|
|
 |
| (GMT+08:00)
2005-06-30 17:51:11
|
 |
|
ການພົວພັນຈີນຣັດເຊຍໄດ້ຂະຫຍາຍຕົວຢ່າງໜັກແໜ້ນ
cri
Author: mo
ໃນຫລາຍປີມານີ້, ການພົວພັນຈີນຣັດເຊຍໄດ້ຮັກສາທ່ວງທ່າຂະຫຍາຍຕົວອັນດີງາມ, ຄວາມໄວ້ເນື້ອເຊື່ອໃຈດ້ານການເມືອງເຊິ່ງກັນແລະກັນໄດ້ເພີ່ມຂຶ້ນຢ່າງບໍ່ຢຸດຢັ້ງ, ການຮ່ວມມືໃນຂົງເຂດຕ່າງໆເຊັ່ນເສດຖະກິດການຄ້າໄດ້ຮັບໝາກຜົນອັນເດັ່ນຊັດ, ການພົວພັນຄູ່ຂາປະສານງານດ້ານຍຸດທະສາດສອງປະເທດໄດ້ກ້າວເຂົ້າສູ່ໄລຍະຂະຫຍາຍຕົວໃໝ່.
ປີນີ້, ການພົວພັນລະຫວ່າງສອງປະເທດໄດ້ຮັບຄວາມຄືບໜ້າທີ່ມີລັກສະນະທາດແທ້ໃນຫລາຍບັນຫາສຳຄັນ. ໜຶ່ງ, ຄະນະປະຈຳສະພາປະຊາຊົນແຫ່ງຊາດຈີນ ຄະນະກຳມະການສະຫະພັນຣັດເຊຍແລະສະພາດູມາແຫ່ງຊາດໄດ້ອະນຸມັດສັນຍາເພີ່ມເຕີມຂອງຊາຍແດນຈີນຣັດເຊຍຕອນຕາເວັນອອກ, ໄດ້ສຳເລັດລະບຽບການກົດໝາຍໃນການແກ້ໄຂບັນຫາຊາຍແດນຈີນຣັດເຊຍຢ່າງເຖິງຖອງ. ສອງ, ກົນໄກຫາລືຄວາມປອດໄພແຫ່ງຊາດໄດ້ເລີ່ມເຮັດວຽກ. ສາມ, ສອງຝ່າຍໄດ້ກ້າວເຖິງຂັ້ນເຊັນສັນຍາກ່ຽວກັບບັນຫາຕ່າງໆເຊັ່ນ: ເພີ່ມທະວີການຮ່ວມມືດ້ານພະລັງງານແລະການລົງທຶນລະຫວ່າງສອງປະເທດ.
ປັດຈຸບັນ, ການພົວພັນຈີນຣັດເຊຍພວມຢູ່ໃນໄລຍະດີທີ່ສຸດໃນປະຫວັດສາດ, ຕົ້ນຕໍສະແດງດັ່ງລຸ່ມນີ້: ກ່ອນອື່ນ, ຊັ້ນສູງຈີນຣັດເຊຍຢ້ຽມຢາມກັນຢ່າງເນື່ອງນິດ, ບຸກຄະລາກອນທຸກລະດັບໄດ້ເພີ່ມການຕິດຕໍ່ພົວພັນແລະແລກປ່ຽນກັນຢ່າງບໍ່ຢຸດຢັ້ງ. ປີ 2001, ທ່ານປະທານຈຽງເຈີມີນກັບທ່ານປະທານາທິບໍດີປູຕິນໄດ້ເຊັນສົນທິສັນຍາໄມຕິຈິດຖານບ້ານໃກ້ເຮືອນຄຽງແລະຮ່ວມມືຈີນຣັດເຊຍ. ປີ 2003, ທ່ານປະທານຫູຈີນທາວຢ້ຽມຢາມຣັດເຊຍ, ທ່ານກັບປະທານາທິບໍດີປູຕິນໄດ້ເຊັນ"ຖະແຫລງການຮ່ວມຈີນຣັດເຊຍ". ວັນທີ 8 ຫາວັນທີ 9 ພຶດສະພາປີນີ້, ໂດຍຕອບສະໜອງຄຳເຊີນຂອງທ່ານປະທານາທິບໍດີປູຕິນ, ທ່ານປະທານຫູຈິນທາວໄດ້ເຂົ້າຮ່ວມພິທີຣັດເຊຍສະຫລອງສົງຄາມປ້ອງກັນຊາດໄດ້ຮັບໄຊຊະນະຄົບຮອບ 60 ປີ, ປະມຸກລັດສອງປະເທດໄດ້ກ້າວເຖິງຂັ້ນມີຄວາມຮັບຮູ້ຄືກັນຢ່າງກວ້າງຂວາງກ່ຽວກັບການພົວພັນສອງຕໍ່ສອງແລະບັນຫາສາກົນແລະພາກພື້ນທີ່ຮີບດ່ວນໃນສະເພາະໜ້າ.
ສອງ, ຄວາມໄວເນື້ອເຊື່ອໃຈດ້ານການເມືອງລະຫວ່າງສອງປະເທດໄດ້ລົງສູ່ລວງເລິກຢ່າງບໍ່ຢຸດຢັ້ງ. ຈີນຣັດເຊຍໄດ້ເອົາການຂະຫຍາຍການພົວພັນກັບຝ່າຍກົງກັນຂ້າມເປັນນະໂຍບາຍບູລິມະສິດດ້ານການຕ່າງປະເທດ. ໄດ້ສະໜັບສະໜູນເຊິ່ງກັນແລະກັນໃນບັນຫາທີ່ກ່ຽວພັນເຖິງອະທິປະໄຕແຫ່ງຊາດ ຜືດແຜ່ນດິນອັນຄົບຖ້ວນແລະຄວາມປອດໄພ. ຝ່າຍຣັດເຊຍໄດ້ເດັດດ່ຽວສະໜັບສະໜູນຫລັກໝັ້ນຂອງຝ່າຍຈີນຢ່າງສະເໝີຕົ້ນສະເໝີປາຍ.ໃນບັນຫາຕ່າງໆເຊັ່ນ: ໄຕ້ຫວັນ ຕິເບດແລະສິດທິມະນຸດເປັນຕົ້ນ, ຝ່າຍຈີນກໍເດັດດ່ຽວສະໜັບສະໜູນຝ່າຍຣັດເຊຍໂຈມຕີກຳລັງກໍ່ການຮ້າຍເຊເຊນ, ແລະປົກປັກຮັກສາຄວາມປອດໄພແລະສະຖຽນລະພາບຂອງຊາດ.
ສາມ, ການຮ່ວມມືລະຫວ່າງຈີນຣັດເຊຍໃນຂົງເຂດເສດຖະກິດການຄ້ານັບມື້ນັບເປີດກວ້າງ, ກາຍເປັນພື້ນຖານອັນສຳຄັນແລະກຳລັງຊຸກຍູ້ການຂະຫຍາຍການພົວພັນສອງປະເທດ. ປີ 2004, ຍອດມູນຄ່າການຄ້າຈີນຣັດເຊຍບັນລຸ 21 ຕື້ 230 ລ້ານໂດລາສະຫະລັດ. ແຕ່ເດືອນມັງກອນຫາເດືອນເມສາປີນີ້, ການຄ້າສອງຕໍ່ສອງໄດ້ປະກົດມີທ່ວງທ່າຂະຫຍາຍຕົວເປັນຢ່າງດີ, ມູນຄ່າການຄ້າບັນລຸ 7 ຕື້ 840 ລ້ານໂດລາສະຫະລັດ. ນອກນີ້, ໃນກອງປະຊຸມສົ່ງເສີມການລົງທຶນຈີນຣັດເຊຍຄັ້ງທີສອງທີ່ຈັດຂຶ້ນຢູ່ແຊງເປເຕີບວກໃນເດືອນມິຖຸນາປີນີ້, ສອງຝ່າຍໄດ້ເຊັ່ນສັນຍາລົງທຶນ 7 ສະບັບ, ຍອດມູນຄ່າ 1 ຕື້ 500 ລ້ານໂດລາສະຫະລັດ. ສອງຝ່າຍໄດ້ກ້າວເຖິງຂັ້ນມີຄວາມຮັບຮູ້ຄືກັນໃນດ້ານບູລະນະອົງປະກອບການລົງທຶນ ຊຸກຍູ້ໂຄງການຮ່ວມມືຂະໜາດໃຫຍ່, ແລະສ້າງວິທີຮ່ວມມືໃໝ່, ໂຄງການຮ່ວມມືທີ່ກ່ຽວຂ້ອງພວມຈັດຕັ້ງປະຕິບັດ.
ສີ່, ການໄປມາຫາສູ່ກັນລະຫວ່າງສອງກອງທັບໄດ້ເພີ່ມຂຶ້ນຢ່າງບໍ່ຢຸດຢັ້ງ. ໃນລະດູໃບໄມ້ຫຼົ່ນປີນີ້, ສອງປະເທດຈີນຣັດເຊຍຈະຈັດການຊ້ອນລົບຮ່ວມ. ນີ້ຈະແມ່ນການຊ້ອນລົບຂະໜາດໃຫຍ່ລະຫວ່າງສອງປະເທດຄັ້ງທຳອິດແຕ່ປີ 1958 ເປັນຕົ້ນມາ.
ໃນໄລຍະຢ້ຽມຢາມຣັດເຊຍເທື່ອນີ້, ປະມຸກລັດຂອງສອງປະເທດຈີນຣັດເຊຍຈະເຈາະຈົງຫາລືບັນຫາທີ່ເພີ່ມທະວີການຮ່ວມມືດ້ານຍຸດທະສາດແລະດ້ານຮູບປະທຳລະຫວ່ງສອງຝ່າຍ, ແລະຈະປະກາດເອກະສານການເມືອງທີ່ສ່ອງແສງໝາກຜົນການພົບປະແລະເຊັນເອກະສານຮ່ວມມືສອງຕໍ່ສອງຢ່າງເປັນລະບົບ. ບຸກຄົນທີ່ມິອິດທິພົນຂອງສອງປະເທດເຫັນວ່າ, ການພົບປະເທື່ອນີ້ຍ່ອມຈະກາຍເປັນຫລັກໝາຍທາງອັນສຳຄັນທີ່ຊຸກຍູ້ການພົວພັນຄູ່ຂາປະສານງານຍຸດທະສາດຈີນຣັດເຊຍຂະຫຍາຍຕົວຕື່ມອີກແລະເພີ່ມແຖມເນື້ອໃນແຫ່ງການພົວພັນສອງປະເທດໃຫ້ຫລາຍຂຶ້ນ.
|
|
|
