|
ສະບາຍດີທ່ານຜູ່ຟັງທີ່ໂຄລົບ, ຫວ່າງມໍ່ໆນີ້, ຄະນະກຳມະການຈັດຕັ້ງງານກິລາໂອລິມປິກປັກກິ່ງໄດ້ປະກາດຄຳຂວັນງານກິລາໂອລິມປິກປີ 2008 ທີ່ວ່າ "ໂລກໜ່ວຍດຽວກັນ ຄວາມຝັນດຽວກັນ", ຫຼືເປັນພາສາອັງກິດມີດັ່ງນີ້ One World, One Dream". ຄຳຂວັນນີ້ມີຄວາມໝາຍແນວໃດແດ່? ເປັນຫຍັງທ່ານລິວສິ ປະທານຄະນະກຳມະການຈັດຕັ້ງງານກິລາໂອລິມປິກປັກກິ່ງຈຶ່ງກ່າວວ່າ ຄຳຂວັນນີ້ໄດ້ທ້ອນໂຮມສະຕິປັນຍາຂອງຄົນເປັນພັນເປັນໝື່ນ? ໃນລາຍການໂລກກິລາພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ສະຕິປັນຍາຂອງຄົນເປັນພັນເປັນໝື່ນພ້ອມກັນປະດິດແຕ່ງຄຳຂວັນງານກິລາໂອລິມປິກປັກກິ່ງ.
ຕອນຄ່ຳວັນທີ 26 ມິຖຸນາ, ພິທີປະກາດຄຳຂວັນງານກິລາໂອລິມປິກປັກກິ່ງປີ 2008 ໄດ້ຈັດຂຶ້ນຢູ່ຫໍກິລາກຳມະກອນປັກກິ່ງຢ່າງຄຶກຄື້ນ. ທ່າມກາງການຄອງຄອຍອັນແຮງກ້າຂອງຄົນທັງຫຼາຍໃນທົ່ວສະໜາມ, ທ່ານລີສາງຊຸນ ກຳມະການປະຈຳກົມການເມືອງສູນກາງພັກກອມມູນິດຈີນປະກາດວ່າ: ຄຳຂວັນງານກິລາໂອລິມປິກປີ2008 ແມ່ນ "ໂລກໜ່ວຍດຽວກັນ ຄວາມຝັນດຽວກັນ".
ຄຳຂວັນງານກິລາໂອລິມປິກໄດ້ຂ້ອນເອົາທັດສະນະຄະຕິງານກິລາໂອລິມປິກແລະວັດທະນະທຳຂອງປະເທດເຈົ້າພາບເຂົ້າກັນໃນລະດັບ. ແຕ່ງານກິລາໂອລິມປິກທີ່ເຊອຸນເມື່ອປີ 1988 ເປັນຕົ້ນມາ, ປະເທດເຈົ້າພາບງານກິລາໂອລິມປິກທຸກຄັ້ງລ້ວນແຕ່ໄດ້ສະເໜີຄຳຂວັນທີ່ກະທັດຮັດ. ຕົວຢ່າງຄື ໃນງານກິລາໂອລິມປິກອາແຕນໃນປີກາຍ, ຄົນເກຼັກໄດ້ສະເໜີຄຳຂວັນຢ່າງພາກພູມໃຈວ່າ "ຍິນດີຕ້ອນຮັບກັບຄືນບ້ານເກີດ", ໄດ້ສະແດງເຖິງອາລົມຈິດອັນປິຕິຊົມຊື່ນແລະພາກພູມໃຈຂອງເກຼັກຕໍ່ງານກິລາໂອລິມປິກກັບຄືນສູ່ບ້ານເກີດໃນຖານະເປັນບ່ອນກຳເນີດກິລາໂອລິມປິກ.
ຄັນຊັ້ນ ຄຳຂວັນງານກິລາໂອລິມປິກປັກກິ່ງຢາກສະແດງເຖິງເນື້ອໃນຫຍັງແດ່? ຄະນະກຳມະການຈັດຕັ້ງງານກິລາໂອລິມປິກປັກກິ່ງກ່າວວ່າ, ຄຳຂວັນທີ່ວ່າ "ໂລກໜ່ວຍດຽວກັນ ຄວາມຝັນດຽວກັນ" ນີ້ໄດ້ສະແດງເຖິງຄວາມປາຖະໜາຮ່ວມຂອງທົ່ວໂລກທີ່ສະແຫວງຫາອະນາຄົດອັນດີງາມຂອງມະນຸດໃຕ້ການຊັກຊວນອວນຮຽກຂອງຈິດໃຈໂອລິມປິກ ທັງສະແດງເຖິງອຸດົມການຂອງຊາວປັກກິ່ງແລະຊາວຈີນທີ່ຍິນດີພ້ອມກັນກັບປະຊາຊົນບັນດາປະເທດໃນໂລກມີບ້ານເມືອງດຽວກັນທີ່ດີງາມ ຊົມໃຊ້ໝາກຜົນອາລະຍະທຳນຳກັນ ເກາະແຂນກັນສ້າງອະນາຄົດພ້ອມກັນ.
ທ່ານຈ່າງອີອູ ຜູ່ຊ່ຽວຊານບັນຫາໂອລິມປິກມະຫາວິທະຍາໄລປັກກິ່ງເຫັນວ່າ, ຄຳຂວັນ "ໂລກໜ່ວຍດຽວກັນ ຄວາມຝັນດຽວກັນ" ນີ້ໄດ້ສະແດງເຖິງຄວາມປາຖະໜາອັນແຮງກ້າຂອງຈີນທີ່ຫວັງຢາກເຊື່ອມໂຍງເຂົ້າກັບໂລກຢ່າງຕັ້ງໜ້າ ຢູ່ຮ່ວມກັນກັບປະຊາຊົນບັນດາປະເທດໃນໂລກໂດຍສັນຕິແລະພັດທະນາຢ່າງກົມກຽວກັນ. ທ່ານເວົ້າວ່າ: ຄຳຂວັນນີ້ມີຈຸດໜັກສອງຂໍ້, ແກນກາງມັນແມ່ນໂລກແລະຄວາມຝັນ, ອັນທີ່ວ່າ "ໂລກໜ່ວຍດຽວກັນ" ໝາຍເຖິງຈີນເປີດປະຕູ, ຢາກຜູກມິດກັບນານາຊາດທົ່ວໂລກ. ອັນທີ່ວ່າ "ຄວາມຝັນດຽວກັນ" ໝາຍເຖິງຈີນກັບໂລກມີຄວາມຄອງຄອຍຮ່ວມຕໍ່ງານກິລາໂອລິມປິກ ແລະຕໍ່ທັດສະນະຄຸນຄ່າທີ່ມະນຸດຮັກຫອມຄື ສັນຕິພາບເປັນຕົ້ນ.
ຄຳຂວັນ "ໂລກໜ່ວຍດຽວກັນ ຄວາມຝັນດຽວກັນ" ນີ້ບໍ່ພຽງແຕ່ຈະເປັນຄຳຂວັນຂອງງານກິລາໂອລິມປິກປັກກິ່ງທໍ່ນັ້ນ ຍັງຈະເປັນຄຳຂວັນງານກິລາໂອລິມປິກຄົນພິການປັກກິ່ງປີ 2008 ອີກດ້ວຍ. ຕາມເຈົ້າໜ້າທີ່ຄະນະກຳມະການຈັດຕັ້ງງານກິລາໂອລິມປິກປັກກິ່ງແນະນຳວ່າ, ແຕ່ວັນທີ 1 ມັງກອນປີນີ້ເປັນຕົ້ນມາ, ຄະນະກຳມະການຈັດຕັ້ງງານກິລາໂອລິມປິກປັກກິ່ງໄດ້ຂໍຄຳຂວັນງານກິລາໂອລິມປິກປີ 2008 ໃນທົ່ວໂລກ, ໃນໄລຍະຂໍຄຳຂວັນອັນສັ້ນໆຄື ພຽງເດືອນໜຶ່ງກໍ່ໄດ້ຮັບຄຳຂວັນ 2 ແສນ 1 ໝື່ນກວ່າປະໂຫຍກ. ຄຳຂວັນເຫຼົ່ານີ້ໄດ້ສະແດງເຖິງປະຊາຊົນຈີນເຊື້ອເຊີນປະຊາຊົນບັນດາປະເທດໃນໂລກຢ່າງກະຕືລືລົ້ນ ແລະກໍສະແດງເຖິງເພື່ອນມິດຕ່າງປະເທດໄດ້ສົ່ງພອນອັນປະເສີດມາຍັງງານກິລາໂອລິມປິກປັກກິ່ງ. ໃນຂະນະດຽວກັນ ຄຳຂວັນເຫຼົ່ານີ້ກໍ່ໄດ້ສ່ອງແສງເຖິງອາລົມຈິດຂອງປະຊາຊົນທີ່ມີເຊື້ອສາຍຕ່າງກັນແລະເຊື່ອຖືຕ່າງກັນໃນໂລກ.
ເດືອນກຸມພາປີນີ້,ພະນັກງານຄະນະກຳມະການຈັດຕັ້ງງານກິລາໂອລິມປິກປັກກິ່ງເລີ່ມຂຸ້ນຂ້ຽວເຮັດວຽກທັງເວັນທັງຄືນ , ຄັດເລືອກເອົາຄຳຂວັນ 800 ກວ່າປະໂຫຍກຈາກ 2 ແສນ 1 ໝື່ນກວ່າປະໂຫຍກ. ພາຍຫຼັງໄດ້ສະຖິຕິຕໍ່ 800 ຄຳຂວັນ ນີ້ແລ້ວໄດ້ເຫັນວ່າ, ຄຳສັບທີ່ປະກົດມີຫຼາຍກວ່າໝູ່ນັ້ນແມ່ນ "ກົມກຽວກັນ" "ຄວາມຝັນ" "ສາມັກຄີ" ແລະ "ການຊົມໃຊ້ພ້ອມກັນ" ເປັນຕົ້ນ. ຄຳສັບເຫຼົ່ານີ້ສອດຄ່ອງກັບຫຼັກໝັ້ນກົມກຽວກັນແລະຊະນະພ້ອມກັນທີ່ຈີນລິເລີ່ມໂດຍຕະຫຼອດໃນປະຊາຄົມໂລກ ແລະແກນກາງທັດສະນະຄຸນຄ່າທີ່ກົມກຽວກັນ ຊົມໃຊ້ພ້ອມກັນທີ່ງານກິລາໂອລິມປິກປັກກິ່ງລິເລີ່ມ.
ໃນຂະນະດຽວກັນ, ຄະນະກຳມະການຈັດຕັ້ງງານກິລາໂອລິມປິກໄດ້ມອບໝາຍໃຫ້ບໍລິສັດປະຊາສຳພັນສາກົນທີ່ມີຊື່ສຽງສາມບໍລິສັດສຳຫຼວດໃນຂອບເຂດທົ່ວໂລກ. ໃນນັ້ນ ບໍສິສັດສາກົນໄຊນາຄຼິກສ໌ທູໃຫ້ຄຳປຶກສາຈຳກັດຫຼື ChinaClicks2 International consulting ແມ່ນໜຶ່ງໃນສາມບໍລິສັດປະຊາສຳພັນທີ່ຄະນະກຳມະການຈັດຕັ້ງງານກິລາໂອລິມປິກປັກກິ່ງມອບໝາຍໃຫ້ສຳຫຼວດ, ທ່ານນາງຊູຊານ ພັດຕິສ CEO ຂອງບໍລິສັດດັ່ງກ່າວກ່າວວ່າ, ການສຳຫຼວດຂອງຄະນະກຳມະການຈັດຕັ້ງງານກິລາໂອລິມປິກປັກກິ່ງທີ່ລະອຽດແລະອວ່າຍໜ້າໄປສູ່ທົ່ວໂລກເຫຼົ່ານີ້, ໄດ້ເສີມຂະຫຍາຍບົດບາດຄົ້ນຄວ້າອັນສຳຄັນຕໍ່ການກຳເນີດຄຳຂວັນໃນທີ່ສຸດ. ທ່ານນາງຊູຊານເວົ້າວ່າ:
ຄະນະກຳມະການຈັດຕັ້ງງານກິລາໂອລິມປິກຂໍໃຫ້ພວກຂ້າພະເຈົ້າສຳຫຼວດຄົ້ນຄວ້າ ຮັບຟັງສຽງໃນທົ່ວໂລກກ່ອນ, ຊອກຮູ້ທັດສະນະຄະຕິທີ່ຄວນສະແດງອອກໃນເວລາຈັດງານກິລາໂອລິມປິກປີ 2008, ມີຄວາມເຫັນແລະມີຄວາມຄອງຄອຍແນວໃດຕໍ່ຈິດໃຈທີ່ຄຳຂວັນງານກິລາໂອລິມປິກຕ້ອງສ່ອງແສງອອກ. ແລ້ວພິຈາລະນາວ່າ ຈະເຊື່ອມໂຍງເຂົ້າກັບອຸດົມການຂອງປະຊາຊາດຈີນແນວໃດ ເຊື່ອມໂຍງເຂົ້າກັບສຽງຮຽກຮ້ອງຂອງພວກຂ້າພະເຈົ້າແລະຄວາມປາຖະໜາຂອງສາມັນຊົນຈີນທຸກຖ້ວນໜ້າແນວໃດ.
ພາຍຫຼັງວຽກງານຂໍຄຳຂວັນແລະສຳຫຼວດສິ້ນສຸດລົງແລ້ວ, ຄະນະກຳມະການຈັດຕັ້ງງານກິລາໂອລິມປິກປັກກິ່ງໄດ້ໃຊ້ເວລາຫຼາຍເດືອນມາຄັດເລືອກແລະປະກວດ, ແລະຂໍຄວາມເຫັນນຳຜູ່ຊ່ຽວຊານຂອງຈີນແລະຂອງຕ່າງປະເທດໃນຂົງເຂດພາສາສາດ ວັດທະນະທຳແລະກິລານັບເປັນຮ້ອຍຄົນ, ໃນທີ່ສຸດໄດ້ຕົກລົງຄຳຂວັນງານກິລາໂອລິມປິກເປັນ "ໂລກໜ່ວຍດຽວກັນ ຄວາມຝັນດຽວກັນ", ໃນຄຳຂວັນທີ່ຂໍໄດ້ນັ້ນບໍ່ມີຄຳໃດເໝືອນກັນກັບຄຳຂວັນນີ້. ສະນັ້ນ ທ່ານລິວສິ ປະທານຄະນະກຳມະການຈັດຕັ້ງງານກິລາໂອລິມປິກປັກກິ່ງຈຶ່ງອຸທານວ່າ, ຄຳຂວັນນີ້ໄດ້ທ້ອນໂຮມສະຕິປັນຍາຂອງຄົນນັບເປັນພັນເປັນໝື່ນ.
ຕໍ່ຄຳຂວັນ "ໂລກໜ່ວຍດຽວກັນ ຄວາມຝັນດຽວກັນ" ນີ້, ທ່ານລອກເກີ ປະທານຄະນະກຳມະການໂອລິມປິກສາກົນໄດ້ຕີລາຄາສູງ, ໃນຈົດໝາຍທີ່ທ່ານຂຽນມາໃຫ້ຄະນະກຳມະການຈັດຕັ້ງງານກິລາໂອລິມປິກປັກກິ່ງນັ້ນ, ທ່ານເວົ້າວ່າ: "ງານກິລາໂອລິມປິກຊຸກຍູ້ສັນຕິພາບ ເພີ່ມຄວາມເຂົ້າໃຈກັນດ້ວຍກິລາ, ມີກຳລັງດຶງດູດເປັນພິເສດ. ຄຳຂວັນງານກິລາໂອລິມປິກປີ 2008 ທີ່ຄະນະກຳມະການຈັດຕັ້ງງານກິລາໂອລິມປິກປັກກິ່ງສະເໜີອອກນັ້ນ ສອດຄ່ອງກັບທາດແທ້ຂອງຈິດໃຈໂອລິມປິກ, ຄະນະກຳມະການໂອລິມປິກສາກົນຮູ້ສຶກປິຕິຊົມຊື່ນ.
|
