|
ເມື່ອກ່ອນຄ.ສ 770ປີ ຮອດ 481ປີ ໃນປະຫວັດສາດຈີນເອີ້ນວ່າສະໄຫມຊຸນຊິວ ລາຊະວົງໂຈວ ລັດຖະບານສູນກາງໃນຄາວນັ້ນມີອິດທິພົນແລະກຳລັງອ່ອນຫຼາຍລັດນ້ອຍທະຍອຍກັນກໍ່ສົງຄາມຂະຫຍາຍອານາເຂດແລ້ວຈໍ່ຕົວຂຶ້ນເປັນສະພາບສັບສົນທີ່ຫຼາຍລັດນ້ອຍຍາດແຍ່ງເປັນເຈົ້າອຳນາດ ເວລານີ້ໃນລັດນ້ອຍຕ່າງໆໄດ້ມີເຈົ້າອຳນາດ 5 ຄົນ ຄົນຮຸ້ນຫຼັງເອີ້ນວ່າ5ເຈົ້າອຳນາດໃນສະໄຫມຊຸນຊິວ ໃນນັ້ນເຈົ້າອຳນາດຜູ່ທຳອິດແລະຖືກເອີ້ນເປັນຫົວຫນ້າຂອງ 5 ເຈົ້າອຳນາດນັ້ນແມ່ນທ່ານຊີຮວນກົງ
ລັດຊີແມ່ນລັດໃຫຍ່ໃນຫຼາຍລັດໃນສະໄຫມລາຊະວົງໂຈວ ມັນຕັ້ງຢູ່ພາກເຫນືອຂອງແຂວງຊານຕົງ ທາງພາກຕາເວັນອອກຂອງຈີນ ມັນຕັ້ງຢູ່ແຕມທະເລງອຍພູ ມີກຳລັງແຫ່ງຊາດອັນແຂງແຮງ ທ່ານຊີຮວນກົງແມ່ນເຈົ້າຊີວິດອົງທີ 15 ຂອງລັດຊີ ສົມເດັດໄດ້ຊົງຂຶ້ນສະເຫວີຍລາຊະສົມບັດເມື່ອກ່ອນຄ.ສ 685 ປີ ການທີ່ສົມເດັດຂຶ້ນສະເຫວີຍຊາຊະສົມບັດນັ້ນໃນນປະຫວັດສາດຖືກເອີ້ນເປັນເລື່ອງອັດສະຈັນ
ແຕ່ກ່ອນ ໃນເວລາສົມເດັດຊີຮວນກົງຍັງເປັນພະໂອລົດຢູ່ ການເມືອງລັດຊີໄດ້ເກີດການວຸ້ນວາຍ ຊີຮວນກົງກັບອ້າຍນ້ອງຂອງເພິ່ນໄດ້ພາກັນພັດຖິ່ນໄປສູ່ລັດອື່ນ ພາຍຫຼັງມາ ເຈົ້າຊີວິດລັດໄດ້ຖືກລອບຄາດຕະກຳໃນການລັດຖະປະຫານ ຈົນເຮັດໃຫ້ລັດຊີບໍ່ມີເຈົ້າຊີວິດ ຫຼັງຈາກບູດຊີຮວນກົງທີ່ມີສິດສືບລາຊະບັນລັງແລະອ້າຍນ້ອງໄດ້ຮູ້ຂ່າວນີ້ແລ້ວກໍຟ້າວໄປລັດຊີ ເພື່ອສືບລາຊະບັນລັງ ເພື່ອຮັບປະກັນໃຫ້ພະໂອລົດທີ່ຊື່ວ່າຈິວ ສາມາດຂຶ້ນສະເຫວີຍເປັນເຈົ້າຊີວິດ ທ່ານກວນຈົ້ງ ເສນາບໍດີຂອງຈິວໄດ້ນຳພາທະຫານລັດຕີຊີຮວນກົງຢູ່ກາງທາງ ທ່ານກວນຈົ້ງໄດ້ຍິງທະນູໃສ່ຊີຮວນກົງຢູ່ບ່ອນໄກ ເຖິງວ່າລູກທະນູໄດ້ຍິເຖິງເກາະສາຍແອວຂອງຊີຮວນກົງກໍຕາມ ແຕ່ຊີຮວນກົງໄດ້ເຮັດຕິຖືກຍິງຕາຍເພື່ອຫຼວກຫຼວງຝ່າຍກົງກັນຂ້າມ ທ່ານກວນຈົ້ງຄຶດວ່າຊີຮວນກົງໄດ້ຖືກຍິງຕາຍແລ້ວ ຈິວກໍບໍ່ມີຄູ່ແຂ່ງຂັນແລ້ວ ກໍ່ໃຫ້ທະຫານເດີນທາງຊ້າລົງ ແຕ່ຊີຮວນກົງພັດຟ້າວເດີນທາງທັງເວັນທັງຄືນຢ່າງບໍ່ຢຸດບໍ່ເຊົາ ໃນທີ່ສຸດ ໄດ້ໄປຮອດລັດຊີກ່ອນ ຈິວ 6ມື້ ຊີຮວນກົງທີ່ມາກ່ອນຖືກບັນດາເສນາບໍດີສະຫນັບສະຫນູນເປັນເຈົ້າຊີວິດທີ່ຊື່ວ່າສົມເດັດຊີຮວນກົງ
ສົມເດັດຊີຮວນກົງບໍ່ພຽງແຕ່ອີງໃສ່ຄວາມສະຫຼາດສະຫຼຽວຂຶ້ນຄອງອຳນາດທໍ່ນັ້ນ ຫາກຍັງໄດ້ອາໄສສະຕິປັນຍາການເມືອງອັນສູງສຸດສ້າງ ການປົກຄອງເປັນເຈົ້າອຳນາດອີກດ້ວຍຫຼັງຈາກສົມເດັດຊີຮວນກົງຄອງອຳນາດແລ້ວ ໄດ້ແຕ່ງຕັ້ງຜູ່ມີຄວາມປີຊາສາມາດ ຢູ່ອ້ອມຂ້າງຂອງພະອົງໄດ້ມີຜູ່ມີຄວາມຮູ້ຄວາມສາມາດໃນດ້ານ ປົກຄອງປະເທດຢ່າງຫຼວງຫຼາຍ ທ່ານປະຖິ້ມຄວາມອາຄາດບາດຫມອງໃນເມື່ອກ່ອນ ແຕ່ງຕັ້ງທ່ານກວນຈົ້ງທີ່ເຄີຍລອບຂ້າສົມເດັດໃນຄາວນັ້ນຮັບຕຳແຫນ່ງເປັນອັກຄະເສນາບໍດີ ເຊິ່ງເປັນ ຕຳຫນ່າງສຳຄັນທີ່ສຸດ ມອບເລື່ອງສຳຄັນຂອງລັດໃຫ້ທ່ານ ຍັງເອີ້ນທ່ານເປັນບິດາຈົ້ງ ທ່ານກວນຈົ້ງໄດ້ສ້າງຄຸນງາມຄວາມດີອັນດີເດັ່ນເຂົ້າໃນການສ້າງລັດຊີໃຫ້ຈະເລີນ ຮຸ່ງເຮືອງເຂັ້ມແຂງຂຶ້ນ
ສົມເດັດຊີຮວນກົງໄດ້ປະຕິບັດມາດຕະການປະຕິຮູບຢ່າງຕັ້ງຫນ້າ ອອກແຮງສຸດຂີດປ່ຽນແປງສະພາບຫຼ້າຫຼັງເນື່ອງຈາກລັດຊີໄດ້ວຸ້ນວາຍເປັນເວລາດົນນານ ເຮັດໃຫ້ລັດຊີກາຍເປັນລັດທີ່ແຂງແຮງກວ່າຫມູ່ໃນຫຼາຍລັດຢ່າງວ່ອງໄວ ບົນພື້ນຖານດັ່ງກ່າວ ສົມເດັດຊີຮວນກົງໄດ້ຜ່ານການເຄື່ອນໄຫວຕ່າງໆທາງການທະຫານ ການເມືອງແລະການຕ່າງປະເທດສະແຫວງຫາຖານະເປັນເຈົ້າອຳນາດ
ເລື່ອງທີ່ສົມເດັດຊີຮວນກົງຊ່ອຍລັດອ່ອນແລະເຮັດໃຫ້ຫຼາຍລັດຍອມຂຶ້ນກັບສົມເດັດນັ້ນມີຫຼາຍຢ່າງຫຼາຍແນວ ຕົວຢ່າງຄືລັດຊີໄດ້ຍາດເອົາດິນແດນຂອງລັດລູໃນສົງຄາມ ໃນເວລາຫົວຫນ້າ ລັດຊີກັບຫົວຫນ້າລັດລູພົບປະກັນ ນາຍທະຫານລັດລູໄດ້ຖອດເອົາດາບຈີ້ສົມເດັດຊີຮວນກົງຢ່າງກະທັນຫັນ ທວງໃຫ້ສົມເດັດສົ່ງດິນແດນຄືນໃຫ້ ສົມເດັດຊີຮວນກົງຖືກ ບັງຄັບຮັບປາກວ່າຈະສົ່ງດິນແດນຄືນໃຫມ່ໃຫ້ ຕໍ່ມາສົມເດັດໄດ້ສົ່ງດິນແດນຜືນນີ້ຄືນໃຫ້ລັດລູ ຫຼາຍລັດເຫັນວ່າພະອົງແມ່ນເຈົ້າຊີວິດທີ່ມີຄຸນສົມບົດດີແລະເວົ້າແລ້ວຖືເປັນສັດຈະ ແລ້ວໄດ້ທະຍອຍກັນຜູກພັນທະມິດກັບພະອົງ ສົມເດັດຊີຮວນກົງໄດ້ນຳພາກອງທະຫານຊ່ອຍເຫຼືອລັດອ້ຽນໂຈມຕີ ເຜົ່າຕ່າງປະເທດທີ່ເຂົ້າມາຮຸກຮານນັ້ນໃຫ້ຖອຍໄປ ເຈົ້າຊີວິດລັດອ້ຽນໄດ້ສົ່ງສົມເດັດຊີຮວນກົງກັບຄືນສູ່ລັດຊີຢ່າງອາໄລອາວອນ ພັດໄດ້ອອກຈາກ ເຂດຊາຍແດນຂອງລັດອ້ຽນຢ່າງບໍ່ຮູ້ສຶກຕົວ ຕາມກົດລະບຽບຂອງຊລາລາຂະວົງໂຈວ ເຈົ້າຊີວິດລັດຫນຶ່ງໄປສົ່ງເຈົ້າຊີວິດລັດອື່ນແມ່ນບໍ່ໃຫ້ອອກຈາກຊາຍແດນ ສົມເດັດຊີຮວນກົງກໍຕັດເອົາດິນແດນສ່ວນຫນຶ່ງຢູ່ເຂດຊາຍແດນລັດຊີໃຫ້ລັດອ້ຽນ ເຮັດໃຫ້ເຈົ້າຊີວິດລັດອ້ຽນຮູ້ສຶກກະຕຸ້ນໃຈທີ່ສຸດ ແລ້ວນຳພາລັດອ້ຽນຂຶ້ນກັບ ລັດຊີ ລັດຊິງແລະລັດເວ້ຖືກເຜົ່າດີບຸກໂຈມຕີ ໃນເວລາກອງທະຫານຊ່ອຍກອບກູ້ຂອງລັດຊີໄປຮອດ ສອງລັດນີ້ຖືກດັບສູນແລ້ວ ກອງທະຫານລັດຊີກໍຊ່ອຍສອງລັດຍ້າຍແລະກໍ່ສ້າງນະຄອນຫຼວງຄືນໃຫມ່ ສົມເດັດຊີຮວນກົງຍັງໄດ້ຍົກພົນໂຈມຕີລັດສູທີ່ຢູ່ພາກໃຕ້ເຊິ່ງຂົ່ມຂູ່ເຂດຍ່ານກາງແລະຍ່ານໃຕ້ແມ່ນ້ຳເຫຼືອງ ບັງຄັບໃຫ້ລັດສູຮ້ອງຂໍເຈລະຈາສະຫງົບສຸກແລະຍອມຖະຫວາຍເຄື່ອງຂອງໃຫ້ພະລາຊະວັງໂຈວ ການກະທຳເຫຼົ່ານີ້ລ້ວນແຕ່ໄດ້ຊ່ອຍເຫຼືອສົມເດັດຊີຮວນກົງສ້າງອິດທິພົນສູງທີ່ສຸດໃນບັນດາລັດ ໃນເວລາພະລາຊະວັງໂຈວເກີດວິວາດກັນ ສົມເດັດຊີຮວນກົງໄດ້ນຳພາຫຼາຍລັດປັບປຸງຖານະຂອງລາຊະທາຍາດລາຊະວົງໂຈວ ພາຍຫຼັງລາຊະທາຍາດໄດ້ຂຶ້ນສະເຫວີຍລາຊະສົມບັດເປັນເຈົ້າຊີວິດລາຊະວົງໂຈວ
ການປົກຄອງທີ່ເປັນເຈົ້າອຳນາດທີ່ສົມເດັດຊີຮວນກົງສ້າງຂຶ້ນນັ້ນເປັນການປະດິດສ້າງໃນໄລຍະສະໄຫມຊຸນຊິວ ແລະໃນຂະບວນການເປັນເຈົ້າອຳນາດ ພະອົງໄດ້ຜູກພັນທະມິດແລະປອງດອງກັນກັບລັດອື່ນ ເຮັດໃຫ້ສົງຄາມຫຼຸດຫນ້ອຍລົງ ຮ່ວມກັນກັບຫຼາຍລັດຕ້ານທານ ເຜົ່າຢົງແລະເຜົ່າດີທີ່ມາປຸ້ນສະດົມແລະຮຸກຮານ ມັນມີຜົນດີຕໍ່ການພັດທະນາເສດຖະກິດ ວັດທະນະທຳຂອງເຂດຍ່ານກາງແລະຍ່ານໃຕ້ແມ່ນ້ຳເຫຼືອງແລະເຮັດໃຫ້ຊີວິດການເປັນຢູ່ຂອງປະຊາຊົນຢູ່ເຢັນເປັນສຸກ ເຈົ້າອຳນາດທີ່ຖັດຈາກສົມເດັດຊີຮວນກົງ ລ້ວນແຕ່ບໍ່ໄດ້ຮັບຜົນສຳເລັດຄືສົມເດັດຊີຮວນກົງ ສະນັ້ນ ໃນປຶ້ມປະຫວັດສາດຂອງຈີນໄດ້ຍ້ອງຍໍສົມເດັດຊີຮວນກົງວ່າ ໃນຫມູ່5 ເຈົ້າອຳນາດໃນສະໄຫມຊຸນຊິວ ເຈົ້າຊີວິດຊີຮວນກົງພົ້ນເດັ່ນກວ່າເພິ່ນ
|
