|
|
 |
| (GMT+08:00)
2005-06-30 15:30:19
|
 |
|
ປ່ຽນຂອງເສດເປັນຂອງດີ
cri
Author: li
 ຂີ້ເຫຍື້ອອາຫານໝາຍຖິງອາຫານເສດເຫຼືອທີ່ເກີດຂຶ້ນໃນການທຸລະກິດຂອງວິສາຫະກິດກິນດື່ມ,ຍ້ອນວ່າຂີ້ເຫຍື້ອຊະນິດນີ້ມີຈຸດພິເສດຕ່າງໆເຊັ່ນມີນ້ຳມັນຫຼາຍ ເປື່ອຍເນົ່າປ່ຽນທາດງ່າຍເປັນຕົ້ນ,ສະນັ້ນຊຳລະຍາກຫຼາຍ. ເພື່ອແກ້ໄຂບັນຫາດັ່ງກ່າວ,ຫວ່າງມໍ່ໆນີ້ ພະນັກງານວິທະຍາສາດເຕັກນິກຂອງຈີນໄດ້ນຳໃຊ້ເຕັກນິກຈຸນລະຊີບຍຸກປັດຈຸບັນ ສ້າງສະຖານີຊຳລະຂີ້ເຫຍື້ອອາຫານແຫ່ງທຳອິດຂອງຈີນຢູ່ທີ່ປັກກິ່ງ. ສະຖານີຊຳລະດັ່ງກ່າວສາມາດປ່ຽນຂີ້ເຫຍື້ອອາຫານເປັນວັດຖຸດິບທີ່ດີສຳລັບຜະລິດຝຸ່ນອິນຊີ.
ຢູ່ຈີນ ຂີ້ເຫຍື້ອອາຫານກວມເຄິ່ງໜຶ່ງຂອງຂີ້ເຫຍື້ອດຳລົງຊີວິດໃນຕົວເມືອງ. ໃນເວລາດົນນານມານີ້,ຂີ້ເຫຍື້ອອາຫານຕົ້ນຕໍແມ່ນເອົາມາໃຊ້ເປັນຫົວອາຫານຂອງໝູ,ແຕ່ຍ້ອນວ່າໃນນັ້ນອາດຈະມີເຊື້ອພະຍາດຫຼາຍຊະນິດ,ແລ້ວຂົ່ມຂູ່ຄວາມປອດໄພຂອງອາຫານຢ່າງໜັກໜ່ວງ. ນອກນີ້ ກອງຂີ້ເຫຍື້ອເປັນເວລາດົນນານ,ກໍຈະເກີດມີຍຸງ,ແມງວັນແລະເຊື້ອພະຍາດ,ກະທົບກະເທືອນເຖິງສິ່ງແວດລ້ອມຕົວເມືອງ.
ຄຽງຄູ່ກັບການຂະຫຍາຍຕົວຂອງເຕັກນິກຈຸນລະຊີບຍຸກປັດຈຸບັນ,ພະນັກງານຄົ້ນຄວ້າວິທະຍາສາດຂອງຈີນໄດ້ຊອກພົບວິທີແກ້ໄຂບັນຫາຂອງຂີ້ເຫຍື້ອອາຫານທີ່ລົບກວນຕົວເມືອງຈີນມາຫຼາຍປີ. ປັດຈຸບັນ ຢູ່ຖະໜົນຊ້າງຕີ້ເຂດໄຫຕ້ຽນ ພາກຕາເວັນຕົກສຽງເໜືອຂອງນະຄອນປັກກິ່ງ,ໄດ້ສ້າງສະຖານີຊຳລະຂີ້ເຫຍື້ອອາຫານແຫ່ງທຳອິດຂອງຈີນ. ສະຖານີດັ່ງກ່າວສາມາດຊຳລະຂີ້ເຫຍື້ອອາຫານ 1,2 ໂຕນຕໍ່ມື້,ສາມາດຊຳລະຂີ້ເຫຍື້ອອາຫານທີ່ເກີດຂຶ້ນຈາກພັດຕາຄານຂະໜາດກາງຂະໜາດນ້ອຍ 27 ແຫ່ງໃນເຂດຄຸ້ມຊ້າງຕີ້ໃນແຕ່ລະມື້.
ບໍລິສັດວິທະຍາສາດຊີວະຊາດເຈຍໂປເວີນປັກກິ່ງຈຳກັດແມ່ນອົງການທີ່ຄົ້ນຄວ້າຜະລິດເຕັກນິກຊຳລະຂີ້ເຫຍື້ອອາຫານ. ທ່ານເຊ້ຍຢູຊຽວ ວິສະວະກອນໃຫຍ່ຂອງບໍລິສັດດັ່ງກ່າວແນະນຳວ່າ,ສະຖານີຊຳລະແມ່ນນຳໃຊ້ເຊື້ອທຳມະຊາດຊະນິດໜຶ່ງທີ່ເອີ້ນວ່າເຊື້ອອາມາແຍກທາດຂີ້ເຫຍື້ອອາຫານ. ທ່ານເວົ້າວ່າ:
"ເຊື້ອເດີມຂອງເຊື້ອຊະນິດນີ້ແມ່ນພວກເຮົາຊອກພົບໃນພູແຂວງເຊສວນ,ມາຈາກທຳມະຊາດລ້ວນໆ. ມັນແມ່ນເຊື້ອປະສົມ,ຢູ່ໃນນັ້ນມີເຊື້ອຫຼາຍສິບຊະນິດ. ໃຕ້ອຸນຫະພູມແລະຄວາມຊຸ່ມອັນແນ່ນອນ,ມັນກໍຈະແຍກທາດແລະໝັກອາຫານ,ໃຫ້ກາຍເປັນຝູງຈຸນລະຊີບຊະນິດໃໝ່."
ນັກຂ່າວໄດ້ເຫັນວ່າ,ຢູ່ໃນສະຖານີຊຳລະມີເຕົາຊຳລະຈຸນລະຊີບທີ່ມີຄວາມໄວສູງແລະອຸນຫະພູມສູງ 6 ໜ່ວຍ,ເຕົາແຕ່ລະໜ່ວຍລ້ວນແຕ່ແມ່ນຄວບຄຸມໂດຍຄອມພິວເຕີຢ່າງອັດຕະໂນມັດ,ສາມາດປັບອຸນຫະພູມແລະຄວາມຊຸ່ມຢູ່ໃນເຕົາ. ຂີ້ເຫຍື້ອອາຫານເປັນຖັງເປັນຖັງທີ່ມີຊັ້ນນ້ຳມັນໜາຟູຢູ່ໄດ້ຖືກເທເຂົ້າໃນເຕົາ,ຫຼັງຈາກນັ້ນ ພວກກຳມະກອນກໍຈະເທເຊື້ອອາແລະຮຳຈຳນວນໜຶ່ງເຂົ້າໃນເຕົາຕາມມາດຕາສ່ວນ. ທ່ານຫຼີເວີນລົງ ພະນັກງານຂອງສະຖານີດັ່ງກ່າວອະທິບາຍໃຫ້ນັກຂ່າວຊາບວ່າ:
"ພວກເຮົາກຽມຮຳໄວ້ຮຽບຮ້ອຍກ່ອນ,ແລ້ວເອົາເຊື້ອອາໃສ່ໃນຮຳ,ແລ້ວເອົາຮຳໄວ້ຢູ່ໃນລິບຂຶ້ນລົງ,ເທເຂົ້າໄປໃນເຕົາ. ຫຼັງຈາກນັ້ນກໍກົດປຸ່ມ,ເພີ່ມອຸນຫະພູມ,ຄົນ,ໝັກເຊື້ອເປັນເວລາ 4 ຊົ່ວໂມງເຄິ່ງຮອດ 5 ຊົ່ວໂມງ,ແລ້ວຈຶ່ງອົບແຫ້ງ,ຫຼັງຈາກນັ້ນ ຝູງເຊື້ອຈຸນລະຊີບໃໝ່ກໍຜະລິດໄດ້ແລ້ວ."
ທ່ານເວົ້າວ່າ,ເຊື້ອອາຈະແຜ່ພັນເລື້ອຍໆໃຕ້ສິ່ງແວດລ້ອມອັນເໝາະສົມ,ໃນເວລາແຜ່ພັນນັ້ນ ກໍໄດ້ກິນຂີ້ເຫຍື້ອອາຫານ. ຢູ່ກ້ອງເຕົາ,ນັກຂ່າວໄດ້ເຫັນ ຝູງເຊື້ອຈຸນລະຊີບທີ່ມີອິນຊີແບບຝຸ່ນແຫ້ງສີຄຳແລະມີກິ່ນຫອມນ້ຳມັນກອງໃຫຍ່ອອກຈາກປາກເຕົາ,ມັນແມ່ນວັດຖຸດິບທີ່ດີສຳລັບຜະລິດຝຸ່ນອິນຊີ.
ຕາມແນະນຳວ່າ,ເມື່ອໃສ່ຈຸນລະສານຈຳນວນໜຶ່ງເຂົ້າໃນຝູງເຊື້ອຈຸນລະຊີບທີ່ມີອິນຊີຊະນິດນີ້ ກໍຈະເກີດເປັນຝຸ່ນອິນຊີທີ່ມີປະສິດທິພາບສູງຊະນິດໜຶ່ງ. ທ່ານລູ້ເຮີ ຮອງຜູ້ກວດກາໃຫຍ່ເຕັກນິກຝຸ່ນຂອງບໍລິສັດວິທະຍາສາດຊີວະຊາດເຈຍໂປເວີນປັກກິ່ງຈຳກັດກ່າວວ່າ,ຍ້ອນວ່າໃນຂະນະທີ່ຝູງເຊື້ອຈຸນລະຊີບທີ່ມີອິນຊີດູດຮັບຂີ້ເຫຍື້ອອາຫານນັ້ນ ກໍໄດ້ດູດຮັບເອົາພະລັງງານຫຼາຍທີ່ສຸດ,ສະນັ້ນ ຝຸ່ນອິນຊີຊີວະຊາດທີ່ຜະລິດດ້ວຍເຊື້ອຊະນິດນີ້ຈຶ່ງມີບົດບາດຊຸກຍູ້ການເຕີບໃຫຍ່ຂອງພືດແລະເພີ່ມພູມຕ້ານທານພະຍາດຂອງມັນ.
"ເມື່ອຝູງເຊື້ອຈຸນລະຊີບທີ່ມີອິນຊີເຂົ້າໃນດິນແລ້ວ,ໃຕ້ອຸນຫະພູມທີ່ເໝາະສົມ,ມັນຈະແຜ່ພັນໄວສົມຄວນ. ຫຼັງຈາກແຜ່ພັນໃນດິນແລ້ວ,ມັນຈະຈໍ່ຕົວເປັນຝູງເຊື້ອທີ່ມີທ່າແຮງຊະນິດໜຶ່ງ. ຝູງເຊື້ອຊະນິດນີ້ເຕົ້າໂຮມຢູ່ຮາກຂອງພືດ,ກີດຂວາງບໍ່ໃຫ້ເຊື້ອພະຍາດເຂົ້າມາ,ເມື່ອເປັນແນວນີ້ ອັດຕາເປັນພະຍາດຂອງພືດກໍຈະຫຼຸດຕ່ຳລົງ. ນອກນີ້,ຫຼັງຈາກເຊື້ອຊະນິດນີ້ແຜ່ພັນຢູ່ຮາກຂອງພືດແລ້ວ,ສິ່ງແວດລ້ອມຂອງຮາກກໍຈະດີຂຶ້ນ,ພ້ອມກັນນັ້ນ ສິ່ງຂັບຖ່າຍຂອງຝູງເຊື້ອຊະນິດນີ້ກໍຈະກະຕຸກໃຫ້ພືດເກີດຮາກ,ເຮັດໃຫ້ລະບົບຮາກດົກໜາ. ລະບົບຮາກເຕີບໃຫຍ່ເປັນຢ່າງດີຈະມີຜົນດີຕໍ່ການເຕີບໃຫຍ່ຂອງພາກສ່ວນເທິງດິນຂອງພືດ,ສະນັ້ນ ພືດກໍຈະເຕີບໃຫຍ່ຂຶ້ນຢ່າງຈະເລີນງອກງາມ."
ຜົນການທົດລອງສະແດງໃຫ້ເຫັນວ່າ,ໃຊ້ຝຸ່ນອິນຊີຊີວະຊາດທີ່ມີປະສິດທິພາບສູງຊະນິດນີ້ສາມາດເຮັດໃຫ້ຜົນຜະລິດສະຕໍເປີລີຍົກສູງຂຶ້ນເກືອບ 30%,ເຮັດໃຫ້ຜົນຜະລິດໝາກຈອງເພີ່ມຂຶ້ນ 3 ໂຕນຕໍ່ເຮັກຕາ. ໃນຂະນະທີ່ຜົນຜະລິດເພີ່ມຂຶ້ນນັ້ນ ນ້ຳຕານໃນໝາກໄມ້ເຫຼົ່ານີ້ກໍ່ສູງຂຶ້ນຢ່າງເດັ່ນຊັດ. ໃນຂະນະທີ່ປ່ຽນຂອງເສດເປັນຂອງດີນັ້ນ ເຕັກນິກຊຳລະຂີ້ເຫຍື້ອອາຫານກໍໄດ້ແກ້ໄຂບັນຫາອະນາໄມຂອງຂະແໜງການກິນດື່ມທີ່ມີຢູ່ເປັນເວລາຍາວນານ.
ຕາມຊາບວ່າ,ປັດຈຸບັນ ເຕັກນິກຊຳລະຂີ້ເຫຍື້ອອາຫານດ້ວຍຊີວະຊາດມີອະນາຄົດນຳໃຊ້ເປັນຢ່າງດີ. ຕົວຢ່າງຄື,ເພື່ອປົວແປງສິ່ງແວດລ້ອມຂອງຕົວເມືອງໃຫ້ດີຂຶ້ນຕື່ມອີກ,ຕ້ອນຮັບງານກິລາໂອລິມປິກປີ 2008 ອົງການປົກຄອງນະຄອນປັກກິ່ງຈະເຜີຍແຜ່ເຕັກນິກດັ່ງກ່າວເປັນກ້າວໆ,ແລະກຽມບັນລຸການຊຳລະຂີ້ເຫຍື້ອອາຫານໃຫ້ກາຍເປັນຊັບພະຍາກອນໃນທົ່ວນະຄອນກ່ອນປີ 2008. ນອກນີ້ ຕົວເມືອງໃຫຍ່ຈຳນວນໜຶ່ງຂອງຈີນເຊັ່ນຊຽງໄຮ້ແລະອຸຮ້ານເປັນຕົ້ນກໍຈະໃຊ້ເຕັກນິກດັ່ງກ່າວສ້າງຕັ້ງສະຖານີຊຳລະຂີ້ເຫຍື້ອອາຫານ.
|
|
|
