|
|
 |
| (GMT+08:00)
2005-06-24 14:13:25
|
 |
|
ຈີນຈະຈັດງານກິລາໂອລິມປິກປັກກິ່ງທີ່ມີໄຮເຕັກ
cri
Author: li
 ຕັ້ງແຕ່ນະຄອນປັກກິ່ງໄດ້ຮັບສິດເປັນເຈົ້າພາບຈັດງານກິລາໂອລິມປິກຄັ້ງທີ 29 ເມື່ອ 4 ປີກ່ອນມານີ້,ຈີນກໍໄດ້ລົງມືເຮັດວຽກກະກຽມທຸກລາຍຂອງງານກິລາໂອລິມປິກ. ໃນຂະບວນການດັ່ງກ່າວ,ຈະເສີມຂະຫຍາຍບົດບາດຂອງວິທະຍາສາດເຕັກນິກແນວໃດ,ເພື່ອຮັບປະກັນໃຫ້ງານກິລາໂອລິມປິກດຳເນີນໄປຢ່າງສະດວກນັ້ນແມ່ນຈຸດໜັກຕະຫຼອດມາ.
ໃນເວລາຮ້ອງຂໍຈັດງານກິລາໂອລິມປິກ,ປັກກິ່ງກໍໄດ້ກຳນົດຫົວຂໍ້ຫຼັກທີ່ວ່າ"ງານໂອລິມປິກສີຂຽວ,ງານໂອລິມປິກວິທະຍາສາດເຕັກນິກແລະງານໂອລິມປິກວັດທະນະທຳ". ນີ້ກໍເປັນຄັ້ງທຳອິດໃນປະຫວັດສາດງານກິລາໂອລິມປິກທີ່ໄດ້ສະເໜີທັດສະນະຄະຕິ"ງານໂອລິມປິກວິທະຍາສາດ". ທ່ານນາງລິນເວີນຢີ ຮອງເຈົ້າຄອງນະຄອນຫຼວງປັກກິ່ງໄດ້ອະທິບາຍທັດສະນະຄະຕິດັ່ງກ່າວວ່າ:
"ຄວາມໝາຍຂອງງານໂອລິມປິກວິທະຍາສາດເຕັກນິກກໍແມ່ນຕ້ອງປະສານສົມທົບກັບຄວາມຄືບໜ້າໃໝ່ສຸດທາງດ້ານວິທະຍາສາດເຕັກນິກຢ່າງແໜ້ນແຟ້ນ,ໂຮມສູນໝາກຜົນເຕັກນິກສູງໃໝ່ຂອງທົ່ວປະເທດກໍຄືຂອງໂລກ,ໃຊ້ເຂົ້າໃນງານກິລາອັນໃຫຍ່ໂຕມະໂຫລານຄັ້ງນີ້."
ພາຍຫຼັງປັກກິ່ງໄດ້ຮັບສິດເປັນເຈົ້າພາບຈັດງານໂອລິມປິກແລ້ວ,ກະຊວງວິທະຍາສາດເຕັກໂນໂລຢີຈີນ,ຄະນະກຳມະການຈັດຕັ້ງງານກິລາໂອລິມປິກປັກກິ່ງແລະຫົວໜ່ວຍອື່ນໆກໍໄດ້ລົງມືປະຕິບັດ"ແຜນການດຳເນີນງານຂອງງານກິລາໂອລິມປິກວິທະຍາສາດເຕັກນິກ",ຕົກລົງບຸກຂໍ້ຍາກໃນ 6 ດ້ານເຊັ່ນການກໍ່ສ້າງສະໜາມແລະຫໍກິລາໂອລິມປິກ,ການຮັກສາຄວາມປອດໄພຂອງງານກິລາໂອລິມປິກ,ສິ່ງແວດລ້ອມທາງອາກາດກັບແຫຼ່ງນ້ຳຂອງປັກກິ່ງ,ຄົມມະນາຄົມ,ເຕັກນິກໂທລະຄົມຂໍ້ມູນຂ່າວສານແລະວິທະຍາສາດເຕັກນິກກິລາເປັນຕົ້ນ,ຢູ່ໃຕ້ຫົວຂໍ້ໃຫຍ່ເຫຼົ່ານີ້ໄດ້ປະຕິບັດ 10 ໂຄງການໃຫຍ່ຢ່າງລະອຽດ,ຕົ້ນຕໍລວມທັງ"ແຜນການຄົມມະນາຄົມທີ່ມີສະຕິປັນຍາຂອງປັກກິ່ງ","ແບບຢ່າງການແລ່ນລົດກຸຍ","ລະບົບບໍລິການຂໍ້ມູນຂ່າວສານດ້ວຍຫຼາຍພາສາທີ່ມີສະຕິປັນຍາ"ແລະອື່ນໆ.
ເພື່ອປະຕິບັດໂຄງການເຫຼົ່ານີ້,ຝ່າຍທີ່ກ່ຽວຂ້ອງຂອງຈີນໄດ້ລົງທຶນ 3 ຕື້ກວ່າໂດລາສະຫະລັດ,ພະນັກງານວິທະຍາສາດເຕັກນິກຫຼາຍພັນຄົນໄດ້ເຂົ້າຮ່ວມວຽກງານຄົ້ນຄວ້າວິທະຍາສາດທີ່ກ່ຽວຂ້ອງ.
ທ່ານລິວປິນແມ່ນຜູ້ຄົ້ນຄວ້າຂອງສະຖາບັນຄົ້ນຄວ້າລະບົບອັດຕະໂນມັດຂອງສະພາບັນດິດວິທະຍາສາດຈີນ,ໜ່ວຍງານທີ່ນຳໂດຍທ່ານໄດ້ເຂົ້າຮ່ວມວຽກງານຄົ້ນຄວ້າ"ລະບົບບໍລິການຂໍ້ມູນຂ່າວສານດ້ວຍຫຼາຍພາສາທີ່ມີສະຕິປັນຍາ". ທ່ານໄດ້ແນະນຳໃຫ້ນັກຂ່າວຊາບວ່າ:
"ສິ່ງທີ່ພວກຂ້າພະເຈົ້າພວມຄົ້ນຄວ້ານັ້ນແມ່ນລະບົບແປພາສາທີ່ມີສະຕິປັນຍາແກ່ເພື່ອນຕ່າງປະເທດທີ່ມາເຂົ້າຮ່ວມງານກິລາໂອລິມປິກປີ 2008 ຢູ່ຈີນ,ມັນຕົ້ນຕໍໃຊ້ໃນຜະລິດຕະພັນເອເລັກໂຕຼນິກແບບມືຖືເຊັ່ນຄອມພິວເຕີມືຖືແລະໂທລະສັບມືຖືເປັນຕົ້ນ. ສັບພະຄຸນຕົ້ນຕໍຂອງມັນແມ່ນໃຫ້ການບໍລິການແປພາສາແກ່ຜູ້ໃຊ້ໃນດ້ານຈອງໂຮງແຮມ,ກວດກາຄົມມະນາຄົມ,ໄປຫາໝໍແລະໄປກິນເຂົ້າເປັນຕົ້ນ."
ເມື່ອຮອດວັນງານກິລາໂອລິມປິກປັກກິ່ງປີ 2008 ຈະມີນັກກິລາ,ຄູເຝິກແລະຜູ້ທ່ອງທ່ຽວຕ່າງປະເທດຈຳນວນຫຼວງຫຼາຍມາຮອດປັກກິ່ງ. ຖ້າຄອມພິວເຕີມືຖືຫຼືໂທລະສັບມືຖືຂອງເພື່ອນຕ່າງປະເທດໄດ້ຕິດຕັ້ງລະບົບແປພາສາທີ່ມີສະຕິປັນຍາທີ່ທ່ານລິວປິນເປັນຕົ້ນພັດທະນານັ້ນ,ກໍເໝືອນດັ່ງມີຜູ້ແປຕິດຕົວ.
ຕາມຊາບວ່າ,ນອກຈາກນຳໃຊ້ໃນອຸປະກອນເອເລັກໂຕຼນິກແບບມືຖືຂອງສ່ວນບຸກຄົນແລ້ວ,ເມື່ອຮອດປີ 2008 ລະບົບແປພາສາທີ່ມີສະຕິປັນຍາຍັງຈະຖືກນຳໃຊ້ໃນ 3000 ກວ່າສາລາຂໍ້ມູນຂ່າວສານທີ່ຕັ້ງຢູ່ແຄມຖະໜົນຫົນທາງຂອງປັກກິ່ງ.
ໃນຂະນະທີ່ວຽກງານຄົ້ນຄວ້າ"ລະບົບບໍລິການຂໍ້ມູນຂ່າວສານດ້ວຍຫຼາຍພາສາທີ່ມີສະຕິປັນຍາ"ຂອງງານກິລາໂອລິມປິກໄດ້ມີການບຸກທະລຸຢ່າງໃຫຍ່ຫຼວງນັ້ນ,ສະພາບຄວາມຄືບໜ້າຂອງໂຄງການວິທະຍາສາດເຕັກນິກສຳຄັນອື່ນໆຂອງງານກິລາໂອລິມປິກເປັນແນວໃດ? ທ່ານດູຈັນຢວນ ເຈົ້າໜ້າທີ່ກະຊວງວິທະຍາສາດເຕັກໂນໂລອີຈີນແມ່ນຜູ້ຮັບຜິດຊອບຜູ້ໜຶ່ງຂອງ"ແຜນການດຳເນີນງານຂອງງານກິລາໂອລິມປິກວິທະຍາສາດເຕັກນິກ,ທ່ານແນະນຳວ່າ:
"ຕົວຢ່າງຄືໂຄງການລົດກຸຍໄດ້ຮັບໝາກຜົນສຳຄັນໃນດ້ານເຕັກນິກຂໍກະແຈ,ການຄົ້ນຄວ້າຜະລິດແລະທົດລອງໃຊ້ລົດເປັນຕົ້ນ; ໂຄງການມາດຖານສິ່ງກໍ່ສ້າງສີຂຽວພ້ອມດ້ວຍແບບຢ່າງນຳໃຊ້ໄດ້ສະເໜີມາດຖານສິ່ງກໍ່ສ້າງສີຂຽວຂອງສະໜາມແລະຫໍກິລາໂອລິມປິກແລະຫໍພັກໂອລິມປິກ ແລະມາດຖານປະຢັດພະລັງງານ,ປະຢັດນ້ຳຂອງສິ່ງກໍ່ສ້າງໂອລິມປິກເປັນຕົ້ນ. ເວົ້າລວມແລ້ວ,ປັດຈຸບັນ,10 ໂຄງການວິທະຍາສາດເຕັກນິກສຳຄັນຂອງງານກິລາໂອລິມປິກໄດ້ມີຄວາມຄືບໜ້າຢ່າງສະດວກ."
ທ່ານເວົ້າວ່າ,ຜ່ານຈາກການປະຕິບັດໂຄງການເຫຼົ່ານີ້,ໃນໄລຍະຈັດງານກິລາໂອລິມປິກປີ 2008,ໄຟຖະໜົນເກີນ 80% ຂອງໃຈກາງເມືອງປັກກິ່ງຈະໃຊ້ພະລັງຕາເວັນ; ລົດຍົນທີ່ຮັບສົ່ງນັກກິລາຈະໃຊ້ລົດກຸຍທັງໝົດ; ບ້ານໂອລິມປິກຈະໃຊ້ເຕັກນິກຈຳແນກໜ້າຄົນມາຕິດຕາມຄວບຄຸມຜູ້ເຂົ້າ,ເພື່ອຮັບປະກັນຄວາມປອດໄພຂອງນັກກິລາແລະຄູເຝິກ; ຜູ້ຊົມຈະໃຊ້ໂທລະສັບມືຖື 3 G ຊົມເບິ່ງການແຂ່ງຂັນໂອລິມປິກໄດ້ແລະອື່ນໆ. ຜູ້ຮັບຜິດຊອບຜູ້ນີ້ຍັງກ່າວວ່າ,ແຕ່ປັດຈຸບັນຮອດວັນຈັດງານກິລາໂອລິມປິກປີ 2008 ຍັງມີເວລາປະມານ 3 ປີ,ໃນໄລຍະນີ້,ຍັງມີວິທະຍາສາເຕັກນິກໃໝ່ຢ່າງຫຼວງຫຼາຍກຳເນີດຂຶ້ນ,ຝ່າຍທີ່ກ່ຽວຂ້ອງຈະເລືອກນຳໃຊ້ໝາກຜົນວິທະຍາສາດເຕັກນິກທີ່ມີສ່ວນກ່ຽວຂ້ອງກັບງານກິລາໂອລິມປິກຢ່າງທັນການ.
|
|
|
