍລິໂພກເຊື່ອມໂຍງເຂົ້າກັນ. ຕົວຢ່າງຄື,ໂທລະພາບແລະຄອມພິວເຕີທີ່ດັ້ງເດີມ,ແມ່ນອຸປະກອນສອງເຄື່ອງທີ່ເປັນອິດສະຫຼະ; ຫຼັງຈາກໃຊ້ມາດຖານເຕັກນິກ IGRS ແລ້ວ,ລະຫວ່າງອຸປະກອນເຫຼົ່ານີ້ກໍເຊື່ອມໂຍງເຂົ້າກັນໄດ້,ແລ້ວໂອນຖ່າຍເອກະສານໃຫ້ກັນໄດ້. ໝາຍຄວາມວ່າ,ພວກເຮົາສາມາດເບິ່ງພາບແລະວິດີໂອສັ້ນໃນຄອມພິວເຕີຈາກໂທລະພາບ,ພ້ອມກັນນັ້ນ ພວກເຮົາກໍສາມາດອັດລາຍການໃນໂທລະພາບທີ່ພວມເບິ່ງຢູ່ນັ້ນເຂົ້າໃນຄອມພິວເຕີ."
ທ່ານເວົ້າວ່າ,ບໍ່ພຽງແຕ່ທໍ່ນີ້,ໃນງານໂຮມຊຸນນຸມໝູ່ເພື່ອນ,ທ່ານຍັງສາມາດນຳໃຊ້ເຕັກນິກ IGRS ຝາກດົນຕີອວຍພອນໃນຄອມພິວເຕີຫຼືຂໍ້ຄວາມສັ້ນຕະຫຼົກໃນໂທລະສັບມືຖືໄປຮອດເຄື່ອງໄຮໄຟຫຼືໂທລະພາບທີ່ມໍ່ກັບທ່ານ,ເພື່ອສ້າງຄວາມມ່ວນຊື່ນໃຫ້ແກ່ເພື່ອນ.
ຕາມໄດ້ຊາບ,ຈີນໄດ້ເລີ່ມຄົ້ນຄວ້າມາດຖານ IGRS ແຕ່ປີ 2003,ວິສາຫະກິດທີ່ມີຊື່ສຽງຂອງຈີນເຊັ່ນເລໂນໂວແລະຄອນຄາເປັນຕົ້ນໄດ້ເຂົ້າຮ່ວມວຽກງານເທື່ອນີ້,ປັດຈຸບັນ,ໂທລະສັບມືຖື,ຄອມພິວເຕີ,ກ້ອງໂປຼເຊັກຊົງແລະໂທລະພາບເປັນຕົ້ນທີ່ມີສັບພະຄຸນ IGRS ນັ້ນໄດ້ຜະລິດອອກມາແລ້ວ,ຢູ່ຕົວເມືອງໃຫຍ່ຕ່າງໆເຊັ່ນປັກກິ່ງ,ຊຽງໄຮ້ແລະເສີນເຈີນເປັນຕົ້ນລ້ວນແຕ່ໄດ້ສ້າງຮ້ານສຳຜັດ IGRS,ຫຼາຍໆຄົນໄດ້ສົນໃຈຫຼາຍຕໍ່ຜະລິດຕະພັນທີ່ມີເຕັກນິກກ້າວໜ້າດັ່ງກ່າວ.
ຢູ່ງານວາງສະແດງວິທະຍາສາດເຕັກນິກປັກກິ່ງ,ນາງເມີນປີງບອກນັກຂ່າວວ່າ:
"ເຕັກນິກ IGRS ດີຫຼາຍ,ສະດວກ. ຂ້າພະເຈົ້າໄດ້ທົດລອງແລ້ວ,ເຫັນວ່າການສົ່ງຂໍ້ມູນຂ່າວສານລະຫວ່າງຄອມພິວເຕີກັບໂທລະພາບແມ່ນສະດວກຫຼາຍ."
ປັດຈຸບັນ,ຜະລິດຕະພັນ IGRS ໄດ້ມີປະຕິກິລິຍາດີຫຼາຍໃນວິສາຫະກິດທີ່ນຳໃຊ້,ແຕ່ຍັງໃຊ້ໜ້ອຍໃນຄອບຄົວ.
ໃນງານວາງສະແດງວິທະຍາສາດເຕັກນິກປັກກິ່ງຄັ້ງນີ້,ນັກຂ່າວໄດ້ເຫັນວ່າ,ຜະລິດຕະພັນເຕັກນິກສູງທີ່ພົວພັນກັບລົດຍົນມີຈຳນວນບໍ່ໜ້ອຍ. ເຄື່ອງເສີງຈີທົງ ຜະລິດຕະພັນນຳທາງລົດຍົນທີ່ວິສາຫະກິດວິທະຍາສາດເຕັກນິກຫຼັງໜຶ່ງຂອງປັກກິ່ງຄົ້ນຄວ້າຜະລິດນັ້ນກໍຕິດໃຈຄົນທີ່ສຸດ. ເຄື່ອງນີ້ນ້ອຍຫຼາຍ,ຈະວາງຢູ່ແທ່ນຂັບຂີ່ກໍໄດ້,ບໍ່ກະທົບກະເທືອນເຖິງຜູ້ຂັບລົດ. ຕາມຊາບວ່າ,ຜະລິດຕະພັນນີ້ໄດ້ຕິດຕັ້ງເຄື່ອງຮັບລະບົບ GPS,ສາມາດສະໜອງການບໍລິການນຳທາງລະຫວ່າງສອງແຫ່ງໃດໆຂອງແຜ່ນດິນໃຫຍ່ຈີນ. ໃນເວລາໃຊ້,ຜູ້ໃຊ້ຂຽນຈຸດໝາຍປາຍທາງໃສ່,ລະບົບນີ້ກໍຈະສະເໜີເສັ້ນທາງໄປທີ່ຕ່າງກັນ 4 ເສັ້ນ,ແລະຈະອອກສຽງແຈ້ງໃຫ້ລ້ຽວລົດໃນເວລາຈຳເປັນ.
ທ່ານກາວເຟິງທີ່ຫາກໍ່ຊື້ລົດສ່ວນຕົວ,ໄດ້ສົນໃຈນຳເຄື່ອງນີ້,ທ່ານເວົ້າວ່າ:
"ສຳລັບມືໃໝ່ແລ້ວ,ຂັບລົດໃນສະພາບແວດລ້ອມຄົມມະນາຄົມທີ່ສັບຄົນແນວນີ້ຂອງປັກກິ່ງຮູ້ສຶກເຈັບຫົວຫຼາຍ,ຖ້າມີເຄື່ອງນຳທາງນີ້ແລ້ວ,ມັນຈະບອກໃຫ້ຮູ້ຢ່າງຈະແຈ້ງວ່າແລ່ນຜ່ານປາກທາງແນວໃດ,ຈະເລືອກທາງສາຍຫຼັກຫຼືກສາຍສຳຮອງ,ລ້ຽວຜ່ານຂົວລອຍແນວໃດເປັນຕົ້ນ,ເວົ້າສຳລັບຂ້າພະເຈົ້າແລ້ວ,ການຊອກຮູ້ສະພາບແນວນີ້ແມ່ນຈຳເປັນທີ່ສຸດ."
|
|
|
