|
|
 |
| (GMT+08:00)
2005-07-15 20:14:53
|
 |
|
ຈີນຕັ້ງໜ້າຍົກຄວາມສາມາດຄົ້ນຄວ້າຜະລິດຢຸກປາໃໝ່ໃຫ້ສູງຂຶ້ນ
cri
Author: li
 ເພື່ອຕອບສະໜອງຄວາມຕ້ອງການດ້ານສຸຂະພາບຂອງສາທາລະນະຊົນແລະຄວາມຕ້ອງການຂອງການພັດທະນາອຸດສາຫະກຳຢຸກຢາ,ໃນຫຼາຍປີມານີ້ ຈີນໄດ້ເພີ່ມຄວາມແຮງເຂົ້າໃນການສະໜັບສະໜູນການຄົ້ນຄວ້າແລະພັດທະນາຢຸກຢາໃໝ່,ຢຸກຢາໃໝ່ສຳລັບປົວພະຍາດສຳຄັນງວດໜຶ່ງໄດ້ຄົ້ນຄວ້າຜະລິດອອກມາແລ້ວ.
ການຄົ້ນຄວ້າພັດທະນາຢຸກຢາແມ່ນຂະບວນການທີ່ສັບສົນແລະຍາວນານ,ຕ້ອງການເງິນທຶນຢ່າງຫຼວງຫຼາຍ,ອຸປະກອນພ້ອມດ້ວຍພະນັກງານຄົ້ນຄວ້າທີ່ມີລະດັບສູງ.
ໃນເວລາຫາກໍ່ສະຖາປະນາປະເທດຈີນໃໝ່,ກຳລັງແຫ່ງຊາດບອບບາງ,ເຕັກນິກຫຼ້າຫຼັງ,ເພື່ອສຸຂະພາບຂອງສາທາລະນະຊົນຫຼາຍຮ້ອຍລ້ານຄົນ,ຈີນໄດ້ເດີນຕາມເສັ້ນທາງລອກແບບໃນດ້ານພັດທະນາຢຸກຢາ. ເມື່ອເປັນແນວນີ້ ຈີນຈຶ່ງມີຢຸກຢາຫຼາຍຢ່າງສຳລັບປິ່ນປົວພະຍາດທີ່ມີຄົນູເປັນຫຼາຍເຊັ່ນຢາຕ້ານເຊື້ອເປັນຕົ້ນ,ອັນໄດ້ຍົກລະດັບສຸກຂະພາບຂອງປະຊາຊົນໃຫ້ສູງຂຶ້ນ.
ໃນ 20 ກວ່າປີມານີ້ ເສດຖະກິດຈີນໄດ້ພັດທະນາຢ່າງສືບເນື່ອງແລະວ່ອງໄວ,ກຳລັງແຫ່ງຊາດແຂງແຮງຂຶ້ນຢ່າງເດັ່ນຊັດ,ວິທະຍາສາດເຕັກນິກກໍໄດ້ມີຄວາມກ້າວໜ້າຢ່າງມະຫາສານ, ໃຕ້ສະຖານະການໃຫຍ່ດັ່ງກ່າວ,ລັດຖະບານຈີນນັບມື້ນັບເອົາໃຈໃສ່ນຳວຽກງານຄົ້ນຄວ້າພັດທະນາຢຸກຢາ. ປີ 2000 ກະຊວງວິທະຍາສາດເຕັກໂນໂລຢີຈີນໄດ້ສ້າງຕັ້ງໂຄງການຄົ້ນຄວ້າຢຸກຢາໃໝ່ສຳຄັນລາຍຈຳເພາະຄື,ໄລຍະປະຕິບັດ 5 ປີ. ທ່ານວາງສຽວຟ່າງ ເຈົ້າໜ້າທີ່ກະຊວງວິທະຍາສາດເຕັກໂນໂລຢີຈີນແມ່ນຜູ້ຮັບຜິດຊອບຜູ້ໜຶ່ງຂອງໂຄງການຈຳເພາະດັ່ງກ່າວ,ທ່ານແນະນຳວ່າ:
"ຈຸດປະສົງຂອງການສ້າງຕັ້ງໂຄງການຈຳເພາະດັ່ງກ່າວແມ່ນເພື່ອສ້າງຕັ້ງ ໃນເບື້ອງຕົ້ນແລະປົວແປງລະບົບຄົ້ນຄວ້າພັດທະນາຢຸກຢາໃໝ່ຢ່າງເປັນເຈົ້າການຂອງຈີນ,ພັດທະນາຜະລິດຕະພັນໃໝ່ດ້ານຢຸກຢາທີ່ມີສິດຊັບສິນທາງປັນຍາຂອງຕົນງວດໜຶ່ງ,ຊຸກຍູ້ການຄົ້ນຄວ້າພັດທະນາຢຸກຢາໃໝ່ຂອງຈີນຈາກການລອກແບບຫັນໄປສູ່ການປະດິດສ້າງ."
ຜູ້ຮັບຜິດຊອບຜູ້ນີ້ເວົ້າວ່າ,ເພື່ອປະຕິບັດໂຄງການຄົ້ນຄວ້າສຳຄັນລາຍຈຳເພາະ"ຢຸກຢາໃໝ່",ພຽງແຕ່ລັດຖະບານຂອງຈີນກໍໄດ້ລົງທຶນ 800 ລ້ານຢວນ,ຢຸກຢາທີ່ໄດ້ຮັບການສະໜັບສະໜູນເປັນຈຸດໜັກໃນການພັດທະນານັ້ນຕົ້ນຕໍໃຊ້ເຂົ້າໃນການປິ່ນປົວພະຍາດທີ່ມີຄົນເປັນຫຼາຍແລະມີຜົນຮ້າຍໜັກໜ່ວງຢູ່ຈີນ; ໃນການຄົ້ນຄວ້າໄດ້ໃຊ້ຮູບການທີ່ອົງການຄົ້ນຄວ້າວິທະຍາສາດຮ່ວມມືກັບວິສາຫະກິດຜະລິດຢຸກຢາ. ເມື່ອໄດ້ພະຍາຍາມ 4 ປີປາຍແລ້ວ,ວຽກງານຄົ້ນຄວ້າທຸກລາຍຂອງໂຄງການຈຳເພາະໄດ້ດຳເນີນໄປຢ່າງສະດວກ,ແລະໄດ້ຮັບໝາກຜົນສຳຄັນ,ໄດ້ເດີນຕາມເສັ້ນທາງພັດທະນາຢຸກຢາໃໝ່ທີ່ລົງທຶນໜ້ອຍແລະເຫັນຜົນໄວ. ຕາມສະຖິຕິ,ໃນການປະຕິບັດໂຄງການຈຳເພາະຄົ້ນຄວ້າຢຸກຢກໃໝ່,ໄດ້ມີ 22 ຊະນິດໄດ້ຮັບໃບຢັ້ງຢືນຢຸກຢາໃໝ່ແລະໃບອະນຸຍາດໃຫ້ຜະລິດ; ນອກນີ້ ຍັງມີ 140 ກວ່າຊະນິດພວມທົດລອງຫຼືໄດ້ສຳເລັດວຽກງານຄົ້ນຄວ້າທັງໝົດ,ພວມຮ້ອງຂໍໃບຢັ້ງຢືນຢຸກຢາໃໝ່.
ຕົວຢ່າງຄື,ຢາທ້າຍຊິ່ນເຊິ່ງແມ່ນຢາປົວມະເຮັງທີ່ຫາກໍ່ໄດ້ຮັບໃບຢັ້ງຢືນຢຸກຢາໃໝ່. ທ່ານປາຍຊ່ຽນຮົງ ຜູ້ອຳນວຍການໃຫຍ່ຂອງບໍລິສັດຜະລິດຢາຊີວະຊາດປາຍໄທ້ຈຳກັດທີ່ຄົ້ນຄວ້າຜະລິດຢາດັ່ງກ່າວເວົ້າວ່າ,ຢາທ້າຍຊິ່ນເຊິ່ງແມ່ນຢາຊະນິດໜຶ່ງທີ່ພັດທະນາດ້ວຍເຕັກນິກຊີວະຊາດທັນສະໄໝໂດຍສັງລວມ,ສາມາດຍົກອັດຕາປົວຫາຍໂຣກມະເຮັງໃຫ້ສູງຂຶ້ນຢ່າງເດັ່ນຊັດ. ທ່ານເວົ້າວ່າ:
"ເມື່ອຢານີ້ເຂົ້າໃນຮ່າງກາຍແລ້ວ,ຈະປະສານກັບຈຸລັງຊີ້ນປົ່ງຢ່າງມີການເລືອກເຟັ້ນ,ຕໍ່ຈຸລັງອື່ນໆ,ພັດມີຜົນທາງລົບໜ້ອຍຫຼືເກືອບບໍ່ມີ. ປັດຈຸບັນ ເມື່ອເບິ່ງຈາກການທົດລອງປິ່ນປົວມະເຮັງໃນດັງແລະຄໍທີ່ພວກເຮົາພວມດຳເນີນນັ້ນເຫັນວ່າ,ໃຊ້ຢານີ້ຊະນິດດຽວ,ບໍ່ຕ້ອງປິ່ນປົວດ້ວຍແອກສ໌ເລ,ທັງບໍ່ຕ້ອງປິ່ນປົວດ້ວຍເຄມີ,ກໍຈະໄດ້ຮັບຜົນດີຫຼາຍ. ສະນັ້ນ ຢານີ້ແມ່ນຢາທີ່ມີອະນາຄົດດີຫຼາຍໃນການນຳໃຊ້."
"ຢາສັກສະເຕໂລຄີນາສ໌ໃຊ້ສຳລັບສັກຢາ"ແມ່ນໂຮງງານຜະລິດຢາຫຼັງໜຶ່ງຂອງແຂວງຈິລີນພາກຕາເວັນອອກສຽງເໜືອ ແຫຼ່ງຜະລິດຢາທີ່ສຳຄັນຂອງຈີນກັບອົງການຄົ້ນຄວ້າວິທະຍາສາດຮ່ວມກັນຄົ້ນຄວ້າຜະລິດ. ທ່ານນາງຫຼີປິ່ນ ຮອງເຈົ້າແຂວງແຂວງຈີລີນໄດ້ເອົາໃຈໃສ່ນຳການຄົ້ນຄວ້າພັດທະນາຢາໃໝ່ດັ່ງກ່າວຕະຫຼອດມາ,ນາງເວົ້າວ່າ:
"ໃນຫຼາຍປີມານີ້ ອົງການປົກຄອງແຂວງແລະອົງການປົກຄອງທຸກຂັ້ນຂອງແຂວງຈີລິນລ້ວນແຕ່ອອກແຮງສະໜັບສະໜູນຂ້ຽວເລັ່ງວຽກງານຄົ້ນຄວ້າພັດທະນາຢາໃໝ່,ປັດຈຸບັນ,ຢາສັກສະເຕໂລຄີນາສ໌ໃຊ້ສຳລັບສັກຢາໄດ້ເລີ່ມຜະລິດແລ້ວ."
ໃນຂະນະທີ່ພັດທະນາຢາໃໝ່ງວດໃຫຍ່,ໂຄງການຈຳເພາະສຳຄັນກ່ຽວກັບຢຸກຢາໃໝ່ຍັງໄດ້ແນໃສ່ເຕັກນິກສຳຄັນໃນການຄົ້ນຄວ້າພັດທະນາຢຸກຢາໃໝ່,ພະຍາຍາມສ້າງແທ່ນສຳລັບປະດິດສ້າງຢາໃໝ່ແລະລະບົບຄົ້ນຄວ້າພັດທະນາທີ່ສອດຄ່ອງກັບສະພາບແຫ່ງຊາດຂອງຈີນ,ໄດ້ສ້າງແທ່ນເຕັກນິກ 9 ປະເພດເຊັ່ນຄັດເລືອກຢຸກຢາໃໝ່,ປະເມີນຄວາມປອດໄພກ່ອນໃຊ້ປິ່ນປົວ,ແລະການຄົ້ນຄວ້າການທົດລອງເປັນຕົ້ນ,ເຮັດໃຫ້ຄວາມສາມາດຄົ້ນຄວ້າພັດທະນາຢຸກຢາໃໝ່ຂອງຈີນໄດ້ຍົກສູງຂຶ້ນຢ່າງເດັ່ນຊັດ. ທ່ານລິວອ້ຽນຮວາ ຮອງລັດຖະມົນຕີກະຊວງວິທະຍາສາດເຕັກໂນໂລຢີຈີນຊີ້ອອກວ່າ:
"ຈີນໄດ້ພະຍາຍາມມາຫຼາຍປີແລ້ວໃນດ້ານພັດທະນາຢຸກຢາ,ໄດ້ສ້າງສະພາບແວດລ້ອມຂ້ອນຂ້າງດີ,ສ້າງແທ່ນຄົ້ນຄວ້າພັດທະນາ,ລົງທຶນນັບມື້ນັບຫຼາຍ,ທັງໝົດເຫຼົ່ານີ້ໄດ້ເຮັດໃຫ້ຄວາມສາມາດພັດທະນາຢຸກຢາຂອງຈີນຂຶ້ນຂັ້ນໄດໃໝ່."
|
|
|
