|
ສະບາຍດີທ່ານຜູ່ຟັງທີ່ໂຄລົບ, ແຕ່ວັນທີ 17 ຮອດວັນທີ 31 ກໍລະກົດນີ້, ງານແຂ່ງຂັນລອຍນ້ຳຊິງຊະນະເລີດໂລກຄັ້ງທີ 11 ຈະຈັດຂຶ້ນຢູ່ມົງເຣອານແຫ່ງການາດາ, ຈີນຈະແຕ່ງນັກກິລາ 71 ຄົນໄປເຂົ້າຮ່ວມງານແຂ່ງຂັນເທື່ອນີ້, ໃນລາຍການໂລກກິລາພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ຄະນະນັກກິລາລອຍນ້ຳຈີນເຂົ້າຮ່ວມງານແຂ່ງຂັນລອຍນ້ຳຊິງຊະນະເລີດໂລກ.
ວັນທີ 5 ກໍລະກົດນີ້, ສູນລອຍນ້ຳກົມໃຫຍ່ກິລາແຫ່ງຊາດຈີນໄດ້ປະກາດບັນຊີລາຍຊື່ນັກກິລາຈີນທີ່ຈະເຂົ້າຮ່ວມງານແຂ່ງຂັນລອຍນ້ຳຊິງຊະນະເລີດໂລກທີ່ມົງເຣອານ, ຄະນະຜູ່ແທນຈີນປະກອບດ້ວຍ 121 ຄົນ, ໃນນັ້ນມີນັກກິລາ 71 ຄົນ, ແມ່ນຫຼາຍກວ່າທຸກຄັ້ງທີ່ຈີນແຕ່ງໄປເຂົ້າຮ່ວມງານແຂ່ງຂັນລອຍນ້ຳຊິງຊະນະເລີດໂລກ. ໃນງານແຂ່ງຂັນລອຍນ້ຳຊິງຊະນະເລີດໂລກຄັ້ງນີ້, ຄະນະນັກກິລາຈີນຈະເຂົ້າຮ່ວມການແຂ່ງຂັນ 4 ປະເພດໃຫຍ່ ຄື ລອຍນ້ຳ ໂດດນ້ຳ ລອຍນ້ຳແບບລວດລາຍແລະບານນ້ຳ, ໃນນັ້ນ ບານນ້ຳເພດຍິງແມ່ນເຂົ້າຮ່ວມງານແຂ່ງຂັນຊິງຊະນະເລີດໂລກຄັ້ງທຳອິດ.
ໃນງານແຂ່ງຂັນຊິງຊະນະເລີດໂລກເທື່ອນີ້, ສູນລອຍນ້ຳຈີນບໍ່ໄດ້ວາງຄາດໝາຍຊິງເອົາຫຼຽນຄຳຈັກຫຼຽນຕໍ່ນັກກິລາຈີນ, ຫາກໄດ້ເນັ້ນໜັກວ່າ ການແຂ່ງຂັນເທື່ອນີ້ ຕ້ອງຖືເອົາການຝຶກແອບນັກກິລາເພື່ອງານກິລາໂອລິມປິກປັກກິ່ງປີ 2008 ແລະສ້າງນັກກິລາຜູ່ໃໝ່ເປັນເປົ້າໝາຍ. ໃນນັກກິລາ 71 ຄົນທີ່ເຂົ້າຮ່ວມງານແຂ່ງຂັນຊິງຊະນະເລີດໂລກເທື່ອນີ້, ນັກກິລາທີ່ເຂົ້າຮ່ວມເປັນຄັ້ງທຳອິດໄດ້ກວມ 53%, ຕໍ່ເລື່ອງນີ້, ທ່ານລີຮວາ ຫົວໜ້າສູນລອຍນ້ຳກົມໃຫຍ່ກິລາແຫ່ງຊາດຈີນເວົ້າວ່າ: ໃນງານແຂ່ງຂັນລອຍນ້ຳຊິງຊະນະເລີດໂລກເທື່ອນີ້, ພວກຂ້າພະເຈົ້າຖືການຝຶກແອບນັກກິລາ ແຂ່ງຂັນກັບທີມເກັ່ງ ທ້ອນໂຮມບົດຮຽນເພື່ອງານກິລາໂອລິມປິກປັກກິ່ງເປັນເປົ້າໝາຍອັນດັບໜຶ່ງ.
ທ່ານລີຮວາຍັງກ່າວວ່າ, ໃນຂະນະທີ່ຝຶກແອບນັກກິລາເພື່ອງານກິລາໂອລິມປິກປັກກິ່ງນັ້ນ, ຄະນະນັກກິລາຈີນກໍຈະອອກແຮງຊິງເອົາຫຼຽນຄຳໃນປະເພດໂດດນ້ຳເຊິ່ງແມ່ນລາຍການທ່າແຮງແລະບາງລາຍການຂອງປະເພດລອຍນ້ຳ.
ໃນໝູ່ນັກກິລາຈີນທີ່ເຂົ້າຮ່ວມງານແຂ່ງຂັນຊິງຊະນະເລີດໂລກເຫຼົ່ານັ້ນ, ບໍ່ຕ້ອງສົງໄສເລີຍວ່າ ນາງໂລເຊຈວນ ແຊມປຽນລອຍແບບກົບ 100 ແມັດງານກິລາໂອລິມປິກອາແຕນແມ່ນນັກກິລາທີ່ມີຊື່ສຽງດົ່ງດັງທີ່ສຸດ, ແລະກໍ່ແມ່ນຄວາມຫວັງຊິງໄດ້ແຊມປຽນຂອງຄະນະນັກກິລາລອຍນ້ຳຈີນ. ໃນງານແຂ່ງຂັນຊິງຊະນະເລີດໂລກສອງຄັ້ງກ່ອນ, ນາງໂລເຊຈວນຊິງໄດ້ແຊມປຽນລອຍການລອຍ 50 ແມັດແລະລອຍ 100 ແມັດເພດຍິງ, ໃນງານແຂ່ງຂັນຊິງຊະນະເລີດໂລກເທື່ອນີ້ ນາງຈະຍາດແຍ່ງຊິງເອົາແຊມປຽນຄັ້ງທີສາມຢ່າງຕໍ່ເນື່ອງໃນສອງລາຍການດັ່ງກ່າວ.
ແຕ່ໃນເວລາຂຸ້ນຂ້ຽວກະກຽມງານແຂ່ງຂັນຊິງຊະນະເລີດໂລກ, ສະພາບສຸຂະພາບຂອງນາງໂລເຊຈວນໄດ້ພາໃຫ້ວົງການພາຍນອກສົນໃຈນຳ. ແຕ່ຕົ້ນປີມານີ້, ສຸຂະພາບຂອງນາງໂລເຊຈວນບໍ່ດີປານໃດໂດຍຕະຫຼອດ, ຫວ່າງບໍ່ດົນນີ້ ໄດ້ມີຂ່າວລາຍງານອີກວ່າ, ຫວ່າງມໍ່ໆນີ້ ສະມາຄົມລອຍນ້ຳຈີນໄດ້ຂໍນຳສະຫະພັນລອຍນ້ຳສາກົນ, ຫວັງອະນຸຍາດໃຫ້ນາງໂລເຊຈວນກິນຢາຊະນິດໜຶ່ງທີ່ມີສ່ວນປະສົມຂອງ "ຢາເກືອດຫ້າມ" ເພື່ອປິ່ນປົວພະຍາດ. ໂດຍແນໃສ່ບັນຫາທີ່ສື່ມວນຊົນສົນໃຈນຳເຫຼົ່ານີ້, ທ່ານຄູຝຶກຈ່າງຢ້າຕົງແຫ່ງທີມລອຍນ້ຳແຫ່ງຊາດຈີນ ຜູ່ຮັບຜິດຊອບຊີ້ນຳນາງໂລເຊຈວນໄດ້ໃຫ້ຄວາມກະຈ່າງແຈ້ງ. ທ່ານເວົ້າວ່າ: ຢາກິນທີ່ຮ້ອງຂໍໃຊ້ໃນການປິ່ນປົວນັ້ນ ບໍ່ແມ່ນກິນໃນຍາມທຳມະດາ, ຫາກແມ່ນກິນໃນເວລາປິ່ນປົວດ່ວນ, ຢ່າເຂົ້າໃຈວ່າໃນຍາມທຳມະດາກໍ່ກິນຢາປະເພດນີ້. ເວົ້າອີກດ້ານໜຶ່ງແລ້ວ, ຖ້ານາງໂລເຊຈວນກິນຢາເກືອດຫ້າມນີ້ ບໍ່ພຽງແຕ່ບໍ່ສາມາດເຮັດໃຫ້ລະດັບຂອງນາງຈະສູງຂຶ້ນ, ຫາກຍັງຈະມີຜົນຮ້າຍອີກຊ້ຳ. ຢາກະຕຸ້ນປະສາດແມ່ນແນໃສ່ລາຍການທີ່ຕ່າງກັນ, ຢາສະຫງົບປະສາດທີ່ນາງໂລເຊຈວນກິນນັ້ນ ເວົ້າສຳລັບນັກກິລາຍິງເປົ້າແລ້ວແມ່ນຢາກະຕຸ້ນປະສາດ, ແຕ່ເວົ້າສຳລັບນັກກິລາລອຍນ້ຳແລ້ວ ບໍ່ມີຜົນດີຫຍັງຕໍ່ການຍົກລະດັບ. ດຽວນີ້ ຮ່າງກາຍຂອງນາງໂລເຊຈວນແມ່ນດີຫຼາຍ, ນາງຝຶກແອບກໍ່ເປັນປົກກະຕິຢູ່.
ນອກຈາກລາຍການລອຍ 50 ແມັດແລະ 100 ແມັດຂອງນາງໂລເຊຈວນແລ້ວ, ໃນລາຍການລອຍແບບເສລີຕໍ່ແຮງ 4 ຄຸນ 200 ແມັດເພດຍິງ, ທີມຈີນກໍ່ມີຄວາມສາມາດຊິງເອົາແຊມປຽນໄດ້. ສ່ວນນັກກິລາເພດຊາຍ, ໃນລາຍການລອຍແບບແມງກະເບື້ອເພດຊາຍ 200 ແມັດງານກິລາໂອລິມປິກອາແຕນໃນປີກາຍ, ທ້າວອູເຜິງ ນັກກິລາໜຸ່ມຈີນເປັນທີ 6. ໃນງານແຂ່ງຂັນຊິງຊະນະເລີດໂລກເທື່ອນີ້, ເປົ້າໝາຍຂອງລາວແມ່ນພະຍາຍາມຍາດໄດ້ຜົນດີກວ່າເກົ່າອີກ.
ໃນໄລຍະດົນນານມານີ້, ທີມໂດດນ້ຳຈີນໄດ້ຢູ່ໃນທ່າແຮງໂດຍຕະຫຼອດບົນເວທີໂດດນ້ຳສາກົນ, ໃນງານກິລາໂອລິມປິກອາແຕນປີກາຍນີ້, ຫຼຽນຄຳຂອງລາຍການໂດດນ້ຳທັງໝົດມີ 8 ຫຼຽນ, ທີມໂດດນ້ຳຈີນກໍຊິງໄດ້ 6 ຫຼຽນ. ໃນງານແຂ່ງຂັນຊິງຊະນະເລີດໂລກເທື່ອນີ້, ທີມໂດດນ້ຳຈີນເລັງສາຍຕາໃສ່ງານກິລາໂອລິມປິກປັກກິ່ງປີ 2008, ຈຶ່ງໄດ້ແຕ່ງຄະນະນັກກິລາປະກອບດ້ວຍນັກກິລາເກົ່າປະສົມກັບນັກກິລາໜຸ່ມໄປເຂົ້າຮ່ວມການແຂ່ງຂັນເທື່ອນີ້.
ນາງໂຈ່ວຈີຫົງ ຫົວໜ້າທີມໂດດນ້ຳແຫ່ງຊາດຈີນແນະນຳວ່າ, ໃນປີທີສອງຫຼັງຈາກງານກິລາໂອລິມປິກ ມັກຈະເປັນໂອກາດດີຂອງກິລາໂດດນ້ຳຂອງບັນດາປະເທດທີ່ຝຶກແອບນັກກິລາໜຸ່ມ ທົດລອງລາຍການໂດດຄູ່, ສ່ວນທີມຈີນກໍ່ຄືກັນ. ໃນລາຍການໂດດຄູ່ຈາກແປ້ນສູງ 3 ແມັດເພດຍິງ, ຈີນຈະໃຫ້ນາງໂກຈິງຈິງ ແຊມປຽນງານກິລາໂອລິມປິກກັບນາງລີຖິງ ນັກກິລາໜຸ່ມປະກອບເປັນຄູ່ໜຶ່ງ. ໃນລາຍການໂດດຄູ່ຈາກແປ້ນສູງ 3 ແມັດເພດຊາຍ ກໍ່ແມ່ນທ້າວຫວັງຟົງ ນັກກິລາເກົ່າພາທ້າວເຫີຊົງ ນັກກິລາໜຸ່ມ. ສ່ວນສອງລາຍການໂດດຄູ່ຈາກແທ່ນສູງ 10 ແມັດປະເພດຍິງແລະປະເພດຊາຍ, ເປັນນັກກິລາໜຸ່ມເຂົ້າຮ່ວມໝົດ. ນາງໂຈ່ວຈີຫົງເວົ້າວ່າ: ຈາກງານແຂ່ງຂັນຊິງຊະນະເລີດໂລກໄປຮອດງານກິລາໂອລິມປິກປັກກິ່ງຍັງມີໄລຍະໜຶ່ງ, ວຽກງານຂອງພວກຂ້າພະເຈົ້າຕ້ອງຖືງານກິລາໂອລິມປິກເປັນເປົ້າໝາຍສຸດທ້າຍ, ໃນງານແຂ່ງຂັນຊິງຊະນະເລີດໂລກເທື່ອນີ້, ພວກຂ້າພະເຈົ້າບໍ່ພຽງແຕ່ຕ້ອງພະຍາຍາມຈົນສຸດຂີດ ເພື່ອຊິງໄດ້ຜົນງານດີທໍ່ນັ້ນ, ຍັງຕ້ອງເຮັດໃຫ້ນັກກິລາໜຸ່ມຂອງພວກຂ້າພະເຈົ້າໂປໂລຂຶ້ນອີກດ້ວຍ.
|
