|
ສະບາຍດີທ່ານຜູ່ຟັງທີ່ໂຄລົບ, ເວົ້າສຳລັບງານກິລາໂອລິມປິກແລ້ວ, ຜູ່ໄປເບິ່ງການແຂ່ງຂັນຢູ່ສະໜາມກິລານັ້ນມີຈຳນວນໜ້ອຍ. ຄົນຫຼາຍກວ່າແມ່ນຕິດຕາມສະພາບການແຂ່ງຂັນຂອງງານກິລາໂອລິມປິກໂດຍຜ່ານການຖ່າຍທອດສົດທາງໂທລະພາບ. ຈາກນີ້ພວກເຮົາຈະເຫັນໄດ້ວ່າ, ການຖ່າຍທອດສົດທາງໂທລະພາບມີບົດບາດສຳຄັນຕໍ່ງານກິລາໂອລິມປິກ. ຫວ່າງມໍ່ໆນີ້, ບໍລິສັດຖ່າຍທອດງານກິລາໂອລິມປິກປັກກິ່ງຈຳກັດຫຼື BOB ໄດ້ສ້າງຕັ້ງຂຶ້ນຢ່າງເປັນທາງການ; ບວກກັບຄະນະກຳມະການປະສານງານການຖ່າຍທອດງານກິລາໂອລິມປິກປັກກິ່ງໄດ້ສ້າງຕັ້ງຂຶ້ນຫວ່າງກ່ອນນີ້ບໍ່ດົນ, ວຽກງານຖ່າຍທອດງານກິລາໂອລິມປິກປັກກິ່ງໂດຍທາງໂທລະພາບ ໄດ້ເຂົ້າສູ່ໂຄຈອນຢ່າງສິ້ນເຊິງແລ້ວ. ຕໍ່ໄປເຊີງຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ວຽກງານຖ່າຍທອດງານກິລາໂອລິມປິກປັກກິ່ງໄດ້ເຂົ້າສູ່ໂຄຈອນເປັນປົກກະຕິແລ້ວ.
ຫວ່າງມໍ່ໆນີ້, ບໍລິສັດຖ່າຍທອດງານກິລາໂອລິມປິກປັກກິ່ງໂດຍທາງໂທລະພາບຫຼື BOB ໄດ້ສ້າງຕັ້ງຂຶ້ນຢູ່ທີ່ປັກກິ່ງຢ່າງເປັນທາງການ, ກ່ຽວກັບການສ້າງຕັ້ງ BOB, ຫວ່າງມໍ່ໆນີ້ ຢູ່ທີ່ປັກກິ່ງ, ທ່ານເວີບຼູແກນ ປະທານຄະນະກຳມະການປະສານງານກິລາໂອລິມປິກປັກກິ່ງປີ 2008 ຂອງຄະນະກຳມະການໂອລິມປິກສາກົນແນະນຳວ່າ: BOB ແມ່ນຄະນະກຳມະການຈັດງານກິລາໂອລິມປິກປັກກິ່ງກັບບໍລິສັດບໍລິການກະຈາຍສຽງໂອລິມປິກຄະນະກຳມະການໂອລິມປິກສາກົນຫຼື OBS ຮ່ວມກັນອອກທຶນສ້າງຕັ້ງຂຶ້ນ, ມັນແມ່ນອົງການຖ່າຍທອດຕົ້ນຕໍໃນໄລຍະງານກິລາໂອລິມປິກປັກກິ່ງແລະງານກິລາໂອລິມປິກຄົນພິການປີ 2008, ສະໜອງສັນຍານສາທາລະນະຂອງວິທະຍຸກະຈາຍສຽງແລະໂທລະພາບໃຫ້ສື່ມວນຊົນວິທະຍຸກະຈາຍສຽງແລະໂທລະພາບທົ່ວໂລກໃນໄລຍະງານກິລາໂອລິມປິກ, ກໍ່ສ້າງແລະໝູນໃຊ້ສູນກະຈາຍສຽງສາກົນແລະອຸປະກອນຖ່າຍທອດໃນສະໜາມກິລາງານກິລາໂອລິມປິກປັກກິ່ງ, ແລະສະໜອງການບໍລິການອື່ນໆທີ່ກ່ຽວພັນກັບການລາຍງານຂ່າວ. ພວກຂ້າພະເຈົ້າຍັງຮູ້ສຶກເປັນກຽດທີ່ໄດ້ເຊີນທ່ານມານູໂລ ໂຣເມໂຣ ຜູ່ອຳນວຍການໃຫຍ່ OBS ທີ່ມີບົດຮຽນອຸດົມສົມບູນໃນການຖ່າຍທອດງານກິລາໂອລິມປິກມາດຳລົງຕຳແໜ່ງ CEO ຂອງ BOB.
ຕາມໄດ້ຊາບ, ໃນສະເພາະໜ້ານີ້ ບໍລິສັດຖ່າຍທອດງານກິລາໂອລິມປິກປັກກິ່ງຈຳກັດໄດ້ຈ້າງພະນັກງານຈີນແລະຕ່າງປະເທດ 40 ຄົນແລ້ວ. ໃນໄລຍະຈັດງານກິລາໂອລິມປິກປັກກິ່ງ, ຈຳນວນພະນັກງານຈະລື່ນກາຍ 4000 ຄົນ. ໃນເວລານັ້ນ ຈະເຊົ່າລົດຖ່າຍທອດໂທລະພາບ 60 ຄັນຂຶ້ນໄປ, ກ້ອງຖ່າຍວີດີໂອ 1000 ກວ່າເຄື່ອງ, ແລະຈະສ້າງສູນກະຈາຍສຽງສາກົນກວ້າງ 80000 ແມັດມົນທົນຂຶ້ນໄປ, ສະໜອງສັນຍານຖ່າຍທອດໂທລະພາບກ່ຽວກັບງານກິລາໂອລິມປິກປະມານ 4000 ຊົ່ວໂມງ.
ທ່ານຈຽງຊຽວອີ ຮອງປະທານຄະນະບໍລິຫານງານຄະນະກຳມະການຈັດງານກິລາໂອລິມປິກປັກກິ່ງ ປະທານສະພາບໍລິຫານ BOB ກ່າວວ່າ, BOB ເລີ່ມໝູນເດີນຢ່າງຮອບດ້ານ, ເປັນຫຼັກໝາຍທາງອັນສຳຄັນອີກໃນວຽກງານຖ່າຍທອດໂດຍທາງວິທະຍຸກະຈາຍສຽງແລະໂທລະພາບໃນງານກິລາໂອລິມປິກປັກກິ່ງ, ແມ່ນບາດກ້າວສຳຄັນໃນການບັນລຸການຖ່າຍທອດທີ່ມີລະດັບສູງ, ແລະຈັດງານກິລາໂອລິມປິກຄັ້ງໜຶ່ງໃຫ້ມີສີສັນພິເສດແລະມີລະດັບສູງ. ຄະນະກຳມະການປະສານງານການຖ່າຍທອດງານກິລາໂອລິມປິກປັກກິ່ງທີ່ສ້າງຕັ້ງຂຶ້ນໃນຫວ່າງມໍ່ໆນີ້ ຈະປະສານກັບພາກສ່ວນທີ່ກ່ຽວຂ້ອງຂອງລັດຖະບານ, ສຸມກຳລັງສະໜັບສະໜູນ BOB ເຮັດຫຼ້ອນໜ້າທີ່ຖ່າຍທອດຢ່າງສຳເລັດຜົນ.
ແຕ່ງານກິລາໂອລິມປິກບາກເຊີລອນປີ 1992 ເປັນຕົ້ນມາ, ຄຽງຄູ່ກັບເຕັກນິກຖ່າຍທອດໄດ້ພັດທະນາຢ່າງວ່ອງໄວແລະຄວາມຕ້ອງການຂອງການເບິ່ງໂທລະພາບສູງຂຶ້ນ, ການເຮັດສັນຍານສາທາລະນະຖ່າຍທອດງານກິລາໂອລິມປິກໄດ້ຈາກ "ເບົ້າແບບປະເທດເຈົ້າພາບ" ພັດທະນາມາເປັນ "ເບົ້າແບບນານາຊາດ", ກໍ່ຄື ຈາກປະເທດເຈົ້າພາບເອງຈັດຕັ້ງອົງການຖ່າຍທອດໂດຍທາງວິທະຍຸກະກາຍສຽງແລະໂທລະພາບໃນແຕ່ເດີມ ປ່ຽນມາເປັນໃຫ້ຄະນະສື່ມວນຊົນໂທລະພາບຂອງຫຼາຍປະເທດປະກອບເປັນອົງການຖ່າຍທອດ ສາກົນ, ຮ່ວມມືກັນສຳເລັດການຜະລິດສັນຍານສາທາລະນະ. ໃນງານກິລາໂອລິມປິກອາແຕນ, ພະນັກງານທີ່ເຂົ້າຮ່ວມການສົ່ງສັນຍານສາທາລະນະຖ່າຍທອດກໍ່ແມ່ນນັກວິຊາເກັ່ງທີ່ມາຈາກ 40 ກວ່າປະເທດແລະເຂດແຄວ້ນ, ໂທລະພາບສູນກາງຈີນຫຼື CCTV ໄດ້ຜະລິດສັນຍານສາກົນກ່ຽວກັບລາຍການແຂ່ງຂັນປິ່ງປ່ອງ ດອກປີກໄກ່ແລະ 5 ລາຍການຍຸກປະຈຸບັນ, ອັນໄດ້ຮັບຄວາມຍ້ອງຍໍຈາກອົງການກິລາປະເພດດ່ຽວສາກົນແລະເພື່ອນຮ່ວມງານສາກົນ. ໃນງານກິລາໂອລິມປິກປັກກິ່ງກໍ່ຈະໃຊ້ເບົ້າແບບດຽວກັນຖ່າຍທອດສັນຍານສາທາລະນະ, BOB ກໍ່ແມ່ນອົງການຈັດຕັ້ງທີ່ໄດ້ສ້າງຕັ້ງຂຶ້ນເພື່ອສອດຄ່ອງກັບກົນໄກນີ້. ທ່ານເວີບຼູແກນ ປະທານຄະນະປະສານງານກິລາໂອລິມປິກປັກກິ່ງປີ 2008 ເວົ້າວ່າ: ໃນງານກິລາໂອລິມປິກຫຼາຍຄັ້ງກ່ອນ, ພວກຂ້າພະເຈົ້າໃຊ້ອຸປະກອນຄຸນນະພາບສູງແລະນັກວິຊາການຜູ່ມີລະດັບສູງເຂົ້າໃນວຽກງານຖ່າຍທອດງານກິລາໂອລິມປິກ, ສ່ວນໃນງານກິລາໂອລິມປິກປັກກິ່ງປີ 2008 ງານກິລາໂອລິມປິກລະດູໜາວແວນຄູເວີປີ 2010 ແລະງານກິລາໂອລິມປິກລະດູຮ້ອນປີ 2012, ພວກຂ້າພະເຈົ້າຈະສືບຕໍ່ໃຊ້ທີມດັ່ງກ່າວທີ່ມີຄຸນທາດສູງທີ່ນຳພາໂດຍທ່ານໂຣເມໂຣ, ແລະໃຊ້ເບົ້າແບບໝູນເດີນທີ່ມີລະດັບສູງນີ້, ເພື່ອຮັບປະກັນໃຫ້ວຽກງານຖ່າຍທອດງານກິລາໂອລິມປິກມີຄຸນນະພາບສູງແລະມີລະດັບສູງຢ່າງສະເໝີຕົ້ນສະເໝີປາຍ.
ນອກຈາກສະໜອງການບໍລິການທາງໂທລະພາບແລະວິທະຍຸກະຈາຍສຽງອັນດີງາມໃນງານກິລາໂອລິມປິກປັກກິ່ງແລ້ວ, BOB ຍັງຖືການບຳລຸງສ້າງນັກວິຊາການຖ່າຍທອດທີ່ຄຸນທາດສູງໃຫ້ແກ່ຈີນເປັນຈຸດປະສົງສຳຄັນໃນວຽກງານຂອງຕົນ. ພະນັກງານຄຸ້ມຄອງຊັ້ນສູງຂອງ BOB ເຜີຍໃຫ້ຮູ້ວ່າ, ໃຕ້ປະຖົມປັດໄຈທີ່ຮັບປະກັນຄຸນນະພາບແລະລະດັບການຖ່າຍທອດ, BOB ຈະຍາດແຍ່ງໃຫ້ຝ່າຍຈີນເຂົ້າຮ່ວມການຖ່າຍທອດງານກິລາໂອລິມປິກປັກກິ່ງຫຼາຍກວ່າເກົ່າ. ຕາມໄດ້ຊາບ, ໃນງານກິລາໂອລິມປິກຫຼາຍຄັ້ງກ່ອນ, ທຳມະດາແລ້ວ ອົງການໂທລະພາບຂອງປະເທດເຈົ້າພາບຈະມີຄຸນວຸດທິຖ່າຍທອດການແຂ່ງຂັນ 3 ຫາ 4 ປະເພດ. ນັບມາຮອດປະຈຸບັນ, ຈີນໄດ້ຍາດແຍ່ງຄຸນວຸດທິຖ່າຍທອດປະເພດການແຂ່ງຂັນໃນງານກິລາໂອລິມປິກປັກກິ່ງ 3 ປະເພດແລ້ວ, ແລະຍັງອາດຈະເພີ່ມຂຶ້ນອີກ. ເມື່ອເວົ້າເຖິງບັນຫານີ້, ທ່ານເວີບຼູແກນເວົ້າວ່າ: ຄົນທັງຫຼາຍໄດ້ເຫັນແລ້ວວ່າ, ໃນຊັ້ນນຳແກນກາງຂອງ BOB ໄດ້ໃຫ້ທ່ານມາໂກລີ ອະດີດຫົວໜ້າສູນກິລາ CCTV ດຳລົງຕຳແໜ່ງຫົວໜ້າເຈົ້າໜ້າທີ່ຄຸ້ມຄອງການໝູນເດີນ, ໃນໄລຍະມໍ່ໆນີ້ ພວກຂ້າພະເຈົ້າຈະເລີ່ມອົບຮົມວິຊາຖ່າຍທອດງານກິລາໂອລິມ ປິກຢ່າງຮອບດ້ານ, ທັງນີ້ຈະສ້າງນັກວິຊາການຖ່າຍທອດກິລາທີ່ມີຄຸນທາດສູງຫຼາຍຄົນໃຫ້ແກ່ຈີນ, ທັງໝົດເຫຼົ່ານີ້ ຈະເປັນຊັບສົມບັດອັນລ້ຳຄ່າຂອງຂະແໜງການໂທລະພາບກິລາຈີນທີ່ໄດ້ຈາກງານກິລາໂອລິມປິກປັກກິ່ງ.
|
