|
ການປ້ອງກັນເມົາແດດໃນລະດູຮ້ອນຕ້ອງໃຊ້ນ້ຳກ່ອນ
cri
Author: li
 ນ້ຳແມ່ນເຄື່ອງດື່ມແກ້ຮ້ອນທີ່ດີກວ່າໝູ່ໃນຍາມຮ້ອນ,ແລະກໍແມ່ນວັດຖຸສຳຄັນໃນການຮັກສາການຂັບຖ່າຍ,ປັບອຸນຫະພູມຮ່າງກາຍ,ສົ່ງທາດບຳລຸງ,ຊຸກຍູ້ການລະບາຍຂອງເສຍແລະທາດເບື່ອອອກຈາກຮ່າງກາຍ. ຄັນຊັ້ນ ໃນຍາມຮ້ອນຈັດ,ຄົນເຮົາຄວນກິນນ້ຳແນວໃດ?
ໃນລະດູຮ້ອນ,ອາກາດອົບເອົ້າ,ຄົນເຮົາຈະມີເຫື່ອອອກຫຼາຍ,ນ້ຳໃນຮ່າງກາຍສິ້ນເປືອງຫຼາຍທີ່ສຸດ,ຖ້າບໍ່ເພີ່ມນ້ຳຢ່າງທັນການ,ມັກຈະມີອາການຂາດນ້ຳລັກສະນະສະລີລະສາດ,ພາໃຫ້ອຸນຫະພູມຮ່າງກາຍສູງຂຶ້ນ,ອິດເມື່ອຍ,ໂຮຍແຮງແລະເລືອດເຂັ້ມຂຸ້ນເຂົ້າ,ມັກພາໃຫ້ເປັນພະຍາດຕ່າງໆເຊັ່ນເລືອດດັນສູງແລະສາຍເລືອດໃນສະໝອງຕັນເປັນຕົ້ນ,ພ້ອມກັນນັ້ນ ຍັງອາດຈະພາໃຫ້ທ້ອງຜູກ. ສະນັ້ນ ຄົນເຮົາຄວນກິນນ້ຳເລື້ອຍໆ,ຢ່າຖ້າໃຫ້ຈົນຄໍແຫ້ງແລ້ວຈຶ່ງໄປຫານ້ຳກິນ. ທ່ານຄວນຈື່ໄວ້ວ່າ,ການກິນນ້ຳເລື້ອຍໆແມ່ນຄວາມຊິນເຄີຍທີ່ດີ.
ບາງຄົນຈົນຮູ້ສຶກຫິວນ້ຳແຮງ,ຈຶ່ງຄິດໄປກິນນ້ຳຫຼືກິນເຄື່ອງດື່ມອື່ນໆ,ແລະກືນເອົາອຶກໆບາດດຽວ. ວິທີກິນນ້ຳແບບຮ່າຍເອົາແບບນີ້ ນອກຈາກຮູ້ສຶກໜຳໃຈຊົ່ວໄລຍະໜຶ່ງແລ້ວ,ຕໍ່ສຸຂະພາບຂອງຄົນມີແຕ່ຜົນຮ້າຍບໍ່ມີຜົນດີຫຍັງເລີຍ. ເພາະວ່າກິນນ້ຳແບບນີ້ຈະເພີ່ມການຫາບແບກໃຫ້ແກ່ຫົວໃຈຢ່າງກະທັນຫັນ,ເຮັດໃຫ້ເລືອດຈາງລົງໄວເກີນໄປ,ຄວາມເຂັ້ມຂຸ້ນຂອງເລືອດຫຼຸດຕ່ຳລົງໃນບາດດຽວ,ຈະພາໃຫ້ເກີດອາການທີ່ບໍ່ດີຕ່າງໆເຊັ່ນໃຈສັ່ນ ແລະວິນຫົວເປັນຕົ້ນ; ຍັງອາດຈະເຮັດໃຫ້ນ້ຳກົດກະເພາະຈາງລົງກະທັນຫັນ,ທຳລາຍເຈ້ຍເມືອກກະເພາະ,ກະທົບກະເທືອນຄວາມຢາກກິນເຂົ້າແລະສັບພະຄຸນຍ່ອຍອາຫານທີ່ເປັນປົກກະຕິຂອງກະເພາະ; ພ້ອມກັນນັ້ນ ການກິນນ້ຳໄວເກີນໄປ,ຮ່າງກາຍຮັບເອົາບໍ່ທັນ,ຈຶ່ງບໍ່ສາມາດແກ້ຫິວນ້ຳ,ຍັງຈະພາໃຫ້ເຫື່ອອອກຫຼາຍ,ເຮັດໃຫ້ບໍ່ສະບາຍ. ສະນັ້ນ ໃນເວລາກິນນ້ຳຍາມທຳມະດາ,ຄວນກິນຫຼາຍເທື່ອ,ປະລິມານໜ້ອຍ,ກິນຊ້າແດ່,ລະວັງບໍ່ໃຫ້ກິນໄວກິນຫຼາຍບາດດຽວ.
ໃນຍາມຮ້ອນເຫື່ອອອກຫຼາຍ,ບໍ່ພຽງແຕ່ເຮັດໃຫ້ນ້ຳໃນຮ່າງກາຍເສຍຫາຍຫຼາຍທໍ່ນັ້ນ,ແລະພາໃຫ້ເກືອ,ວິຕາມິນແລະພາໃຫ້ຈຸນລະທາດຕ່າງໆເຊັ່ນກາລີແລະມາເຍຊີອົມເປັນຕົ້ນລະບາຍອອກ. ຖ້າໃສ່ເກືອໜ້ອຍໜຶ່ງໃນນ້ຳກິນ,ທຳມະດາແລ້ວນ້ຳລິດໜຶ່ງໃສ່ເກືອ 2 ກຼາມ,ກໍສາມາດເຮັດໃຫ້ຮ່າງກາຍຮັກສາທາດນ້ຳໄວ້,ທັງແກ້ຫິວ. ແຕ່ວ່າ,ການກິນນ້ຳຊາກໍແມ່ນວິທີທີ່ດີສົມຄວນ,ຍາມຮ້ອນກິນນ້ຳຊາເລື້ອຍໆນອກຈາກສາມາດເພີ່ມທາດນ້ຳ,ວິຕາມິນແລະວັດຖຸອື່ນໆທີ່ຮ່າງກາຍຄົນເຮົາຕ້ອງການແລ້ວ,ຍັງມີບົດບາດແກ້ຫິວນ້ຳ,ເຮັດໃຫ້ສົດຊື່ນແລະຂັບຖ່າຍທາດເບື່ອອອກຈາກຮ່າງກາຍເປັນຕົ້ນ. ແຕ່ກິນນ້ຳຊາກໍຕ້ອງລະວັງຄື: ຄວນກິນຊາຈືດ,ບໍ່ຄວນກິນປຸກຫຼາຍ,ນ້ຳກໍບໍ່ໃຫ້ຮ້ອນເກີນໄປ;ເທື່ອໜຶ່ງຢ່າກິນຫຼາຍໂພດ; ອີກດ້ານໜຶ່ງຄືດີທີ່ສຸດຢ່າກິນນ້ຳຊາກ່ອນນອນ.
ຜູ້ຊ່ຽວຊານເຫັນວ່າ,ຜູ້ໃຫຍ່ທີ່ສຸຂະພາບແຂງແຮງ,ນ້ຳທີ່ຮັບຈາກອາຫານແລະເຄື່ອງດື່ມຕ່າງໆໃນແຕ່ລະມື້ຄວນມີປະມານ 2500 ມີລີລິດ, ນອກນີ້ ຍັງຄວນກິນນ້ຳອີກ 6 ຈອກຮອດ 8 ຈອກຕໍ່ມື້,ຈຶ່ງສາມາດຮັບປະກັນໃຫ້ນ້ຳທີ່ຕ້ອງການໃນທຸກມື້ດຸນດ່ຽງກັນໃນຂັ້ນພື້ນຖານ; ຖ້າແມ່ນຄົນຕຸ້ຍເກີນ,ເກີນນ້ຳໜັກ 11,24 ກິໂລ,ໃຫ້ກິນນ້ຳເພີ່ມອີກຈອກໜຶ່ງ.
ນອກນີ້ ກິນນ້ຳໃນເວລາຕື່ນເຊົ້າຍັງມີບົດບາດປ້ອງກັນພະຍາດອີກ. ຫຼັງຈາກຕື່ນນອນແລ້ວ,ກິນນ້ຳສອງຈອກໃນເວລາທ້ອງເປົ່າ,ທັງສາມາດຕາບຈູນນ້ຳໃນຮ່າງກາຍ,ທັງສາມາດຫຼຸດຄວາມຂຸ້ນຂອງເລືອດ,ຊຸກຍູ້ການລະບາຍຂອງເສຍແລະທາດເບື່ອໃນຮ່າງກາຍ,ມີບົດບາດສຳຄັນທີ່ສຸດຕໍ່ການປ້ອງກັນເກີດພະຍາດສາຍເລືອດຫົວໃຈແລະສະໝອງແລະພະຍາດລະບົບປັດສາວະ. ໃນຍາມຮ້ອນ,ຍຶດໝັ້ນກິນນ້ຳເຢັນໃນເວລາທ້ອງເປົ່າໃນຕອນເຊົ້າມີຜົນປະໂຫຍດຫຼາຍຕໍ່ສຸຂະພາບ.
|
|
