|
|
 |
| (GMT+08:00)
2005-07-07 21:49:19
|
 |
|
GMS ຊຸກຍູ້ການສ້າງທາງຜ່ານເສດຖະກິດຈີນອາຊຽນ(ສຽງ)
cri
Author: da
|
ກອງປະຊຸມຜູ້ນຳຄັ້ງທີ 2 ຂອງ GMS ທີ່ໄຂຂຶ້ນຢູ່ເມືອງຄຸນມີງແຂວງຢຸນນານ ພາກຕາເວັນຕົກສຽງໃຕ້ຂອງຈີນໄດ້ອັດລົງແລ້ວໃນວັນທີ 5 ກໍລະກົດ,ຄຽງຄູ່ກັບການກໍ່ສ້າງເຂດການຄ້າເສລີຈີນອາຊຽນເລັ່ງໄວເຂົ້າ,ພື້ນຖານໂຄງລ່າງຄົມມະນາຄົມທີ່ເຄີຍເປັນອຸປະສັກຂັດຂວາງການພັດທະນາການຄ້າລະຫວ່າງຈີນກັບອາຊຽນໂດຍຕະຫຼອດນັ້ນ ກໍໄດ້ສະດວກກວ່າ.ພາຍໃຕ້ການຊຸກຍູ້ຂອງກົນໄກ GMS ,ທາງຜ່ານ ເສດຖະກິດເໜືອໃຕ້ລະຫວ່າງຈີນກັບອາຊຽນໄດ້ຈໍ່ຕົວຂຶ້ນໃນເບື້ອງຕົ້ນ.
ປະຈຸບັນ,ໂຄງການທາງຫຼວງຄຸນມິງ-ບາງກອກແລະໂຄງການທາງຫຼວງຄຸນມິງ-ຢາງກຸງ ຊຶ່ງເປັນທາງຜ່ານເສດຖະກິດເໜືອໃຕ້ຂອງ GMS ໄດ້ຮັບຄວາມເອົາໃຈໃສ່ຫຼາຍຈາກລັດຖະບານບັນດາປະເທດທີ່ກ່ຽວຂ້ອງ,ແລະກຳລັງກໍ່ສ້າງໄປພ້ອມກັນ.ສະນັ້ນ ການຮ່ວມມືສ້າງທາງຫຼວງຖືກຖືໂດຍທົ່ວໄປວ່າ ແມ່ນຂົງເຂດທີ່ມີການຄືບໜ້າລັກສະນະແທ້ຈິງຂອງGMS.
ທ່ານລີທ່ຽນມິງ ຜູ້ອຳນວຍການໃຫຍ່ກຸ່ມບໍລິສັດຈໍລະຈອນສິນຄ້າບໍລິການຮ້າວຮົງຢຸນນານເວົ້າວ່າ,ເບິ່ງໃນປະຈຸບັນ ແລ້ວເຫັນວ່າ,ທາງຜ່ານເສດຖະກິດເໜືອໃຕ້ໃນອະນຸພາກພື້ນແມ່ນ້ຳຂອງ ໂດຍສະເພາະແມ່ນສ້າງທາງຫຼວງຄຸນມິງ-ບາງກອກສຳເລັດແລະແລ່ນລົດໄດ້ແລ້ວ,ຈະກາຍເປັນທາງທີ່ສຳຄັນກວ່າໝູ່ໃນການຮ່ວມມືດ້ານເສດຖະກິດລະຫວ່າງຈີນກັບອາຊຽນ.
ທ່ານຄາດຄະເນດ້ວຍທັດສະນະເຫັນໄປໃນແງ່ດີວ່າ,ເມື່ອສ້າງເຂດການຄ້າເສລີຈີນອາຊຽນສຳເລັດແລ້ວ,ຍອດມູນຄ່າເຄື່ອງຂົນສົ່ງສິນຄ້າຕາມທາງຫຼວງຄຸນມິງບາງກອກຈະບັນລຸ 100 ຕື້ໂດລາສະຫະລັດຕໍ່ປີ.
ທາງຫຼວງຈາກເມືອງຄຸນມິງ ເທດສະບານແຂວງຢຸນນານຜ່ານລາວໄປຮອດບາງກອກ ນະຄອນຫຼວງໄທ ຍາວທັງໝົດປະມານ 1800 ກິໂລແມັດ,ຕອນຢູ່ຈີນ 687 ກິໂລແມັດ,ຕອນຢູ່ລາວ 247 ກິໂລແມັດ,ຕອນຢູ່ໄທ 813 ກິໂລແມັດ.
ທາງຫຼວງທີ່ສ້າງຢູ່ເຂດພູຜາປ່າໄມ້ເສັ້ນນີ້ແມ່ນປະຕິບັດຕາມຂໍ້ລິເລີ່ມຂອງທະນາຄານພັດທະນາອາຊີ,ລັດຖະບານຈີນ ລາວແລະໄທໄດ້ເຊັນສັນຍາຮ່ວມມືໃນປີ 2000,ຕົກລົງພະຍາຍາມພ້ອມກັນສ້າງທາງຫຼວງຄຸນມິງບາງກອກໃຫ້ເປັນທາງຫຼວງຊັ້ນສູງ,ໃນທີ່ສຸດເຊື່ອມຕໍ່ກັບທາງຫຼວງຂອງມາເລເຊຍແລະສິງກະໂປ.
ທາງຫຼວງຄຸນມິງບາງກອກຕອນສ້ຽວເມືອງຢາງ-ບໍ່ຫານໃນເຂດແດນຈີນໄດ້ເລີ່ມກໍ່ສ້າງຢ່າງເປັນທາງການແລ້ວໃນລະດູບານໃໝ່ປີນີ້.ພະແນກຄົມມະນາຄົມແຂວງຢຸນນານແນະນຳວ່າ,ທາງຫຼວງຕອນນີ້ຍາວປະມານ 189 ກິໂລແມັດ,ລົງທຶນ 6 ຕື້ 600 ລ້ານຢວນ,ກະວ່າຈະສ້າງສຳເລັດແລະແລ່ນລົດໄດ້ຢ່າງເປັນທາງການໃນປີ 2008.ເວລານັ້ນ,ທາງຫຼວງຄຸນມິງບາງກອກຕອນຢູ່ຈີນລວມທັງໝົດຍາວ 687 ກິໂລແມັດຈະສ້າງເປັນທາງຫຼວງຊັ້ນສູງ,ໄລຍະທາງຂົນສົ່ງຈະສົ້ນກວ່າກ່ອນດັດແປງ 70 ກິໂລແມັດ.
ສ່ວນກິດຈະການດັດແປງທາງຫຼວງຄຸນມິງບາງກອກຕອນ 247 ກິໂລແມັດຢູ່ລາວແມ່ນຈີນ ລາວແລະໄທແບ່ງກັນລົງທຶນຝ່າຍລະ 1 ສ່ວນ 3 .ໄລຍະທາງທີ່ຍາວ 69,44 ກິໂລແມັດທີ່ຈີນຊ່ອຍເຫຼືອນັ້ນໄດ້ເລີ່ມສ້າງໃນເດືອນເມສາປີກາຍນີ້.
ທ່ານກົງສູນໃຫຍ່ຂອງໄທປະຈຳເມືອງຄຸນມິງແນະນຳວ່າ,ປະຈຸບັນ ໄລຍະທາງຊຽງຂອງບາງກອກ 800 ກວ່າກິໂລແມັດ ຊຶ່ງເປັນພາກສ່ວນທາງຜ່ານຄຸນມິງບາງກອກໃນແດນໄທໄດ້ສ້າງເປັນທາງຫຼວງຊັ້ນສູງແລ້ວ,ເມື່ອທາງຫຼວງຊັ້ນສູງຈາກຄຸນມິງຜ່ານລາວໄປຮອດເມືອງຊຽງຂອງຂອງໄທສ້າງສຳເລັດແລ້ວ,ຈາກແຂວງຢຸນນານຈີນໄປໄທ ອອກຕອນເຊົ້າ ຕອນແລງກໍຮອດແລ້ວ.
ທາງຫຼວງອີກເສັ້ນໜຶ່ງຈາກຄຸນມິງໄປຍຸ້ຍລີ້ແລ້ວເຂົ້າມຽນມານັ້ນຍາວ 651 ກິໂລແມັດໄດ້ສ້າງເປັນທາງຫຼວງຊັ້ນສູງແລ້ວ,ຍັງເຫຼືອແຕ່ຕອນປາວຊ່ານໄປຫາລົງຊ່ານຂ້າ 76 ກິໂລແມັດພວມກໍ່ສ້າງເປັນທາງດ່ວນ 4 ເລັນ.ທາງຫຼວງຈາກເມືອງຍຸ້ຍລີ້ໄປເມືອງມັນດາເລ ເມືອງສຳຄັນຢູ່ພາກເໜືອມຽນມາ 432 ກິໂລແມັດ ຍັງເຫຼືອແຕ່ຕອນຍຸ້ຍລີ້ໄປຫາລາໂຊມຽນມາ 170 ກິໂລແມັດຍັງຕ້ອງສ້ອມແປງ.ຂະແໜງການຄົມມະນາຄົມແນະນຳວ່າ,ຈີນພວມຮ່ວມມືກັບລັດຖະບານມຽນມາ,ສ້ອມແປງທາງຫຼວງຈາກຊາຍແດນຈີນມຽນມາໄປວາຊໍມຽນມາຍາວ 95 ກິໂລແມັດ,ກິດຈະການສ້ອມແປງໄດ້ເລີ່ມກໍ່ສ້າງໃນທ້າຍປີກາຍນີ້ແລ້ວ.
ທະນາຄານພັດທະນາອາຊີໄດ້ສະໜອງເງິນທຶນຊ່ອຍກໍ່ສ້າງທາງຜ່ານເສດຖະກິດເໜືອໃຕ້ຢ່າງແຂງແຮງ.ທະນາຄານພັດທະນາອາຊີໄດ້ໃຫ້ເງິນກູ້ຢືມແກ່ການກໍ່ສ້າງທາງດ່ວນຈາກສູຊົງໄປຕ້າຫຼີຂອງທາງຫຼວງຄຸນມິງຢາງກຸງ 150 ລ້ານໂດລາສະຫະລັດ,ເຮັດໃຫ້ໂຄງການນີ້ໄດ້ເລີ່ມສ້າງກ່ອນເວລາກຳນົດ 5 ປີ;ທະນາຄານພັດທະນາອາຊີຍັງໃຫ້ເງິນກູ້ຢືມ 250 ລ້ານໂດລາສະຫະລັດແກ່ການກໍ່ສ້າງທາງດ່ວນຈາກຢວນຈ່ຽງໄປຫາໂມ້ເຫີ່ຍຂອງທາງຫຼວງຄຸນມິງບາງກອກ.
|
|
|
