|
|
 |
| (GMT+08:00)
2005-07-08 16:47:11
|
 |
|
ອຸປະກອນໄຮເທັກຕ້ານການກໍ່ການຮ້າຍຂອງຈີນ
cri
Author: li
 ຕາມຂ່າວ CRI: ລັດທິກໍ່ການຮ້າຍແມ່ນບັນຫາສຳຄັນທີ່ທົ່ວໂລກປະເຊີນໃນປັດຈຸບັນ. ເພື່ອເສີມສ້າງຄວາມສາມາດຕ້ານການກໍ່ການຮ້າຍ,ຫຼາຍປະເທດກໍສຸດທີ່ເອົາໃຈໃສ່ນຳການຄົ້ນຄວ້າແລະພັດທະນາອຸປະກອນຕ້ານການກໍ່ການຮ້າຍ. ໃນຖານເປັນປະເທດທີ່ຈະຈັດງານກິລາໂອລິມປິກ,ຈີນກໍໄດ້ເຮັດວຽກຢ່າງຫຼວງຫຼາຍໃນດ້ານນີ້. ຫວ່າງມໍ່ໆນີ້ ງານວາງສະແດງເຕັກນິກແລະອຸປະກອນຕ້ານການກໍ່ການຮ້າຍຂອງຈີນຄັ້ງປະຖົມມະເລີກໄດ້ຈັດຂຶ້ນຢູ່ທີ່ປັກກິ່ງ.
ພວກກໍ່ການຮ້າຍໄດ້ຈີ້ຕົວປະກັນລີ້ຊ່ອນຢູ່ໃນຍົນ,ເປັນປໍລະປັກກັນກັບຕຳຫຼວດ,ແລະຂູ່ວ່າຈະຂ້າຕົວປະກັນ,ໃຫ້ຕຳຫຼວດເຫັນດີນຳເງື່ອນໄຂຂອງພວກເຂົາ. ໃນເວລາຜູ້ຊ່ຽວຊານດ້ານການເຈລະຈາໄກ່ເກ່ຍກັບພວກກໍ່ການຮ້າຍນັ້ນ,ຕຳຫຼວດພິເສດຕ້ານການກໍ່ການຮ້າຍທີ່ຊຳນິຊຳນານໄດ້ໃຊ້ສິ່ວໄຟຟ້າທີ່ບໍ່ມີສຽງເຈາະຮູນ້ອຍໆຮູໜຶ່ງທີ່ເສັ້ນຜ່າກາງບໍ່ຮອດ 1 ຊັງຕີແມັດຢູ່ພື້ນໃນຍົນຢ່າງວ່ອງໄວ,ແລ້ວຍັດຫຼອດອ່ອນສີດຳເສັ້ນໜຶ່ງເຂົ້າໃນຮູຢ່າງມິດໆ,ຫຼັງຈາກນັ້ນ ຫົວຫຼອດທີ່ຍື່ນອອກຈາກຮູພຽງແຕ່ 2 ຊັງຕີແມັດນັ້ນປິ້ນຊ້າຍປິ້ນຂວາ,ການເຄື່ອນໄຫວຂອງໝົດທຸກຄົນໃນຍົນກໍໄດ້ຖືກສົ່ງໄປຮອດໜ້າຈໍຢູ່ຕໍ່ໜ້າຜູ້ບັນຊາການທີ່ຢູ່ບ່ອນໄກ.
"ຫຼອດອ່ອນສີດຳ"ແລະ"ໜ້າຈໍ"ທີ່ເສີມຂະຫຍາຍບົດບາດສຳຄັນໃນການແກ້ໄຂ"ວິກິດການຕົວປະກັນ"ນັ້ນກໍແມ່ນກ້ອງສ່ອງເອເລັກໂຕຼນິກທີ່ຖືກຜູ້ຊ່ຽວຊານຕ້ານການກໍ່ການຮ້າຍເອີ້ນເປັນ"ຕາເອັກສ໌ເລ". ໃນງານວາງສະແດງເຕັກນິກແລະອຸປະກອນຕ້ານການກໍ່ການຮ້າຍເທື່ອນີ້,"ຕາເອັກສ໌ເລ"ໄດ້ຕິດໃຈຄົນທີ່ສຸດ. ບໍລິສັດຢີງຢຸ້ຍຕາປັກກິ່ງແມ່ນຫົວໜ່ວຍທີ່ອອກແບບອຸປະກອນດັ່ງກ່າວ,ທ່ານຊູນອີຊ່າວຂອງບໍລິສັດດັ່ງກ່າວແນະນຳວ່າ:
"ນີ້ແມ່ນກ້ອງສ່ອງວີດີໂອເອເລັກໂຕຼນິກ. ມັນຕ່າງກັບກ້ອງສ່ອງເອເລັກໂຕຼນິກທີ່ເບິ່ງດ້ວຍຕາໃນເມື່ອກ່ອນ,ຈຸດພິເສດຂອງກ້ອງສ່ອງດ້ວຍຕາແມ່ນໃສ່ເທິງຕາ,ແມ່ນຜູ້ດຽວໃຊ້. ແຕ່ກ້ອງສ່ອງວີດີໂອມີໜ້າຈໍ,ບໍ່ພຽງແຕ່ເຈົ້າເຫັນໄດ້,ຄົນຢູ່ຄຽງຂ້າງກໍເຫັນໄດ້ຄືກັນ; ມັນມີຫຼອດອ່ອນ,ຜ່ານເຕັກນິກຄວບຄຸມທາງໄກສາມາດຄວບຄຸມສົ້ນຕົ້ນຂອງຫຼອດ; ກ້ອງສ່ອງນີ້ແມ່ນແບບມືຖື,ໜັກພຽງແຕ່ 4 ກິໂລກວ່າ. ນອກນີ້ ມັນຍັງກັນຝົນໄດ້."
ຕາມນັກວິຊາການແນະນຳວ່າ,ຢູ່ສົ້ນເທິງຂອງຫຼອດອ່ອນໄດ້ຕິດຕັ້ງກ້ອງທີ່ມີອັດຕາຈຳແນກສູງແລະມີມຸມກວ້າງທີ່ມີເສັ້ນຜ່າກາງພຽງແຕ່ 6 ມີລີແມັດ,ໝູນໄດ້ 360 ອົງສາ. "ຕາເອັກສ໌ເລ"ບໍ່ພຽງແຕ່ສາມາດໃຊ້ໃນການຕ້ານການຈີ້ຍົນທໍ່ນັ້ນ ຫາກຍັງສາມາດເສີມຂະຫຍາຍບົດບາດຢູ່ບ່ອນທີ່ອຸນຫະພູມສູງ,ມີພິດ,ແຜ່ລັງສີນິວເຄຼຍແລະສະຖານທີ່ອື່ນໆທີ່ຕາຄົນສັງເກດບໍ່ເຫັນ.
ເຫດການລອບຄາຕະກຳແມ່ນປ້ອງກັນຍາກ,ຫຼັງຈາກເກີດຂຶ້ນແລ້ວ,ຈະຊອກຮູ້ບ່ອນຂອງຄາຕະກອນແນວໃດແລະຈັບຕົວເຂົາຢ່າງວ່ອງໄວນັ້ນແມ່ນຍາກທີ່ສຸດ. ແຕ່ລະບົບຊອກຄົ້ນຊະນິດໜຶ່ງທີ່ວາງສະແດງໃນງານວາງສະແດງເຕັກນິກແລະອຸປະກອນຕ້ານການກໍ່ການຮ້າຍຂອງຈີນ ພັດສາມາດແກ້ໄຂບັນຫາດັ່ງກ່າວຢ່າງສະບາຍທີ່ສຸດ.
ລະບົບຊອກຄົ້ນນີ້ປະກອບດ້ວຍສາຍອັງແຕນເອົາຄື້ນສຽງ 1 ຫາ 2 ເຄື່ອງແລະເຄື່ອງຊຳລະສັນຍານ. ທ່ານນາງລູ້ອ້ຽນຟ່າງ ຊ່າງອອກແບບລະບົບດັ່ງກ່າວ ນັກຄົ້ນຄວ້າຂອງບໍລິສັດກຸ່ມວິທະຍາສາດເຕັກນິກເອເລັກໂຕຼນິກຈີນເວົ້າວ່າ:
"ພວກຂ້າພະເຈົ້າໃຊ້ວິທີວິທະຍາສາດສຽງມາກຳນົດທີ່ມາຂອງລູກປືນ. ລູກປືນທີ່ຍິງອອກມາມີສຽງສອງຊະນິດ,ໜຶ່ງແມ່ນສຽງລູກປືນຍິງອອກຈາກປາກປືນ,ອີກຊະນິດໜຶ່ງແມ່ນສຽງທີ່ລູກປືນບິນ. ພວກຂ້າພະເຈົ້າໃຊ້ລະບົບນີ້ສາມາດຊອກຄົ້ນສອງສຽງດັ່ງກ່າວ,ແລ້ວກຳນົດບ່ອນຂອງຄາຕະກອນ."
ທ່ານນາງລູ້ອ້ຽນຟ່າງເວົ້າວ່າ,ສາຍອັງແຕນຂອງລະບົບນີ້ສາມາດປ່ຽນສັນຍານຄື້ນສຽງເປັນສັນຍານເອເລັກໂຕຼນິກແລ້ວສົ່ງໃຫ້ເຄື່ອງຊຳລະສັນຍານ,ເມື່ອເຄື່ອງຊຳລະວິເຄາະແລ້ວສາມາດກຳນົດບ່ອນຂອງຄາຕະກອນພາຍໃນ 1 ວິນາທີ.
ໃນງານວາງສະແດງອຸປະກອນຕ້ານການກໍ່ການຮ້າຍເທື່ອນີ້,ອຸປະກອນທີ່ຊື່ວ່າ"ເຄື່ອງກວດກາຄວາມປອດໄພໃນເກີບ"ໄດ້ຕິດໃຈຜູ້ຊົມບໍ່ໜ້ອຍ. ນັກຂ່າວໄດ້ທົດລອງຢູ່ບ່ອນວາງສະແດງ, ຖ້າຢືນຢູ່ເຄື່ອງກວດກາ ໃນເວລາໃນເກີບບໍ່ມີເຄື່ອງໂລຫະໃດໆ,ເຄື່ອງນີ້ຈະມີໄຟສີຂຽວຮຸ່ງຂຶ້ນ; ແຕ່ຖ້ານັກຂ່າວຍັດເອົາຕະປູເຫຼັກອັນໜຶ່ງໃນເກີດຕີນຊ້າຍ ແລ້ວໄປຢືນອີກ,ເຄື່ອງນີ້ກໍໄດ້ສັນຍານໄພໃນທັນທີ. ໃນເວລາທ່ານເສີນກວາງ ພະນັກງານເຕັກນິກຂອງບໍລິສັດປ້ອງກັນຄວາມປອດໄພການບິນພົນລະເຮືອນປັກກິ່ງອະທິບາຍສັບພະຄຸນຂອງເຄື່ອງນີ້ນັ້ນ ທ່ານເວົ້າວ່າ:
"ມັນຕົ້ນຕໍແມ່ນກວດກາໂລຫະແລະມີດໃນເກີບ. ດ້ານໜຶ່ງແມ່ນກວດກາສ່ວນປະກອບພາຍໃນເກີບວ່າມັນສະໝ່ຳສະເໝີກັນບໍ່; ອີກດ້ານໜຶ່ງແມ່ນກວດການ້ຳໜັກ,ຖ້າເກີນແລ້ວຈະສັນຍານໄພ. ອີກດ້ານໜຶ່ງແມ່ນກວດກາວ່າຕີນສອງເບື້ອງແມ່ນສະໝ່ຳສະເໜີກັນຫຼືບໍ່,ຖ້າບໍ່ສະໝ່ຳສະເໝີກັນຫຼືແຕກຕ່າງກັນຫຼາຍເກີນໄປກໍຈະສັນຍານໄພ. ນີ້ແມ່ນເຕັກນິກທີ່ກ້າວໜ້າທີ່ສຸດໃນໂລກ."
ໃນງານວາງສະແດງເທື່ອນີ້,ມີວິສາຫະກິດຈີນເກືອບ 200 ຫຼັງໄດ້ວາງສະແດງອຸປະກອບຕ້ານການກໍ່ການຮ້າຍແບບໃໝ່ຫຼາຍຮ້ອຍຊະນິດ. ຕຳຫຼວດປັກກິ່ງຈະອີງຕາມຄວາມຕ້ອງການຂອງຕົນ ຈັດຊື້ສ່ວນໜຶ່ງເພື່ອໃຊ້ເຂົ້າໃນວຽກງານປ້ອງກັນຄວາມປອດໄພຂອງງານກິລາໂອລິມປິກປັກກິ່ງປີ 2008.
|
|
|
