|
ວັນທີ 4 ຫາວັນທີ 5 ກໍລະກົດ, ຢູ່ເມືອງຄຸນມິງແຂວງຢຸນນານຈີນ, ໄດ້ຈັດກອງປະຊຸມຜູ້ນຳGMSຄັ້ງທີສອງ. ໃນໄລຍະກອງປະຊຸມ, ເພື່ອສະແດງໝາກຜົນທີ່ບັນດາປະເທດກ່ຽວຂ້ອງໄດ້ຮັບໃນຂົງເຂດຮ່ວມມືໂທລະຄົມໃຕ້ຂອບGMSໃນຫລາຍປີມານີ້ໂດຍກົງ, ຝ່າຍເຈົ້າພາບໄດ້ຈັດງານວາງສະແດງການພັດທະນາດ້ານໂທລະຄົມໂດຍສະເພາະ. ປະເທດGMSເຊັ່ນຈີນ ລາວ ໄທ ກຳປູເຈຍ ມຽນມາ ແລະຫວຽດນາມຕ່າງຈັດຕັ້ງຄະນະຜູ້ແທນວິສາຫະກິດໂທລະຄົມພາຍໃນປະເທດຕົນມາເຂົ້າຮ່ວມການວາງສະແດງ. ລາວກໍໄດ້ແຕ່ງບໍລິສັດໂທລະຄົມລາວ"ETL"ເປັນຜູ້ຕາງໜ້າມາຈັດການວາງສະແດງ. ໃນເວລາໃຫ້ສຳພາດຕໍ່ນັກຂ່າວວິທະຍຸພວກເຮົາ, ທ່ານຄຳມ່ວນ ຊົມສີຫາປັນຍາ ຮອງຜູ້ອຳນວຍການໃຫຍ່ຂອງບໍລິສັດETLລາວກ່າວວ່າ,ພາຍໃຕ້ຂອບGMS,ການຮ່ວມມືໂທລະຄົມລາວຈີນຄົງຈະມີອະນາຄົດອັນດີງາມ.
ກ່ອນອື່ນ, ທ່ານຄຳມ່ວນ ຊົມສີຫາປັນຍາໄດ້ແນະນຳສະພາບປັດຈຸບັນແຫ່ງການພັດທະນາໂທລະຄົມລາວສູ່ຟັງ, ທ່ານກ່າວວ່າ, ໃນ 5 ປີມານີ້, ພາຍໃຕ້ກົນໄກຮ່ວມມືGMS, ໂທລະຄົມລາວໄດ້ພັດທະນາຢ່າງວ່ອງໄວ.ທ່ານກ່າວວ່າ:
"ສະພາບການພັດທະນາໂທລະຄົມລາວໃນປັດຈຸບັນຖ້າທຽບໃສ່5ປີຫຼັງ,ຖືວ່າການພັດທະນາໄດ້ໄວຫຼາຍ,ໂດຍສະເພາະແມ່ນພວກໄວຣັສ,ພວກມືຖືນີ້ນາໄປໄວຫຼາຍ, ອັນທີສອງແມ່ນພວກອິນເຕີເນັດໂບຼດແບນດ໌ ຄືວ່າມີອັດຕາໄວແລະສູງ..ໃນເມື່ອກ່ອນ,5ປີຫຼັງຫັ້ນ,ປະຊາຊົນຈະໃຊ້ໂທລະສັບຫຼືອັນຫຍັງຕ່າງໆຖ້າຮັບຂ່າວຖືວ່າຍາກ,ແຕ່ປັດຈຸບັນ,ເກືອບກວມເອົາ90%ຂອງພື້ນທີ່,ເພື່ອປະຊາຊົນຮັບໄດ້ຫຼືວ່າໂທໄດ້ທຸກແຫ່ງຫົນ,ຖືວ່າດີຫຼາຍ."
ປັດຈຸບັນ, ໃຕ້ຂອບ GMS ການຮ່ວມມືໂທລະຄົມລາວຈີນໄດ້ເພີ່ມທະວີຂຶ້ນເລື້ອຍໆ: "ການຮ່ວມມືກັບຈີນໂດຍສະເພາະແມ່ນETL,ມີການຮ່ວມມືກັບຈີນຫຼາຍ,ເພາະວ່າໃນການພັດທະນາເລື່ອງໂທລະຄົມໂດຍສະເພາະໄດ້ຮັບທຶນກູ້ຢືມຊົບໂລນຈາກເອັກຊິນແບກ(ExinBank) ແລະກໍຮ່ວມມືກັບຜູ້ສະໜອງວັດຖຸ,ກໍເອີ້ນວ່າsupplier ແມ່ນAlcatel ຊຽງໄຮແບວ.ເພິ່ນໃຫ້ກູ້ຢືມຍາວນານຄືກັນ,ຖືວ່າດີຫຼາຍ,ຄັນວ່າບໍ່ມີລັດຖະບານຈີນໃຫ້ກູ້ຢືມ,ໂທລະຄົມລາວອາດຈະໄປຊ້າ."
ທ່ານຄຳມ່ວນກ່າວວ່າ, ການຮ່ວມມືລະຫວ່າງລາວຈີນມີອະນາຄົດກວ້າງຂວາງ:"ແນ່ນອນແລ້ວຕ້ອງມີການຮ່ວມມືເປັນພິເສດ,ເປັນເພື່ອນມິດອ້າຍນ້ອງ,ຕ້ອງໄດ້ອາໄສຈີນຕະຫຼອດ,ເພື່ອຈະຊຸກດັນດ້ານເສດຖະກິດຂອງລາວຂຶ້ນສູ່ລະດັບອອກຈາກຄວາມທຸກຍາກ,ຄຶດວ່າການຮ່ວມມືຕ້ອງແໜັ້ນແຟ້ນແລະຕ້ອງຢູ່ໃນລະດັບດີທີ່ສຸດ."
ການໄຂກອງປະຊຸມຜູ້ນຳGMSຄັ້ງທີສອງມີຄວາມໝາຍສຳຄັນຕໍ່ການເພີ່ມທະວີການຮ່ວມມືເສດຖະກິດໃນອະນຸພາກພື້ນນີ້, ມັນຍ່ອມຈະຊຸກຍູ້ພາລະກິດໂທລະຄົມລາວກ້າວໄປໜ້າ.ທ່ານກ່າວວ່າ:
"ນັ້ນເປັນບາດກ້າວສຳຄັນອັນໜຶ່ງສຳລັບພວກສື່ສານ,ຄືໂທລະຄົມຂອງພວກເຮົາຊຶ່ງເມື່ອກ່ອນເພິ່ນຢາກໄດ້ເບິ່ງໃນແງ່ເປັນພື້ນຖານ.ການລົງທຶນການພັດທະນາທາງດ້ານຣູຣານເອເຣຍເຊິ່ງມາເຖິງສະໄໝນີ້ເພິ່ນໄດ້ເອົາໃຈໃສ່ເປັນພິເສດ,ຊຸກດັນໃຫ້ອົງການກ່ຽວກັບການເຊື່ອມໂຍງການສື່ສານລະຫວ່າງ6ປະເທດໃຫ້ເກີດຜົນເປັນຈິງ,ນີ້ມີຜົນດີຫຼາຍສຳລັບໂທລະຄົມຂອງພວກເຮົາ,ຄຶດວ່າພວກເຮົາຖືເປັນໂຄງການບູລິມະສິດໃນຂົງເຂດນີ້ໃນປັດຈຸບັນ."
ໃນເວລາກ່າວເຖິງແຜນການຮ່ວມມືໃນພາຍໜ້າ, ທ່ານຄຳມ່ວນເວົ້າວ່າ: "ວາວກຽມພ້ອມແລ້ວທີ່ຈະເຊື່ອມຕໍ່ກັບການສື່ສານຂອງບັນດາ6ປະເທດນີ້.ທ້າຍປີນີ້ຖືວ່າຈະຕ້ອງເຊື່ອມຕໍ່ກັບຈີນໃຫ້ສຳເລັດ.ເພາະວ່າໄດ້ເຊື່ອມຕໍ່ກັບຫວຽດນາມແລະໄທແລ້ວ,ປີນີ້ຈະເຊື່ອມຕໍ່ກັບຈີນຕື່ມ.ປີ2007ຈະເຊື່ອມຕໍ່ກັບກຳປູເຈຍແລະພະມາ."
ໃນເວລາສຳພາດ, ນັກຂ່າວໄດ້ຊາບຢ່າງນອກຄາດຄຶດວ່າ, ທ່ານຄຳມ່ວນຍັງແມ່ນມິດລາຍການຂອງວິທະຍາCRIພວກເຮົາ. ທ່ານເວົ້າວ່າ, ໃນສິບກວ່າປີມານີ້, ທ່ານໄດ້ຕິດຕາມລາຍການພາກພາສາລາວຂອງວິທະຍຸ CRI ໂດຍຕະຫລອດ, ທ່ານໄດ້ຕີລາຄາສູງຕໍ່ລາຍການຂອງພວກເຮົາ, ທ່ານເຫັນວ່າ, ວິທະຍຸCRIພວກເຮົາໄດ້ກາຍເປັນ"ສຽງຂອງອາຊີ"ແລ້ວ. ທ່ານເວົ້າວ່າ:
"ຮູ້ສຶກວ່າດີຫຼາຍ,ສ່ວນຫຼາຍແມ່ນເປັນສຽງຂອງອາຊີ.ຂ່າວທົ່ວໄປ,ຂ່າວເລື່ອງການພັດທະນາຂອງຂົງເຂດອາຊີ,ໂດຍສະເພາະແມ່ນເສດຖະກິດຈີນມີການກະທົບໃສ່ເສດຖະກິດໃນຂົງເຂດ,ປະເທດເພື່ອນບ້ານກໍມີຫຼາຍ.ຮູ້ສຶກວ່າດີ.ຂ້າພະເຈົ້າໄດ້ຟັງລາຍການCRIເລື້ອຍໆ,ຟັງມາແຕ່ດົນແລ້ວ,ມີ10ກວ່າປີແລ້ວ."
|
