|
ຕາມຂ່າວສານຊິນຮວາ ເນຶ່ອງໃນໂອກາດທີ່ໄລຍະທຳອິດຂອງສັນຍາການຄ້າເສລີຈີນອາຊຽນຈະເລີ່ມດຳເນີນຢ່າງເປັນທາງການໃນວັນທີ 1 ກໍລະກົດ ເຈົ້າຫນ້າທີ່ກະຊວງການຄ້າແລະອຸດສາຫະກຳຟິລິບປິນກ່າວວ່າ ຄອງຄອຍໃຫ້ສັນຍາສ້າງໂອກາດໃຫມ່ໃຫ້ແກ່ການຂະຫຍາຍການພົວພັນເສດຖະກິດການຄ້າລະຫວ່າງຟິລິບປິນກັບຈີນ ກໍກຽມຕ້ອນຮັບການທ້າທາຍໃຫມ່ພາຍໃນຂອບການຮ່ວມມືເສດຖະກິດແບບໃຫມ່ລະຫວ່າງຈີນກັບອາຊຽນ
ໃນເວລາທ່ານຄາບີທິງ ຫົວຫນ້າກົມການພົວພັນການຄ້າສາກົນຂອງກະຊວງການຄ້າແລະອຸດສາຫະກຳຟີລິບປິນໃຫ້ສຳພາດຕໍ່ນັກຂ່າວຂ່າວສານຊິນຮວານັ້ນ ທ່ານຊີ້ອອກວ່າ ໃນ 3 ປີມານີ້ ໃນຖານເປັນຄູ່ຂາການຄ້າຂອງຟິລິບປິນ ຖານະຂອງຈີນໄດ້ຈາກທີ 12 ສູງເລື່ອນຂຶ້ນຮອດທີ 4 ຍອດມູນຄ່າການຄ້າຂອງສອງປະເທດໄດ້ລື່ນກາຍ 13 ຕື້ໂດລາສະຫະລັດໃນປີກາຍ ການເຕີບໂຕໄວຈົນໃຜກໍໃຫ້ນຶກໄດ້ຝັນ ການປະຕິບັດສັນຍາການຄ້າເສລີຈະຊຸກຍູ້ໃຫ້ທ່ວງທ່າອັນແຂງແຮງດັ່ງກ່າວຂະຫຍາຍຕົວອອກ
ເດືອນພະຈິກປີ 2004 ຜູ່ນຳປະເທດສະມາຊິກອາຊຽນກັບຈີນໄດ້ເຊັນສັນຍາການຄ້າເສລີໃນໄລຍະໄຂກອງປະຊຸມສຸດຍອດທີ່ວຽງຈັນ ນະຄອນຫຼວງລາວ ຕົກລົງວ່າຜ່ານສາມບາດກ້າວຄືການຄ້າສິນຄ້າ ການຄ້າບໍລິການແລະການລົງທຶນຂ້າມຊາດຊຸກຍູ້ການຮ່ວມມືເສດຖະກິດການຄ້າລະຫວ່າງສອງຝ່າຍເທື່ອລະກ້າວ ແຕ່ວັນທີ 1 ກໍລະກົດປີນີ້ເປັນຕົ້ນໄປ ສອງຝ່າຍໄດ້ຂັດກັນວ່າ ພາສີສິນ ຄ້າຂາເຂົ້າສ່ວນຫນຶ່ງທີ່ສອງຝ່າຍໄດ້ຕົກລົງກັນຈະຫຼຸດລົງຄູ່ປີພາຍໃນເວລາກຳນົດ ຈົນຮອດການຍົກເລີກໃນທີ່ສຸດ
ທ່ານຄາບີທິງເຫັນວ່າ ເວົ້າສຳລັບໄລຍະການຄ້າສິນຄ້າວ່າ ພາຍໃຕ້ສັນຍາການຄ້າເສລີ ສິນຄ້າຈີນທີ່ມີປະເພດແລະຈຳນວນຫຼາຍກວ່າເກົ່າຈະເຂົ້າສູ່ຕະຫຼາດຟິລິບປິນ ພ້ອມກັນນັ້ນ ການສົ່ງຜະລິດຕະພັນເອເລັກໂຕຼນິກ ເສື້ອຜ້າອາພອນ ຫມາກໄມ້ແລະວັດຖຸດິບຂອງຟິລິບປິນຂາຍໃຫ້ຕ່າງປະເທດກໍຈະໄດ້ຮັບຜົນປະໂຫຍດຈາກສັນຍາການຄ້າເສລີ ບໍລິມາດການຄ້າຂອງສອງປະເທດຈະເພີ່ມຂຶ້ນຢ່າງວ່ອງໄວ ຍ້ອນຕະຫຼາດບໍລິໂພກອຸປະໂພກຂອງຈີນກວ້າງໃຫຍ່ໄພສານ ຈຳນວນການຄ້າຂາອອກຂອງຟິລິບປິນຕໍ່ຈີນຍັງຈະຮັກສາຂາອອກຫຼາຍກວ່າຂາເຂົ້າຕໍ່ໄປ ແຕ່ຄວາມແຕກຕ່າງກັນຈະຫຼຸດຫນ້ອຍລົງໃນລະດັບໃດຫນຶ່ງ ນອກນີ້ ຟິລິບປິນຫວັງວ່າ ພາຍໃຕ້ຂອບຂອງສັນຍາການຄ້າເສລີ ຂົງເຂດການຄ້າບໍລິການແລະການລົງທຶນຂ້າມຊາດກໍສາມາດສ້າງການພົວພົນຮ່ວມມືກັນຢ່າງແຫນ້ນແຟ້ນກວ່າເກົ່າກັບຈີບ
ທ່ານຄາບີທິງກ່າວວ່າ ສັນຍາຍັງຈະມີຜົນດີຕໍ່ການສັບຊ້ອນອຸດສາຫະກຳຂອງຟິລິບປິນຄືນໃຫມ່ແລະເພີ່ມກຳລັງແກ່ງແຍ່ງໃນຕະຫຼາດ ປັດຈຸບັນ ນັກທຸລະກິດຜະລິດແລະພໍ່ຄ້າສົ່ງອອກຂອງຟິລິບປິນໄດ້ເລີ່ມຮູ້ຈັກຄວາມຕ້ອງການຂອງລູກຄ້າໃນຕະຫຼາດຈີນ ດູດດຶງການລົງທຶນສັບຊ້ອນຂະຫນາດການຜະລິດ ກຽມຕ້ອນຮັບການແກ່ງແຍ່ງໃນຕະຫຼາດທີ່ຂະຫຍາຍໄປໃນແງ່ດີດັ່ງກ່າວ
ໃນຖານເປັນປະເທດຫນຶ່ງທີ່ເລີ່ມສ້າງອາຊຽນ ຟິລິບປິນໄດ້ຕັ້ງຫນ້າເຂົ້າຮ່ວມ ແລະຊຸກຍູ້ໃຫ້ພາກພື້ນອາຊຽນຮ່ວມມືກັນ ພ້ອມກັນຈະເລີນຮຸ່ງເຮືອງແລະເຊື່ອມໂຍງເສດຖະກິດເຂົ້າກັນຢ່າງສະເຫມີຕົ້ນສະຫມີປາຍ ປີກາຍນີ້ ກ່ອນທ່ານນາງອາໂລໂຢ ປະທານາທິບໍດີຟິລິບປິນເຂົ້າຮ່ວມກອງປະຊຸມສຸດຍອດອາຊຽນຈີນທີ່ວຽງຈັນ ທ່ານນາງເຄີຍກ່າວວ່າ ເປົ້າຫມາຍຂອງອາຊຽນແມ່ນຂະຫຍາຍໃຫ້ເປັນອົງປະກອບຮ່ວມທີ່ສິນຄ້າ ການບໍລິການ ການລົງທຶນພ້ອມທັງກຳມະກອນເຕັກນິກແລະທຶນຈໍລະຈອນຢ່າງເສລີ
|
