|
|
 |
| (GMT+08:00)
2005-07-05 16:08:06
|
 |
|
ລັດຖະບານແລະວົງການອຸດສາຫະກຳການຄ້າບັນດາປະເທດອະນຸພາກພື້ນແມ່ນ້ຳຂອງຈະພ້ອມກັນອອກແຮງຮ່ວມມືໃນພາກພື້ນ
cri
Author: li
ຕາມຂ່າວ CRI: ກອງປະຊຸມສົນທະນາລະຫວ່າງຜູ້ນຳກັບຜູ້ແທນວົງການອຸດສາຫະກຳການຄ້າຂອງອະນຸພາກພື້ນແມ່ນ້ຳຂອງໄດ້ໄຂຂຶ້ນຢູ່ຄຸນມິງ ເມືອງພາກຕາເວັນຕົກສຽງໃຕ້ຂອງຈີນ,ຜູ້ນຳ 6 ປະເທດຄືຈີນ,ກຳປູເຈຍ,ລາວ,ມຽນມາ,ໄທແລະຫວຽດນາມແລະຜູ້ວ່າການທະນາຄານພັດທະນາອາຊີພ້ອມດ້ວຍຜູ້ແທນວົງການອຸດສາຫະກຳການຄ້າຂອງບັນດາປະເທດອານຸພາກພື້ນ 300 ກວ່າຄົນໄດ້ເຂົ້າຮ່ວມກອງປະຊຸມສົນທະນາ. ຜູ້ນຳບັນດາປະທດເປັນເອກະສັນກັນກ່າວວ່າ,ລັດຖະບານປະເທດຕົນຈະອອກແຮງສຸດຂີດສ້າງສະພາບແວດລ້ອມທີ່ທ່ຽງທຳແລະສະດວກກວ່າເກົ່າເພື່ອການຮ່ວມມືເສດຖະກິດການຄ້າຂ້າມຊາດແລະການລົງທຶນຂອງຂະແໜງການເອກະຊົນຂອງອະນຸພາກພື້ນ.
ໃນກອງປະຊຸມສົນທະນາ,ທ່ານເວີນເຈຍປາວ ນາຍົກລັດຖະມົນຕີຈີນ,ທ່ານຮຸນແຮງ ນາຍົກລັດຖະມົນຕີກຳປູເຈຍ,ທ່ານບຸນຍັງ ວໍລະຈິດ ນາຍົກລັດຖະມົນຕີລາວ,ທ່ານໂຊວິນ ນາຍົກລັດຖະມົນຕີມຽນມາ,ທ່ານທັກສິນ ຊິນນະວັດ ນາຍົກລັດຖະມົນຕີໄທ,ທ່ານຟານວັນຂ້າຍ ນາຍົກລັດຖະມົນຕີຫວຽດນາມແລະທ່ານຄູໂຣດາ ຮາຣູຮີໂຄ ຜູ້ວ່າການທະນາຄານພັດທະນາອາຊີພ້ອມກັບຜູ້ແທນທີ່ຮ່ວມປະຊຸມໄດ້ແລກປ່ຽນຄວາມເຫັນກັນຢ່າງເຕັມສ່ວນແລະກົງໄປກົງມາກ່ຽວກັບບັນຫາຕ່າງໆເຊັ່ນເຮັດໃຫ້ການລົງທຶນການຄ້າສະດວກກວ່າເກົ່າ,ປົວແປງການກໍ່ສ້າງພື້ນຖານໂຄງລ່າງແລະການກໍ່ສ້າງລະບົບເຄືອຂ່າຍຂໍ້ມູນຂ່າວສານປັນຕົ້ນ. ທ່ານເວີນເຈຍປາວໄດ້ເປັນປະທານຈັດກອງປະຊຸມແລະກ່າວຄຳປາໄສ,ທ່ານເວົ້ວ່າ:
"ການເພີ່ມທະວີການພົວພັນລະຫວ່າງລັດຖະບານກັບວົງການອຸດສາຫະກຳການຄ້າມີຄວາມໝາຍສຳຄັນຕໍ່ການບັນລຸຄວາມຈະເລີນຮຸ່ງເຮືອງນຳກັນໃນອະນຸພາກພື້ນ. ພຶດຕິກຳພິສູດໃຫ້ເຫັນວ່າ,ຖ້າຢາກສ້າງອະນຸພາກພື້ນທີ່ມີກຳລັງແກ່ງແຍ່ງຫຼາຍກວ່າເກົ່າແລະກົມກຽວກັນຈະເລີນຮຸ່ງເຮືອງກວ່າເກົ່າໃນຂະບວນການໂລກາວິວັດ,ຕ່ອງໂສ້ອັນສຳຄັນກໍແມ່ນເພີ່ມະວີການຕິດຕໍ່ພົວພັນລະຫວ່າງລັດຖະບານກັບວົງການອຸດສາຫະກຳການຄ້າ,ສົ່ງເສີມແລະຊຸກຍູ້ໃຫ້ວົງການອຸດສາຫະກຳການຄ້າເຂົ້າຮ່ວມການຮ່ວມມືເສດຖະກິດຂອງອະນຸພາກພື້ນຢ່າງຕັ້ງໜ້າ."
ການກໍ່ສ້າງລະບົບເຄືອຂ່າຍຂໍ້ມູນຂ່າວສານແມ່ນຫົວຂໍ້ໜຶ່ງທີ່ສຳຄັນຂອງກອງປະຊຸມສົນທະນາເທື່ອນີ້. ໃນເວລາທ່ານເຈີນຫວຽດຮຸງ ຮອງຜູ້ຈັດການຂອງບໍລິສັດໂທລະຄົມດີຈີຕອນຫວຽດນາມທີ່ເຂົ້າຮ່ວມກອງປະຊຸມສົນທະນາໃນມື້ດຽວກັນໃຫ້ສຳພາດຕໍ່ນັກຂ່າວວິທະຍຸພວກເຮົານັ້ນທ່ານກ່າວວ່າ,
"ການສ້າງທາງດ່ວນຂໍ້ມູນຂ່າວສານຢູ່ອະນຸພາກພື້ນແມ່ນ້ຳຂອງຈະມີຜົນສະທ້ອນເລິກເຊິ່ງຍາວໄກຕໍ່ປະຊາຊົນ 6 ປະເທດ,ມີຜົນດີທີ່ຈະຊ່ອຍໃຫ້ບັນດາປະເທດພັດທະນາເສດຖະກິດນຳກັນ,ແລກປ່ຽນວັດທະນະທຳແລະຊ່ອຍເຫຼືອເຊິ່ງກັນແລະກັນ. ໃນດ້ານໂທລະຄົມ,ບາງບໍລິສັດຂອງຝ່າຍຈີນໄດ້ອອກແຮງຊ່ອຍເຫຼືອຫວຽດນາມໃນດ້ານສະໜັບສະໜູນທາງເຕັກນິກແລະຄ້ຳປະກັນທາງລະບົບ. ໃນດ້ານບຸກເບີກໂທລະຄົມ,ຈີນຫວຽດນາມໄດ້ດຳເນີນຫຼາຍໂຄງການຮ່ວມມືທີ່ໃຫຍ່ສົມຄວນ,ສອງປະເທດໃນການຮ່ວມມືໃນຂົງເຂດໂທລະຄົມສອງປະເທດມີກຳລັງບົ່ມຊ້ອນໃຫຍ່ຫຼາຍ."
ນອກນີ້ ການຮ່ວມມືໃນຂົງເຂດດັ້ງເດີມເຊັ່ນກະສິກຳເປັນຕົ້ນກໍແມ່ນບັນຫາສຳຄັນທີ່ຈະຫາລືກັນໃນກອງປະຊຸມສົນທະນາເທື່ອນີ້ລະຫວ່າງຜູ້ນຳແລະວົງການອຸດສາຫະກຳການຄ້າ. ໃນເວລາທ່ານກິດສະໜາ ວົງໄຊ ປະທານສະມາຄົມການຄ້າລາວໃຫ້ສຳພາດຕໍ່ນັກຂ່າວວິທະຍຸພວກເຮົານັ້ນ ທ່ານໄດ້ເນັ້ນໜັກເຖິງຄວາມສຳຄັນຂອງການເພີ່ມທະວີການຮ່ວມມືດ້ານກະສິກຳໃນອະນຸພາກພື້ນທີ່ມີຕໍ່ລາວ. ທ່ານເວົ້າວ່າ:
"ໃນດ້ານກະສິກຳ,ປັດຈຸບັນ ຈີນໄດ້ຫຼຸດຫຼືຍົກເວັ້ນພາສີຜົນຜະລິດ ກະສິກຳ 208 ຊະນິດແລ້ວ. ລັດຖະບານລາວພວມອອກແຮງເຊື້ອເຊີນນັກທຸລະກິດຈີນໄປຜະລິດແລະລົງທຶນດ້ານກະສິກຳຢູ່ລາວ,ເພື່ອໃຫ້ຜະລິດຕະພັນກະສິກຳເຫຼົ່ານີ້ຂາຍຢູ່ຈີນໄດ້,ແລະສາມາດສົ່ງໄປຂາຍຢູ່ປະເທດທີສາມ. ປັດຈຸບັນ,ນັກທຸລະກິດຈີນພວມພາກັນໄປລົງທຶນຢູ່ລາວຢ່າງຫ້າວຫັນ. ຂ້າພະເຈົ້າເຊື່ອວ່າ,ໃນອະນາຄົດທີ່ບໍ່ດົນນີ້,ຜະລິດຕະພັນກະສິກຳຂອງລາວຈະມີໂອກາດເຂົ້າສູ່ຕະຫຼາດຈີນຫຼາຍກວ່າເກົ່າ."
ຜູ້ແທນວົງການອຸດສາຫະກຳການຄ້າຂອງບັນດາປະເທດທີ່ຮ່ວມປະຊຸມຍັງໄດ້ສະເໜີຄວາມເຫັນແລະຂໍ້ສະເໜີທີ່ມີລັກສະນະສ້າງສັນຫຼາຍຢ່າງກ່ຽວກັບການເຮັດໃຫ້ລະບຽບການລົງທຶນການຄ້າຂ້າມຊາດງ່າຍກວ່າເກົ່າ,ຍົກລະດັບຄຸ້ມຄອງຂອງລັດຖະບານໃຫ້ສູງຂຶ້ນ,ຂ້ຽວເລັ່ງສ້າງທາງຜ່ານເສດຖະກິດເປັນຕົ້ນ. ຜູ້ນຳບັນດາປະເທດກໍກ່າວວ່າ,ຈະຕັ້ງໜ້າຄົ້ນຄວ້າຄວາມເຫັນແລະຂໍ້ສະເໜີເຫຼົ່ານີ້ ແລະຫັນປ່ຽນເປັນມາດຕະການການກະທຳຕົວຈິງ.
|
|
|
