|
|
 |
| (GMT+08:00)
2005-06-23 15:30:35
|
 |
|
ກອງປະຊຸມສາກົນກ່ຽວກັບບັນຫາອີຣັກກ່າວລື້ມວ່າ ສະໜັບສະໜູນຂະບວນການສ້າງສາອີຣັກຄືນໃໝ່
cri
Author: da
ຕາມຂ່າວCRI: ວັນທີ 22 ມີຖຸນາ, ກອງປະຊຸມສາກົນກ່ຽວກັບບັນຫາອີຣັກໄດ້ຈັດຂຶ້ນຢູ່ບຼູແຊນ ທີ່ຕັ້ງສຳນັກງານໃຫຍ່ສະຫະພາບເອີລົບ,ລັດຖະມົນຕີກະຊວງການຕ່າງປະເທດຂອງ 80 ກວ່າປະເທດເຊິ່ງລວມທັງທ່ານລີຈ້າວຊິງ ລັດຖະມົນຕີການຕ່າງປະເທດຈີນ ແລະຜູ້ຕາງໜ້າອົງການຈັດຕັ້ງສາກົນແລະທ້ອງຖິ່ນຄືສະຫະປະຊາຊາດ ສະຫະພາບເອີລົບ ສັນນິບາດປະເພດອາລັບ ສະຫະພາບອາຟຼີກາ ກຸ່ມນາໂຕ ທະນາຄານໂລກແລະອົງການກອງທຶນເງິນຕາສາກົນເປັນຕົ້ນໄດ້ເຂົ້າຮ່ວມກອງປະຊຸມທີ່ໄຂເປັນເວລາມື້ໜຶ່ງຄັ້ງນີ້.
ກອງປະຊຸມຄັ້ງນີ້ໄດ້ເຈາະຈົງຫາລືຫົວຂໍ້ 3 ຂໍ້ໃນຂະບວນວິວັດການເມືອງ ການກໍ່ສ້າງເສດຖະກິດຄືນໃໝ່ແລະການສ້າງສາການປົກຄອງຕາມກົດໝາຍຂອງອີຣັກ,ຖະແຫຼງການຮ່ວມທີ່ປະກາດໃນກອງປະຊຸມໄດ້ໃຫ້ຄຳໝັ້ນສັນຍາວ່າ ສືບຕໍ່ສະໜັບສະໜູນຂະບວນວິວັດສ້າງສາອີຣັກຄືນໃໝ່ໃນດ້ານການເມືອງ ເສດຖະກິດແລະສັງຄົມ,ແຕ່ບໍ່ໄດ້ວາງມາດຕະການຊ່ອຍເຫຼືອອັນລະອຽດ.ຖະແຫຼງການຂຽນວ່າ,ລັດຖະມົນຕີການຕ່າງປະເທດຂອງບັນດາປະເທດແລະຜູ້ຕາງໜ້າອົງການຈັດຕັ້ງສາກົນທີ່ຮ່ວມປະຊຸມຊົມເຊີຍຄວາມຄຶດແລະຂໍ້ສະເໜີຂອງອີຣັກທີ່ສະເໜີຕໍ່ກອງປະຊຸມ,ແລະກ່າວລື້ມວ່າສະໜັບສະໜູນຂະບວນວິວັດການເມືອງຂອງອີຣັກ,ແລະເຊີດຊູກຳລັງໃຈອີຣັກຟື້ນຟູເສດຖະກິດແລະການສ້າງສາຄືນໃໝ່,ຊ່ອຍເຫຼືອອີຣັກສ້າງລະບຽບການປົກຄອງຕາມກົດໝາຍແລະສາທາລະນະ.
ພ້ອມກັນນັ້ນ ຖະແຫຼງການຮຽກຮ້ອງປະເທດທີ່ກ່ຽວຂ້ອງຈົ່ງປະຕິບັດຕາມຄຳໝັ້ນສັນຍາທີ່ຫຼຸດແລະຍົກເວັ້ນໜີ້ສິນຂອງອີຣັກຢ່າງແທ້ຈິງ,ຊົມເຊີຍປະເທດເຈົ້າໜີ້ຈຳນວນໜຶ່ງສືບຕໍ່ຫຼຸດແລະຍົກເວັ້ນໜີ້ສິນຂອງອີຣັກຢ່າງມີເງື່ອນໄຂໃຫ້ຂໍ້ສະດວກພິເສດ.ຖະແຫຼງການຮຽກຮ້ອງລັດຖະບານຂ້າມຜ່ານຂອງອີຣັກວາງຄວາມຮຽກຮ້ອງຕ້ອງການອັນລະອຽດ,ເພື່ອຫາລືກັນໃນກອງປະຊຸມບໍລິຈາກເງິນຄັ້ງທີ 4 ທີ່ຈະຈັດຂຶ້ນຢູ່ອຳມານ ນະຄອນຫຼວງຊອກດານີໃນເດືອນກໍລະກົດ.
ຄະນະຜູ້ແທນອີຣັກເຊິ່ງແມ່ນທ່ານຈາຟາລີ ນາຍົກລັດຖະມົນຕີລັດຖະບານຂ້າມຜ່ານເປັນຫົວໜ້າໄດ້ເຂົ້າຮ່ວມກອງປະຊຸມໃນມື້ດຽວກັນ.ໃນກອງປະຊຸມ ທ່ານເຈບາລີ ລັດຖະມົນຕີການຕ່າງປະເທດຂອງລັດຖະບານຂ້າມຜ່ານອີຣັກໄດ້ວາງໜ້າທີ່ສຳຄັນ 4 ລາຍຂອງອີຣັກໃນການພົວພັນກັບຕ່າງປະເທດໃນອະນາຄົດຄື:ສຳເລັດຂະບວນວິວັດການປະຕິຮູບທາງການເມືອງຕາມຕາລາງເວລາທີ່ສະພາຄວາມໝັ້ນຄົງສະຫະປະຊາຊາດກຳນົດໄວ້ໃນມະຕິເລກ 1546; ປົກປັກຮັກສາສະຖຽນລະພາບຂອງອີຣັກໃຕ້ການສະໜັບສະໜູນຕື່ມອີກຈາກປະຊາຄົມໂລກ;ຍາດແຍ່ງໃຫ້ປະຊາຄົມໂລກຊ່ອຍອີຣັກດຳເນີນການສ້າງສາຄືນໃໝ່ແລະດັດແປງລະບົບລັດຖະບານຕື່ມອີກ;ທວງໃຫ້ປະຊາຄົມໂລກຮັບຮອງຄືນໃໝ່ວ່າ ອີຣັກແມ່ນສະມາຊິກປົກກະຕິຜູ້ໜຶ່ງໃນການໄປມາຫາສູ່ກັນລະຫວ່າງຊາດ.
ໃນກອງປະຊຸມ ທ່ານອານນານ ເລຂາທິການໃຫຍ່ສະຫະປະຊາຊາດທວງໃຫ້ປະຊາຄົມໂລກຈົ່ງໂຄລົບຄຳໝັ້ນສັນຍາໃຊ້ມາດຕະການຕົວຈິງເພື່ອໃຫ້ການຊ່ອຍເຫຼືອແກ່ການສ້າງສາຄືນໃໝ່ຂອງອີຣັກ.ທ່ານເວົ້າວ່າ,ປະຊາຊົນອີຣັກຈະຖືກອງປະຊຸມຄັ້ງນີ້ເປັນຄຳໝັ້ນສັນຍາທີ່ປະຊາຄົມໂລກພ້ອມກັນກັບພວກຂະເຈົ້າຮັບມືກັບການທ້າທາຍ.
ໃນເວລາປະກອບຄຳຄິດຄຳເຫັນໃນກອງປະຊຸມ ທ່ານລີຈ້າວຊິງ ລັດຖະມົນຕີການຕ່າງປະເທດຈີນໄດ້ບັນລະຍາຍຫຼັກໝັ້ນຂອງລັດຖະບານຈີນໃນບັນຫາອີຣັກ.ທ່ານໄດ້ວາງຂໍ້ສະເໜີ 3 ຂໍ້ ເຊິ່ງລວມທັງໃຫ້ຊາວອີຣັກປົກຄອງອີຣັກໃນດ້ານການເມືອງ ດຳເນີນການປັບປຸງສັງລວມໃນດ້ານຄວາມປອດໄພແລະຟຶ້ນຟູພາລະບົດບາດສ້າງເລືອດດ້ານເສດຖະກິດ,ທ່ານເວົ້າວ່າ ຈີນຈະສືບຕໍ່ພ້ອມກັນກັບປະຊາຄົມໂລກ ທຳຄວາມພະຍາຍາມຢ່າງຕັ້ງໜ້າ ເພື່ອຊຸກຍູ້ຂະບວນວິວັດສ້າງສາອີຣັກຄືນໃໝ່.
ຫາງສຽງເຫັນໂດຍທົ່ວໄປວ່າ,ກອງປະຊຸມຄັ້ງນີ້ ໂດຍຕົ້ນຕໍແມ່ນເພື່ອປະສານສົມທົບຫຼັກໝັ້ນແລະການກະທຳຂອງປະຊາຄົມໂລກໃນບັນຫາສະໜັບສະໜູນການສ້າງສາອີຣັກຄືນໃໝ່,ແລະທຳການກະກຽມເພື່ອກອງປະຊຸມບໍລິຈາກເງິນທີ່ຈະຈັດຂຶ້ນຢູ່ອຳມານໃນເດືອນກໍລະກົດ,ຄວາມໝາຍເປັນສັນຍາລັກສຳຄັນກວ່າຄວາມໝາຍຕົວຈິງ.
|
|
|
