|
ຕາມຂ່າວCRI: ວັນທີ 2 ກໍລະກົດນີ້ ຢູ່ເມືອງເວິຍໄຫ ທາງພາກຕາເວັນອອກຂອງຈີນ, ທ່ານຈ່າງເຢຊຸຍ ຮອງລັດຖະມົນຕີການຕ່າງປະເທດຈີນກ່າວວ່າ, ຈີນຈະສຸມກຳລັງດຳເນີນການຮ່ວມມືທີ່ຕ່າງຝ່າຍຕ່າງມີຜົນປະໂຫຍດກັບບັນດາປະເທດອາຊີຕາເວັນອອກຢ່າງຮອບດ້ານ.
ທ່ານຈ່າງເຢຊຸຍຊີ້ອອກວ່າ, ບັນດາປະເທດອາຊີຕາເວັນອອກຄວນເພີ່ມທະວີການແລກປ່ຽນແລະຮ່ວມມືໃນຂົງເຂດຕ່າງໆ, ເຂົ້າໃຈກັນໃຫ້ຫຼາຍຂຶ້ນຕື່ມອີກ, ສ້າງເງື່ອນໄຂແລະບັນຍາກາດອັນດີງາມໃຫ້ແກ່ການຮ່ວມມືລະຫວ່າງຊາດ; ພ້ອມກັນນັ້ນ ກໍເລັ່ງລັດຊຸກຍູ້ການສ້າງເຂດການຄ້າເສລີແບບສອງຝ່າຍແລະຫຼາຍຝ່າຍລະຫວ່າງປະເທດອາຊີຕາເວັນອອກ, ສ້າງພື້ນຖານໃຫ້ເຂດການຄ້າເສລີອາຊີຕາເວັນອອກ; ນຳໃຊ້ຄັງສຳຮອງເງິນຕາຕ່າງປະເທດແລະທຶນກ້ອນໃຫຍ່ຂອງອາຊີຕາເວັນອອກຢ່າງເຕັມທີ່, ສ້າງອົງກອນລົງທຶນ ຕະຫຼາດພັນທະບັດ ແລະລະບົບການຮ່ວມມືດ້ານການເງິນທີ່ມີລັກສະນະເຂດແຄວ້ນ, ປົວແປງສະພາບແວດລ້ອມການລົງທຶນແລະລະດົມທຶນຂອງເຂດແຄວ້ນຕື່ມອີກ,ເພີ່ມຄວາມສາມາດຕ້ານທານຄວາມສ່ຽງທາງການເງິນຂອງປະເທດອາຊີຕາເວັນອອກ.
ທ່ານຈ່າງເຢຊຸຍກ່າວວ່າ, ຈີນສະໜັບສະໜູນອາຊຽນເສີມຂະຫຍາຍບົດບາດນຳທາງໃນຂະບວນການຮ່ວມມືອາຊີຕາເວັນອອກ.
|
