|
ສະບາຍດີທ່ານຜູ້ຟັງທີ່ເຄົາລົບ, ໃນກອງປະຊຸມເວທີປາໄສວົງການອຸດສາຫະກຳການຄ້າເຂົ້າຮ່ວມການຮ່ວມມືອະນຸພາກພື້ນແມ່ນ້ຳຂອງທີ່ຈັດຂຶ້ນໃນວັນທີ 3 ກໍລະກົດ, ທ່ານກິດສະໜາ ວົງໄຊ ປະທານສະມາຄົມການຄ້າສປປລາວໄດ້ກ່າວປາຖະກະຖາທີ່ມີຫົວເລື່ອງວ່າ" ຖານະແລະບົດບາດຂອງພາກສ່ວນເອກະຊົນໃນການຮ່ວມມືເສດຖະກິດອະນຸພາກພື້ນແມ່ນ້ຳຂອງ", ຫລັງກອງປະຊຸມ, ທ່ານກິດສະໜາໄດ້ໃຫ້ສຳພາດຕໍ່ນັກຂ່າວວິທະຍຸCRIໂດຍສະເພາະ, ທ່ານກ່າວວ່າ, ພາກເອກະຊົນຈະປະໝາດບໍ່ໄດ້ໃນການຮ່ວມມືເສດຖະກິດGMS.ທ່ານເວົ້າວ່າ:
"ພາກເອກະຊົນມີບົດບາດສຳຄັນຫຼາຍຕໍ່ກັບຜົນສຳເລັດຂອງນະໂຍບາຍຂອງລັດຖະບານ6ປະເທດໃນອະນຸພາກພື້ນແມ່ນ້ຳຂອງ.GMS BF ໝາຍຄວາມວ່າພາກເອກະຊົນໄດ້ຮ່ວມໂຕກັນສ້າງຕັ້ງ. GMS BFເຊິ່ງມາຈາກສະພາການຄ້າຂອງ6ປະເທດໃນລຸ່ມແມ່ນ້ຳຂອງນີ້.ພາກເອກະຊົນຈີນນີ້ແມ່ນມົນທົນຢຸນນານໄດ້ເຂົ້າຮ່ວມ,ເຊິ່ງສະພາດັ່ງກ່າວນັ້ນໄດ້ມາຕັ້ງແຕ່ປີ2000,ມາຮອດປັດຈຸບັນກໍຖືວ່າໄດ້5ປີແລ້ວ,ຕົ້ນຕໍຂອງພາກເອກະຊົນ,ເຮັດແນວໃດໃຫ້ໂຄງການທີ່ທັງລັດຖະບານ6ປະເທດໄດ້ຮ່ວມກັນຕົກລົງນັ້ນໄປຜັນຂະຫຍາຍແລະຮ່ວມກັບອົງການສາກົນເຊັ່ນວ່າອົງການADB ອົງການUNESCAPທີ່ເປັນອົງການຫຼັກໃນການຊ່ອຍເຫຼືອໃຫ້ພາກເອກະຊົນຢູ່ໃນ6ປະເທດຂອງພວກເຮົານີ້ຮ່ວມກັບລັດຖະບານເຮັດໂຄງການດັ່ງກ່າວເກີດປະສິດທິຜົນຂຶ້ນ."
ເຖິງວ່າຂົງເຂດແມ່ນ້ຳຂອງມີຊັບພະຍາກອນອຸດົມສົມບູນ, ແຕ່ຍ້ອນບັນດາປະເທດຢູ່ລ້ອງແມ່ນ້ຳຂອງ ສ່ວນຫລາຍແມ່ນປະເທດທີ່ເສດຖະກິດບໍ່ພັດທະນາປານໃດ, ສະນັ້ນ, ໃນການຮ່ວມມືGMSນັ້ນ, ເວົ້າສຳລັບລາວແລ້ວ, ການກໍ່ສ້າງພື້ນຖານໂຄງລ່າງຍິ່ງເປັນເລື່ອງສຳຄັນພິເສດ,ທ່ານກິດສະໜາເວົ້າວ່າ:
"ນະໂຍບາຍຂອງGMSຄືວ່າ6ປະເທດໃນລຸ່ມແມ່ນ້ຳຂອງນີ້ແມ່ນຕົ້ນຕໍການຮ່ວມກັນແນວໃດ,ໜຶ່ງແມ່ນຫຼຸດຜ່ອນຄວາມທຸກຈົນຂອງປະຊາຊົນໃນພາກພື້ນນີ້,ອັນທີສອງແມ່ນສ້າງຄວາມສະດວກທາງດ້ານຄົມມະນາຄົມຂົນສົ່ງ,ໂດຍສະເພາະທາງດ້ານການຂົນສົ່ງໂດຍສານແລະການຂົນສົ່ງສິນຄ້າ.ເຮັດແນວໃດໃຫ້ຕົ້ນທຶນການຂົນສົ່ງສິນຄ້າຖືກລົງ.ສະນັ້ນ,ນະໂຍບາຍຫຼັກຢູ່ໃນພາກພື້ນລຸ່ມແມ່ນ້ຳຂອງນີ້ໂຄງການໃຫຍ່ໆກໍແມ່ນການສ້າງເສັ້ນທາງເຊື່ອມຕໍ່.
ປັດຈຸບັນນີ້ມີ3ໂຄງການໃຫຍ່.ເຊິ່ງໂດຍທີໜຶ່ງແມ່ນເຊື່ອມຕໍ່ຄຸນມິງກັບບາງກອກ,ເຊິ່ງຜ່ານລາວ.ເສັ້ນທາງນີ້800ກິໂລແມັດປັດຈຸບັນກໍກຳລັງກໍ່ສ້າງ,ຄາດວ່າປີ2007ກໍຈະສຳເລັດ.ໂຄງການທີສອງໂຄງການເຂົາເຈົ້າເອີ້ນວ່າEWECເຊິ່ງເຊື່ອມຕໍ່4ປະເທດ,ມີມຽນມາ,ໄທ,ລາວ,ຫວຽດນາມເຊິ່ງຄວາມຍາວຂອງໂຄງການດັ່ງກ່າວ2450ກິໂລແມັດ.ຖ້າວ່າສຳເລັດກໍຈະເຮັດໃຫ້ລາວພວກເຮົານີ້ສາມາດອອກສູ່ທ່າເຮືອຕາໜ່າງປະເທດຫວຽດນາມໄດ້,ຈະເຮັດໃຫ້ການຂົນສົ່ງສິນຄ້າໃນ4ປະເທດນີ້ມີຄວາມຄ່ອງຕົວຂຶ້ນແລະເຮັດໃຫ້ການໄປມາຫາສູ່ເພື່ອເພີ່ມການລົງທຶນແລະການທ່ອງທ່ຽວໃຫ້ມັນໄດ້ຫຼາຍຂຶ້ນ.ເສັ້ນທາງໂຕໜຶ່ງແມ່ນເຊື່ອມຕໍ່ຄຸນມິງກັບຮ່າໂນຍຄາຍຟອງ.ປະຈຸບັດ,ກຳລັງເຮັດເປັນຈຸດໜັກ.
ນອກຈາກນີ້,ໂຄງການGMSແມ່ນຍັງເນັ້ນທາງດ້ານການກໍ່ສ້າງບຸກຄະລາກອນເພື່ອເຮັດໃຫ້ບຸກຄະລາກອນມີສ່ວນຮ່ວມເຮັດໃຫ້ໂຄງການດັ່ງກ່າວໄດ້ປະສົບຜົນສຳເລັດ,ມື້ນີ້,ພວກເຮົາກໍໄດ້ປະຊຸມກັນຢູ່ຫົວຂໍ້ໜຶ່ງກ່ຽວຂ້ອງກັບການເຊື່ອມຕໍຊ່ຕາຂ່າຍຄົມມະນາຄົມ,ສື່ສານ,ເຊິ່ງລະບົບທັງໝົດນີ້ຈະເຮັດໃຫ້6ປະເທດໃນພາກພື້ນແມ່ນ້ຳຂອງມີການເຊື່ອມຕໍ່ກັນດີຂຶ້ນ.ຂ້າພະເຈົ້າເຫັນວ່າກອງປະຊຸມເທື່ອນີ້ມີຄວາມໝາຍສຳຄັນຫຼາຍ,ເພາະວ່າປະມຸກລັດ6ປະເທດຈະມາປະຊຸມກັນໃນວັນທີ4ຫາວັນທີ5.ທາງພາກເອກະຊົນຂອງພວກເຮົາກໍໄດ້ສັງລວມຈິດໃຈຂອງກອງປະຊຸມມື້ນີ້,ມື້ອື່ນຈະລາຍງານໃຫ້ຜູ້ນຳ6ປະເທດຊາບ,ເຮັດໃຫ້ພາກເອກະຊົນ,ພາກລັດມີການປະສົມປະສານ,ເຮັດໃຫ້ຈຸປະສົງຂອງGMSເພື່ອສ້າງຄວາມສະດວກໃຫ້ການໄປມາຫາສູ່ກັນໃຫ້ປະຊາຊົນໃນພາກພື້ນນີ້ໃຫ້ດີຂຶ້ນ."
ໃນຖານເປັນປະເທດກະສິກຳທີ່ດ້ອຍພັດທະນາໃນອະນຸພາກພື້ນ, ລາວເອົາໃຈໃສ່ທີ່ສຸດນຳການຮ່ວມມືກັບຈີນທາງດ້ານກະສິກຳພາຍໃຕ້ຂອບການຮ່ວມມືຂອງGMS, ທ່ານກິດສະໜາເວົ້າວ່າ:
"ໂຄງການກະສິກຳສະເພາະລາວຈີນ,ຈີນໄດ້ຍົກເວົ້ນພາສີສິນຄ້າຂາເຂົ້າ,ບໍ່ເກັບພາສີໃຫ້ລາວ,ຕາມຂ້າພະເຈົ້າຈື່ໄດ້ວ່າ208ຊະນິດລາຍການ,ເຊິ່ງປັດຈຸບັນເບື້ອງລາວກຳລັງເຊີນຊວນນັກທຸລະກິດຈີນໄປລົງທຶນຢູ່ລາວ,ການລົງທຶນຢູ່ລາວກສາມາດເອົາສິນຄ້າໄປຂາຍຢູ່ຈີນໄດ້,ເພາະວ່າທາງປະເທດຈີນກໍໃຫ້ຄວາມສະດວກຫຼາຍໃນການຍົກເວັ້ນພາສີ.ນອກຈາກນັ້ນກໍສາມາດເອົາສິນຄ້າດັ່ງກ່າວໄປຂາຍຢູ່ປະເທດທີສາມ.ນັກທຸລະກິດຈີນລົງທຶນຢູ່ລາວໃນປັດຈຸບັນກໍມີບັນຍາກາດຄຶກຄື້ນ,ຈຳນວນຕົວເລກທີ່ຈີນລົງທຶນຢູ່ລາວນີ້ນັບມື້ນັບສູງຂຶ້ນ,ໃນອະນາຄົດນີ້,ສິນຄ້າດ້ານກະເສດຂອງລາວກໍມີໂອກາດເຂົ້າມາຈຳໜ່າຍໃນຈີນໄດ້,ໂດຍສະເພາະແມ່ນນັກທຸລະກິດຈີນເພິ່ນເອງເປັນຜູ້ລົງທຶນເພິ່ນຈະຮູ້ຕະຫຼາດແລະຄວາມຕ້ອງການຂອງປະຊາຊົນຈີນ,ເຊິ່ງຂ້າພະເຈົ້າມີຄວາມຫວັງຫຼາຍເພາະວ່າຕະຫຼາດຈີນແມ່ນຕະຫຼາດໃຫຍ່,ຈະຊ່ອຍໃຫ້ລາວເຊິ່ງປະຊາກອນບໍ່ຫຼາຍນັ້ນມີເງື່ອນໄຂຈະສົ່ງສິນຄ້າອອກສູ່ຈີນໄດ້ໃນອະນາຄົດ,ຈີນລາວຊ່ອຍເຫຼືອເຊິ່ງກັນແລະກັນທາງດ້ານເສດຖະກິດ,ເຊິ່ງນະໂຍບາຍຂອງສອງປະເທດແມ່ນນະໂຍບາຍຮ່ວມມືທີ່ຕ່າງຝ່າຍຕ່າງມີຜົນປະໂຫຍດບົນພື້ນຖານຄວາມສະເໝີພາບແລະອະທິປະໄຕຂອງສອງປະເທດ.ຂ້າພະເຈົ້າມີຄວາມເຊື່ອໝັ້ນວ່າ,ການຮ່ວມມືລາວຈີນໃນອະນາຄົດຈະນັບມື້ນັບຂະຫຍາຍດີຂຶ້ນຫຼາຍ."
|
