|
ຕາມຂ່າວCRI: ວັນທີ 24 ມິຖຸນານີ້ ຢູ່ທີ່ທຳນຽບຂາວ, ພາຍຫຼັງໄດ້ເຈລະຈາກັບທ່ານຈາຟາຣີ ນາຍົກລັດຖະມົນຕີລັດຖະບານຂ້າມຜ່ານຂອງອີຣັກທີ່ມາຢ້ຽມຢາມນັ້ນແລ້ວ, ທ່ານບຸສ ປະທານາທິບໍດີອາເມລິກາກ່າວວ່າ, ປະຕິເສດວາງຕາລາງເວລາກ່ຽວກັບການຖອນກອງທະຫານອາເມລິກາອອກຈາກອີຣັກ.
ໃນງານຊຸມນຸມນັກຂ່າວທີ່ຈັດຂຶ້ນຫຼັງການເຈລະຈາ, ທ່ານບຸສກ່າວວ່າ, ກອງທະຫານອາເມລິກາປະຈຳອີຣັກຈະສືບຕໍ່ຊ່ອຍເຫຼືອອີຣັກອົບຮົມສ້າງກອງທະຫານຮັກສາຄວາມປອດໄພ, ເຮັດໃຫ້ອີຣັກສາມາດຫາບແບກໜ້າທີ່ຮັບຜິດຊອບປ້ອງກັນປະເທດ.
ໃນມື້ດຽວກັນ, ກອງທະຫານອາເມລິກາປະຈຳອີຣັກຢືນຢັນວ່າ, ລົດຄັນໜຶ່ງຂອງທະຫານເຮືອສູ້ເທິງບົກອາເມລິກາຖືກຫຼອນໂຈມຕີດ້ວຍລະເບີດລົດຍົນແບບສະຫຼະຊີວິດຢູ່ເມືອງຟາລູຈາ, ທະຫານອາເມລິກາ 6 ຄົນເສຍຊີວິດ.
|
