|
|
 |
| (GMT+08:00)
2005-07-19 17:01:34
|
 |
|
ແຜ່ນຊີດີ"ກຸຫຼາບແດງ"ຂອງວົງດົນຕີເຈິ້ງອູຢາງກວ່າງ
cri
"ເຈິ້ງອູຢາງກວາງ"ແມ່ນວົງດົນຕີໃໝ່ເທິງເວທີດົນຕີດັ້ງເດີມຂອງແຜ່ນດິນໃຫຍ່ຈີນ, ໃນທ້າຍປີ2004, ພວກເຂົາເຈົ້າໄດ້ສະເໜີປະມວນເພງ"ກຸຫຼາບແດງ" ເຊິ່ງເປັນແຜ່ນຊີດີເພງເດີມ ແຜ່ນທຳອິດ. ໃນລາຍການມື້ນີ້, ຂ້າພະເຈົ້າຈະສະເໜີວົງດົນຕີ"ເຈິ້ງອູຢາງກວາງ"ແລະແຜ່ນຊີດີແຜ່ນນີ້ຂອງພວກເຂົາເຈົ້າສູ່ທ່ານຟັງ.
ທີ່ທ່ານພວມຟັງຢູ່ນີ້ແມ່ນເພງອົວຄ່າຍສືອຽວກຸນເລີ່ແປວ່າ"ຂ້ອຍເລີ່ມເຕັ້ນລອກແອນໂລນແລ້ວ. ນີ້ແມ່ນເພງຈັງຫວະລອກແອນໂລນ, ເປັນເພງແບບເລົ່າປະສົບການຄວາມເຕີບໂຕຂອງເດັກຊາຍທຳມະດາຜູ້ໜຶ່ງທີ່ຮັກຫອມດົນຕີລອກແອນໂລນ. "ເຈິ້ງອູຢາງກວ່າງ"ຢາກບອກໃຫ້ແຟນເພງວ່າ, ຊາວໜຸ່ມຄວນມີຄວາມໝັ້ນໃຈແລະຄວາມກ້າຫານໄປເຮັດເລື່ອງທີ່ຕົນຢາກເຮັດ, ຢ່າໄປຕາມປ່ອງລ່ອງຕາມແປວ.
ໃນລະດູຮ້ອນປີ1996, ໃນງານດົນຕີດັ້ງເດີມເທື່ອໜຶ່ງທີ່ຈັດຂຶ້ນຢູ່ນະຄອນທຽນສິນ ຕົວເມືອງພາກເໜືອຂອງຈີນ, ວົງດົນຕີໜຶ່ງທີ່ຄົນທັງຫຼາຍບໍ່ເຄີຍຮູ້ມາກ່ອນນັ້ນໄດ້ປະກົດຕົວຢູ່ເທິງເວທີ, ການສະແດງອັນດີເດັ່ນຂອງພວກເຂົາເຈົ້າໄດ້ຮັບຄວາມຊົມເຊີຍຈາກສຽງຕົບມືອັນຟົດສະໜັ່ນຫວັນໄຫວຂອງຜູ້ຊົມ, ນີ້ກໍແມ່ນວົງດົນຕີ"ເຈິ້ງອູຢາງກວ່າງ", ມີສະມາຊິກ5ຄົນນຳກັນເຊັ່ນ: ທ່ານວາງປາວ ນັກຮ້ອງ, ທ່ານເມີ້ງຟານຮ້າວ ມືກິດຕາ, ທ່ານຢາງໂປນັກບີດເບສ, ມືຄີບອດທ່ານມາເຄີແລະທ່ານເອີລົງມືກອງ, ເຖິງວ່າພວກເຂົາເຈົ້າອາຍຸຕ່າງກັນແລະນິດໄສກໍຕ່າງກັນ, ແຕ່ພັດໄດ້ມາໂຮມກັນຍ້ອນຄວາມຮັກຫອມດົນຕີ.
ຫຼັງການສະແດງເທື່ອນັ້ນແລ້ວ, ວົງດົນຕີ"ເຈິ້ງອູຢາງກວ່າງ"ກໍໄດ້ສະແດງຢູ່ເທິງເວທີຂອງໂຮງຮຽນຊັ້ນສູງແລະບາເຫຼົ້າຕ່າງໆຂອງທຽນສິນຕະຫຼອດມາ, ແລະໄດ້ກາຍເປັນວົງດົນຕີທີ່ມີຊື່ສຽງໃນນະຄອນທຽນສິນ. ແຕ່ພວກເຂົາເຈົ້າບໍ່ໄດ້ພໍໃຈຕໍ່ຕົນເອງ. ປີ2000, ວົງດົນຕີນີ້ໄດ້ມາປັກກິ່ງ, ປີ2003, ໃນເວລາທ່ານເສຊຸນ ນັກຮ້ອງຜູ້ໜຶ່ງເຮັດແຜ່ນຊີດີທີ່ໃຫ້ຊື່ວ່າສວນຊື້ກ່າວເຄີຈີ້ ແປວ່າລ້ວນແຕ່ແມ່ນໄຮເຕັກທັງໝົດ, ໄດ້ຮູ້ຈັກກັບວົງດົນຕີນີ້, ຍ້ອນວ່າມັກເພງຂອງພວກເຂົາເຈົ້າຫຼາຍ, ທ່ານເລີຍໄດ້ຈັດເອົາເພງ"ອົວຄ່າຍສືອຽວກຸນເລີ່" ແປວ່າຂ້ອຍເລີ່ມເຕັ້ນລອກແອນໂລນແລ້ວຂອງພວກເຂົາເຈົ້າເຂົ້າໃນແຜ່ນຊີດີຂອງຕົນ, ແລະແນະນຳໃຫ້ພວກເຂົາເຈົ້າເຊັນສັນຍາກັບບໍລິສັດແຜ່ນສຽງ"ເຊິ້ງຊື້ຊິງສາຍ"ທີ່ຕົນສັງກັດ. ເມື່ອໄດ້ກະກຽມຢ່າງພຽນໃຈປີໜຶ່ງແລ້ວ, ໃນທ້າຍປີ2004, ວົງດົນຕີ"ເຈິ້ງອູຢາງກວາງ"ໄດ້ສະເໜີແຜ່ນຊີດີ"ຫົງຊຽງເວີ້ນ" ແປວ່າກຸຫຼາບແດງເຊິ່ງເປັນແຜ່ນຊີດີແຜ່ນທຳອິດຂອງພວກເຂົາເຈົ້າ.
ໃນ11ເພງໃນແຜ່ນຊີດີກຸຫຼາບແດງ, ມີ9ເພງແມ່ນທ່ານວາງປາວ ນັກຮ້ອງເອກເປັນຜູ້ແຕ່ງເນື້ອຮ້ອງສ່ວນນົດເພງທັງໝົດ, ແມ່ນສະມາຊິກວົງດົນຕີແຕ່ງນຳກັນ, ເຮັດໃຫ້ຫົວຂໍ້ຂອງເພງໃນແຜ່ນຊີດີແຜ່ນນີ້ເປັນເອກະພາບກັນແຕ່ມີທຳນອງຫຼາຍສີຫຼາຍສັນ. ຕໍ່ໄປເຊີນທ່ານຟັງເພງອົວຮາຍຊື້ໂຈວປ່າ ແປວ່າໃຫ້ຂ້ອຍໜີຈະດີກວ່າ
"ບໍ່ເຮັດລອກແອນໂລນປອມ, ຂໍແຕ່ແມ່ນເພງສະໄໝນິຍົມແທ້ໆ"ນີ້ກໍແມ່ນເປົ້າໝາຍດົນຕີຂອງວົງດົນຕີ"ເຈິ້ງອູຢາງກວ່າງ", ໃນເວລາໃຫ້ສຳພາດທ່ານວາງປາວ ນັກຮ້ອງເວົ້າວ່າ:"ໃນເວລາຈັດຕັ້ງວົງດົນຕີນັ້ນ, ກໍແມ່ນເພື່ອໃຫ້ດົນຕີດັ້ງເດີມມີສຽງຕ່າງກັນຫຼາຍແດ່, ບໍ່ວ່າຈະເປັນຮູບແນວໃດ, ຂໍໃຫ້ມ່ວນກໍເປັນພໍ." ຈຸດປະສົງໃນການແຕ່ງເພງຂອງພວກເຂົາເຈົ້າແມ່ນງ່າຍດາຍທີ່ສຸດ, ບໍ່ມີປັດໄຈທາງການຄ້າ, ມີແຕ່ຄວາມນຶກຄິດໃນໃຈເທົ່ານັ້ນ, ນີ້ກໍແມ່ນສະເໜຂອງວົງດົນຕີ"ເຈິ້ງອູຢາງກວ່າງ".
ເພງອູຊູ້ເຂີຊີ້ ແປວ່າ ບໍ່ມີບ່ອນໄປ ກໍແມ່ນເພງລອກແອນໂລນສະໄໝນິຍົມໃນປະມວນເພງດັ່ງກ່າວ, ເນື້ອເພງແມ່ນເວົ້າເລື່ອງຈາກບ້ານໄປແລະກັບເມືອບ້ານ. "ບ້ານ"ແມ່ນຫົວຂໍ້ຖາວອນເທິງເວທີເພງສະໄໝນິຍົມຂອງຈີນຕະຫຼອດມາ, ສ່ວນການບັນລະຍາຍຫົວຂໍ້ດັ່ງກ່າວຂອງວົງດົນຕີ"ເຈິ້ງອູຢາງກວ່າງ"ຍິ່ງໄດ້ສະແດງເຖິງອາລົມຈິດຂອງເຂົາເຈົ້າໂດຍກົງ. ເນື້ອເພງມີຢູ່ວ່າ: ຂ້ອຍມັກໄປບ່ອນທີ່ມີຄົນຫຼາຍ, ເພາະຂ້ອຍຢ້ານໂດດດ່ຽວທີ່ສຸດ, ຂ້ອຍຕ້ອງການຕະກຽງດວງໜຶ່ງແລະເພື່ອນຫຼາຍຄົນ." ໃນຝູງຄົນທີ່ຊຸມແຊວນັ້ນຍັງຮູ້ສຶກໂດດດ່ຽວປ່ຽວພອຍູ, ນີ້ກໍແມ່ນການສ່ອງແສງໃຫ້ເຫັນຈິດໃຈຂອງຝູງຄົນໃນຕົວເມືອງທັນສະໄໝ.
ເພງລອກແອນໂລນຂອງວົງດົນຕີ"ເຈິ້ງອູຢາງກວ່າງ"ໄດ້ລະດົມໃຈໃຫ້ມີຈິດໃຈປອດໃສ, ແຕ່ໃນຊີດີແຜ່ນນີ້, ກໍມີເພງທີ່ອ່ອນໂຍນຄືກັນ.
ທີ່ທ່ານພວມຟັງຢູ່ນີ້ແມ່ນເພງຫົງສຽງເວີ່ຍ ກຸຫຼາບແດງ ເພງເອກໃນຊີດີແຜ່ນນີ້, ແມ່ນເພງທີ່ທ່ານວາງປາວມອບໃຫ້ທ່ານມາຊານລີ ສິລະປິນເວົ້າຕະຫຼົກທີ່ມີຊື່ສຽງຂອງຈີນທີ່ໄດ້ລ່ວງລັບໄປແລ້ວ. ເພງນີ້ມີທຳນອງໂສກເສົ້າບວກກັບສຽງສີແຫບໆຂອງທ່ານວາງປາວ, ໄດ້ສ້າງ
ບັນຍາກາດອັນທຸກລະທົມໃຫ້ແກ່ເພງນີ້.ມ້ວນທ້າຍລາຍການມື້ນີ້, ເຊີນຟັງເພງ"ຊິ່ວຮາຍຈື"ແປວ່າເດັກນ້ອຍໃນລະດູໃບໄມ້ຫຼົ່ນ ທີ່ຂັບຮ້ອງໂດຍວົງດົນຕີ"ເຈິ້ງອູຢາງກວ່າງ", ກີຕາແບບອັງກິດໄດ້ເສບທຳນອງໃໝ່ໆທີ່ສົດຊື່ນ, ບວກກັບສຽງວີໂອລົງແລະສຽງກອງແລ້ວ, ກະຕຸ້ນໃຈຄົນທີ່ສຸດ.
|
|
|
