|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການໂລກກິລາ, ໃນລາຍການພາກນີ້, ຂ້າພະເຈົ້າຈະສະເໜີຂ່າວກິລາປະມວນໜຶ່ງ.
ແຕ່ວັນທີ 20 ມິຖຸນາເປັນຕົ້ນໄປ, ຄະນະກຳມະການຈັດຕັ້ງງານກິລາໂອລິມປິກປັກກິ່ງຈະຈັດເຂດວາງສະແດງໃນງານເອັກສ໌ໂປເຄື່ອງກິລາສາກົນຈີນຄັ້ງທີ 16, ເພື່ອສະແດງເຖິງຄວາມຄືບໜ້າຂອງວຽກງານພັດທະນາຕະຫຼາດງານກິລາໂອລິມປິກປັກກິ່ງ. ປະຈຸບັນ ນອກຈາກວິສາຫະກິດ 11 ແຫ່ງໃນແຜນການ "ຄູ່ຂາໂອລິມປິກ" ຂອງຄະນະກຳມະການໂອລິມປິກສາກົນຈະອຸປະຖຳງານກິລາໂອລິມປິກປັກກິ່ງແລ້ວ, ຍັງມີວິສາຫະກິດ 8 ແຫ່ງໄດ້ເປັນຄູ່ຂາຮ່ວມມືງານກິລາໂອລິມປິກປັກກິ່ງ. ພ້ອມກັນນັ້ນ, ສິນຄ້າງານກິລາໂອລິມປິກປັກກິ່ງທີ່ໄດ້ຮັບອະນຸຍາດເປັນພິເສດໃຫ້ເຂົ້າຕະຫຼາດນັ້ນກໍມີເຖິງ 500 ກວ່າຊະນິດແລ້ວ.
ວັນທີ 19 ມິຖຸນານີ້, ຄະນະກຳມະການຈັດຕັ້ງງານກິລາໂອລິມປິກປັກກິ່ງປະກາດວ່າ, ກອງປະຊຸມ "ເວທີປາໄສສາກົນກ່ຽວກັບງານກິລາໂອລິມປິກປັກກິ່ງປີ 2008" ປະຈຳປີ 2005 ຈະຈັດຂຶ້ນຢູ່ທີ່ປັກກິ່ງແຕ່ວັນທີ 25 ຮອດວັນທີ 26 ມິຖຸນານີ້. ກອງປະຊຸມເວທີປາໄສເທື່ອນີ້ແມ່ນຄະນະກຳມະການຈັດຕັ້ງງານກິລາໂອລິມປິກປັກກິ່ງ ມະຫາວິທະຍາໄລປະຊາຊົນຈີນ ອົງການປົກຄອງເຂດຊວນອູນະຄອນປັກກິ່ງແລະມະຫາວິທະຍາໄລຫຼຽນເຫີປັກກິ່ງພ້ອມກັນເປັນເຈົ້າພາບ, ຫົວຂໍ້ແມ່ນ "ສະພາບແວດລ້ອມທີ່ກົມກຽວກັນ: ຜົນສະທ້ອນສັງລວມຂອງໂອລິມປິກແລະທົ່ວປວງຊົນເຂົ້າຮ່ວມ". ກອງປະຊຸມຈະເຈາະຈົງຄົ້ນຄວ້າແລະຊອກຫາຫຼາຍຊ່ອງທາງທີ່ທົ່ວປວງຊົນເຂົ້າຮ່ວມງານກິລາໂອລິມປິກ.
ວັນທີ 20 ມິຖຸນານີ້, ງານແຂ່ງຂັນຍິງປືນຊິງຂັນໂລກປີ 2005 ໄດ້ສິ້ນສຸດການແຂ່ງຂັນນັດມີລານອີຕາລີເຊິ່ງເປັນນັດສຸດທ້າຍຂອງການແຂ່ງຂັນດັ່ງກ່າວ. ໃນງານແຂ່ງຂັນທຸກຄັ້ງຂອງງານແຂ່ງຂັນຍິງປືນຊິງຂັນໂລກຢ່າງເປັນລະບົບຄັ້ງນີ້, ນັກກິລາຈີນມີ 8 ຄົນໄດ້ສິດເຂົ້າຮ່ວມງານກິລາໂອລິມປິກປັກກິ່ງ, ເມື່ອເປັນຈັ່ງຊັ້ນ ທີມຍິງປືນແຫ່ງຊາດຈີນໄດ້ບ່ອນນັ່ງເຂົ້າຮ່ວມງານກິລາໂອລິມປິກປັກກິ່ງ 17 ບ່ອນນັ່ງແລ້ວ. ເນື່ອງຈາກວ່າ ອີງຕາມການກຳນົດ, ໃນຖານະເປັນເຈົ້າພາບ, ນັກກິລາຍິງປືນຈີນຈະມີ 9 ຄົນເຂົ້າຮ່ວມງານກິລາໂອລິມປິກປັກກິ່ງໂດຍອັດຕະໂນມັດ.
ວັນທີ 17 ມິຖຸນານີ້, ໃນງານແຂ່ງຂັນບານເຕະ U-20 ຊິງຊະນະເລີດໂລກທີ່ຈັດຂຶ້ນຢູ່ໂຮນລັງ, ທີມບານເຕະເພດຊາຍ U-20 ແຫ່ງຊາດຈີນໄດ້ເຂົ້າຮອບ 16 ທີມສຸດທ້າຍ. ໃນການແຂ່ງຂັນໃນຈຸ, ທີມ U-20 ຈີນໄດ້ເອົາຊະນະທີມຕວກກີ ທີມອູແກຼນແລະທີມປານາມາຢ່າງຕໍ່ເນື່ອງ. ໃນການແຂ່ງຂັນເຂົ້າຮອບ 8 ທີມສຸດທ້າຍ, ທີມຈີນໄດ້ເສຍໃຫ້ທີມ U-20 ເຢຍລະມັນດ້ວຍ 2:3.
ວັນທີ 19 ມິຖຸນານີ້ ຢູ່ເມືອງສາງຊາທີ່ຢູ່ພາກກາງສຽງໃຕ້ຂອງຈີນ, ທີມບານເຕະເພດຊາຍແຫ່ງຊາດຈີນໄດ້ແຂ່ງຂັນມິດຕະພາບກັບທີມບານເຕະກົສຕາລີກາ. ຜົນການແຂ່ງຂັນແມ່ນ 2:2, ນັກກິລາຈີນຜູ່ຍິງໄດ້ປະຕູແມ່ນທ້າວຈາງຢ້າວຄຸນແລະທ້າວຊຸນສຽງ.
"ງານແຂ່ງຂັນທ້າທາຍລູອິສ ວຸຍຕົງ" ເຊິ່ງງານແຂ່ງຂັນເຮືອໃບເດີນທະເລສາກົນໄດ້ຈັດຂຶ້ນຢູ່ວາລັງເຊີແຫ່ງແອສປາຍ, ເຮືອໃບຈີນເບີ "ທີມແຫ່ງຈີນ" ໄດ້ເຂົ້າຮ່ວມງານແຂ່ງຂັນເທື່ອນີ້, ນີ້ແມ່ນເຮືອໃບຈີນເຂົ້າຮ່ວມງານແຂ່ງຂັນເຮືອໃບທີ່ມີຊື່ສຽງເປັນຄັ້ງທຳອິດ. ນັບມາຮອດວັນທີ 20 ມິຖຸນານີ້, ຜົນງານຂອງ "ທີມແຫ່ງຈີນ" ແມ່ນຊະນະເທື່ອໜຶ່ງແຕ່ເສຍໄຊ 17 ເທື່ອ, ເປັນທີ 11. "ງານແຂ່ງຂັນທ້າທາຍລູອິສ ວຸຍຕົງ" ແມ່ນງານແຂ່ງຂັນຮອບຄັດເລືອກຂອງງານແຂ່ງຂັນເຮືອໃບເດີນທະເລຊິງຂັນທະວີບອາເມລິກາ ເຊິ່ງເປັນງານແຂ່ງຂັນເຮືອໃບລະດັບສຸດຍອດ
ວັນທີ 18 ມິຖຸນານີ້, ທ້າວຖາງເຈິ້ງຕົງ ນັກກິລາບານບ້ວງຂອງຈີນໄດ້ປະກາດຖອນອອກຈາກການແຂ່ງຂັນຄັດເລືອກນັກກິລາບານບ້ວງຜູ່ດີເດັ່ນ NBA ສົກປີ 2005 ຢ່າງເປັນທາງການ. ກ່ອນໜ້ານີ້, ຈີນມີນັກກິລາສາມຄົນເຂົ້າຮ່ວມທີມບານບ້ວງ NBA, ໃນນັ້ນຜູ່ດີເດັ່ນກວ່າໝູ່ແມ່ນທ້າວຢາວມິງ ຫຼິ້ນກອງກາງໃນທີມລອກເກ໊ດຮິວສ໌ໂຕນໃນປະຈຸບັນ. ມູນເຫດຕົ້ນຕໍທີ່ທ້າວຖາງເຈິ້ງຕົງ ນັກຫຼິ້ນກອງກາງບໍ່ເຂົ້າຮ່ວມການແຂ່ງຂັນຄັດເລືອກນັກກິລາບານບ້ວງຜູ່ດີເດັ່ນໃນປີນີ້ແມ່ນທີມບານບ້ວງເພດຊາຍຈີນຈະກະກຽມງານແຂ່ງຂັນບານບ້ວງຊິງຊະນະເລີດອາຊີໃນໄວໆນີ້, ທ້າວຖາງເຈິ້ງຕົງທີ່ຫວັງຈັ້ງຕີນຢ່າງໝັ້ນທ່ຽງໃນທີມຊາດຈີນບໍ່ມີເວລາຫວ່າງໄປອາເມລິກາ
ວັນທີ 19 ມິຖຸນານີ້, ຜູ່ມັກຫຼິ້ນກິລາຫັດກາຍບໍລິຫານຫຼາຍແສນຄົນໃນ 17 ຕົວເມືອງຂອງຈີນໄດ້ຫຼັ່ງໄຫຼຂຶ້ນສູ່ທ້ອງຖະໜົນ, ໂຄສະນາຜົນດີຂອງການຫຼິ້ນກິລາຫັດກາຍຕໍ່ມວນຊົນຈີນດ້ວຍ "ຮູບການເດີນທາງ" ເຊິ່ງເປັນຮູບການກິລາງ່າຍດາຍທີ່ສຸດ, ແລະຖືໂອກາດນີ້ສະຫຼອງສະຫະປະຊາຊາດກຳນົດເອົາປີ 2005 ນີ້ເປັນ "ປີກິລາສາກົນ".
ວັນທີ 19 ມິຖຸນານີ້, ທີມບານເຕະເພດຍິງແຫ່ງຊາດເຢຍລະມັນຊິງໄດ້ແຊມປຽນໃນງານແຂ່ງຂັນບານເຕະຊິງຊະນະເລີດເອີລົບ 2005, ເຂົາເຈົ້າໄດ້ເອົາຊະນະທີມນອກແວດ້ວຍ 3:1 ໃນການແຂ່ງຂັນຮອບຊິງຊະນະເລີດ. ນີ້ແມ່ນແຊມປຽນຄັ້ງທີ 6 ທີ່ທີມເຢຍລະມັນຊິງໄດ້ໃນງານແຂ່ງຂັນບານເຕະເພດຍິງຊິງຊະນະເລີດເອີລົບ.
ວັນທີ 19 ມິຖຸນານີ້, ໃນງານແຂ່ງຂັນລົດສູດໜຶ່ງຫຼື F-1 ຊິງຊະນະເລີດໂລກປີ 2005 ໄດ້ປະກົດມີສະພາບການໜ້າຕົກສະເງີ້ທີ່ສຸດໃນປະຫວັດສາດ. ເນື່ອງຈາກບໍລິສັດມີແຊລິນ ເຊິ່ງເປັນບໍລິສັດສະໜອງຕີນລົດເຫັນວ່າ ຕີນລົດທີ່ບໍລິສັດຕົນເອງຜະລິດນັ້ນ ຮັບປະກັນຄວາມປອດໄພຂອງລົດຍົນບົນເສັ້ນທາງການແຂ່ງຂັນສາຍນີ້ບໍ່ໄດ້, ແຕ່ສະຫະພັນລົດສູດໜຶ່ງສາກົນໄດ້ປະຕິເສດບໍ່ໃຫ້ທີມລົດປ່ຽນຕີນລົດ, ຈຶ່ງພາໃຫ້ທີມລົດທີ່ໃຊ້ຕີນລົດຂອງບໍລິສັດດັ່ງກ່າວ 7 ທີມຖອຍອອກຈາກງານແຂ່ງຂັນພ້ອມກັນ. ໃນທີ່ສຸດມີລົດພຽງ 6 ຄັນຂອງ 3 ທີມໄດ້ເຂົ້າຮ່ວມການແຂ່ງຂັນ. ສຸດທ້າຍ, ທ້າວຊູມາເຊີ ນັກຂັບລົດເຢຍລະມັນຂອງທີມລົດຟາລາຣີຊິງໄດ້ແຊມປຽນໃນງານແຂ່ງຂັນນັດນີ້.
|
