|
ປີນີ້ແມ່ນທ່ານເຈິ້ງເຮີ ນັກເດີນທະເລຜູ່ຍິ່ງໃຫຍ່ໃນລາຊະວົງມິງຈີນເດີນມະຫາສະຫມຸດຄົບຮອບ 600 ປີ
ໃນຕົ້ນສະຕະວັດທີ 15 ຈີນໄດ້ເຂົ້າສູ່ໄລຍະສະຫງ່າລາສີທີ່ບໍ່ເຄີຍມີມາກ່ອນໃນປະຫວັດການເດີນທະເລ ທ່ານເຈີ້ງເຮີໄດ້ຂີ່ເຮືອປະເສີດທີ່ໃຫຍ່ກວ່າຫມູ່ໃນໂລກ ເດີນມະຫາສະຫມຸດຢ່າງອຶກຄະທຶກຄຶກໂຄມ ຜ່ານການເຄື່ອນໄຫວດັ່ງກ່າວ ຈີນກັບບັນດາປະເທດອາຊີອາຄະເນໄດ້ສ້າງການພົວພັນທາງການເມືອງ ການຕ່າງປະເທດແລະການຄ້າຢ່າງແຫນ້ນແຟ້ນ ການແລກປ່ຽນດ້ານວັດທະນະທຳລະຫວ່າງສອງຝ່າຍບໍ່ເສົ້າສູນເປັນເວລາຍາວນານ ຫຼັງຈາກເຈົ້າຊີວິດມິງເສີນຈູສະຫວັນລະຄົດແລ້ວ ສະພາບການໄດ້ມີການປ່ຽນແປງຢ່າງໃຫຍ່ຫຼວງ ການເຄື່ອນໄຫວເດີນມະຫາສະຫມຸດໄດ້ຖືກຕິຕຽນເປັນການຟຸມເຟືອຍກຳລັງແຫ່ງຊາດ ການເດີນທະເລຂອງຈີນໄດ້ຫຼຸດຕ່ຳລົງຢ່າງວ່ອງໄວ
ທ່ານເຈິ້ງເຮີແມ່ນຂັນທີຜູ່ໃກ້ຊິດແລະໄດ້ຮັບຄວາມໄວ້ເນື້ອເຊື່ອໃຈຈາກເຈົ້າຊີວິດມິງເສີງຈູ ໃນຍາມຍັງນ້ອຍ ທ່ານໄດ້ເປັນຊະເລີຍເສິກຂອງລາຊະວົງມິງ ຖືກຄົນສົ່ງເຂົ້າພະລາຊະວັງແລ້ວກາຍເປັນຂັນທີ ຍ້ອນທ່ານເປັນຄົນສະຫຼາດຫຼັກແຫຼມ ໄດ້ຮັບຄວາມໄວ້ວາງໃຈຈາກເຈົ້າຊີວິດ ຫຼັງຈາກເຈົ້າຊີວິດມິງເສີງຈູໄດ້ຂຶ້ນສະເຫວີຍລາຊະສົມບັດແລ້ວ ໄດ້ແຕ່ງທ່ານຈ່ຽງບິນຊິງແລະທ່ານວາງຊູເປັນຕົ້ນໄປປະກາດພະລາຊະໂອງການກ່ຽວກັບເຫດການການເມືອງອັນສຳຄັນຢູ່ແຖບອາຊີອາຄະເນ ຫວັງໃຫ້ເພີ່ມທະວີການຕິດຕໍ່ພົວພັນກັບປະເທດເຫຼົ່ານີ້ ກໍສວຍໂອກາດນີ້ມາອວດອ້າງອຳນາດແລະຊື່ສຽງຂອງປະເທດຈັກກະພັດມິງ ຫຼັງຈາກນັ້ນ ເຈົ້າຊີວິດມິງເສີງຈູຊົງແຕ່ງທ່ານເຈິງເຮີເປັນທູຕານຸທູດ ເລີ່ມດຳເນີນການເຄື່ອນໄຫວເທິງທະເລຢ່າງຂະຫນາດໃຫຍ່ຕໍ່ເນື່ອງກັນເຊິ່ງລວມມີ 7 ເທື່ອ ເຊິ່ງໄດ້ຍືດເຍືອມາເປັນເວລາ 28 ປີ ຍ້ອນເຂດການເຄື່ອນໄຫວເທື່ອນີ້ຕົ້ນຕໍແມ່ນຢູ່ເຂດທະເລທີ່ຫ່າງຈາກເກາະກາລີມັນດານໃນຊູ່ມື້ນີ້ໄປທາງທິດຕາເວັນຕົກ ຊື່ເກົ່າແມ່ນທະເລຕາເວັນຕົກ ດ້ວຍເຫດນີ້ ການເຄື່ອນໄຫວເດີນທະເລຕາເວັນຕົກຄືມະຫາສະຫມຸດອິນເດຍໃນຊູ່ມື້ນີ້
ໃນສະໄຫມຢົງເລີ້ປີ 3 ຄືປີ 1405 ທ່ານເຈິ້ງເຮີໄດ້ເດີນມະຫາສະຫມຸດຕາມພະລາຊະໂອງການຂອງເຈົ້າຊີວິດມິງເສີງຈູເປັນຄັ້ງທຳອິດ ໃນການເດີນທະເລຂອງທ່ານເຈິ້ງເຮີເທື່ອນີ້ມີທະຫານທັງຫມົດ 2 ຫມື່ນ 7 ພັນ 800 ກວ່າຄົນ ມີເຮືອແພນາວາ 208 ລຳ ໄດ້ອອກຈາກທ່າເຮືອລິວເຈ່ຍເມືອງທ້າຍຊັ່ງ ຜ່ານເມືອງຊາງເລີ້ແຂວງຟູຈ້ຽນ ບ່ອນທຳອີດໄດ້ໄປຮອດນະຄອນຫຼວງລັດຈ້ານເສີງ ບ່ອນເດີນທະເລເປັນລຳດັບຂອງທ່ານແມ່ນຊູລູມາເກາະຈາວາ ທ່າກ່ຳປັ່ນເກົ່າພາກໃຕ້ຂອງເກາະຊູມັດຕຼາ ມານຊີ້ກາຢູ່ຝັ່ງຕາເວັນຕົກຂອງແຫຼມມາເລ ຢູ່ມານຊີ້ກາ ຂະບວນເຮືອໄດ້ພັກຜ່ອນປັບປຸງຊົ່ວຄາວ ຕັ້ງຄ້າຍທະຫານ ສ້າງສາງເພື່ອຮັກສາສິນຄ້າການຄ້າໄວ້ ແລ້ວເດີນທະເລໄປທິດຕາເວັນຕົກຕໍ່ໄປ ຮອດພູຊີລານ ແລ້ວອ້ອມແຫຼມອິນເດຍໄປຮອດທາງພາກເຫນືອກໍຄືເກີລານ ເຄີຈີ່ ຈຸດຫມາຍປາຍທາງແມ່ນກູລີ ຂະບວນເຮືອສ່ວນຫນຶ່ງຂອງທ່ານເຈິ້ງເຮີໄດ້ແບ່ງເປັນສອງກອງ ກອງຫນຶ່ງສືບຕໍ່ເດີນທະເລໄປທິດຕາເວັນຕົກສຽງເຫນືອ ຮອດອີຣານ ແລ້ວອ້ອມແຫຼມອາລັບເຂົ້າສູ່ທະເລແດງ ຈຸດຫມາຍປາງທາງແມ່ນເມືອງໄມກາ ແດນສັກກາລະບູຊາສາສະຫນາອິສລາມ ອີກກອງຫນຶ່ງໄດ້ເດີນທະເລໄປທິດຕາເວັນຕົກສຽງໃຕ້ ເດີນໄປຮອດຝັ່ງທະເລຕາເວັນອອກຂອງອາຟຼິກາໂດຍກົງ
ຂະບວນເຮືອຂອງທ່ານເຈິ້ງເຮີໄດ້ສ້າງການພົວພັນມິດຕະພາບກັບບັນດາປະເທດທີ່ເຮືອເດີນໄປຮອດ ແລະເຂົ້າຮ່ວມການຕໍ່ສູ້ທາງການເມືອງແລະລະບົບການຄ້າຂອງທ້ອງຖິ່ນ ປະເທດທີ່ຖວາຍບັນນາການແກ່ຈີນນັ້ນຍັງມີປະເທດຊູມັດຕຼາແລະປະເທດອາລູເປັນຕົ້ນ ພໍ່ຄ້າຢູ່ທະເລໃຕ້ໄດ້ຕິດຕາມທູຕານຸທູດຂອງປະເທດຕົນມາດຳເນີນການຄ້າຢູ່ຈີນເລື້ອຍໆ ສະນັ້ນ ວັດທະນະທຳຈີນໄດ້ມີຜົນສະທ້ອນແຖບອາຊີອາຄະເນ ໃນໄລຍະກາງແລະທ້າຍຂອງສະໄຫມ ລາຊະວົງມິງ ພໍ່ຄ້າຈີນກໍໄດ້ໄປທຸດລະກິດການຄ້າຢູ່ອາຊີອາຄະເນຢ່າງຄຶກຄັກທີ່ສຸດ ໂດຍສະເພາະແມ່ນແຖບແຂວງຟູຈ້ຽນແຄມທະເລຕາເວັນອອກສຽງໃຕ້ ມີຊາວຈີນບໍ່ຫນ້ອຍໄດ້ຍ້າຍໄປຢູ່ຕ່າງປະເທດ ເຖິງວ່າອາດຈະບໍ່ແມ່ນຜົນສະທ້ອນໂດຍກົງຍ້ອນທ່ານເຈິ້ງເຮີເດີນມະຫາສະຫມຸດກໍຕາມ ແຕ່ຍັງມີສ່ວນທີ່ກ່ຽວຂ້ອງຢ່າງຫຼວງຫຼາຍກັບກະແສຟອງແຫ່ງການໄຂປະຕູທີ່ເນື່ອງຈາກເຈິ້ງເຮີເດີນມະຫາສະຫມຸດອິນເດຍ
ທ່ານເຈິ້ງເຮີເດີນມະຫາສະຫມຸດໄດ້ຢັ້ງຢືນໃຫ້ເຫັນວ່າໃນສະຕະວັດທີ 15 ໃນຄາວນັ້ນ ຈີນມີວິທະຍາສາດເຕັກນິກເດີນທະເລແລະເຕັກນິກຕໍ່ ເຮືອທີ່ນຳຫນ້າໃນໂລກ ກ່ອນກວ່າການຄົ້ນພົບພູມສາດເອີລົບຫນຶ່ງສະຕະວັດ ໄດ້ຢູ່ໃນໄລຍະາດຽວກັນກັບການບຸກເບີກທາງເດີນເຮືອເສັ້ນໃຫມ່ຂອງໂລກໃນຂັ້ນພື້ນຖານ
ປີ 2005 ແມ່ນທ່ານເຈິ້ງເຮີ ນັກເດີນທະເລຜູ່ຍິ່ງໃຫຍ່ຂອງ ຈີນເດີນມະຫາສະຫມຸດຄົບຮອບ 600 ປີ ທ່ານເຈິ້ງເຮີເດີນມະຫາສະຫມຸດແມ່ນການເດີນທະເລກ່ອນຫມູ່ໃນໂລກ ຫຼັງຈາກນັ້ນ 87 ປີແລ້ວ ຈຶ່ງມີທ່ານໂກລົມບຸສໄດ້ປະກົດເຫັນແຜ່ນດິນໃຫຍ່ ຫຼັງຈາກນັ້ນ 93 ປີ ຈຶ່ງມີທ່ານດາກາມາປະກົດເຫັນທາງເດີນເຮືອເສັ້ນໃຫມ່ ຫຼັງຈາກນັ້ນ 116 ປີ ຈຶ່ງມີຂະບວນເຮືອຂອງທ່ານມາເຈແລນອອກຈາກທ່າກ່ຳປັ່ນໄປເດີນທະເລ ຈິດໃຈຊາດທີ່ຍິ່ງໃຫຍ່ຂອງທ່ານເຈິ້ງເຮີທີ່ບໍ່ຢ້ານທຸລະ ກັນດານ ເຜີຍແຜ່ມິດຕະພາບສາມັກຄີເຂົ້າກັນແລະເປັນເອກະພາບກັນ ໄດ້ປະກອບສ່ວນອັນສຳຄັນໃຫ້ແກ່ອາລິຍະທຳຂອງມວນມະນຸດ
|
