|
ຕາຊາຍຈະພາໃຫ້ເປັນພະຍາດຫຼາຍຊະນິດ
cri
Author: li
 ຕາຊາຍແມ່ພະຍາດຊຳເຮື້ອແລະຕິດແປດທີ່ເຮັດໃຫ້ເຍື່ອໄນຕາແລະເຍື່ອແກ້ວຕາອັກເສບ. ຍ້ອນວ່າຕາຊາຍເປັນເມັດຊາໆຢູ່ຕາມຮິມຕາຄືເມັດຂີ້ຊາຍ,ຈຶ່ງເອີ້ນຕາຊາຍ.
ໄລຍະຟັກຕົວຂອງພະຍາດຕາຊາຍປະມານ 2 ມື້ຮອດ 5 ມື້,ທຳມະດາແລ້ວ,ມັກຈະເປັນທັງຕາສອງເບື້ອງ,ຄົນເຈັບຈະຮູ້ສຶກເຄືອງຕາ,ຢ້ານແສງ,ນ້ຳຕາໄຫຼ,ມີນ້ຳໜຽວໄຫຼອອກຫຼືມີສິ່ງຄ້າຍຄືນ້ຳໜຽວຊຶມອອກເລື້ອຍໆ. ບ່ອນອັກເສບຂອງຕາຊາຍແມ່ນຢູ່ຕາມຮິມເຍື່ອໄນຕາ,ທຳອິດຈະມີເມັດມົນສີຂາວນ້ອຍໆ,ເສັ້ນຜ່າກາງ 0,2 ຮອດ 2 ມີລີແມັດ. ບາງເທື່ອຈະມີຈຸດແດງໆ. ໃນເວລາອາການອັກເສບໜັກໜ່ວງ,ຍ້ອນວ່າເຍື່ອໄນຕາບວມແລະໜາຂຶ້ນ,ເຮັດໃຫ້ສາຍເລືອດມົວ,ຖ້າໜັກໜ່ວງກວ່ານັ້ນຈະໄປທຳລາຍເຍື່ອແກ້ວຕາ,ແລ້ວຈະເຮັດໃຫ້ເປັນຕາລໍ. ຫຼັງຈາກຫຼາຍສັບປະດາແລ້ວ,ອາການຕາແດງ,ຕາບວມ,ເຄືອງຕາແລະເປັນເມັດຂາວຈະຫາຍໄປ,ແລ້ວເຂົ້າສູ່ໄລຍະຊຳເຮື້ອ,ເວລານີ້ຈະຮູ້ສຶກຄືວ່າດີໆ,ບໍ່ເປັນຫຍັງ,ພຽງແຕ່ຮູ້ສຶກວ່າຕາເມື່ອຍງ່າຍ. ຖ້າປົວໃຫ້ຫາຍຫຼືຫາຍເອງໃນເວລານີ້,ຈະບໍ່ເປັນແຜ. ພະຍາດຕາຊາຍອາດຈະເປັນຫຼາຍປີຈົນຮອດຫຼາຍສິບປີ,ສະນັ້ນ ຫຼາຍຄົນຈຶ່ງບໍ່ເອົາຫົວຊານຳ.
ແຕ່ການຕິດພະຍາດຕາຊາຍຊ້ຳກັນຫຼາຍເທື່ອຈະເຮັດໃຫ້ເຍື່ອໄນຕາເປັນແປ້ວໜັກໜ່ວງ,ເຮັດໃຫ້ຂົນຕາສັກເຂົ້າທາງໃນ. ຂົນຕາຈະໄປແຍ່ຖືກແກ້ວຕາເລື້ອຍໆ,ເຮັດໃຫ້ແກ້ວຕາຂຸ້ນເຂົ້າ,ດົນແລ້ວກາຍເປັນແປ້ວສີຂາວ,ພາໃຫ້ສາຍຕາອ່ອນລົງ,ຈົນກະທັ້ງຕາບອດ.
ທ່ານນາງເອຍມາ ນັກຊີວະຊາດຂອງສະຖາບັນການຊ່າງແຫ່ງຊາດແມັກຊິກເຄີຍເວົ້າວ່າ,ທີ່ຈິງແລ້ວ,ແມ່ພະຍາດຕາຊາຍຍັງອາດຈະພາໃຫ້ເປັນພະຍາດອື່ນໆຫຼາຍຊະນິດເຊິ່ງລວມທັງລະບົບປັດສາວະແລະສືບພັນເປັນຕົ້ນ. ເມື່ອຄົນເຮົາຕິດພະຍາດຕາຊາຍແລ້ວ,ຈະມີພູມຕ້ານທານເປັນເວລາສັ້ນແລະບໍ່ແຂງແຮງປານໃດ,ສະນັ້ນ ຜູ້ເປັນຕາຊາຍຈຶ່ງມັກເປັນຄືນຊ້ຳກັນຫຼາຍເທື່ອ. ນາງໄດ້ເອົາເຍື່ອໄນຕາມາຄົ້ນຄວ້າແລ້ວເຫັນວ່າ,ອັດຕາເຊື້ອພະຍາດຕາຊາຍເປັນໝາຍບວກສູງຫຼາຍ,ຖ້າປົວບໍ່ທັນແລະບໍ່ເໝາະສົມ,ກໍຈະເຮັດໃຫ້ຕາບອດ. ທ່ານນາງເອຍມາຍັງເວົ້າວ່າ,ຜູ້ເປັນພະຍາດຕາຊາຍສ່ວນຫຼາຍແມ່ນຊາວໜຸ່ມ,ມັນອາດຈະພາໃຫ້ເປັນພະຍາດທໍ່ປັດສາວະອັກເສບກະທັນຫັນ. ຖ້າເພດຍິງຕິດເຊື້ອພະຍາດຕາຊາຍ,ຈະພາໃຫ້ປາກມົດລູກອັກເສບ,ຊ່ອງຄອດອັກເສບ,ທໍ່ປັດສາວະອັກເສບ,ຈົນກະທັ້ງພາໃຫ້ທໍ່ສົ່ງໄຂ່ອັກເສບລັກສະນະກະທັນຫັນຫຼືຊຳເຮື້ອແລະໂບກກະດູກງ່າມຂາອັກເສບເປັນຕົ້ນ. ຖ້າແມ່ມານຕິດເຊື້ອພະຍາດຕາຊາຍ,ໃນເວລາຄອດລູກນັ້ນ ຕາຂອງລູກມັກຈະຕິດເຊື້ອພະຍາດຕາໃນເວລາຜ່ານຊ່ອງຄອດ,ພາໃຫ້ເດັກແດງເຈັບຕາແລະເປັນປອດອັກເສບຍ້ອນແມ່ພະຍາດຕາຊາຍ.
ຈາກນີ້ກໍເຫັນໄດ້ວ່າ,ພະຍາດຕາຊາຍແມ່ນພະຍາດທີ່ປະໝາດບໍ່ໄດ້. ຖ້າເປັນແລ້ວຕ້ອງປິ່ນປົວໂດຍໄວ,ເພື່ອບໍ່ໃຫ້ເປັນພະຍາດແນວອື່ນ.
|
|
