|
|
 |
| (GMT+08:00)
2005-06-21 17:45:19
|
 |
|
ນາຍົກຫວຽດນາມເລີ່ມຢ້ຽມຢາມອາເມລິກາ(ສຽງ)
cri
Author: li
 ຕາມຂ່າວ CRI: ວັນທີ 20 ມິຖຸນາ ທ່ານຟານວັນຄາຍ ນາຍົກລັດຖະມົນຕີຫວຽດນາມໄດ້ເລີ່ມຢ້ຽມຢາມອາເມລິກາເປັນເວລາອາທິດໜຶ່ງ. ນີ້ແມ່ນຜູ້ນຳລັດຖະບານຫວຽດນາມຢ້ຽມຢາມອາເມລິກາຄັ້ງທຳອິດແຕ່ສົງຄາມຫວຽດນາມສິ້ນສຸດລົງ 30 ປີມານີ້ ແລະສາຍສຳພັນການທູດຫວຽດນາມອາເມລິກາຫັນເປັນປົກກະຕິເປັນເວລາ 10 ປີມານີ້.
ກ່ອນຢ້ຽມຢາມອາເມລິກາ ທ່ານຟານວັນຄາຍກ່າວວ່າ,ຈຸດປະສົງຂອງທ່ານໃນການຢ້ຽມຢາມເທື່ອນີ້ແມ່ນເພື່ອຊຸກຍູ້ການຂະຫຍາຍການພົວພັນລະຫວ່າງຫວຽດນາມກັບອາເມລິກາ. ໃນນັ້ນ ລວມທັງການສະແຫວງໃຫ້ອາເມລິກາສະໜັບສະໜູນຫວຽດນາມເຂົ້າເປັນສະມາຊິກອົງການການຄ້າໂລກ,ແລ້ວຊຸກຍູ້ຕື່ມອີກໃຫ້ເສດຖະກິດຂອງຫວຽດນາມພັດທະນາຢ່າງສືບເນື່ອງ.
ແຕ່ຫວຽດນາມກັບອາເມລິກາສ້າງສາຍສຳພັນການທູດເມື່ອວັນທີ 12 ກໍລະກົດປີ 1995 ເປັນຕົ້ນມາ,ມູນຄ່າການຄ້າສອງຝ່າຍໄດ້ເພີ່ມຈາກ 451 ລ້ານໂດລາສະຫະລັດໃນປາງນັ້ນຂຶ້ນຢ່າງໄວວາຮອດ 6 ຕື້ 400 ລ້ານໂດລາສະຫະລັດໃນປີ 2004. ແຕ່ສອງປະເທດເຊັນສັນຍາການຄ້າສອງຝ່າຍໃນປີ 2001 ເປັນຕົ້ນມາ,ການຄ້າລະວ່າງສອງປະເທດນັບມື້ນັບຂະຫຍາຍຕົວອອກ,ຮອດຊູ່ມື້ນີ້,ອາເມລິກາໄດ້ກາຍເປັນຄູ່ຂາການຄ້າທີ່ໃຫຍ່ກວ່າໝູ່ຂອງຫວຽດນາມ. ແຕ່ປີ 2001 ຮອດປັດຈຸບັນ,ອາເມລິກາໄດ້ລົງທຶນຢູ່ຫວຽດນາມເພີ່ມຂຶ້ນ 26% ສະເລ່ຍຕໍ່ປີ. ເທື່ອນີ້ຜູ້ຕິດຕາມທ່ານຟານວັນຄາຍໄປຢ້ຽມຢາມອາເມລິການັ້ນລວມມີ 200 ຄົນ,ໃນນັ້ນ ສ່ວນຫຼາຍແມ່ນບຸກຄົນວົງການອຸດສາຫະກຳການຄ້າ. ການປະກອບຄະນະຢ້ຽມຢາມກໍໄດ້ພິສູດໃຫ້ເຫັນພາກສ່ວນປະກອບດ້ວຍເສດຖະກິດຂອງການຢ້ຽມຢາມເທື່ອນີ້.
ໃນການຢ້ຽມຢາມເທື່ອນີ້ ທ່ານຟານວັນຄາຍຈະຢ້ຽມຢາມ 4 ຕົວເມືອງຄືຊີແອັດໂທວ,ວໍຊິງຕັນ,ແລະບົສຕັນ. ວັນທີ 20 ມິຖຸນາ ຢູ່ຊີແອັດໂທວ ທ່ານຟານວັນຄາຍໄດ້ເຂົ້າຮ່ວມພິທີລົງນາມທີ່ຫວຽດນາມຊື້ຍົນໂບອິງ 787 4 ລຳ,ຂໍ້ຜູກພັນດັ່ງກ່າວມີມູນຄ່າ 500 ລ້ານໂດລາສະຫະລັດ. ໃນມື້ນັ້ນ,ທ່ານຟານວັນຄາຍກັບທ່ານບິວເກສ ຜູ້ອຳນວຍການໃຫຍ່ບໍລິສັດໄມໂຄຼຊອຟ ບໍລິສັດຊອຟແວໃຫຍ່ປະກາດວ່າສອງຝ່າຍໄດ້ເຊັນບົດບັນທຶກຊ່ອຍຈຳສອງສະບັບ,ອີງຕາມບົດບັນທຶກທີ່ກ່ຽວຂ້ອງ,ບໍລິສັດໄມໂຄຼຊອຟຈະອົບຮົມຊ່າງໃຫ້ບໍລິສັດເຕັກນິກຂໍ້ມູນຂ່າວສານຂອງຫວຽດນາມ,ແລະຍັງຈະສະໜອງຄອມພິວເຕີແລະຊອຟແວທີ່ຕ້ອງການໃນການອົບຮົມຄູຫວຽດນາມ 5 ໝື່ນຄົນ. ຕາມຊາບວ່າ,ທ່ານຟານວັນຄາຍຍັງຈະໄປຢ້ຽມຢາມຕະຫຼາດຫຼັກຊັບນິວຢອກ,ແລະພົບປະອະທິການບໍດີຂອງມະຫາວິທະຍາໄລຮາເວີດແລະວິທະຍາຄານວິທະຍາສາດການຊ່າງແມັດເຊັດຊູເຊັດ.
ນອກຈາກເພີ່ມທະວີການຮ່ວມມືທາງເສດຖະກິດຫວຽດນາມອາເມລິກາແລ້ວ,ໃນການຢ້ຽມຢາມອາເມລິກາເທື່ອນີ້,ທ່ານຟານວັນຄາຍຍັງຈະອອກແຮງເພີ່ມທະວີການຮ່ວມມືກັບຝ່າຍອາເມລິກາໃນດ້ານການທະຫານແລະຂ່າວກອງເປັນຕົ້ນ,ເພື່ອຍົກການພົວພັນລະຫວ່າງສອງປະເທດໃຫ້ສູງຂຶ້ນຮອບດ້ານ. ທ່ານຍັງຈະພົບປະທ່ານປະທານາທິບໍດີບຸສຢູ່ທຳນຽບຂາວໃນວັນທີ 22 ມິຖຸນາ. ນອກນີ້ ທ່ານຟານວັນຄາຍຍັງຈະພົບປະທ່ານລາມສ໌ຟິວ ລັດຖະມົນຕີກະຊວງປ້ອງກັນປະເທດອາເມລິກາເພື່ອຫາລືບັນຫາການຮ່ວມມືດ້ານການທະຫານລະຫວ່າງສອງປະເທດ.
ຂ່າວແຈ້ງວ່າ,ທ່ານຟານວັນຄາຍກັບເຈົ້າໜ້າທີ່ອາເມລິກາຍັງຈະຫາລືບັນຫາຕ່າງໆເຊັ່ນເພີ່ມສົ່ງເຈົ້າໜ້າທີ່ແລກປ່ຽນຂ່າວກອງຢູ່ສະຖານທູດສອງຝ່າຍ,ຊົມໃຊ້ຂ່າວກອງນຳກັນແລະເປີດກວ້າງການແລກປ່ຽນຂ່າວກອງໄປຮອດຂົງເຂດຟອກເງິນເປັນຕົ້ນ. ອາເມລິກາຫວັງໃຫ້ຫວຽດນາມໃຫ້ການຮ່ວມມືໃນດ້ານປາບປາມການຄ້າຢາເສບຕິດ,ຕ້ານການລັກລອກແບບແລະປ້ອງກັນການແຜ່ຂະຫຍາຍອາວຸດນິວເຄຼຍເປັນຕົ້ນ. ຝ່າຍຫວຽດນາມກ່າວວ່າ,ຈະແຕ່ງຜູ້ແປພາສາອັງກິດແລະພະນັກງານກອບກູ້ພະຍາບານຂອງຝ່າຍທະຫານໄປອົບຮົມຢູ່ອາເມລິກາ.
ເຖິງວ່າສາຍສຳພັນທາງການທູດອາເມລິກາຫວຽດນາມໄດ້ຫັນເປັນປົກກະຕິ 10 ປີແລ້ວ,ແຕ່ລະຫວ່າງສອງປະເທດຍັງມີຄວາມເຫັນຂັດກັນຫຼາຍຢູ່. ໃນໄລຍະສົງຄາມຫວຽດນາມ,ທະຫານອາເມລິກາໄດ້ວາງຢາໃບໄມ້ຫ່ຽວແຫ້ງ,ພາໃຫ້ເດັກນ້ອຍຫວຽດນາມ 1 ລ້ານກວ່າຄົນພິການ. ລັດຖະບານຫວຽດນາມຮຽກຮ້ອງໃຫ້ອາເມລິກາຊ່ອຍເຫຼືອຜູ້ຖືກທຳຮ້າຍດ້ວຍຄວາມຮັບຜິດຊອບທາງມະນຸດສະທຳ,ແຕ່ອາເມລິກາປະຕິເສດໄຊ້ແທນຄ່າເສຍຫາຍຕໍ່ຜູ້ທີ່ຖືກທຳຮ້າຍ. ອາເມລິກາຍັງຕິຕຽນສະພາບສິດທິມະນຸດແລະເສລີພາບໃນການເຊື່ອຖືສາສະໜາຂອງຫວຽດນາມ. ໃນເວລາໃຫ້ສຳພາດຕໍ່ນັກຂ່າວ,ທ່ານຟານວັນຄາຍເວົ້າວ່າ,ຫວຽດນາມຫວັງພ້ອມກັນກັບອາເມລິກາ,ຊອກຫາວິທີທີ່ເໝາະສົມແກ້ໄຂບັນຫາເຫຼົ່ານີ້,ແລະຍິນດີປຶກສາຫາລືກັບອາເມລິກາກ່ຽວກັບບັນຫາຕ່າງໆ.
|
|
|
