ອາຊຽນກັບຈີນ,ຍີ່ປຸນແລະສ.ເກົາຫຼີຈະເພີ່ມທະວີການຮ່ວມມືກັນດ້ານພະລັງງານ
cri
Author: ສຣ
ຕາມຂ່າວ CRI: ວັນທີ 13 ກໍລະກົດ ຢູ່ຊຽມຊຽບແຫ່ງກຳປູເຈຍ ໄດ້ໄຂກອງປະຊຸມລັດຖະມົນຕີພະລັງງານຂອງອາຊຽນຄັ້ງທີ 23 ແລະກອງປະຊຸມລັດຖະມົນຕີພະລັງງານຂອງອາຊຽນກັບຈີນ,ຍີ່ປຸ່ນແລະສ.ເກົາຫຼີຄັ້ງທີສອງ.
ຫົວຂໍ້ສຳຄັນຂອງກອງປະຊຸມແມ່ນເສີມຄວາມໜັກແໜ້ນ,ຄວາມປອດໄພແລະຄວາມສືບເນື່ອງຂອງພະລັງງານ. ບັນດາລັດຖະມົນຕີທີ່ຮ່ວມປະຊຸມເປັນເອກະສັນກັນເຫັນວ່າ,ເພື່ອຮັບມືກັບລາຄານ້ຳມັນເຊື້ອໄຟທີ່ຖີບສູງຂຶ້ນຢ່າງຕໍ່ເນື່ອງ,ບັນດາປະເທດຕ້ອງສ້າງສະພາບແວດລ້ອມການລົງທຶນທີ່ດີກວ່າເກົ່າໃນຂະແໜງການພະລັງງານຂອງພາກພື້ນ,ແລະຊຸກຍູ້ໃຫ້ພະແນກຂອງລັດແລະຂອງເອກະຊົນຮ່ວມມືກັນໃນດ້ານບຸກເບີກນຳໃຊ້ພະລັງຕາເວັນແລະພະລັງງານອື່ນໆ.
ບັນດາລັດຖະມົນຕີທີ່ຮ່ວມປະຊຸມຍັງກ່າວວ່າ,ຈະຢູ່ໃຕ້ຂອບຮ່ວມມືພະລັງງານຂອງອາຊຽນແລະຈີນ,ຍີ່ປຸ່ນ,ສ.ເກົາຫຼີ,ຜ່ານຈາກການຮ່ວມມືໂດຍທົ່ວໄປ,ຫຼຸດຜົນສະທ້ອນຕໍ່ການເຕີບໂຕທາງເສດຖະກິດຍ້ອນຕົ້ນທຶນພະລັງງານເພີ່ມຂຶ້ນ,ພ້ອມກັນນັ້ນ ຕ້ອງຮ່ວມມືກັນຢ່າງແໜ້ນແຟ້ນໃນດ້ານຮັກສາຄວາມໜັກແໜ້ນຂອງຕະຫຼາດພະລັງງານ.
|
|